Santiago 2:1-26

  • Maynir jiskʼachañasa yaqhar jachʼañchañas juchawa (1-13)

    • Munasiñajj Reyin jachʼa leyipawa (8)

  • “Janitejj luratanakajj utjkchejja, Diosar confiyañajj inamayakiwa” (14-26)

    • Demonionakajj creyipjjarakiwa, ajjsarañatsa khatatipjjarakiwa (19)

    • Abrahanajj Jehová Diosan amigopa satarakiwa (23)

2  Munat jilatanakaja, jumanakajj jachʼañchat Jesucristo Tatitusaru confiykasaw* mayninakar jachʼañchapjjtajja, yaqhanakarojj jiskʼachapjjaraktajja, ¿janich ukhamäki?  Kunapachatï tantachäwinakamar mä jaqejj lukʼananakaparus qori anillonakan uchantata wali suma isin mantani, ukat qʼañu isini mä pobre jaqejj mantaniraki ukhajja,  wali suma isini jaqerojj “aka suma lugarankir qonuñar qontʼasim” sasaw sapjjtajja. Pobre jaqerusti, “jumajj uka cheqar saytʼam” jan ukajj “oraqer jumajj qontʼam” sasaw sapjjaraktajja.  Ukham lurasajja, maynirojj jachʼañchapjjtawa maynirojj jiskʼachapjjaraktawa, jan wali amtampi juchañchir juezanakaruw tukupjjtajja, ¿janich ukhamäki?  Munat jilatanakaja, istʼapjjam. ¿Janit Diosajj khitinakatï akapachatak pobrëpki ukanakar ajlliskänjja? Jïsa, Diosaw jupanakarojj ajllïna, ukhamat Diosar confiyañan* qamirïpjjañapataki* ukhamarak jupar munasipki ukanakar arskäna uka Reino* katoqapjjañapataki.  Jumanakasti pobrerojj jiskʼachapjjtawa. ¿Janit qamir* jaqenakajj tʼaqesiyapktamjja, tribunalanakarus qatatipktamjja?  ¿Janit jupanakajj kawkïr suma suttejj jumanakajj apapkta uka suma suti contrajj jan wal parlapki?  Reyin jachʼa leyipasti qellqatarjamajj akham siwa: “Jaqe masimarojj juma kikparjam munasiñamawa” sasa, jumanakatï uk phoqapjjstajja sum lurasipktajja.  Jumanakatï mayninakar jachʼañchapjjsta, yaqhanakarojj jiskʼachapjjaraksta ukhajja, juchwa lurasipktajja, ley pʼakintirinakjam juchañchatäpjjaraktawa. 10  Maynitejj taqpach Ley phoqkasin Leyin mä mandamientop phoqañan pantjaschi ukhajja, taqpach Ley pʼakintaski. 11  Khititejj “janiw adulterio jucha* lurätati” siskäna ukajja, “janiw jaqe masimar jiwayätati” sasaw sarakïnjja. Ukhamajj jumatï adulterio jucha jan lurksta, ukampis jaqe masimar jiwaysta ukhajja, Ley pʼakintasktajja. 12  Jumanakajj libre sarnaqer markäpjjtawa, jumanakatak utjki uka leyirjam* juzgatäpjjätawa, ukhamajj ukarjam sarnaqapjjam, ukarjamarak parlapjjam. 13  Khititejj jan khuyaptʼayasirïki* ukajja, jan khuyaptʼayasis juzgatarakïniwa. Cheqpachansa juzgañat sipansa khuyapayasiñaw jilanki. 14  Jilatanaka, maynitejj Diosaruw nayajj confiyta* sasin saspa, ukampis luratanakapajj janirak utjkaspa ukhajja, ¿kuna walirakïspasti? Ukham confiyatapajj* janiw jupar salvkaspati, ¿janich ukhamäki? 15  Yaqhep jilatanakatï jan ukajj yaqhep kullakanakatï jan isinïpkchi, janirak mä urutakis manqʼañanakapajj utjkchi, 16  ukampis maynejj jumanak taypit jupanakar “sumak sarjjapjjam, juntʼukïpjjam, sum manqtʼasipjjarakim” sasin sischi, janirak kunatï cuerponakapatak wakiski ukanaksa churkchi ukhajja, ¿kunjamarak ukajj yanaptʼaspasti? 17  Ukhamarakiwa janitejj luratanakajj utjkchejja, Diosar confiyañajj* inamayakiwa.* 18  Ukampis maynejj akham saspawa: “Jumajj Diosar confiyirïtawa,* nayajj luräwinak luririrakïtwa. ¿Kunjamaraki jumajj jan suma luräwinak lurasajj Diosar confiyatam* uñachtʼayitasmasti? Nayajj luratanakajampiw Diosar confiyataj* uñachtʼayäma” sasa. 19  Jumajj mä sapa Diosan utjatap creytawa, ¿janich ukhamäki? Ukajj walikiwa. Demonionakas uk creyipjjarakiwa, jupar ajjsarañatsa* khatatipjjarakiwa. 20  Jan amuytʼasir jaqe, maynintejj jan kuna luräwinakapas utjkchejja, Diosar confiyatapajj* inamayakiwa, ¿uka toqet jukʼamp yatiñti munta? 21  Abrahán awkisajj Isaac yoqaparuw altaran sacrificiot loqtäna, ukatwa jupajj luräwinakap toqejj cheqapar sarnaqer jaqet uñjatänjja, ¿janich ukhamäki? 22  Jumajj yattawa, Abrahanan Diosar confiyatapajj* luräwinakapanwa qhan uñjasïna, Diosar confiyatapajj* luräwinakap taypirakiw perfector tukuyatäna. 23  Ukatjja aka qellqataw phoqasirakïna: “Abrahanajj Jehová* Diosaruw confiyäna,* ukatwa jupajj cheqapar sarnaqer jaqet uñjatäna”. Jupasti Jehová* Diosan amigopa satarakïnwa. 24  Jumanakajj amuyapjjtawa, mä jaqejja janiw Diosar confiyatap* laykukejj cheqapar sarnaqerit uñjatäkaniti, jan ukasti luräwinakap toqew cheqapar sarnaqer jaqet uñjatäni. 25  Kunapachatï Rahab prostituta* warmejj uñaqerinakar* sum katoqtʼasajj* yaqha thaknam khitjjäna uka qhepatjja, jupajj luräwinakap toqew cheqapar sarnaqerit uñjatänjja, ¿janich ukhamäki? 26  Cheqpachansa kunjamtï mä cuerpojj jan samananejj* jiwatäjjejja, ukhamarakiw Diosar confiyañajj* jan luräwinakanïki ukhajj jiwatäjje.

Qhanañchäwinaka

Jan ukajja, “iyawskasaw”.
Jan ukajja, “iyawsañan”.
Variante: “wali utjirinïpjjañapataki”.
Jan ukajja, “Gobierno”.
Variante: “wali qollqen”.
Ukasti casaratäkasin yaqhamp ikintasiña sañ muni.
Griego arunjja, “libre sarnaqañatak leyirjam”.
Variante: “jan khariptʼayasirïki”.
Jan ukajja, “iyawsta”.
Jan ukajja, “iyawsatapajj”.
Jan ukajja, “iyawsañajj”.
Griego arunjja, “jiwatawa”.
Jan ukajja, “iyawsirïtawa”.
Jan ukajja, “iyawsatam”.
Jan ukajja, “iyawsataj”.
Variante: “jiwtayasisajj”.
Jan ukajja, “iyawsatapajj”.
Jan ukajja, “iyawsatapajj”.
Jan ukajja, “iyawsatapajj”.
“Jehová” siski uka cheq aka Biblian diccionariopan liytʼäta.
Jan ukajja, “iyawsäna”.
“Jehová” siski uka cheq aka Biblian diccionariopan liytʼäta.
Jan ukajja, “iyawsatap”.
Ukasti chachanakampi qollqe layku ikintasir warmi sañ muni.
Griego arunjja, “khitanakar”.
Jan ukajja, “yanaptʼasajj”.
Jan ukajja, “jan espiritunejj”.
Jan ukajja, “iyawsañajj”.