Romanos 9:1-33

  • Israel markatwa Pablojj chuym wal usuyasi (1-5)

  • Abrahanan cheqpach wawanakapa (6-13)

  • Janiw khitis Diosarojj kutkataskaspati (14-26)

    • Jan sumäki uk apnaqañatak vaso, sumäki uk apnaqañatak vaso (22, 23)

  • Jiltʼapki ukanakakiw salvatäpjjani (27-29)

  • Israelajj lanktʼasiwa (30-33)

9  Criston arkiripjamajja, kunatï cheqäki ukwa nayajj parlaskta, janiw kʼariskti.* Kunjamtï concienciajajj* espíritu santomp* irpatäsin qhanañchkejja,  wali jachʼa llakiw nayan utjitu, janirakiw jachañas chuymajan tukuskiti.  Naya pachpaw jilanakaj laykojj Cristot jitheqtat mä maldisit jaqëñ munirista. Jïsa, khitinakatï parientenakajäpki,  mä arunjja khitinakatï israelitanakäpki ukanak layku. Jupanakaruw Diosajj wawanakapjam katoqäna, jachʼañcharakïna, jupanakampiw mä pacto* luräna, Leyisa Diosar serviñasa jupanakar churatänwa, jupanakaruw Diosajj promesanakap arsüna.  Jupanakajj nayra awkinakasat jutirïpjjewa, uka nayra awkinakatwa Cristojj jutarakïna. Diosajj wiñayatak jachʼañchatäpan, jupaw taqe kunjjarus munañanejja. Amén.*  Ukhamajj ¿Diosan arupajj janiw phoqaskiti sañäniti? Janiwa. Taqe khitinakatï Israelan wawanakapäpki ukanakajj janiw taqenejj cheqpach israelitäpkiti.  Jupanakajj Abrahanat jutirïpkchisa, janiw taqenejj Abrahanan wawanakapäpkiti. Qellqatanjja siwa: “Wawanakama satäpkani ukanakajj Isaacatwa jutani” sasa.  Ukhamajj janiw Abrahanan taqe wawanakapajj Diosan wawanakapäpkiti, antisas khitinakatï Diosan promesaparjam nasipki ukanakaw Abrahanan cheqpach wawanakapäpjje.  Diosan promesapajj akhamänwa: “Mara aka horasaruw nayajj jutäjja, ukapachatakejj Sarajj mä yoqall wawanïniwa” sasa. 10  Janiw ukakïkiti, Rebecajj Isaac nayra awkisatak ispa* wawanïñapäkäna ukhajja, ukhamarakiw Diosajj mä promesa arsüna. 11  Kunjamsa maynirojj ajllini ukjja, janïräkipanwa Diosajj amtjjäna, janiw jaqen luratanakaparjam uk amtkiti, jan ukasti khitirutï munki ukaruw Diosajj ajlli. Ukhamajj janïr uka ispa* wawanakajj nasipkäna, janirak kunatï walïki jan walïki ukanaks lurapkäna ukhajja, 12  akham sasaw Diosajj Rebecar säna: “Jilïristi sullkan esclavopäniwa” sasa. 13  Kunjamtï qellqatäkejja, Diosajj akham sänwa: “Jacoburojj munasiyätwa, Esaurojj uñisiyätwa” sasa. 14  Ukhamajj ¿kamsañänisa? ¿Diosajj janit cheqaparjam uñjirïki? ¡Janipuniw ukhamäkaspati! 15  Diosajj akham sasaw Moisesar säna: “Khitirutï nayajj khuyaptʼaykäjja* ukaruw khuyaptʼayäjja, khitirutï sinttʼasiñamp uñjkäjja ukaruw sinttʼasiñamp uñjarakëjja” sasa. 16  Ukhamajj janiw jaqen munañapatsa ni chʼamachasitapatsa ukajj luraskiti, jan ukasti kunjamtï khuyapayasir* Diosajj munki ukarjamaw ukajj lurasi. 17  Qellqatansti Diosajj akham sasaw Faraonar säna: “Aka laykuw nayajj jumar jakaysma, chʼamajajj juma taypi uñachtʼayasiñapataki ukhamarak sutijajj taqe aka oraqpachan yatiyasiñapataki” sasa. 18  Ukhamajj khitirutï jupajj khuyapayañ* munki ukaruw khuyapayi, khitinakatï qala chuymäñ munapki ukanakarojj janiw jarkʼkiti. 19  Ukhamarus jumajj akham sitätawa: “¿Janejjay khitis Diosan amtap contrajj saytʼkaspatejja? Ukhamajj ¿kunatsa Diosajj jaqenakar juchañchaskaki?” sasa. 20  ¿Jumajj khitïtas Diosar kutkatasiñataki? ¿Mä ñeqʼe vasojj “kunatsa akham lurista” sasajj luriripar saspati? 21  ¿Janit sañu lurirejj ñeqʼet kun lurañatakis munañanïki? ¿Janit jupajj kunatï sumäki uk apnaqañatak mä ñeqʼe vaso lurañatakisa, jan ukajj kunatï jan sumäki uk apnaqañatak mä ñeqʼe vaso lurañatakis munañanïki? 22  Diosajj jan wali jaqenakarojj colerasiñapsa chʼamapsa uñachtʼayaspawa, ukampis wali pacienciampiw jupanakar uñjäna. Kunatï jan sumäki uk apnaqañatak vasor uñtat jaqenakatakejj Diosajj wali coleratänwa, jupanakarojj jiwarayañas wakiskchïnjja, Diosajj wali pacienciampiw jupanakar uñjäna. 23  Ukhamatwa Diosajj kunja jachʼas jupajj uk uñachtʼayäna. Jïsa, khitinakatï khuyapayasiñamp* uñjatäpki, mä arunjja kunatï sumäki uk apnaqañatak vasor uñtatäpki ukanakaruw uñachtʼayäna. Diosarakiw jupanakar jachʼañchañatakejj janïräkipan wakichäna, 24  mä arunjja ukanakajj jiwasätanwa. Diosajj janiw judionak taypitaki jawskistuti, jan ukasti yaqha markanak taypitsa jawsarakistuwa. 25  Oseas qellqatanjja Diosajj akham siwa: “Kawkïrinakatejj jan markajäpki ukanakarojja ‘markaja’ sasaw säjja, jan munatäki ukarojja, ‘munata’ sasaw sarakëjja. 26  Kawkjantï ‘janiw jumanakajj markajäpktati’ sasin jupanakar sapkäna ukanjja, ‘jakkir Diosan wawanakapa’ satäpjjaniwa” sasa. 27  Ukhamarus Israelat parlkasajj akham sasaw Isaías profetajj arnaqasïna: “Israelan wawanakapajj qota chʼallar uñtatas waljäskpan, jiltʼirinakakiw salvatäpjjani. 28  Jehová* Diosaw aka oraqerojja, phoqatpacha jankʼaki juzgani”* sasa. 29  Isaías profetajj akham sasaw arsurakïna: “Janitï ejercitonakan Jehová* Diosapajj wawanak jaytkasapänjja, jiwasajj Sodoma, Gomorra markanakjamaw uñjasisäna” sasa. 30  Ukhamajj ¿kamsañänisa? Yaqha markankir jaqenakajj janiw cheqapar sarnaqañatak chʼamachasipkänti, ukhampachas Diosar confiyapjjatap* laykojj Dios nayraqatanjja cheqapar sarnaqerit uñjatäpjjänwa. 31  Kuntï leyejj siski ukarjamas Israelajj cheqapar sarnaqañatak chʼamachaskchïnjja, janiw jupanakajj ley phoqapkänti. 32  ¿Kunatsa ukhamänjja? Jupanakajj janiw Diosar confiyapjjatap* laykojj cheqap jaqet uñjatäñatak chʼamachasipkänti, jan ukasti luräwinakampiw cheqap jaqet uñjatäñ munapjjäna. Ukhamajj “lanktʼayir qalampiw” jupanakajj lanktʼapjjäna. 33  Qellqatanjja akham siwa: “Sionjjarojj mä lanktʼayir qalwa uchaskta, tinkuyir mä jachʼa qala. Khititï ukar confiykani* ukajja, janiw chuyma pʼakintat uñjaskaniti” sasa.

Qhanañchäwinaka

Variante: “llullaskti”.
“Conciencia” siski uka cheq aka Biblian diccionariopan liytʼäta.
Ukasti Diosan chʼamapa sañ muni.
Ukajj mä acuerdor mantaña sañ muni.
Jan ukajja, “Ukhamäpan”.
Variante: “gemelo”.
Variante: “gemelo”.
Variante: “khariptʼaykäjja”.
Variante: “khariptʼayasir”.
Variante: “khariptʼayañ”.
Variante: “khariptʼayasiñamp”.
“Jehová” siski uka cheq aka Biblian diccionariopan liytʼäta.
Griego arunjja, “tuktʼayasa jiskʼaptayas juzgani”.
“Jehová” siski uka cheq aka Biblian diccionariopan liytʼäta.
Jan ukajja, “iyawsapjjatap”.
Jan ukajja, “iyawsapjjatap”.
Jan ukajja, “iyawskani”.