Romanos 14:1-23

  • Jan maynit maynikamajj juzgasipjjamti (1-12)

  • Jan yaqhanakar lanktʼayapjjamti (13-18)

  • Sumankañ utjayki, mayachkaraki ukanak lurañatak chʼamachasipjjam (19-23)

14  Khititï Diosar confiyañan* aynachtʼatäki ukarojj munasiñamp katoqapjjam. Jupatï jumanakjam jan amuykchi ukhajja, jan juzgapjjamti.  Diosar confiyir* jaqejj taqe kun manqʼe, ukampis Diosar confiyañan* aynachtʼatäki uka jaqejj verduranakak manqʼe.  Khititï manqʼki ukajja, jan manqʼki ukarojj janiw jiskʼachañapäkiti. Khititï jan manqʼki ukajja, manqʼki ukarojj janiw juzgañapäkiti, Diosaw juparojj katoqe.  ¿Khitirakït jumasti yaqhan serviripar juzgañatakisti? Uka servirejj uywiripatakiw saytʼatäskisa tinkutäskisa. Cheqas jupajj saytʼatäskaniwa, Jehová* Diosaw juparojj saytʼatäskañapatak yanaptʼaspa.  Mä jaqetakejja mä urojj yaqha urut sipansa wali suma uñjatawa, yaqhatakisti taqe urunakas pachpakirakiwa. Sapa maynis kuntï amuyki ukatjja janipun pächaspanti.  Khititï mä uru wali sum uñjki ukajja, Jehová* Diosatakiw wali sum uñjaski. Khititï manqʼki ukajja, Jehová* Diosatakiw manqʼaski, Diosar yuspäratap layku. Khititï jan manqʼki ukajja, Jehová* Diosatakiw jan manqʼkiti, ukhampachas jupajj Diosaruw yuspäri.  Cheqas jiwas taypinjja janiw khitis jupa pachpatakikejj jakkiti, janirakiw khitis jupa pachpatakikejj jiwkiti.  Jiwasatï jakaskstanjja, Jehová* Diosatakiw jaktanjja, jiwasatï jiwstanjja, Jehová* Diosatakiw jiwtanjja. Ukhamajj jakañänis jiwañänisa Jehová* Diosanktanwa.  Cristojj ukatakiw jiwäna, jaktarakïna, ukhamat jupajj jiwatanakjjarusa jakirinakjjarusa munañanïñapataki. 10  ¿Kunatsa jilamar juchañchta? Jan ukajj ¿kunatsa jilamar jiskʼachta? Taqeniw kawkjantï Diosajj juzgañatak qontʼaski uka nayraqatankañäni. 11  Kunjamtï qellqatäkejja: “Jehová* Diosajj akham siwa: ‘Cheqpachapuniw nayajj jakaskta, taqe jaqenakaw nayraqatajan killptʼasipjjani,* kunayman aru parlirinakaw nayan Diosätaj qhan arsupjjani’ sasa”. 12  Ukhamajj sapa mayniw Diosarojj cuenta churañäni. 13  Ukhamajj jan jukʼampi maynit maynikamajj juzgasipjjañäniti. Antisas ak lurañatak chʼamachasiñäni: janipun mä jilatasan nayraqataparojj mä lanktʼayir qalsa jan ukajj kunatejj saranukuykaspa uksa uchañäniti. 14  Tatit Jesusan arkiripjamajj nayajj yattwa, creyiraktwa, janiw kunas qʼañükiti. Jan ukasti kunapachatï jaqejj mä kunarus qʼañurjam uñjki ukhakiw jupatakejj qʼañöjje. 15  Jilamatï manqʼatam layku chuyma ustʼatächejja, janiw munasiñarjam sarnaqjjtati. Jan jilamarojj manqʼatamamp jan walir puriyamti, Cristojj jupa laykuw jiwarakïna. 16  Ukhamajj janiy jaqenakajj suma luräwinakamat jan wal parlapjjpanti. 17  Diosan Reinopajj* janiw manqʼaña, umaña sañ munkiti, jan ukasti espíritu santon* yanaptʼapampi cheqapar sarnaqaña, sumankaña, kusisiña sañ muni. 18  Khititejj ukarjam Criston esclavopäki ukajja, Diosansa jaqenakansa suma uñjatarakiwa. 19  Ukhamajj kunanakatï mayninakamp sumankañataki ukhamarak maynit maynikam chʼamañchtʼasiñatak yanaptʼkistu ukanak lurañatakejj chʼamachasiskakiñäni. 20  Jan jukʼampi manqʼa laykojj Diosan luratap ina chʼusar tukuyapjjamti. Cheqansa taqe kunas qʼomawa, mä jaqejj manqʼatapampi yaqhanakar lanktʼasiyi ukhajja, janipuniw walïkiti. 21  Jukʼamp walïspaw jan aycha manqʼañajja, ni vino umañasa jan ukajj yaqhanak lurañasa, jilamatejj ukanak luratamat lanktʼaschi ukhajja. 22  Jumatï Diosar confiystajja,* ukham confiyatamjja* jumampi Diosampik yatpan. Maynitï amtataparjam lurchi, janirak jupa pachpajj juzgaskchi ukhajja, kusispan. 23  Ukampis jupatï pächaschi, manqʼarakchi ukhajja, niyaw juchañchatäjje, Diosar jan confiyas* manqʼatap layku. Cheqansa taqe kunatï Diosar jan confiyas* luraski ukajja, juchawa.

Qhanañchäwinaka

Jan ukajja, “iyawsañan”.
Jan ukajja, “iyawsir”.
Jan ukajja, “iyawsañan”.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
Variante: “killtʼasipjjani; qonqortʼasipjjani”.
Jan ukajja, “Gobiernopajj”.
Ukasti Diosan chʼamapa sañ muni.
Jan ukajja, “iyawsstajja”.
Jan ukajja, “iyawsatamjja”.
Jan ukajja, “jan iyawsas”.
Jan ukajja, “jan iyawsas”.