Mateo 8:1-34

  • Lepra usuni mä jaqeruw qollasi (1-4)

  • Ejerciton mä oficialapaw Diosar confiyi (5-13)

  • Jesusajj waljaniruw Capernaúm markan qolli (14-17)

  • Kunjamsa Jesusar arkañasa (18-22)

  • Jesusajj jachʼa thayaruw tʼakurayi (23-27)

  • Demonionakarojj khuchinakar mantapjjañapatakiw Jesusajj khiti (28-34)

8  Qollut saraqanjjäna uka qhepatjja, walja jaqenakaw jupar arkanipjjäna.  Ukatsti lepra usuni mä jaqew jupar jakʼachasïna, nayraqatapar altʼasisinsti akham sänwa: “Tata, munsta ukhajj qolltʼasitasmawa”* sasa.  Ukatwa jupajj amparampi loqjjatasin llamktʼäna, akham sasa: “Muntwa, qollatäjjam”* sasa. Ukatsti ukaratpachaw lepra usupat qollatäjjäna.*  Jesusajj akham sarakïnwa: “Janiw khitirus arsütati, jan ukasti sacerdotempi uñjayasir saram, kunjamtï Moisesajj siskäna ukarjam mä ofrenda loqtarakim, ukhamat sacerdotenakan yatipjjañapataki” sasa.  Capernaúm markar mantäna ukhajja, ejerciton mä oficialapaw jupan ukar jutasin ruwtʼasïna,  akham sasa: “Tata, servirijaw wali usuntat tʼaqesiski, janiw sartirjamäkiti, utan jaqontatäskiwa” sasa.  Jesusajj sarakïnwa: “Utamar jutä ukhaw qollarapïma” sasa.  Uk satasti akham sasaw ejerciton oficialajj jupar sarakïna: “Tata, janiw utajar jutañamajj wakiskaspati, janiw kuna suma jaqëktsa; mä aruksa qollasiñapataki arsüta ukhajja, servirijajj waliptjjaniwa.  Nayajj jilïrinakar katuyat jaqerakïtwa, soldadonaksa pʼeqtʼaraktwa. Maynir ‘¡saram!’ sista ukhajja, iyaw sasaw sari. Yaqhar ‘¡jutam!’ sista ukhasti, iyaw sasaw jutaraki. Esclavojar ‘¡uk luram!’ sista ukhasa lurarakiwa” sasa. 10  Uka arunak istʼasasti Jesusajj wal musparäna, arkirinakaparojj akham sänwa: “Cheqpachapuniw nayajj sapjjsma, jupjam taqe chuym Diosar confiyir* jaqejj janiw Israel markan utjkiti. 11  Nayasti sapjjsmawa, waljaniw inti jalsu toqetsa inti jalant toqetsa jutapjjani; jupanakajj alajjpachankir Reinonwa* Abrahanampi, Isaacampi, Jacobumpi mesan qontʼasipjjani. 12  Reinon* wawanakapasti, anqa chʼamakar jaqonukutaw uñjasipjjani; ukanwa jachapjjani, laka chʼakhanakapsa tʼurusipjjani” sasa. 13  Ukjjarusti Jesusajj akham sasaw ejerciton oficialapar säna: “Sarjjam, kunjamtï chuymaman Diosar confiykta* ukarjam jumatakejj phoqaspan” sasa. Uka jaqen serviripajj ukaratpachaw waliptjjäna. 14  Jesusajj Pedron utapar mantäna ukhajja, Pedron suegraparuw ikiñan jaqontat uñjäna, jupajj calenturampi wali usuntatänwa. 15  Jupar amparat llamktʼäna ukhajja, ukaratpachaw calenturajj saraqjjäna, sartasinjja jupar serviñ qalltarakïna. 16  Niya arumäjjäna ukhajja, demonionakan mantata walja jaqenakwa Jesusan ukar apanipjjäna. Jupasti mä arumpikiw uka demonionak alissüna, taqe tʼaqesirinakarus waliptayarakïnwa. 17  Ukhamat kuntï Isaías profetajj siskäna uka arunakan phoqasiñapataki, jupasti sänwa: “Jupaw usunakas chhaqtayjje, kunatï tʼaqesiykistu ukanaksa apasjjaraki” sasa. 18  Jesusajj walja jaqenakar jakʼapan uñjäna ukhajja, qota khurkatar makatapjjam sasaw arkirinakapar säna. 19  Ukatjja escribanakat maynïriw jupar jakʼachasïna, akham sasa: “Yatichiri, kawkirutï sarkäta ukaruw nayajj arkäma” sasa. 20  Jesusajj jupar sänwa: “Qamaqenakas putuniwa,* jamachʼinakas tapanirakiwa, ukampis jaqen Yoqapatakejj janiw kawkin iktʼañas utjkiti” sasa. 21  Discipulonakat maynejj jupar akham sarakïnwa: “Tata, awkijar imantiriw nayraqat sarañ munta” sasa. 22  Jesusasti juparojj sarakïnwa: “Jumajj nayar arkaskakita, jiwatanakajj jiwatanakapar imasipjjpan” sasa. 23  Uka qhepatjja mä botetwa Jesusampi discipulonakapampejj sarjjapjjäna. 24  Ukatsti mä jachʼa thayaw* qota taypin sartäna, oladanakas boter chhaqtayirjamaw phoqaranttäna. Ukampis Jesusajj ikiskänwa. 25  Jupan ukar sarasasti, akham sasaw arkirinakapajj sartayapjjäna: “¡Tata, salvapjjeta, jiwarañäniwa!” sasa. 26  Jupasti sarakïnwa: “Diosar jan taqe chuym confiyir* jaqenaka, ¿kunatsa ajjsarapjjta?”* sasa. Sartasinjja thayampir* qotampiruw toqenoqäna. Ukatsti taqe kunas sumakëjjänwa. 27  Jupanakasti wal musparapjjäna, akham sapjjarakïnwa: “¿Khitipunirakïpach aka jaqesti? Thayas* qotas istʼakirakisä” sasa. 28  Qota khurkatar saräna ukhajja, gadarenonakan lugaraparuw mantäna. Ukanjja, demonionakan mantat pä jaqew jupar jikjjatäna,* sepulturanak taypitwa jupanakajj mistunisipkäna. Wali ajjsarkañ* jaqenakäpjjänwa. Janirakiw khitis uka jakʼankir thaknam pasañ munkänti. 29  Jupanakajj akham sasaw arnaqasipjjäna: “Diosan Yoqapa, ¿kun luriris akar jutta? ¿Janïr tiempökipanti nanakar tʼaqesiyir jutta?” sasa. 30  Jupanakat jaya cheqanjja, walja khuchinakaw manqʼasipkäna. 31  Ukatwa uka demonionakajj akham sasin jupar ruwtʼasipjjäna: “Alissupjjetäta ukhajja, khä khuchinakar khitjjapjjeta” sasa. 32  Jupasti jupanakar sarakïnwa: “¡Sarapjjam!” sasa. Ukhamasti uka pä jaqet mistusajja, khuchinakaruw uka demonionakajj mantapjjäna. Khuchinakasti taqpachaniw mä barranco patjjat qotar chhukuntasajj uman jiwarapjjäna. 33  Ukatjja khuchi awatirinakajj jankʼakiw markar tʼijupjjäna,* purisajj taqe kunwa yatiyapjjäna, demonion mantat jaqenakatsa yatiyapjjarakïnwa. 34  Ukat markpachaw Jesusan ukar mistunipjjäna. Jupar uñjasasti uka cheqanakat yaqha lugarar sarjjañapatakiw ruwtʼapjjäna.

Qhanañchäwinaka

Griego arunjja, “qʼomachtʼasitasmawa”.
Griego arunjja, “qʼomachatäjjam”.
Griego arunjja, “qʼomachatäjjäna”.
Jan ukajja, “iyawsir”.
Jan ukajja, “Gobiernonwa”.
Jan ukajja, “Gobiernon”.
Jan ukajja, “iyawskta”.
Variante: “Zorronakas utaniwa”.
Variante: “wayraw”.
Jan ukajja, “iyawsir”.
Variante: “jiwtayasipjjta”.
Variante: “wayrampir”.
Variante: “Wayras”.
Variante: “jakjjatäna”.
Variante: “jiwtayaskañ; watskañ”.
Variante: “tanipjjäna”.