Mateo 26:1-75

  • Sacerdotenakajj Jesusar jiwayañatakiw amtapjje (1-5)

  • Suma qʼapkiri aceitempiw mä warmejj Jesusar warjjattʼi (6-13)

  • Qhep qhepa Pascua; Judasajj Jesusaruw aljanti (14-25)

  • Tatitun Cenapaw uttʼayasi (26-30)

  • Pedrojj Jesusar jan uñtʼiriw tukuni sasaw qhanañchasi (31-35)

  • Getsemaní lugaranwa Jesusajj oración luri (36-46)

  • Jesusaruw katuntapjje (47-56)

  • Sanedrinanwa Jesusar juchañchapjje (57-68)

  • Pedrojj Jesusar jan uñtʼiriw tuku (69-75)

26  Jesusajj taqe ukanak parlañ tukuyjjäna ukhajja, akham sasaw discipulonakapar säna:  “Jumanakajj yatipjjtawa, akat pä ururuw Pascuajj amtasini, lawar chʼakkatas* jiwayañatakiw jaqen Yoqapar katuntapjjani” sasa.  Ukatsti Caifás sat jachʼa jilïr sacerdoten patiopanwa jilïr sacerdotenakampi markankir jilïr irpirinakampejj* tantachasipjjäna,  Jesusar kʼarimp kʼarimpi* katuntañatakiw amtapjjäna, ukhamat jiwayañataki.  Jupanakajj sapjjarakïnwa: “Janiw fiestan katuntañajj walïkaspati, marka taypin chʼajjwañaw utjaspa” sasa.  Jesusajj Betania markan lepra usuni Simonan utapankaskäna ukhajja,  mä warmiw jupar jakʼachasïna, wali jila alani suma qʼapkiri* aceites mä alabastro* yurur aptʼasita. Ukatsti Jesusajj manqʼaskäna* ukhaw uka warmejj uka aceitemp jupar pʼeqet warjjattʼäna.  Uk uñjasasti discipulonakajj colerasipjjänwa, sapjjarakïnwa: “¿Kunatsa uka aceitejj inamay wartasi?  Ukajj walja qollqeruw aljasisapänjja, ukhamat pobrenakar churañataki” sasa. 10  Ukanak amuyasajja, Jesusajj akham sasaw jupanakar säna: “¿Kunatsa uka warmitak ukham parlapjjta? Kuntï jupajj naya layku lurki ukajja wali suma luräwiwa. 11  Pobrenakajj jumanakamp chikäskapuniwa, nayajj janiw wiñayatak jumanakampïkäti. 12  Uka suma qʼapkiri* aceitempi cuerpojar warjjattʼasajja, imjjapjjetani ukatakiw aka warmejj wakichaskitu. 13  Qhanakwa sapjjsma, kawkjanakantï aka suma yatiyäwinakajj oraqpachan yatiyaskani uka cheqanakanjja, aka warmin luratapajj yatiyasirakiniwa, jupat amtañataki” sasa. 14  Ukatsti tunka payan apostolonak taypitjja, Judas Iscariote satäki ukaw jilïr sacerdotenakan ukar saräna, 15  akham sasa: “Jesusar apjjaruyapjjerisma ukhajja, ¿kuns churapjjetasmajja?” sasa. Jupanakasti kimsa tunka qollqe churapjjäma sasaw sapjjäna. 16  Ukat uksaruw jupajj kunjamatsa Jesusar aljantaspa uk thaqäna. 17  Jan Levadurani Tʼantʼa Manqʼañ Fiestan nayrïr urupajj purinjjäna ukhajja, discipulonakaw Jesusan ukar jutapjjäna, akham sasa: “¿Pascua manqʼañatakejj kawkin wakichapjjañajsa munta?” sasa. 18  Jupasti sarakïnwa: “Markar sarapjjam, mayni jaqen ukaru, ukatsti akham sapjjarakïtawa: ‘Yatichirejj akham siwa: “Señalat tiempojj jakʼankjjewa, utamanwa discipulonakajampejj Pascua amtäjja” sasa’”. 19  Ukhamasti discipulonakajj Jesusan arunakaparjamaw lurapjjäna, kunatï wakiskäna ukanakwa Pascuatakejj wakichapjjarakïna. 20  Arumäjjäna ukhajja, tunka payani discipulonakampiw jupajj mesan qontʼatäskäna. 21  Manqʼasipkäna ukhajja, akham sänwa: “Qhanakwa sapjjsma, mayniw jumanak taypit aljantitani” sasa. 22  Uk istʼasajja jupanakajj wal llakisipjjäna, sapa mayniw akham sapjjarakïna: “Tata, ¿janejjay nayäktejja?” sasa. 23  Uk satasti jupajj akham sänwa: “Khititï nayamp chik plator tʼantʼa chilltaski ukaw aljantitani. 24  Cheqansa jaqen Yoqapajj sarjjaniwa, kunjamtï jupat qellqatäki ukhama. Jaqen Yoqapar aljantir jaqejj ¡ay kamachkakini! Jan naskasapän ukajj jupatak jukʼamp walïspänwa” sasa. 25  Ukjjarusti khititï aljantañampïskäna uka Judasarakiw akham säna: “Rabí,* ¿janejjay nayäktejja?” sasa. Jesusasti juparojj sarakïnwa: “Juma pachpaw sasktajja” sasa. 26  Manqʼasipkäna ukhaw Jesusajj mä tʼantʼa irtäna, mä oración lurasaw pachjarakïna. Ukatsti akham sasaw discipulonakar churäna: “Aka tʼantʼa manqʼapjjam, akajj cuerpoj sañ muni” sasa. 27  Ukatsti mä copa astasaw Diosar yuspäräna, ukatjja akham sasaw jupanakar churäna: “Taqenis akat umtʼapjjam, 28  akajj nayan wilaja sañ muni, uka ‘wilajampiw mä pactor* mantasini’, walja jaqenak laykuw wartasirakini, ukhamat juchanak perdonasiñapataki. 29  Nayajj sapjjsmawa, akat uksarojj janiw mayampis vino umtʼjjäti, kunürutï Awkijan Reinopan* jumanakampi machaq vino umtʼkä ukapachkama” sasa. 30  Ukjjarusti cantonakampi* Diosar jachʼañchañ tukuyasajj Olivos Qolluruw makatapjjäna. 31  Ukatjja akham sasaw Jesusajj jupanakar säna: “Aka arumajja, taqpachaniw jumanakajj nayar jaytjapjjetäta. Qellqatansti akham siwa: ‘Awatirirojj jiwayäwa, ukatsti tamapankir ovejanakajj ananukutäniwa’ sasa. 32  Ukampis jiwatat jaktayatäjjä* uka qhepatjja, jumanak nayraw Galilear saräjja” sasa. 33  Ukatwa Pedrojj jupar akham säna: “Taqenis jumar jaytapkchïtamjja, ¡janipuniw kunäkipansa nayajj jaytjkämati!” sasa. 34  Jesusasti sarakïnwa: “Qhanakwa sissma, janïr wallpajj artʼkani ukhaw jichha arumajj kimsa kuti nayar jan uñtʼir tuküta” sasa. 35  Pedrosti sarakïnwa: “Jumamp chik jiwañ wakischini ukhasa, janipuniw nayajj kunäkipansa jumar jan uñtʼirejj tukkäti” sasa. Mayni discipulonakas uka pachpwa sapjjarakïna. 36  Jesusasti Getsemaní sat lugararuw discipulonakamp chik saräna, ukatjja sarakïnwa: “Akawjar qontʼasipjjam, nayajj khä cheqaruw oración lurir saräjja” sasa. 37  Ukatjja Pedrompiru Zebedeon pä yoqapampiruw irpjjaruwayäna, ukatsti walpun llakisïna, chuymapansa wal tʼaqesirakïna. 38  Jupanakarojj sarakïnwa: “Nayajj wali llaktʼatapunïtwa,* jumanakajj aka cheqar quedasipjjam, nayamp chik uñnaqapjjam” sasa. 39  Ukatsti nayrar mä jukʼa sartasaw killptʼasïna,* oraqer alintasaw akham sas mayisïna: “Awkijay, wakischi ukhajja, aka copa nayat apaqtʼita, ukampis jan nayajj munkta ukham luraspanti, jan ukasti kunjamtï jumajj munkta ukham luraspan” sasa. 40  Discipulonakan ukar kuttʼanisajja, ikiraskirwa jupanakar katjäna, Pedrorojj akham sänwa: “¿Janit mä horakis nayamp chik uñnaqapkasma? 41  Amuyasipjjapunim, oracionsa jan jaytas lurasipkakim, ukhamat jan juchar puriñataki. Chuymajj qhawqsa lurañ munaskiwa, ukampis jañchejj janiw chʼamanïkiti” sasa. 42  Payïr kutin saräna ukhajja, akham sasaw mayisirakïna: “Awkijay, aka copat umtʼañajajj wakisipunchi ukhajja, juman munañamajj luraspan” sasa. 43  Mayamp kuttʼasajja, ikiraskirwa katjarakïna, jupanakajj ikin atipjataw ikirjjapjjäna. 44  Jupanakar jaytasasti, mayampiw oración lurir kuttʼäna, ukampejj kimsa kutiw pachpa arunakamp mayisir sarjjäna. 45  Ukatjja discipulonakan ukar kuttʼasajj akham sasaw jupanakar säna: “¡Janiw jichhajj ikiñ horasäkiti, ni samarañ horasäkisa! Jaqen Yoqapajj jucharar jaqenakan amparapar apjjaruyatäñapäki uka horasajj purinjjewa. 46  Sartapjjam, jin sarjjapjjañäni, nayar aljantirejj jakʼankjjewa” sasa. 47  Jupajj ukanak parlaskäna ukhaw Judasajj purinïna, jupajj tunka payan apostolonakat maynïrïnwa. Jupamp chikajj walja jaqenakaw espadas aptʼasita, lawas aytʼasita jutapjjäna. Jupanakarojj jilïr sacerdotenakampi markankir jilïr irpirinakampiw* khitanipjjäna. 48  Aljantirejj akham sasaw jupanakar mä señal churatayna: “Khitirutï jampʼattʼkäjja ukawa, juparuw katuntapjjäta” sasa. 49  Ukatjja akham sasaw Jesusar cheqaki makatäna: “Rabí,* kamisaraki” sasa, ukatjja munasiñampiw jampʼattʼäna. 50  Jesusasti juparojj sarakïnwa: “Amigo, ¿kuna amtampis akar jutta?” sasa. Ukhamaruw jaqenakajj nayrtʼasin Jesusar katuntapjjäna. 51  Ukatjja Jesusan arkirinakapat mayniw espadap apsusïna, uka espadampi jawqʼatatasaw jachʼa jilïr sacerdoten esclavopar jiñch thoqoqayäna. 52  Jesusasti jupar sarakïnwa: “Imañapar uka espadam imasim, espada aytirejj espadampi jiwayataw uñjasini. 53  Nayatï munirista ukhajja, ¿janit Awkijarojj anchhitpach waranq waranqa* angelanakat sipans jukʼamp maykiristjja? 54  Ukhamäspa ukhajja, ¿kunanaktï Qellqatanakajj siski ukanakajj kunjamarak phoqasispasti?” sasa. 55  Uka horasanjja, akham sasaw Jesusajj jaqenakar sarakïna: “¿Mä lunthatarjam katuntañatakit espadanakampi lawanakampi mistunipjjta? Sapüruw nayajj templon qontʼata yatichaskayätjja, ukampis janiw katuntapkistati. 56  Taqe ukanakasti profetanakajj qellqapkäna ukanakan phoqasiñapatakiw pasäna” sasa. Ukatsti jupar jaytjasajj taqeniw discipulonakajj sarjjapjjäna. 57  Jesusar katuntir jaqenakajja, Caifás sat jachʼa jilïr sacerdoten ukaruw apapjjäna, ukanjja escribanakampi jilïr irpirinakampiw* tantachasisipkäna. 58  Pedrojj jachʼa jilïr sacerdoten patiopar puriñkamaw jayat arkaskäna. Mantasasti kunanakas pasani ukanak uñjañatakejj utan servirinakamp chikaw qontʼasirakïna. 59  Jilïr sacerdotenakasa Sanedrinankir* taqe jaqenakasa Jesusar jiwayañatakiw kʼari* testimonio thaqasipkäna. 60  Walja kʼari* testigonakas purinkchïnjja, janiw kuns jikjjatapkänti.* Qhepatjja paniniw purinipjjarakïna, 61  akham sasa: “Aka jaqejja, ‘Diosan templop allinukusajj* kimsürutwa saytʼayirista’ sasaw parli” sasa. 62  Uk istʼasasti saythapisaw jachʼa jilïr sacerdotejj Jesusar akham sasin jisktʼäna:* “¿Janit kuns kamskäta? ¿Kuns uka jaqenakajj juma contra parlasipki?” sasa. 63  Jesusajj amukïskänwa, ukatwa jachʼa jilïr sacerdotejj jupar akham säna: “¡Jakkir Diosan sutipjjar juramentompi sapjjeta, ¿jumätati Diosan Yoqap Cristojja?!” sasa. 64  Jesusasti jupar sarakïnwa: “Juma pachpaw uk sasktajja. Nayajj ak sapjjäma, jichhat uksarojja jumanakajj jaqen Yoqaparuw uñjapjjäta, khititejj taqe chʼamanïki ukan kupëjjapan qontʼata ukhamaraki alajjpachankir qenayanak* patjjan jutaskiri” sasa. 65  Uk istʼasasti jachʼa jilïr sacerdotejj patjja isinakapwa chʼiyanoqasïna, sarakïnwa: “¡Dios contraw aka jaqejj jan wal parli! ¿Kunataraki yaqha testigonak munaskañänisti? ¡Uñjapjjam! Jumanak pachpaw Dios contra jan wal parlir istʼasipktajja, 66  ¿kamsapjjasmasa?” sasa. Jupanakasti sapjjarakïnwa: “Jiwañapawa” sasa. 67  Ukatjja ajanut thuskatapjjäna, chʼakuntapjjarakïnwa. Yaqhanakasti ajanut tʼajjllintapjjarakïna, 68  akham sasa: “Cristo, jumatï profetästajja, khitis nuwtam uk sapjjeta” sasa. 69  Pedrosti pation qontʼatäskänwa, ukhamaruw mä sirvienta tawaqojj jupar jakʼachasïna, akham sasa: “Jumajj Galileankir Jesusamp chik sarnaqerïtawa” sasa. 70  Ukampis jupajja jan uñtʼiriw jaqenak nayraqatan tuküna, sarakïnwa: “Kunpun jumajj parlasksta, janiw yatkti” sasa. 71  Jupajj sawan punkur saräna ukhajja, yaqha tawaqorakiw jupar uñjasajj uka jakʼankir jaqenakar akham säna: “Aka jaqejj Nazareno Jesusamp chikaw sarnaqaskäna” sasa. 72  Ukampis mayampiw jupajj jan uñtʼir tuküna, juramentompiw akham sarakïna: “¡Janiw nayajj uka jaqer uñtʼkti!” sasa. 73  Mä jukʼampitjja, uka cheqan sayaskir jaqenakaw Pedror jakʼachasipjjarakïna, akham sasa: “Jumajj jupanakamp chik sarnaqerïskapuntawa, parlatamas* qhanäskarakisä” sasa. 74  Jupasti maldisiñwa qalltäna, juramentompiw akham sarakïna: “¡Janiw nayajj uka jaqer uñtʼkti!” sasa. Ukaratpachaw mä wallpajj artʼasïna. 75  Pedrosti kuntï Jesusajj siskäna uk amtasïna. Jesusajj sänwa: “Janïr wallpajj artʼkani ukhaw kimsa kuti nayar jan uñtʼir tuküta” sasa. Pedrosti anqar mistusaw chuymas kawkstʼat wal jachäna.

Qhanañchäwinaka

Variante: “kʼutkatas”.
Jan ukajja, “ancianonakampejj”.
Jan ukajja, “engañompi”.
Variante: “suma olorani”.
“Alabastro” siski uka cheq aka Biblian diccionariopan liytʼäta.
Jan ukajja, “mesan qontʼatäskäna”.
Variante: “suma olorani”.
Ukajj “Yatichiri” sañ muni.
Ukajj mä acuerdor mantaña sañ muni.
Jan ukajja, “Gobiernopan”.
Jan ukajja, “himnonakampi; salmonakampi”.
Griego arunjja, “sartayatäjjä”.
Jan ukajja, “Almajajj wali llaktʼatapuniwa”.
Variante: “killtʼasïna; qonqortʼasïna”.
Jan ukajja, “ancianonakampiw”.
Ukajj “Yatichiri” sañ muni.
Griego arunjja, “tunka payani legión”. “Legión” siski uka cheq aka Biblian diccionariopan liytʼäta.
Jan ukajja, “ancianonakampiw”.
“Sanedrín” siski uka cheq aka Biblian diccionariopan liytʼäta.
Variante: “llulla”.
Variante: “llulla”.
Variante: “jakipkänti”.
Variante: “allinoqasajj”.
Variante: “chhiktʼäna”.
Variante: “chʼiwi”.
Jan ukajja, “arunakamas”.