Mateo 20:1-34

  • Uvas yapun trabajirinakajj mä igualakwa pago katoqapjje (1-16)

  • Mayampiw Jesusan jiwäwipat janïräkipan qhanañchasi (17-19)

  • Yoqanakajar Reinoman qontʼayarapita sasaw Jesusar mayi (20-28)

    • Waljanir juchat kutsuyañatakiw Jesusajj jiwi (28)

  • Pä juykhu jaqenakaw qollatäpjje (29-34)

20  ”Alajjpachankir Reinojj* utani mä jaqemp sasiwa, jupasti yapu luririnak thaqeriw wali alwat mistüna, uvas yapupan trabajipjjañapataki.  Jornalatjja mä denario* pagapjjäma sasin jupanakamp mä amtar purisajja, uvas yapuparuw khitäna.  Niya llätunka alwa horasar* mayamp mistusajja, jan trabajoni jaqenakaruw qhatun sayaraskir uñjäna,  jupanakarojj akham sasaw säna: ‘Jumanakajj uvas yapur sarapjjarakim, qhawqhatejj pagasiñapäki uk churapjjäma’ sasa.  Ukatwa jupanakajj sarapjjäna. Utan jaqejj mayampwa niya chika ururu* ukhamaraki kimsa jaypʼu horasar* mistüna, ukatjja uka pachpwa lurarakïna.  Ukatsti mayampwa niya phesqa jaypʼu horasarojj* misturakïna, ukan sayaraskir yaqha jaqenakar jikjjatasajja* akham sänwa: ‘¿Kunatsa jumanakajj alwat jichhakam inak sayarasipkta?’ sasa.  Uk satasti jupanakajj sapjjarakïnwa: ‘Janiw khitis contratapkituti’ sasa. ‘Ukhamajj jumanakas uvas yapur sarapjjarakim’ sasaw jupajj säna.  ”Niya arumäjjäna ukhajja, uvas yapunejj akham sasaw mayordomopar säna: ‘Yapu luririnakar jawsanim, pagonakap churjjam, qhep purinki ukat qalltasajj nayraqat purinki ukaruw tukuyäta’ sasa.  Phesqa jaypʼu horasar purinir jaqenakajj jutapkäna ukhajja, sapa mayniw mä denario* katoqapjjäna. 10  Ukhamasti nayraqat purinir jaqenakajj jutapkäna ukhajja, jilpachwa katoqañäni sasaw sapjjäna, ukampis jupanakajj mä denariokwa* pagopat katoqapjjarakïna. 11  Ukatwa utan jaqetakejj arusiñ qalltapjjäna, 12  akham sasa: ‘Qhepak purinir jaqenakajj mä horakiw trabajipjje, nanakajj alwat jaypʼukamaw chʼam tukupjjta, lupins lupjataw trabajipjjta, ukhampachas jumajj nanakarjamaw jupanakar pagaraktajja’ sasa. 13  Ukampis jupajj akham sasaw maynirojj säna: ‘Amigo, janiw nayajj kuna jan wals lurksmati, mä denario* pagäma sarakis parltanjja, ¿janit amtaskta? 14  Pagom katoqasisin sarjjam. Nayaw qhep purinki ukarojj jumarjam churañ munta. 15  ¿Kunatï nayan utjkitu ukanakamp kun lurañas janit nayar waktʼkitu? Jan ukajj ¿suma* jaqëtaj laykojj envidiasistacha?’* sasa. 16  Ukhamarakiw qhepankirinakajj nayrankapjjani, nayrankirinakasti qhepankapjjarakiniwa”. 17  Jerusalén markar makatañampïsipkäna ukhajja, Jesusajj tunka payani discipulonakaruw jaqenak taypit yaqha cheqar irpäna, thak sarkasajj akham sasaw jupanakar säna: 18  “Jerusalén markaruw makatasktanjja, jaqen Yoqapajj jilïr sacerdotenakampiru escribanakampir katuyataw uñjasini. Jupanakaw jiwayañatak juchañchapjjani. 19  Ukatjja yaqha markankir jaqenakaruw katuyapjjani, jupat sawkasipjjañapataki, jawqʼjapjjañapataki ukhamarak mä lawar chʼakkatas* jiwayapjjañapataki. Ukampis kimsïr urunwa jupajj jaktayatäni”* sasa. 20  Ukatsti Zebedeon warmipaw Jesusar jakʼachasïna, pä yoqanakapamp chika, jupar ruwtʼasiñatakiw nayraqatapan altʼasïna. 21  Jesusasti sarakïnwa: “¿Kuns munta?” sasa. Uk satasti akham sasaw uka warmejj jupar säna: “Reinoman* apnaqjjäta ukhajja, aka pä yoqajaruy jumamp chik qontʼayarapita, maynirojj kupëjjamaru, maynirojj chʼeqäjjamaruraki” sasa. 22  Jesusasti sarakïnwa: “Kuntï mayipkta ukjja, janiw jumanakajj yatipktati. ¿Niya umtʼañampïskta uka copat jumanakajj umtʼapjjasmati?” sasa. “Jïsa, umtʼapjjeristwa” sasaw jupanakajj sapjjäna. 23  Jupasti saskakïnwa: “Cheqansa, jumanakajj uka copajat umtʼapjjätawa. Ukampis khitis nayamp chikajj kupëjjajaru jan ukajj chʼeqäjjajaru qontʼasini uk sañajj janiw nayar waktʼkituti. Jan ukasti Awkijaw khitinakas ukan qontʼasipjjani ukanakarojj ajllini” sasa. 24  Ukanak istʼasasti mayninakajj tunkanpachaw uka pä jila sullkatakejj wal colerasipjjäna. 25  Ukatwa Jesusajj jupanakar jawsasin akham säna: “Jumanakajj yatipjjtawa, marka apnaqerinakajj munañaparuw jaqenakar apnaqapjje, jachʼa jilïrinakas ukhamarakiw jupanakjjarojj wali munañanïpjje. 26  Ukampis jumanak taypinjj janiw ukhamäñapäkiti. Antisas khititejj jumanak taypin jilïrïñ munki ukajja, jumanakar serviñapawa. 27  Khititejj jumanak taypin nayrankañ munki ukajja, jumanakar mä esclavjam serviñaparakiwa. 28  Kunjamtï jaqen Yoqapajj servir jutkejj ukhama, jupajj janiw serviyasir jutkiti. Jupajj jakañap* churañatakiw juti, ukhamat waljanir juchat kutsuyañataki”.* 29  Jupanakajj Jericó markat mistusipkäna ukhajja, walja jaqenakaw jupar arkapjjäna. 30  Ukatsti pä juykhunakaw thaki jakʼan qontʼatäsipkäna, Jesusan uka cheq saraskatap istʼasajj akham sasaw jachʼat artʼapjjäna: “¡Tata, Davidan Yoqapa, nanakat khuyaptʼayasipjjeta!”* sasa. 31  Uk istʼasasti jaqenakajj amuktʼapjjam sasaw toqenoqapjjäna. Ukampis jupanakajj jukʼamp jachʼatwa artʼapjjäna, akham sasa: “¡Tata, Davidan Yoqapa, nanakat khuyaptʼayasipjjetaya!”* sasa. 32  Ukatwa Jesusajj ukawjar saytʼasin jupanakar jawsäna, sarakïnwa: “¿Kunsa nayajj jumanakatak lurirista?” sasa. 33  Jupanakasti sapjjarakïnwa: “Tata, uñjañwa munapjjta” sasa. 34  Jesusasti jupanakat wal sinteqtʼasïna, ukatwa nayranakapat llamktʼäna. Jupanakajj ukaratpachaw uñj-jjapjjäna. Ukatsti juparuw arkapjjarakïna.

Qhanañchäwinaka

Jan ukajja, “Gobiernojj”.
“Denario” siski uka cheq aka Biblian diccionariopan liytʼäta.
Griego arunjja, “niya kimsïr horasar”.
Griego arunjja, “niya sojjtïr horasaru”.
Griego arunjja, “niya llätunkïr horasar”.
Griego arunjja, “niya tunka mayanïr horasarojj”.
Variante: “jakjjatasajja”.
“Denario” siski uka cheq aka Biblian diccionariopan liytʼäta.
“Denario” siski uka cheq aka Biblian diccionariopan liytʼäta.
“Denario” siski uka cheq aka Biblian diccionariopan liytʼäta.
Jan ukajja, “khuyaptʼayasiri”.
Griego arunjja, “jan wali nayranïtacha”.
Variante: “kʼutkatas”.
Griego arunjja, “sartayatäni”.
Jan ukajja, “Gobiernoman”.
Jan ukajja, “almap”.
“Juchat kutsuyaña” siski uka cheq aka Biblian diccionariopan liytʼäta.
Variante: “khariptʼayasipjjeta”.
Variante: “khariptʼayasikimaya”.