Mateo 2:1-23

  • Yatirinakan Jesusar visitapjjatapa (1-12)

  • Egiptor sarjjapjjatapa (13-15)

  • Herodesan yoqall wawanakar jiwarayatapa (16-18)

  • Nazaretar kuttʼapjjatapa (19-23)

2  Jesusajja Judeankiri Belén markanwa nasïna, uka urunakanjja Herodesaw* reyjam apnaqaskäna. Ukapachaw warawaranak uñchʼukisin yatirinakajj inti jalsu toqet Jerusalenar purinipjjäna,  akham sasa: “¿Kawkinkisa judionakan reyipäkani uka wawajja? Inti jalsu toqenkkasaw jupan warawarap uñjapjjta, ukatwa nayraqatapar altʼasiri jutapjjta” sasa.  Uk istʼasinjja Herodes reyisa Jerusalenankiri taqe jaqenakasa wal ajjsarayasipjjäna.*  Reyejj taqpach jilïr sacerdotenakampiru escribanakampir jawsthapiyasajja, kawkinsa Cristojj* nasiñapäna uka toqet jupanakar jisktʼäna.*  Jupanakasti sapjjänwa: “Judeankiri Belén markanwa nasiñapäna, uksti akham sasaw Diosajj profetapar qellqayatayna:  ‘Jumasti, Judá oraqenkiri Belén marka, Judá oraqenkiri gobernadoranak taypinjja janiw añcha jiskʼäktati, jumatwa mä apnaqerejj mistuni, jupaw Israel markajarojj awatini’ sasa”.  Uk istʼasasti Herodesajj jamasatwa warawaranak uñchʼukisin yatirinakar jawsayäna, ukatsti kunapachas warawarajj uñstäna ukwa jupanakar jisktʼasajj* sum yatjjatäna.  Ukatjja Belén markaruw jupanakar khitäna, akham sasa: “Uka wawar sum thaqtir sarapjjam, jupar katj-jjasajj yatiyapjjetätawa, ukhamat nayraqatapar altʼasiri sarañajataki” sasa.  Reyir istʼasasti warawaranak uñchʼukisin yatirinakajj kawkirutï sarapjjañapäkäna uka thaknamaw sarjjapjjäna. Inti jalsu toqen uñjapkäna uka warawarajj jupanakan nayraqatap saräna, ukat kawkinkkäntï wawajj uka patjjaruw warawarajj saytʼäna. 10  Uka warawarar saytʼiri uñjasajja walpun kusisipjjäna. 11  Kunapachatï warawaranak uñchʼukisin yatirinakajj utar mantapjjäna ukhajja, wawajj María mamapampïskänwa, uk uñjasasti killptʼasisaw* nayraqatapar altʼasipjjäna. Ukatjja regalonakap apsusaw churapjjäna: qori, janqʼo incienso, mirra* ukanaka. 12  Diosajj Herodesan ukar jan kuttʼapjjañapatakiw uka yatirinakar mä samkan yatiyäna, ukatwa markaparojj yaqha thaknam sarjjapjjäna. 13  Sarjjapjjäna uka qhepatjja, Jehová* Diosan angelapaw Josear mä samkan uñstäna, akham sasa: “Sartam, wawampir mamapampir irpjjarusin Egiptor sarjjam, nayajj siskäma ukapachkam uka markankam; Herodes reyejj wawar jiwayañatakiw thaqani” sasa. 14  Sartasinsti arumpachaw Joseajj wawampir Mariampir irpjjarusajj Egiptor sarjjäna. 15  Herodesan jiwañapkamaw uka markan quedasïna. Ukhamat kuntï Jehová* Diosajj profetap toqejj siskatayna uka arunak phoqasiñapataki, jupajj akham sänwa: “Egiptotwa wawajar jawsanta” sasa. 16  Herodesajj warawaranak uñchʼukisin yatirinakan engañjatajja walpun colertʼasïna. Kuntï jupanakajj warawarat sapkäna ukarjam amuytʼasaw Herodesajj servirinakaparojj akham säna: “Belenankiri ukhamarak uka cheqanakan jakiri taqe yoqall wawanakar jiwarayir sarapjjam, pä maranit aynacharu” sasa. 17  Ukhamatwa kuntï Jeremías profetajj siskäna ukajj phoqasïna, jupasti akham sänwa: 18  “Ramá markanjja mä aruw istʼasi, Raquelaw wawanakapatjam jachaski, wal warariski, jan wawan uñjasitap laykojj janiw chuymachatäñsa munkiti” sasa. 19  Herodesajj jiwjjäna ukhajja, Jehová* Diosan angelapaw Josearojj Egipto markan mä samkan uñstäna, 20  akham sasa: “Sartam, wawampir mamapampir irpjjarusina Israel markar kuttʼjjam, wawar jiwayañ munirinakajj* jiwarjjapjjewa” sasa. 21  Uk satajja iyaw sasaw Joseajj sartasin wawampir Mariampir irpjjarusajj Israel oraqer kuttʼjjäna. 22  Herodes lantejja, Arquelao sat yoqapaw Judea markan apnaqaskäna. Uk istʼasasti Joseajj uka markar sarañ ajjsarayasïnwa.* Ukatjja Diosajj jan uksar saramti sasaw mä samkan sarakïna, ukatwa Galilea toqer sarjjäna. 23  Nazaret markar purisajj ukanwa jakarakïna, ukhamat kuntï profetanakajj sapkatayna ukanakan phoqasiñapataki. Jupanakasti akham sapjjänwa: “Juparojj Nazareno sasaw sapjjani” sasa.

Qhanañchäwinaka

“Herodes” siski uka cheq aka Biblian diccionariopan liytʼäta.
Variante: “jiwtayasipjjäna”.
Jan ukajja, “Mesiasajj; Ajllitajj”.
Variante: “chhiktʼäna”.
Variante: “chhiktʼasajj”.
Variante: “killtʼasisaw; qonqortʼasisaw”.
“Mirra” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
Griego arunjja, “wawan almap thaqerinakajj”.
Variante: “jiwtayasïnwa”.