Mateo 19:1-30

  • Casarasiñampita divorciasiñampita (1-9)

  • Soltero sarnaqañjjata (10-12)

  • Jesusajj wawanakaruw bendisi (13-15)

  • Mä qamir waynaw Jesusar jisktʼi (16-24)

  • Reino layku taqe kun jaytaña (25-30)

19  Ukanak parlañ tukuyasajja, Jesusajj Galileat sarjjasaw Judean qorpanakapar purïna, Jordán Jawir khurkataru.  Walja jaqenakaw jupar arkapjjäna. Uka cheqanwa jupanakar qollarakïna.  Ukatjja fariseonakaw jupar jakʼachasipjjäna, yantʼañ munasajj akham sasaw jisktʼapjjäna:* “¿Mä jaqejj kun utjipans warmipat divorciasispa ukhajj walikïspati?” sasa.  Uk satasti jupajj sarakïnwa: “¿Janit liytʼapkta? Khititejj qalltatpach jupanakar lurki ukajja, chacha warmi luräna.  Jupajj akham sänwa: ‘Ukatwa chachajj awkiparus taykaparus jaytjjani, ukatsti warmipampiw mayachasjjarakini, panipasti mä jañchikëjjapjjaniwa’ sasa.  Ukhamasti janiw paninëjjapjjeti, jan ukasti mä jañchikëjjapjjewa. Ukhamajj kuntï Diosajj mä yukur mayachki ukjja, jan khiti jaqes jaljtaypanti” sasa.  Jupanakajj jupar akham sapjjarakïnwa: “Ukhamajj ¿kunatsa Moisesajj warmir khitjjañatakejj divorcio papelaw churasiñapa sasin säna?” sasa.  Jesusasti sarakïnwa: “Jumanakajj qala chuymanïpjjtawa, ukatwa Moisesajj warmit divorciasiñ toqet ukham arsuwayäna, ukampis qalltanjja janiw ukhamäkänti.  Nayajj sapjjsmawa, khititejj jan qʼañu jucha* utjkipan warmipat divorciaski, ukatsti yaqhampi casaraski ukajja, adulterio juchwa* luri” sasa. 10  Discipulonakajj akham sapjjarakïnwa: “Mä chachatejj warmipamp ukham jakañapächi ukhajja, jukʼamp walïspawa jan casarasiñajja” sasa. 11  Jesusasti uk istʼasajj sarakïnwa: “Janiw taqenis ukarjam sarnaqañ amtanïpkiti, jan ukasti mä bendicionar uñtata ukham sarnaqañ katoqerinakakiw soltero sarnaqapjje. 12  Cheqans yaqhepajj eunucow* nasipjje, yaqhepasti jaqenakan eunucoptayatäpjjewa. Yaqhepajja alajjpachankir Reino* laykuw eunucöñ amtapjjaraki, khitinakatejj ukham sarnaqañ amtapki ukanakajja, ukham lurasipkakpan” sasa. 13  Ukatsti wawanakaruw jupan ukar irpanipjjäna, amparapamp loqjjatañapataki, oración lurañapataki. Ukampis discipulonakajj jupanakar toqenoqapjjänwa. 14  Ukatwa Jesusajj jupanakar akham säna: “Uka wawanakajj nayan ukar jutasipkpan, jan jarkʼapjjamti. Khitinakatejj aka wawanakjamäpki ukanakankiw alajjpachankir Reinojja”* sasa. 15  Amparampiw uka wawanakar loqjjatäna. Ukatjja uka cheqat sarjjänwa. 16  Maynirakiw jupar jakʼachasisajj akham säna: “Yatichiri, ¿wiñay jakañ katoqañatakejj kuna suma luräwinak lurañajas wakisi?” sasa. 17  Jupasti sarakïnwa: “¿Kunatsa sumanak toqet nayar jisktʼista?* Mayni sapakiw sumajj utji. Wiñay jakañ katoqañ munsta ukhajja, Diosan mandamientonakap phoqaskakim” sasa. 18  Uka jaqejj saskakïnwa: “¿Kawkïr mandamientonak phoqañajas wakisi?” sasa. Jesusasti juparojj sarakïnwa: “Janiw jaqe masimar jiwayätati, janiw adulterio jucha lurätati, janiw lunthatasïtati, janiw falso testigot saytʼätati, 19  awkimarus taykamarus respetam, jaqe masimarus juma kikparjam munasirakim” sasa. 20  Uka waynajj sarakïnwa: “Nayajj taqe ukanakwa phoqta. Ukhamajj ¿kunamp lurañajas wakisispa?” sasa. 21  Jesusasti juparojj saskakïnwa: “Jumatejj perfectöñ munsta ukhajja, kunatejj utjktam ukanak aljir saram, pobrenakar churanjjam, ukhamatwa alajjpachanjja suma imatanakamajj utjani. Ukatjja jutam, nayar arkita” sasa. 22  Uk istʼasasti uka waynajj wali llaktʼataw sarjjäna, walja utjirinïtap layku. 23  Jesusajj akham sasaw discipulonakapar säna: “Qhanakwa sapjjsma, mä qamir* jaqetakejj alajjpachankir Reinor* mantañajj wali chʼamäniwa. 24  Mayamp sapjjäma, mä camellotakis mä aguj nayra pasañajj faciläspawa, ukampis qamiritakejj* Diosan Reinopar* mantañajj jukʼamp chʼamäniwa” sasa. 25  Uk istʼasasti discipulonakajj walpun musparapjjäna, akham sapjjarakïnwa: “Ukhamajj ¿khitikipunis salvatäni?” sasa. 26  Jupanakar uñkatasajja akham sasaw Jesusajj säna: “Ukajj janiw kunjamatsa jaqenakatakejj luraskaspati, ukampis Diosatakejj taqe kunas lurasikispawa” sasa. 27  Uk satasti Pedrojj akham sasaw sarakïna: “Nanakajj taqe kun jaytasaw jumar arkapjjsma, ukhamajj ¿kunas nanakatakejj utjani?” sasa. 28  Jesusasti jupanakar sarakïnwa: “Qhanakwa sapjjsma, taqe kunas machaqat luraskani, jaqen Yoqapas kʼajkir jachʼa tronopan qontʼaskani ukhajja, jumanakajj tunka payani trononakaruw qontʼasipjjäta, nayar arkapjjatam layku. Israelankir tunka payani tribunakaruw juzgapjjarakïta. 29  Khititejj nayan sutij layku utanaksa, jilanaksa, kullakanaksa, awksa, tayksa, wawanaksa, oraqenaksa jaytki ukajja, taqe ukanakat sipansa patak ukhampi katoqani, wiñay jakañsa katoqarakiniwa. 30  ”Nayrankirinakatjja waljaniw qhepankapjjani, qhepankirinakasti nayrankapjjarakiniwa.

Qhanañchäwinaka

Variante: “chhiktʼapjjäna”.
“Qʼañu jucha” siski uka cheq aka Biblian diccionariopan liytʼäta.
Ukasti casaratäkasin yaqhamp ikintasiña sañ muni.
“Eunuco” siski uka cheq aka Biblian diccionariopan liytʼäta.
Jan ukajja, “Gobierno”.
Jan ukajja, “Gobiernojja”.
Variante: “chhiktʼista”.
Variante: “wali utjirini”.
Jan ukajja, “Gobiernor”.
Variante: “wali utjirinitakejj”.
Jan ukajja, “Gobiernopar”.