Mateo 12:1-50

  • Jesusajj “sábado urjjarojj Munañaniwa” (1-8)

  • Mä ampara wañaqat jaqeruw qollasi (9-14)

  • Diosan munat serviripa (15-21)

  • Jesusajj espíritu santompiw demonionakar alissu (22-30)

  • Jan perdonkay jucha (31, 32)

  • Achupatwa mä arbolarojj uñtʼasi (33-37)

  • Jonasan señalapa (38-42)

  • Demoniojj mayampiw mä jaqer manti (43-45)

  • Jesusan mamapampi jilanakapampi (46-50)

12  Mä kutejja Jesusajj discipulonakapamp chikaw sábado urun trigo yapunak taypi saraskäna. Discipulonakapajj manqʼatwa awtjayasipjjäna,* ukatwa trigo puyanak kʼichirasajj manqʼantapjjäna.  Uk uñjasajja fariseonakajj akham sasaw jupar sapjjäna: “¡Uñtam! Kunatï sábado urun jan lurasiñapäki ukwa discipulonakamajj lurasipki” sasa.  Jupasti sarakïnwa: “¿Kuntï Davidampi jaqenakapampejj manqʼat awtjatajj* lurapkäna uk janit liytʼapkta?  Jupajj Diosan utaparuw mantäna, jaqenakapamp chikarakiw Diosar loqtat tʼantʼanak manqʼantapjjäna. Janiw jupas ni mayninakas uk lurapjjañapäkänti, jan ukasti sacerdotenakakiw manqʼapjjañapäna.  ¿Janirakit Leyinsa liytʼapkta? Sacerdotenakajj templon sábado uru pʼakintasajj janiw juchañchatäpkiti.  Nayajj sapjjsmawa, khititejj templot sipansa jukʼamp jachʼäki ukaw akankaski.  Jumanakatejj ‘nayajj khuyapayasirïpjjañam* munta, janiw sacrificionak munkti’ siski uka arunak sum amuytʼapjjasamäna ukhajja, janiw jan juchaninakarojj juchañchapkasamänti.  Jaqen Yoqapasti sábado urjjarojj Munañaniwa” sasa.  Uka cheqat sartasinjja, jupanakan sinagogaparuw mantäna. 10  Ukansti ¡mä ampar wañaqat jaqew ukankaskäna! Ukatsti Jesusar juchañchañ munasaw yaqhepajj akham sasin jisktʼapjjäna:* “¿Sábado urun qollañajj walikïskiti?” sasa. 11  Jupasti sarakïnwa: “Jumanakatï mä ovejanïpjjasma, uka ovejajj sábado urun mä pʼiyar jalantaspa ukhajja, ¿janit jumanakat maynejj katthapisin wayskaspa? 12  Cheqansa mä jaqejja mä ovejat sipansa jukʼampi munatawa. Ukhamasti kunatejj walïki uk sábado urun lurañajj walikïskiwa” sasa. 13  Ukatwa usut jaqerojj akham säna: “Amparam loqatatam” sasa. Iyaw sasaw uka jaqejj loqatatäna, amparapasti mayni amparapjam walikëjjarakïnwa. 14  Ukampis fariseonakajj anqar mistusajja, jupar jiwayañatakiw amtapjjäna. 15  Uk yatisasti Jesusajj yaqha cheqaruw sarjjäna, waljanirakiw jupar arkapjjäna. Taqe usutanakaruw qollarakïna. 16  Ukatsti janipuniw khitirus nayjjat arsupjjätati sasaw jupanakar ewjjäna. 17  Ukhamat kuntï Isaías profetajj arskäna ukanakan phoqasiñapataki, jupajj akham sänwa: 18  “¡Jupaw nayan ajllit servirijajja, jupasti wali munatawa, nayajj wal jupat kusisirakta!* Juparuw espirituj churäjja, kunatejj cheqapäki ukwa markanakarojj qhanañcharakini. 19  Janiw chʼajjwkanisa ni jachʼatsa arnaqaskaniti, janirakiw arunakapas jachʼa thakinakan istʼaskaniti. 20  Taqe kunanakatï jan walïki ukanak sum askichañkamajja, janiw kuna pʼakit cañsa jukʼamp pʼakjkaniti, janirakiw jewqʼeskiri* micha pawilsa jiwaykaniti. 21  Cheqansa sutipjjaruw markanakajj suyapjjani” sasa. 22  Ukatsti demonion mantat mä jaqeruw irpanipjjäna, jupajj juykhünwa, amut jaqerakïnwa. Jesusajj jupar qolljjäna ukhajja, uka amut jaqejj parljjänwa, uñj-jjarakïnwa. 23  Jaqenakasti uk uñjasajj wal musparapjjäna, sapjjarakïnwa: “¿Janit aka jaqejj Davidan Yoqapäkpacha?” sasa. 24  Uk parlir istʼasajja, fariseonakajj akham sapjjänwa: “Aka jaqejj demonionakan Beelzebub* sat apnaqeripan chʼamapampiw demonionakar alissuski” sasa. 25  Amuyunakap yatisajja, Jesusajj akham sänwa: “Mä gobiernojj tʼaqjtasin jupanakpura chʼajjwapjje ukhajja, tukusiwa. Mä markasa jan ukajj mä familiasa tʼaqjtasin jupanakpura chʼajjwapjjani ukhajja, tukusipjjarakiniwa. 26  Ukhamarakiw pasaspa, Supayatejj* Supayar alissuspa ukhajja, jupa pachpaw tʼaqjtasin jupa contra saytʼasispa, gobiernopas tukusirakispawa. 27  Ukhamasti nayatejj Beelzebub satäki ukan chʼamapampi demonionakar alissta ukhajja, ¿khitin chʼamapampis wawanakamajj alissupjje? Ukatwa wawanakamajj jumanakjjar juezat saytʼapjjani. 28  Ukampis nayatejj Diosan espiritupampi demonionakar alissusksta ukhajja, jumanakajj Diosan Reinopampiw* katjayasipjjtajja. 29  ¿Kunjamatsa maynejj wali chʼaman jaqen utapar mantasajj utjirinakap qʼepsuspa? ¿Janit nayraqatajj uka jaqer ñachʼantañajj* wakiskaspa? Jïsa, ukhamatakwa maynejj uka jaqen utapat qʼepsuspa. 30  Khititejj jan nayampïki ukajj naya contrawa, khititejj nayamp chika jan apthapki ukajja, jukʼampikiw apatati. 31  ”Ukatpï jumanakar sapjjsmajja, kuna juchäskpansa jaqenakarojj perdonatakïniwa, jiskʼachir arunak parlañas perdonasirakiniwa, ukampis khititejj espíritu santo* contra jan wal parlki ukajja janiw perdonatäkaniti. 32  Amuytʼañataki, khititejj jaqen Yoqap contra parlki ukajja perdonatakïniwa, ukampis khititejj espíritu santo contra parlki ukajja janiw akapachansa* ni jutïrinsa perdonatäkaniti. 33  ”Jumanakatejj suma arboläpjjsta ukhajja, achunakamajj sumäniwa. Jumanakatejj jan suma arboläpjjsta ukhajja, achunakamajj janirakiw sumäkaniti. Mä arbolajj achupatwa uñtʼasi. 34  Asirun wawanakapa, ¿kunjamarak jumanakasti jan wali jaqëkasin sumanak parlapjjasmasti? Mä jaqejja, kunatï chuymapan phoqantatäki ukwa parlaraki. 35  Mä suma jaqejja, kunatï sumäki ukwa chuymapat apsuni, ukampis mä jan wali jaqejja kunatï jan walïki ukwa chuymapat apsuniraki. 36  Nayajj sapjjsmawa, jaqenakajja taqe jan wali parlatanakapatwa Juicio Urun Diosarojj cuenta churapjjani. 37  Ukhamajj arunakamarjamaw cheqap jaqet uñtʼayasïta, arunakamarjamaw juchañchatas uñjasirakïta” sasa. 38  Ukatsti akham sasaw yaqhep escribanakampi fariseonakampejj jupar sapjjarakïna: “Yatichiri, mä señal jumat uñjañ munapjjta” sasa. 39  Uk satasti jupajj sarakïnwa: “Diosat jitheqtir* aka tiempon jakir jan wali jaqenakajja, mä señal uñjañ munasipkakiwa. Ukampis janiw kuna señalsa uñjapkaniti, jan ukasti Jonás profetan señalapak uñjapjjani. 40  Kunjamtï Jonasajj kimsa urumpi kimsa arumampi mä jachʼa chawllan purakapankkänjja, ukhamarakiw jaqen Yoqapajj kimsa urumpi kimsa arumampi oraq manqhankani. 41  Nínive markankir jaqenakajja aka tiempon jakir jaqenakamp chikaw Juicio Urun sartanipjjani, jupanakaw aka jaqenakarojj juchañchapjjani. Jupanakasti kuntï Jonasajj yatiykäna uk istʼasajj arrepentisipjjänwa, ukampis khititï Jonasat sipansa jukʼamp jilïrïki ukaw akankaski. 42  Ukatsti aynach toqenkir reinaw aka tiempon jakir jaqenakamp chikajj Juicio Urun sartanini, juparakiw aka jaqenakarojj juchañchani. Jupajj Salomonan yatiñap istʼirejj oraq tukuyatpachwa jutäna, ukampis khititï Salomonat sipansa jukʼamp jilïrïki ukaw akankaski. 43  ”Mä demoniojj mä jaqet mistu ukhajja, mä samarañ lugar thaqasaw waña cheqanakan sarnaqaski, janirakiw kuns jikjjatkiti.* 44  Ukatjja sarakiwa: ‘Nayajj mistunkta uka utajar kuttʼjjä’ sasa. Kuttʼasajja suma pichthaptʼata, suma kʼachachtʼat chʼusa utarukiw puri. 45  Sarasinjja paqallq yaqha demonionakaruw irptasini, jupat sipansa jukʼamp jan walinaka. Mantasasti ukanwa jakapjjaraki. Uka jaqejj nayrat sipansa jukʼamp jan walinakanwa uñjasi. Uka pachparakiw aka tiempon jakir jan wali jaqenakampejj pasani”. 46  Jesusajj jaqenakar parlaskäna ukhajja, mamapampi jilanakapampiw anqan saytʼatäsipkäna, jupampiw parlañ munapjjarakïna. 47  Ukatjja mayniw jupar akham säna: “Mamamampi jilanakamampiw anqankasipki, jumampiw parlañ munapjje” sasa. 48  Uk satajja jupajj sarakïnwa: “¿Khitiraki mamajasti, khitinakaraki jilanakajasti?” sasa. 49  Ukatjja discipulonakap toqer ampar loqtasajj akham sarakïnwa: “¡Jupanakaw mamajasa jilanakajasa! 50  Khititejj alajjpachankir Awkijan munañap lurki ukaw jilajasa, kullakajasa, mamajasa” sasa.

Qhanañchäwinaka

Variante: “utjayasipjjäna”.
Variante: “utjatajj”.
Variante: “khariptʼayasirïpjjañam”.
Variante: “chhiktʼapjjäna”.
Jan ukajja, “almajajj wal jupat kusisiraki”.
Variante: “jeqʼeskiri”.
Uka arojja, Supayan yaqha sutipawa.
Griego arunjja, “Satanás”. Ukajj contra saytʼiri, kutkatasiri sañ muni.
Jan ukajja, “Gobiernopampiw”.
Variante: “chʼoqantañajj”.
Ukasti Diosan chʼamapa sañ muni.
“Akapacha” siski uka cheq aka Biblian diccionariopan liytʼäta.
Griego arunjja, “Adulterio jucha luriri”.
Variante: “jakkiti”.