Marcos 3:1-35

  • Mä ampar wañaqat jaqeruw qollasi (1-6)

  • Walja jaqenakaw qota thiyankapjje (7-12)

  • Tunka payan apostolonaka (13-19)

  • Espíritu santo contra parlañjjata (20-30)

  • Jesusan mamapampi jilanakapampi (31-35)

3  Mayampiw jupajj mä sinagogar mantäna. Ukanjja mä ampar wañaqat jaqew ukankaskäna.  Ukatsti uka jaqerojj sábado urun qollaniti janicha uk uñjañatakiw fariseonakajj Jesusar wal uñchʼukisipkäna, ukhamat jupar juchañchañataki.  Jupasti ampar wañaqat jaqerojj akham sänwa: “Sartam, chika taypir jutam” sasa.  Jaqenakarusti akham sarakïnwa: “¿Kunatï walïki, jan walïki ukanak sábado urun lurañajj walikïskiti, uka urun mä almar* salvañasa jan ukajj jiwayañas walikïskiti?” sasa. Jupanakajj janiw kamsapkänsa.  Jupar muyuntatäpkäna uka jaqenakarojj colerataw uñkatäna. Ukham qala chuymanïpjjatap yatisajj walpun llaktʼasirakïna. Ukatjja akham sasaw uka jaqer säna: “Amparam loqatatam” sasa. Uka jaqesti iyaw sasaw loqatatäna, amparapas walikëjjarakïnwa.  Ukanak uñjasasti fariseonakajj anqaruw mistupjjäna, jankʼakiw Herodesan arkirinakapamp tantachasisajj jupa contra parlakipapjjäna, ukhamat jupar jiwayañataki.  Jesusajj discipulonakapamp chikaw qota toqer sarjjäna, Galileatsa Judeatsa walja jaqenakaw jupar arkapjjäna.  Kunanaktï jupajj lurkäna ukanak istʼasasti, walja jaqenakaw jupan ukar jutapjjarakïna, Jerusalenata, Idumeata, Jordán Jawir khurkatata, Tiro ukhamarak Sidón toqenakatsa.  Ukatjja mä jiskʼa bote nayatak wakichapjjam sasaw discipulonakapar säna, ukhamat jaqenakajj jupar jan nukjapjjañapataki. 10  Niyakejjay jupajj walja jaqenakar qollchïnjja, usuntat jaqenakajj taqeniw jupar llamktʼañatakejj jakʼachasipjjäna. 11  Demonionakas sapa kutiw jupar uñjasajj killptʼasis* altʼasipjjäna, akham sasaw jachʼat arnaqasipjjäna: “Jumajj Diosan Yoqapätawa” sasa. 12  Jesusajj janipuniw khitirus nayjjat arsupjjätati sasaw uka demonionakar ewjjäna. 13  Ukatsti jupajj mä qolluruw makatäna, mä qhawqha discipulonakaparuw jawsayäna. Jupanakasti iyaw sasaw jupan ukar sarapjjarakïna. 14  Jupajj tunka payani chachanakaruw ajllïna,* apostolonaka sasaw jupanakar säna. Uka tunka payanisti, jupamp chikaw sarnaqapjjäna, jupanakaruw yatiyir sarapjjañapatak khitäna, 15  ukatjja demonionakar alissupjjañapatakiw chʼam churarakïna. 16  Jupan ajllita* tunka payani chachanakajj akanakänwa: Simón, juparojj Pedro sutimpiw apjjatarakïna. 17  Ukatjja Santiago, Juan, jupanakajj Zebedeon yoqanakapänwa (jupanakarojj Boanerges sutimpiw apjjatarakïna, ukajj “Qʼejjo Qʼejjon Wawanakapa” sañ muni). 18  Andrés, Felipe, Bartolomé, Mateo, Tomás, Santiago, jupasti Alfeon yoqapänwa; Tadeo, cananita* Simón, 19  Judas Iscariote, jupaw qhepatjja Jesusar aljantäna. Ukatjja Jesusajj mä utaruw mantäna. 20  Mayampiw jaqenakajj wal aywthapipjjäna, ukhamajj janiw manqʼasiñatakis jupanakan tiempojj utjkänti. 21  Familiaranakapajj ukanak istʼapjjäna ukhajja, jupar irptiriw jutapjjäna, akham sapjjarakïnwa: “Jupajj loqheratawa” sasa. 22  Jerusalenat saraqanir escribanakajj akham sasaw sapjjarakïna: “Beelzebub* satäki ukan mantatawa, demonionakan apnaqeripan chʼamapampiw demonionakar alissuraki” sasa. 23  Jupanakar jawsasasti, akham sasaw jupajj uñachtʼäwinakampi parläna: “¿Kunjamarak Supayasti,* Supayar alissuspasti? 24  Mä gobiernotï tʼaqjtasin jupa pachpa contra saytʼasispa ukhajja, tukusispawa. 25  Mä familiatï tʼaqjtasin jupanak pachpa contra saytʼasipjjaspa ukhajja, tukusipjjarakispawa. 26  Ukhamasti Supayatï* jupa pachpa contra saytʼasisin tʼaqjtaspa ukhajja, janiw saytʼatäkaspati, jan ukasti tukusispawa. 27  Cheqpachansa maynitejj wali chʼamani mä jaqen utapar mantasin lunthatsuñ munaspa ukhajja, nayraqatajj uka jaqer ñachʼantañapaw* wakisispa, ukhamatakwa uka jaqen utapat qʼepsuspa. 28  Qhanakwa sapjjsma, jaqenakarojj taqe kunas perdonatäniwa. Kuna juch lurapjjani ukhasa, kuna jan wali arunak parlapjjani ukhasa perdonatäniwa. 29  Khititï espíritu santo* contra jan wal parlki ukajja, janipuniw perdonatäkaniti. Jan ukasti wiñayatak juchañchatäniwa” sasa. 30  Uksti “jupajj demonion mantatawa” sapjjatap laykuw ukham säna. 31  Ukatjja Jesusan mamapampi jilanakapampiw jutapjjäna. Anqa toqer saytʼasisajja, maynir khitasaw jupar jawsayapjjäna. 32  Niyakejjay jaqenakajj jupar muyuntat qontʼatäsipkchïnjja, akham sasaw uka jaqenakajj jupar sapjjäna: “Mamamampi jilanakamampiw anqankasipki, jumaruw thaqasipktam” sasa. 33  Uk satasti jupajj sarakïnwa: “¿Khitis mamajas jilanakajasa?” sasa. 34  Khitinakatï jupar muyuntat qontʼatäsipkäna ukanakar uñtasajja, akham sasaw säna: “Uñtapjjam. ¡Jupanakaw mamajasa jilanakajasa! 35  Khititejj Diosan munañap lurki ukaw jilajasa, kullakajasa, mamajasa” sasa.

Qhanañchäwinaka

Jan ukajja, “jakäwir”.
Variante: “killtʼasis; qonqortʼasis”.
Jan ukajja, “uttʼayäna”.
Jan ukajja, “uttʼayata”.
Taqe kunsa taqe chuymaw lurtʼirïna, ukatwa juparojj “cananita” sapjjerïna.
Uka arojja, Supayan yaqha sutipawa.
Griego arunjja, “Satanás”. Ukajj contra saytʼiri, kutkatasiri sañ muni.
Griego arunjja, “Satanás”. Ukajj contra saytʼiri, kutkatasiri sañ muni.
Variante: “chʼoqantañapaw”.
Ukasti Diosan chʼamapa sañ muni.