Lucas 3:1-38

  • Juanajj lurañanakapwa qallti (1, 2)

  • Juanajj bautisasiñatwa yatiyi (3-20)

  • Jesusan bautisasitapa (21, 22)

  • Jesucriston nayra awkinakapa (23-38)

3  Tiberio Cesarajj* tunka phesqani maranak apnaqaskäna ukhajja, Poncio Pilatow Judean gobernadorat apnaqaskäna, Herodesajj* Galilea apnaqarakïna, Filipo jilapasti Iturea, Traconítide markanak apnaqaskäna, Lisanias chachajj Abilene marka apnaqaskarakïna.  Uka urunakanjja Anasampi Caifasampiw jilïr sacerdotëpjjäna. Ukapachaw Zacariasan Juan yoqapajj Diosan yatiyäwip wasaran katoqäna.  Ukatwa jupajj Jordán Jawir toqenkir taqe markanakar saräna, akham sasaw jaqenakar yatiyäna: “Bautisasipjjam, ukhamat arrepentisipjjatam uñachtʼayapjjañamataki, juchanakamatsa Diosajj perdonañapataki” sasa.  Kunjamtï Isaías profetan libropana qellqatäki ukhama, ukansti akham siwa: “Mayniw wasaran akham sas arnaqasiski: ‘¡Jehová* Diosan thakip wakichapjjam! Jupan thakip cheqaptayapjjam.  Taqe pʼiya lugaranakas laqʼamp phoqantatäñapawa, taqe qollunakasa lomanakasa pampachatäñapawa, qʼewi qʼewi thakinakas cheqaptayatäñapawa, jan sarnaqañjam thakinakas ukhamarakiw suma khuskhachatäñapa.  Kunjamsa Diosajj salvani ukjja, taqeniw uñjapjjani’ sasa”.  Jaqenakajj Juanamp bautisayasir jutapkäna ukhajja, akham sasaw jupajj uka jaqenakar säna: “Asirun wawanakapa, ¿khitis jumanakarojj Diosan colerasiñ urupat salvasipjjätaw sasin sapjjtamjja?  Ukhamasti jumanakatï arrepentisipjjstajja, luratanakampi uñachtʼayapjjam. Janiraki jumanakajj ‘Abrahanan wawanakapäpjjtwa’ sasajj chuymanakaman sapjjamti. Nayasti sapjjsmawa, Diosajj aka qalanakatjja Abrahanatak wawanak sartayaspawa.  Cheqpachansa hachajj arbolanakan saphip jakʼan aynoqatäjjewa. Jan suma achunak achoqer taqe arbolanakajj apsutäniwa, ninar jaqontatarakïniwa” sasa. 10  Jaqenakajj akham sasaw jupar jisktʼapjjäna:* “Ukhamajj ¿kun lurañas nanakan wakisi?” sasa. 11  Uk satasti jupajj akham sarakïnwa: “Khititï pä isinïki* ukajja, jan isinïki ukar may churpan, khititï manqʼanïki ukas ukham lurarakpan” sasa. 12  Impuesto cobririnakas ukhamarakiw bautisayasir jutapjjäna, akham sasaw jupar sapjjäna: “Yatichiri, ¿kun lurañas nanakan wakisi?” sasa. 13  Jupasti akham sarakïnwa: “Qhawqhatï impuestot cobrasiñapäki* ukat jukʼampjja jan mayipjjamti” sasa. 14  Soldadonakas akham sasaw jisktʼapjjarakïna:* “¿Kun lurañas nanakan wakisi?” sasa. Jupajj sarakïnwa: “Jan khitirus munkir jan munkir aparapjjamti, janiraki khitirus kʼarimp kʼarimpi* apaqapjjamti, jan ukasti kunatï jumanakar churatäki* ukampejj kusisitakïpjjam” sasa. 15  Jaqenakajj Cristoruw wal suyasipkäna, chuymanakapansa akham sasaw Juanat amuyapjjarakïna: “¿Jupäpachat Cristojja?” sasa. 16  Juanasti taqeniruw akham säna: “Nayasti jumanakarojj umampiw bautisapjjsma, ukampis nayjjar jutki ukajja, nayat sipansa jukʼamp chʼamaniwa, janiw wiskhupan* chinuñap jararañas nayar waktʼkituti. Jupajj espíritu santompi* ninampiw bautisapjjätam. 17  Khuyuñ lampajj amparapankjjewa, trigo jawqʼañ lugarap sum qʼomachañataki ukhamarak imañ utaparu trigo apthapiñataki. Trigon jipipjja jan jiwarkiri ninampiw phichantani” sasa. 18  Juanasti yaqhanakampitwa yaticharakïna, suma yatiyäwinakjja jaqenakar yatiyaskakïnwa. 19  Ukhamarus Galilea apnaqeri Herodesaruw Juanajj juchañchäna, jilapan Herodías warmip kawsa ukhamarak Herodesan taqe jan wali luratanakap kawsa. 20  Ukatwa Herodesajj Juanar carcelar llawintayäna, ukhamatwa yaqha jan wali luräwimpi apjjatasïna. 21  Taqe jaqenakajj bautisayasipkäna ukhajja, Jesusas bautisayasirakïnwa. Jupajj orasiskäna ukhajja, alajjpachaw jistʼartäna. 22  Ukatsti espíritu santow jupjjar saraqanïna, mä palomar uñtata. Mä aruw alajjpachat istʼasirakïna, akham siri: “Jumajj Wawajätawa, wali munatätawa, nayajj wal jumat kusista” sasa. 23  Jesusajj Diosan arunakap yatiyañ qalltäna ukhajja, niya kimsa tunka maranïnwa. Kunjamtï jaqenakajj sapkänjja,jupajj Josean yoqapänwa,Joseajj Helí chachan yoqapänwa, 24  Helí chachajj Matatan yoqapänwa,Matat chachajj Levin yoqapänwa,Leví chachajj Melquin yoqapänwa,Melquí chachajj Janaí chachan yoqapänwa,Janaiajj Josean yoqapänwa, 25  Joseajj Matatiasan yoqapänwa,Matatiasajj Amosan yoqapänwa,Amosajj Nahuman yoqapänwa,Nahumajj Eslí chachan yoqapänwa,Eslí chachajj Nagai chachan yoqapänwa, 26  Nagai chachajj Maatan yoqapänwa,Maatajj Matatiasan yoqapänwa,Matatiasajj Semeín chachan yoqapänwa,Semeín chachajj Josecan yoqapänwa,Josecajj Jodá chachan yoqapänwa, 27  Jodá chachajj Joanán chachan yoqapänwa,Joanán chachajj Resan yoqapänwa,Resajj Zorobabelan yoqapänwa,Zorobabelajj Sealtielan yoqapänwa,Sealtielajj Nerí chachan yoqapänwa, 28  Nerí chachajj Melquin yoqapänwa,Melquí chachajj Adí chachan yoqapänwa,Adí chachajj Cosam chachan yoqapänwa,Cosam chachajj Elmadaman yoqapänwa,Elmadamajj Er chachan yoqapänwa, 29  Er chachajj Jesusan yoqapänwa,Jesusajj Eliezer chachan yoqapänwa,Eliezerajj Joriman yoqapänwa,Jorimajj Matatan yoqapänwa,Matat chachajj Levin yoqapänwa, 30  Leví chachajj Simeonan yoqapänwa,Simeonajj Judasan yoqapänwa,Judasajj Josean yoqapänwa,Joseajj Jonaman yoqapänwa,Jonamajj Eliaquiman yoqapänwa, 31  Eliaquimajj Meleá chachan yoqapänwa,Meleá chachajj Menan yoqapänwa,Menajj Matatan yoqapänwa,Matatá chachajj Natanan yoqapänwa,Natanajj Davidan yoqapänwa, 32  Davidajj Jesé chachan yoqapänwa,Jesejj Obedan yoqapänwa,Obedajj Boazan yoqapänwa,Boazajj Salmonan yoqapänwa,Salmonajj Nahsón chachan yoqapänwa, 33  Nahsonajj Aminadaban yoqapänwa,Aminadabajj Arní chachan yoqapänwa,Arní chachajj Hezronan yoqapänwa,Hezronajj Perezan yoqapänwa,Perezajj Judá chachan yoqapänwa, 34  Judajj Jacobun yoqapänwa,Jacobojj Isaacan yoqapänwa,Isaacajj Abrahanan yoqapänwa,Abrahanajj Taren yoqapänwa,Tarejj Nacoran yoqapänwa, 35  Nacorajj Serug chachan yoqapänwa,Serug chachajj Reú chachan yoqapänwa,Reú chachajj Péleg chachan yoqapänwa,Péleg chachajj Eberan yoqapänwa,Eberajj Selah chachan yoqapänwa, 36  Selah chachajj Cainán chachan yoqapänwa,Cainán chachajj Arpaksadan yoqapänwa,Arpaksadajj Seman yoqapänwa,Semajj Noé chachan yoqapänwa,Noé chachajj Lamecan yoqapänwa, 37  Lamecajj Matusalenan yoqapänwa,Matusalenajj Enoc chachan yoqapänwa,Enocajj Jared chachan yoqapänwa,Jaredajj Mahalaleel chachan yoqapänwa,Mahalaleelajj Cainán chachan yoqapänwa, 38  Cainán chachajj Enosan yoqapänwa,Enosajj Set chachan yoqapänwa,Set chachajj Adanan yoqapänwa,Adanajj Diosan wawapänwa.

Qhanañchäwinaka

“César” siski uka cheq aka Biblian diccionariopan liytʼäta.
Jupasti Herodes Antipasänwa. “Herodes” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
Variante: “chhiktʼapjjäna”.
Jan ukajja, “yaqha isinïki”.
Jan ukajja, “Qhawqhatï impuestot apthapisiñapäki”.
Variante: “chhiktʼapjjarakïna”.
Variante: “llullamp llullampi”.
Jan ukajja, “pagaski”.
Variante: “jiskhupan”.
Ukasti Diosan chʼamapa sañ muni.