Lucas 18:1-43

  • Jan qarjtas mayir viuda warmit parlir uñachtʼäwi (1-8)

  • Fariseompita impuesto cobrir jaqempita (9-14)

  • Jesusampi wawanakampi (15-17)

  • Marka apnaqer qamir jaqen jisktʼatapa (18-30)

  • Mayampiw Jesusan jiwäwipat janïräkipan qhanañchasi (31-34)

  • Mayjasir juykhu jaqew uñj-jje (35-43)

18  Jupajj mä uñachtʼäwimpiw jupanakar parläna, ukampiw kunatsa jan qarjasa jan jaytasa oración lurañajj wakisi uka toqet parläna,  akham sasa: “Mä markanjja mä juezaw utjäna, jupajj Diosar janiw ajjsarkänti* ni jaqerus respetkänti.  Mä viuda warmiw uka markan utjarakïna, jupasti kutin kutiniw uka juezan ukar saräna, akham sasa: ‘Maynimpiw quejar puripjjta, leyinakarjamay cheqapar uñjita’ sasa.  Jupajj walja tiempow uka warmir jan yanaptʼañ munkänti. Qhepatjja jupajj akham sasaw chuymapan säna: ‘Janiw nayajj Diosarus ajjsarkti* ni khiti jaqerus respetkti,  ukampis aka viuda warmejj sapa kutiw akan colerayitu. Ukhamajj cheqapar uñjatäñapatak yanaptʼjjakï, ukhamat akar jan jukʼamp jutañapataki. Aka warmejj quejapampiw coleratsa jiwayjjetani’ sasa”.  Ukatsti akham sasaw Tatitojj säna: “Uka juezajj janis cheqapar uñjir jaqëkchïnjja, ¡kuntï jupajj siskän uk istʼapjjam!  Ukhamasti ¿janit Diosajj uruy aruma arnaqasir ajllitanakaparojj yanaptʼkani, ukhamat cheqapar uñjatäpjjañapataki? Ukhamarus Diosajj wali pacienciampiw jupanakarojj uñjaraki.  Nayasti sapjjsmawa: jupanakar cheqapar uñjasiñapatakejj jankʼakiw Diosajj yanaptʼani. Jaqen Yoqapajj purinkani ukhajja, ¿Diosar ukham confiyir* jaqenak oraqen jikjjataniti?”.*  Ukatsti khitinakatï cheqapar sarnaqer jaqëtwa sasin jupanak pachpar confiyasipki, yaqhanakarojj janis kunäpkaspa ukham uñjapki ukanakaruw mä uñachtʼäwimp parlarakïna, akham sasa: 10  “Pä chachanakaw oración lurirejj templor makatapjjäna, maynisti fariseo, maynejja impuesto cobriri. 11  Fariseojj saytʼasisaw akham sasin chuymapan mayisïna: ‘Diosay yuspärsmawa, janiw nayajj mayni jaqenakjamäkti. Jupanakajj lunthatasiri, jan cheqapar sarnaqeri, adulterio jucha* luriri ukhamäpjjewa, janirakiw ni aka impuesto cobrir jaqjamäktsa. 12  Nayajj semanan pä kutiw ayuntjja, kunanaktï jikjjatkta* ukanakatsa diezmo churaraktwa’ sasa. 13  Impuesto cobriristi jaya cheqanakwa saytʼasïna, janiw alajjpacharus uñtañ munkänti, jan ukasti akham sasaw chuym leqʼesïna: ‘Diosay khuyaptʼayasikitaya,* nayajj jucharar jaqëtwa’ sasa. 14  Nayajj sapjjsmawa, aka jaqejj uka fariseot sipansa Dios nayraqatan jukʼamp cheqapar uñjataw utapar sarjje. Khititï jachʼa jachʼa tukki ukajja jiskʼachatäniwa, khititï jiskʼar tukki ukajja jachʼar aptatäniwa”. 15  Ukatsti jaqenakajj jiskʼa wawanakaparuw jupan ukar apanipjjarakïna, amparapamp loqjjatañapataki. Uk uñjasajja discipulonakajj uka jaqenakar toqenoqapjjänwa. 16  Ukampis Jesusajj uka jiskʼa wawanakarojj jawsänwa, sarakïnwa: “Uka wawanakajj nayan ukar jutasipkpan, jan jarkʼapjjamti. Khitinakatejj aka wawanakjamäpki ukanakankiw Diosan Reinopajja.* 17  Qhanakwa sapjjsma, janitï maynejj Diosan Reinop* mä wawjam katoqki ukajja, janipuniw kunjamatsa ukar mantkaniti” sasa. 18  Ukjjarusti marka apnaqerinakat mayniw jupar jisktʼäna,* akham sasa: “Suma Yatichiri, ¿wiñay jakañ katoqañatakejj kun lurañajas wakisi?” sasa. 19  Jesusasti juparojj sarakïnwa: “¿Kunatsa suma Yatichiri sista? Janiw khiti jaqes sumäkaspati, jan ukasti Diosakiw sumajja. 20  Jumajj aka mandamientonak yatisktawa: ‘Janiw adulterio jucha lurätati, janiw jaqe masimar jiwayätati, janiw lunthatasïtati, janiw falso testigot saytʼätati, awkimarus taykamarus respetätawa’” sasa. 21  Uka jaqesti sarakïnwa: “Wawatpachwa nayajj taqe ukanak phoqaskta” sasa. 22  Uk istʼasasti Jesusajj akham sasaw jupar säna: “Ukampis ak phoqañaw juman wakisiraki, kunatejj utjktam taqe ukanak aljanim, uka qollqjja pobrenakar churanim, ukhamatwa alajjpachan suma imatanakamajj utjani. Ukatsti jutam, nayar arkita” sasa. 23  Ukanak istʼasasti uka jaqejj walpun llaktʼasïna, wali qamirïtap* layku. 24  Jesusasti jupar uñkatasajj akham sänwa: “¡Qollqeninakatakejj Diosan Reinopar* mantañajj kunja chʼamakïkani! 25  Cheqansa mä camellotakis chʼukuñ aguj nayra pasañajj faciläspawa, ukampis mä qamir* jaqetakejj Diosan Reinopar* mantañajj jukʼamp chʼamäniwa” sasa. 26  Uk istʼirinakajj sapjjarakïnwa: “Ukhamächi ukhajja, ¿khitipunirak salvatänisti?” sasa. 27  Jupasti sarakïnwa: “Jaqenakatakejj jan lurañjamäki ukanakajja, Diosatakejj lurasikispawa” sasa. 28  Pedrojj akham sänwa: “Kunanakatï utjapkitäna ukanak jaytasaw nanakajj jumar arkapjjsma” sasa. 29  Jupasti akham sasaw jupanakar sarakïna: “Qhanakwa sapjjsma, khititejj Diosan Reinop* laykojj utsa, warmsa, jilanaksa, awk tayksa, jan ukajj wawanaksa jaytki ukajja, 30  ukanakat sipansa jukʼamp walja jichha tiempon katoqani, jutir pachanjja wiñay jakañ katoqarakini” sasa. 31  Ukatsti tunka payan apostolonakaparuw jupajj yaqhawjar irpaqäna, sarakïnwa: “Jerusalén markaruw makatasktanjja, kunanakatï profetanak taypejj jaqen Yoqapat qellqaskäna ukanakajja, taqpachapuniw phoqasini. 32  Jupajj yaqha markankir jaqenakar katuyataw uñjasini. Jupatjja sawkasipjjaniwa, jiskʼachapjjaniwa, thuskatapjjarakiniwa. 33  Jawqʼjasinsti jiwayapjjaniwa, ukampis kimsïr urunwa jupajj jaktanini”* sasa. 34  Jupanakasti janiw ukanakat akchʼas amuyapkänti, jan ukasti uka arunakajj jupanakat imantatänwa, kunanaktï siskäna ukanaksa janirakiw amuyapkänti. 35  Jesusajj Jericó markar jakʼachasiskäna ukhajja, mä juykhu jaqew thaki jakʼan qontʼatäskäna, jupajj mayjasiskänwa. 36  Walja jaqenak pasaskir istʼasajja, kunas kamachi sasaw jisktʼasïna.* 37  Jupanakasti “¡Nazareno Jesusaw pasaski!” sasaw jupar yatiyapjjäna. 38  Ukatwa jupajj akham sasin jachʼat artʼasïna: “¡Jesús, Davidan Yoqapa, nayat khuyaptʼayasikitaya!”* sasa. 39  Nayraqat saririnakasti, amuktʼam sasaw toqepjjäna, ukhampachas jupajj jukʼamp jachʼatwa arnaqasïna: “¡Davidan Yoqapa, nayat khuyaptʼayasita!”* sasa. 40  Ukatwa Jesusajj sarkasin saytʼäna, uka jaqer irptanipjjam sasaw säna. Jakʼapar purinipansti akham sasaw Jesusajj jupar jisktʼäna:* 41  “¿Kunsa nayajj jumatak lurirista?” sasa. Jupajj sarakïnwa: “Tata, mayamp uñjañ munta” sasa. 42  Jesusasti jupar sarakïnwa: “Mayamp jichhajj uñj-jjam, Diosar confiyatam* laykojj walikëjjtawa” sasa. 43  Ukaratpachaw uka jaqejj mayamp uñj-jjäna, ukatjja Diosar jachʼañchasaw Jesusar arkäna. Ukanak uñjasasti, jaqenakas taqeniw Diosar jachʼañchapjjäna.

Qhanañchäwinaka

Variante: “Diosat janiw jiwtayaskänti”.
Variante: “Diosat jiwtayaskti”.
Jan ukajja, “iyawsir”.
Variante: “jakiniti”.
Ukasti casaratäkasin yaqhamp ikintasiña sañ muni.
Variante: “jakjjatkta”.
Variante: “khariptʼayasikitaya”.
Jan ukajja, “Gobiernopajja”.
Jan ukajja, “Gobiernop”.
Variante: “chhiktʼäna”.
Variante: “utjirinïtap”.
Jan ukajja, “Gobiernopar”.
Variante: “wali utjirin”.
Jan ukajja, “Gobiernopar”.
Jan ukajja, “Gobiernop”.
Griego arunjja, “sartanini”.
Variante: “chhiktʼasïna”.
Variante: “khariptʼayasikitaya”.
Variante: “khariptʼayasita”.
Variante: “chhiktʼäna”.
Jan ukajja, “iyawsatam”.