Lucas 15:1-32

  • Chhaqat ovejat parlir uñachtʼäwi (1-7)

  • Chhaqat dracma qollqet parlir uñachtʼäwi (8-10)

  • Utjirinakap tukuntir waynat parlir uñachtʼäwi (11-32)

15  Ukatsti impuesto cobririnakasa jucharar jaqenakas taqeniw jupan ukar sarasipkakïna, ukhamat jupar istʼañataki.  Fariseonakasa escribanakasa jupatakejj arusisipkakïnwa, akham sasa: “Aka jaqejj jucharar jaqenakaruw katoqasi, jupanakampiw manqʼaraki” sasa.  Ukatwa jupajj aka uñachtʼäwit jupanakar parläna, akham sasa:  “Jumanak taypit maynejj patak ovejanïspa, ukatjja mä ovej chhaqayasispa ukhajja, ¿janit llätunk tunka llätunkani* ovejanak wasarar jaytasajj chhaqat oveja jikjjatañkam* thaqerejj sarkaspa?  Jikjjatjje* ukhajja, kallachiparuw jupajj qʼepjjarusi, wal kusisiraki.  Utapar purisasti amigonakaparu utap jakʼan jakir jaqenakampiruw jawsthapiraki, akham sasa: ‘Nayamp chik kusisipjjam, chhaqatäkäns uka ovejajaruw jikjjatanta’* sasa.  Nayasti sapjjsmawa, mä jucharar jaqejj arrepentiski ukhajja, ukhamarakiw jukʼamp kusisiñajj alajjpachan utjani, llätunk tunka llätunkani* cheqapar sarnaqer jaqenakat sipansa. Uka cheqapar sarnaqer jaqenakan arrepentisipjjañapajj janiw wakiskiti.  ”Jan ukajj mä warmitï tunka dracma* qollqenïspa, ukatjja mä dracma chhaqayasispa ukhajja, ¿janit mä michachuwa* naktaykaspa, janit utap pichsusin uka qollq katjañkam wali amuyumpi thaqskaspa?  Uk katjasasti amiganakaparu, utap jakʼan jakir warminakampiruw jawsthapiraki, akham sasa: ‘Nayamp chik kusisipjjam, chhaqayaskta uka dracma* qollqe katj-jjtwa’ sasa. 10  Nayasti sapjjsmawa, mä jucharar jaqejj arrepentiski ukhajja, ukhamarakiw Diosan angelanakap taypin kusisiñajj utji”. 11  Ukatsti jupajj akham sarakïnwa: “Pä yoqani mä jaqew utjäna. 12  Sullkïrejj akham sasaw awkipar säna: ‘Awkiy, kunatï utjirinakamat nayar waktʼkitu ukay churjjeta’ sasa. Ukatwa awkejj utjirinakap jupanakar jalanoqjjäna. 13  Mä qhawqha urunak qhepatjja, sullkïr yoqajj taqe utjirinakap apthapisaw jaya markar sarjjäna. Ukatsti jan wal sarnaqasaw* uka markanjj utjirinakap tukjasïna. 14  Qʼal tukjasjjäna ukhajja, manqʼat pistʼañ machʼaw uka markan taqe cheqanakan utjarakïna, jupajj jan kunaniw uñjasïna. 15  Ukatwa uka markankir mä jaqen ukar saräna, jupampiw katoqayasirakïna. Uka jaqesti khuchinak awatiriw oraqepar khitäna. 16  Ukatsti khuchinakajj manqʼapki uka thajjonakampiw* jupajj wal sistʼasiñ munäna, janiw khitis juparojj kuns churkänti. 17  ”Jupajj amuytatasïna ukhajja, akham sänwa: ‘¡Awkijan trabajirinakapajj walja tʼantʼanïsipkiwa, nayajj manqʼatjamaw akan jiwaskta! 18  Ukhamajj jichhpachaw awkijan ukar sarjjä, juparojj sarakïwa: “Awkiy, Dios* contra ukhamarak juma contraw juchachasta. 19  Wawamätwa sañatakis janiw walïkti. Ukhamajj jumatak trabajir jaqëkiristsa ukhamak katoqasjjeta” sasa’. 20  Ukhamasti sartasinwa jupajj awkipan ukar sarjjäna. Awkipasti jayankkipanwa jupar uñjarakïna, walpun uka wawapat sinttʼasïna. Ukatwa jupamp jikisirejj* tʼijüna.* Wali munasiñampiw qhomantäna, jampʼattʼarakïna. 21  Ukatsti akham sasaw awkipar säna: ‘Awkiy, Dios contra ukhamarak juma contraw juchachasta. Wawamätwa sañatakis janiw walïkti’ sasa. 22  Awkisti akham sasaw esclavonakapar säna: ‘Jankʼak mä suma isi apsunipjjam, sumäkis ukpun aptanipjjäta, ukampirak isthapiyapjjam, amparaparus mä anillomp uchapjjam, kayunakaparus wiskhump* uchapjjarakim. 23  Mä likʼi torillo jiktanisin kharsupjjam, manqʼapjjañäni fiestachapjjañäni. 24  Aka wawajajj jiwatänwa, jichhajj jaktanjjewa; chhaqatänwa, jichhajj kuttʼanjjewa’ sasa. Ukhamaw jupanakajj kusisiñ qalltapjjäna. 25  ”Ukañkamasti jilïr yoqapajj yapunkaskänwa. Utar kuttʼasin niya jakʼachasjjäna ukhajja, music tukaskiri, thoqoskir istʼäna. 26  Ukatwa jupajj servirinakat maynir jawsäna, kamacharaki sasaw jisktʼäna.* 27  Jupasti sarakïnwa: ‘Jilamaw kuttʼanjjatayna, walikiw* purinjje, ukatwa awkimajj mä likʼi torillo kharsurapi’ sasa. 28  Jupasti walpun colertʼasïna, janirakiw mantañs munkänti. Ukatwa awkipajj mistunisin jupar wal ruwtʼäna. 29  Jupasti awkiparojj sänwa: ‘Nayajj walja maranakaw mä esclavjam jumatak trabajta, janirakiw ni mä kutis arunakam pʼakintkti. Ukampis janiw jumajj amigonakajampi kusistʼañajatakejj ni mä cabritoksa churkistati. 30  Ukhamarus aka yoqamajj prostituta* warminakampi sarnaqasaw utjirinakam tukjani.* Ukat purin ukspachaw jumajj mä likʼi torillo kharsuraptajja’ sasa. 31  Awkisti sarakïnwa: ‘Munat wawa, jumajj nayamp chikäskapuntawa, taqe kunanakatï nayan utjkitu ukanakas jumankarakiwa. 32  Ukhamarus fiestachañas kusisiñas wakisiwa, aka jilamajj jiwatänwa, jichhajj jaktanjjewa; chhaqatänwa, jichhajj kuttʼanjjewa’ sasa”.

Qhanañchäwinaka

“99”.
Variante: “katjañkam”.
Variante: “Katj-jje”.
Variante: “katjanta”.
“99”.
“Dracma” siski uka cheq aka Biblian diccionariopan liytʼäta.
Variante: “mechero”.
“Dracma” siski uka cheq aka Biblian diccionariopan liytʼäta.
Jan ukajja, “jan amuytʼasir jaqer uñtat sarnaqasaw”.
Jan ukajja, “algarrobanakampiw”.
Griego arunjja, “alajjpacha”.
Variante: “jakisirejj”.
Variante: “tanïna”.
Variante: “jiskhump”.
Variante: “chhiktʼäna”.
Jan ukajja, “kʼumarakiw”.
Ukasti chachanakampi qollqe layku ikintasir warmi sañ muni.
Griego arunjja, “manqʼanti”.