Lucas 13:1-35

  • Arrepentisiña jan ukajj jiwaña (1-5)

  • Jan achoqer higos arbolat parlir uñachtʼäwi (6-9)

  • Sábado urunwa mä usut warmirojj qollasi (10-17)

  • Mostaza jathampita levadurampit parlir uñachtʼäwinaka (18-21)

  • Kʼullku punknam mantañatakejj chʼamachasiñaw wakisi (22-30)

  • Herodes, ‘uka qamaqe’ (31-33)

  • Jerusalenatwa Jesusajj wal llakisi (34, 35)

13  Uka urunakanjja mä qhawqhaniw uka cheqankapjjarakïna. Pilatojj Galileankir jaqenakan wilapwa jupanakan pachpa sacrificionakapamp kitanti sasaw Jesusar yatiyapjjäna.  Uk satasti jupajj akham sarakïnwa: “¿Uka jaqenakajj Galileankir taqe jaqenakat sipans jukʼamp juchanïpkaspasa, ukatsa jupanakajj ukham jiwayat uñjasipkaspa ukhamti amuyapjjta?  Janiwa. Nayajj sapjjsmawa, janitï jumanakajj arrepentisipkäta ukhajja, ukham jiwayatarakiw taqenis uñjasipjjäta.  Jan ukajj Siloam cheqankir mä torrejj tunka kimsaqallqoni jaqenakar tinkjjatasin jiwaraykäna uka toqetjja, ¿kunjamsa amuyapjjta? ¿Jupanakajj Jerusalén markan jakir taqe jaqenakat sipansa jukʼamp juchanïpkaspas ukhamti amuyapjjarakta?  Janiwa. Nayajj sapjjsmawa, janitï jumanakajj arrepentisipkäta ukhajja, jupanakjam jiwayatarakiw taqenis uñjasipjjäta” sasa.  Ukatjja akham sasaw jupajj mä uñachtʼäwit parlarakïna: “Mä jaqejj uvas yapunïnwa, mä higos arbolaw uka yapupan ayruntat* utjarakïna. Achunak thaqeriw jupajj jutäna, ukampis janiw kuns jikjjatkänti.*  Ukatwa jupajj uvas yapuchiripar akham säna: ‘Kimsa maraw nayajj aka higos arbolan achunakap thaqerejj jutta, ukampis janiw kunsa jikjjatkti.* ¡Ukhamajj apsjjam! ¿Kunatakirak oraq inamay katjjasiskanisti?’ sasa.  Uk satasti jupajj sarakïnwa: ‘Tata, aka maramp suytʼañäni, nayaw muytpach qʼawsusin wanumpi uchantäjja.  Sum achoqani ukhajja, walïniwa, ukampis jan achoqkani ukhasti, apsjjätawa’ sasa”. 10  Ukatjja mä sinagoganwa jupajj sábado urun yatichaskäna. 11  Wali kʼumthapit mä warmiw ukankarakïna, janiw cheqaptirjamäkänti. Juparojj mä demoniow mantasin tunka kimsaqallqon maranak ukham usuntayatayna. 12  Jesusajj jupar uñjäna ukhajja, akham sasaw säna: “Warmi, jumajj uka usumat walikëjjtawa” sasa. 13  Ukatjja amparampiw jupar loqjjattʼäna, ukaratpachaw uka warmejj cheqaptjjäna, ukatsti Diosaruw jachʼañchäna. 14  Jesusan sábado urun qollatap uñjasajja, sinagogan pʼeqtʼir mä jaqejj akham sasaw colerasisajj jaqenakar säna: “Trabajiñatakejj sojjta urunakaw utji. Ukhamasti uka urunakaw qollayasir jutapjjañama, janiw sábado urun ukajj lurasiñapäkiti” sasa. 15  Ukatsti Tatitojj akham sasaw jupar säna: “Kʼari chuyman* jaqenaka, ¿janit jumanakajj sábado urun vacsa, jan ukajj asnsa jararasin umtʼayir jikhapkta? 16  Aka warmejj Abrahanan wawapawa, jupajj tunka kimsaqallqon maranakaw Supayan* katuntat uñjasïna. Ukhamajj ¿janit jupar sábado urun usupat qollañajj wakiskänjja?” sasa. 17  Jupajj ukanak parlaskäna ukhajja, jupa contra saytʼir jaqenakajj taqeniw phenqʼachat uñjasipjjäna. Taqe jaqenakasti uka musparkañ luräwinakap uñjasajj wal kusisipjjäna. 18  Ukjjarusti jupajj sarakïnwa: “¿Diosan Reinopajj* kunamp sasisa, jan ukajj kunarus uñtasiyäjja? 19  Diosan Reinopajj* mä mostaza* jathampi* sasiwa, mä jaqew huertapar uka jatha phawantäna.* Mä arbolar tukuñkamaw uka jathajj jilsüna. Jamachʼinakas ramanakaparuw tapachasipjjäna” sasa. 20  Mayampiw jupajj akham säna: “¿Kunarus Diosan Reinop* uñtasiyäjja? 21  Diosan Reinopajj* levadurampi sasiwa, uka levadura aptasaw mä warmejj tunka kilo* jakʼur kitantäna. Ukatsti taqpach masaruw uka levadurajj poqtayarakïna” sasa. 22  Jerusalén markar sarkasasti, Jesusajj markat marka sarasaw jaqenakar yatichäna, jiskʼa markanakar mantasas yaticharakïnwa. 23  Ukatjja mä jaqew jupar akham säna: “¿Tata, jukʼanirukit salvasini?” sasa. Jupasti akham sasaw jupanakar sarakïna: 24  “Kʼullkʼu punknam mantañatakejj walpun chʼamachasipjjam. Nayasti sapjjsmawa, waljaniw mantañ munapjjani, ukampis janiw mantapkaniti. 25  Utanejj sartasin punku sum llawintjjani ukhajja, anqäjjan saytʼataw jumanakajj uñjasipjjäta, akham sasaw punku leqʼepjjarakïta: ‘Tata, llawirapjjeta’ sasa. Jupasti akham sasaw jumanakar sapjjätam: ‘Jumanakajj kawkitäpjjstajjaya, janiw nayajj yatkti’ sasa. 26  Jumanakajj akham sasaw sapjjarakïta: ‘Juman uñjkatarakis manqʼasipkta umasipktjjä, nanakan utjki uka jachʼa thakinakansa yaticharaktasä’ sasa. 27  Jupajj akham sapjjarakïtamwa: ‘Jumanakajj kawkitäpjjstajjaya, janiw nayajj yatkti. ¡Nayat jitheqtapjjeta, jan walinak lurir jaqenaka!’ sasa. 28  Kunapachatï Abrahanaru, Isaacaru, Jacoburu ukhamarak taqe profetanakar Diosan Reinopan* uñjapjjäta, ukatjja jumanakajj anqar jaqonukut uñjasipjjäta ukhajja, ukanwa jachapjjäta, laka chʼakhanaksa tʼurusipjjäta. 29  Ukatsti jaqenakaw inti jalsu toqetsa, inti jalant toqetsa, alay toqetsa, aynach toqetsa jutapjjani, jupanakarakiw Diosan Reinopan* mesan qontʼasipjjani. 30  Khitinakatï qhepankapki ukanakatjja yaqhepajj nayrankapjjaniwa, nayrankapki ukanakatsti yaqhepajj qhepankapjjarakiniwa” sasa. 31  Uka horasanjja mä qhawqha fariseonakaw jupan ukar jutasin akham sapjjäna: “Akat mistusin sarjjam, Herodesaw jiwayañ muntam” sasa. 32  Uk satasti jupanakar sarakïnwa: “Sarapjjam, uka qamaqerojj* akham sanipjjam: ‘Jichhürumpi qharürumpejj demonionakwa nayajj alissuskäjja, usutanakwa qollarakëjja, ukampis jurpüruw ukanak lurañ tukuyaskäjja’ sasa. 33  Ukampirus nayajj jichhürusa, qharürusa, jurpürus saraskakiñajawa. Jerusalén anqäjjanjja janiw* mä profetarojj jiwayasiñapäkiti. 34  ¡Jerusalén, Jerusalén, profetanakar jiwayir marka, juman ukar khitanit jaqenakar qalamp kʼupjir marka! ¡Qhawqha kutiw nayajj wawanakamar tantachañ munayätjja, kunjamtï wallpajj chhiwchhinakapar* chheqa* manqhapar jawsthapki ukhama! Jumanakasti janiw munapktati. 35  Jumanakan templomjja* Diosajj apanukuniwa. Nayajj sapjjsmawa, ‘¡Jehová* Diosan sutipjjar jutki ukajj bendisitäpan!’ sasin sapkäta ukapachkamajja, janiw mayampsa uñjapkitätati” sasa.

Qhanañchäwinaka

Variante: “mallkit”.
Variante: “jakkänti”.
Variante: “jakkti”.
Jan ukajja, “Hipócrita”. Ukasti jan suma jaqëkasina suma jaqer tuktʼaña sañ muni.
Griego arunjja, “Satanás”. Ukajj contra saytʼiri, kutkatasiri sañ muni.
Jan ukajja, “Gobiernopajj”.
Jan ukajja, “Gobiernopajj”.
Palestina markanjja, uka jiskʼa semillajj pusi metrotsa jilaw jilsuspa, ramanakanirakiwa.
Variante: “semillampi”.
Variante: “willintäna”.
Jan ukajja, “Gobiernop”.
Jan ukajja, “Gobiernopajj”.
Jan ukajja, “kimsa jachʼa medidanaka”.
Jan ukajja, “Gobiernopan”.
Jan ukajja, “Gobiernopan”.
Variante: “zorrorojj”.
Jan ukajja, “janipuniw”.
Variante: “chiwchinakapar”.
Variante: “chʼeqa”.
Griego arunjja, “Jumanakan utamjja”.
“Jehová” siski uka cheq aka Biblian diccionariopan liytʼäta.