Juan 5:1-47

  • Betzata estanquenwa mä usut jaqerojj qollasi (1-18)

  • Jesusajj Awkipatwa munañanïñ katoqe (19-24)

  • Jiwatanakajj Jesusan arupwa istʼapjjani (25-30)

  • Jesusjjat qhanañchäwinaka (31-47)

5  Ukanak pasatatjja judionakan mä fiestapaw utjäna, Jesusajj Jerusalén markaruw makatäna.  Jerusalenanjja Ovej Punku satäki uka jakʼanjja mä uma estanquew utji, hebreo arunjja Betzata satawa, machonanakampi muyuntatarakiwa.  Uka manqhanjja walja usutanakaw utjäna, juykhunakasa, cojonakasa, amparata jan ukajj kayut wañaqat jaqenakasa ukankapjjarakïnwa.  *——  Kimsa tunka kimsaqallqoni* maranak usurnukstat mä jaqew ukankaskäna.  Uka jaqer oraqen jaqosiskir uñjasasa jaya tiempo usutätap yatisasa akham sasaw Jesusajj jupar säna: “¿Usumat waliptañ muntati?” sasa.  Usut jaqejj jupar sarakïnwa: “Tata, umajj onjjtki ukhajja, janiw khitisa umar wayuntirejj utjkiti, ukar sarañajkamajj yaqhaw nayraqat mantjje” sasa.  Jesusasti jupar sarakïnwa: “Sartam, jantʼakum* aptasisin sarnaqam” sasa.  Uka jaqejj ukaratpachaw usupat waliptjjäna, jantʼakup* apjjarusisaw sarnaqañ qalltäna. Uka urojj sábado urünwa. 10  Ukatwa judionakajj usupat waliptir jaqerojj akham sapjjäna: “Jichhürojj sábado uruwa, janiw leyirjamajj jantʼaku* apañamajj walïkiti” sasa. 11  Jupajj sarakïnwa: “Khititejj nayar qollkitu ukaw akham situ: ‘Jantʼakum* aptasisin sarnaqam’ sasa”. 12  Jupanakasti akham sasaw jisktʼapjjäna:* “¿Khiti jaqes ‘jantʼakum aptasisin sarnaqam’ sasin sistam?” sasa. 13  Waliptir jaqejj janiw khitin qollatsa yatiskänti. Jesusajj jan amuykayakiw ukankir jaqenak taypir mantjjäna. 14  Uka qhepatsti Jesusajj templonwa uka jaqer jikjjatäna,* sarakïnwa: “Uñjam, usumat walikëjjtawa. Jan mayampsa juch lurjjamti, ukhamat jukʼampi jan walinakan jan uñjasiñamataki” sasa. 15  Uka jaqejj sarjjäna ukhajja, Jesusaw waliptayitu sasaw judionakar yatiyäna. 16  Ukatwa judionakajj Jesusar jan waltʼayañatak arknaqañ qalltapjjäna, sábado urun ukanak luratap layku. 17  Jupajj akham sasaw jupanakar säna: “Alajjpachankir Awkijajj jichhakamaw trabajiski, nayas ukhamarakiw trabajiskta” sasa. 18  Uk istʼasasti jukʼampiw judionakajj jupar jiwayañ thaqapjjäna. Jupanakajj akham sasaw amuyapjjäna: “Jupajj janiw sábado uruki pʼakintkiti, jan ukasti Diosajj Awkijawa sasinjja, Diosjamäkaspas ukhamaw tuku” sasa. 19  Ukatwa Jesusajj jupanakar akham säna: “Cheqpachapuniw sapjjsma, Yoqajj janiw amtapat kunsa lurkaspati, jan ukasti kuntï Awkir lurir uñjki ukakwa luri. Kunanaktï Awkejj lurki ukanakwa Yoqajj luraraki. 20  Alajjpachankir Awkejj Yoqar munasiwa, luratanakapjja taqpachwa jupar uñachtʼayaraki. Ukhamarus ukanakat sipansa, jukʼamp jachʼa luräwinakwa jupar uñachtʼayani, ukhamat jumanakajj musparapjjañamataki. 21  Kunjamtï alajjpachankir Awkejj jiwatanakar jaktayki,* jakañsa churkarakejja, ukhamarakiw Yoqajj khitinakarutï jakañ churañ munki ukanakar churi. 22  Alajjpachankir Awkejj janiw khitirus juzgkiti, jan ukasti Yoqaruw taqe kun juzgañapatak katuyi, 23  ukhamat taqenis Yoqaru jachʼañchapjjañapataki, kunjamtï jupanakajj Awkir jachʼañchapki ukhama. Khititejj Yoqar jan jachʼañchki ukajja, janirakiw jupar khitanki uka alajjpachankir Awkirojj jachʼañchkiti. 24  Cheqpachapuniw sapjjsma, khititejj arunakaj istʼki, nayar khitankitu ukarus creykaraki ukajja, wiñay jakañaniwa, janirakiw jupajj juzgatäkaniti, jan ukasti jiwañatjja jakañaruw pasjje. 25  ”Cheqpachapuniw sapjjsma, horasajj purininiwa, cheqas purinjjewa, ukapachaw jiwatanakajj Diosan Yoqapan arup istʼapjjani, khitinakatï istʼasirïpki ukanakajja jakapjjaniwa. 26  Alajjpachankir Awkejj jakañ churañatakejj chʼamaniwa,* juparakiw Yoqarojj jakañ churañapatakejj chʼam churi. 27  Juparakiw juzgañapatakejj munañanïñsa churi, jaqen Yoqapätap layku. 28  Jan jumanakajj aka toqet musparapjjamti, horasajj purininiwa, ukapachaw taqe khitinakatï sepulturankapki* ukanakajj arup istʼapjjani, 29  ukatjja mistunipjjaniwa, khitinakatï suma luräwinak lurapki ukanakajja, jakañatakiw jaktanipjjani, khitinakatï jan walinak lurapki ukanakajja, juzgatäñatakiw jaktanipjjani. 30  Janiw nayajj amtajat kunsa lurkiristti. Kunjamtï nayajj istʼktjja ukarjamaw juzgta. Nayan juzgatajasti cheqaparakiwa, janiw nayajj munañaj thaqkti, jan ukasti khitankitu ukan munañapwa thaqta. 31  ”Nayatejj naya pachpat qhanañchasirista ukhajja, qhanañchatajajj janiw cheqäkaspati. 32  Cheqas yaqhaw nayat qhanañchi, kuntï jupajj nayat qhanañchki ukan cheqätapsa yatiraktwa. 33  Jumanakajj jaqenakaruw Juanan ukar khitapjjtajja, jupajj kunatï cheqäki ukwa nayjjat qhanañcharaki. 34  Ukampis nayajj janiw jaqen qhanañchäwip katoqkti, jumanakan salvasipjjañamatakiw ukanak sista. 35  Jupajj mä micha qhanar uñtataw nakhäna, qhanarakïna. Jumanakasti mä jukʼa tiempojj jupan qhanapanwa wal kusisiñ munapjjayätajja. 36  Jichhajj kuntï Juanajj siskäna ukat sipansa, jukʼamp wakiskir arunakaw nayan utjitu. Kunanaktï alajjpachankir Awkijajj lurañatak churkitu ukanakwa nayajj lurta, uka pachpa luratanakaw alajjpachankir Awkejj nayar khitanitap qhanañcharaki. 37  Ukhamarus khitankitu uka alajjpachankir Awkiw nayat qhanañcharaki. Jumanakajj janiw kunapachas jupan arunakap istʼapktati, ni kunjamas jupajj uksa uñjapkaraktati. 38  Jumanakajj janiw jupan arunakapjja chuymar katjjäsipktati, khitirutejj jupajj khitanki ukar jan creyipjjatam layku. 39  ”Jumanakasti Qellqatanakat wal yatjjatapjjtajja, ukhamatsa wiñay jakañ katoqapkasma ukham amuyapjjaraktajja. Uka pachpa Qellqatanakaw nayjjat qhanañchaski. 40  Ukhampachas jumanakajj janiw wiñay jakañ katoqañatakejj nayan ukar jutañ munapktati. 41  Janiw nayajj jaqenakamp jachʼañchayasiñ munkti. 42  Nayajj sum yatirakta, janiw Diosan munasiñapajj jumanakan utjkiti. 43  Nayajj alajjpachankir Awkijan sutipjjaruw jutta, ukampis jumanakajj janiw katoqapkistati. Maynitï jupa pachpan sutipjjaru jutaspa ukhajja, juparojj katoqapjjasmawa. 44  Jumanakajj maynit maynikama jachʼar aptasipjjta ukhajja, sum katoqasipjjtajja. Ukampis janiw mä sapa cheqpach Diosat jutki uka jachʼañchäwi thaqapktati, ukhamajj ¿kunjamarak creyipjjasmasti? 45  Janiw nayajj alajjpachankir Awki nayraqatanjja jumanakar juchañchapkämati, jan jumanakajj ukham amuyapjjamti. Jan ukasti jumanakar juchañchirejj yaqhaw utji, khitirutï jumanakajj confiyapkta uka Moisesaw juchañchapjjtamjja. 46  Cheqas jumanakatï Moisesar creyipjjasmajja, nayar creyipjjetasmawa, jupajj nayjjatwa qellqäna. 47  Jumanakajj janiw Moisesan qellqatanakapar creyipktati, ukhamajj ¿kunjamaraki kuntï nayajj siskta ukar creyipjjasmasti?”.

Qhanañchäwinaka

Yaqhep nayra qellqatanakanjja, Juan 5:4 qellqatajj janiw uñstkiti, janirakiw Diosan amuytʼayat Qellqatjam uñtʼatäkiti.
“38”.
Jan ukajja, “ikiñam”.
Jan ukajja, “ikiñap”.
Jan ukajja, “ikiña”.
Jan ukajja, “Ikiñam”.
Variante: “chhiktʼapjjäna”.
Variante: “jakjjatäna”.
Griego arunjja, “sartayki”.
Griego arunjja, “Alajjpachankir Awkejj jakañaniwa”.
Griego arunjja, “amtat sepulturankapki”.