Juan 20:1-31

  • Sepulturajj chʼusakëjjewa (1-10)

  • Jesusajj María Magdalenaruw uñsti (11-18)

  • Jesusajj discipulonakaparuw uñsti (19-23)

  • Tomasejj janiw creykänti, qhepatakwa creyjjäna (24-29)

  • Aka rollojj kuna amtampi qellqatasa (30, 31)

20  Semanan nayrïr urupäjjäna ukhajja, chʼamakäskäna ukhaw María Magdalenajj wali alwat sepulturar jutäna. Purisasti sepulturar atkatatäkäna uka qaljja apaqat uñjäna.  Ukatwa jupajj Simón Pedron ukaru ukhamarak Jesusan munat mayni discipulopan ukar tʼijukam* jutäna, akham sasaw jupanakar säna: “Tatituruw sepulturat apasjjapjjatayna, janiw kawkir uchapjjatapsa yatipkti” sasa.  Ukhamasti Pedrompi mayni discipulompejj sepulturaruw sarapjjäna.  Panpachanejj wal tʼijupjjäna.* Mayni discipulojj Pedrot sipans jukʼamp ratukiw tʼijüna, nayraqataw sepulturar purirakïna.  Altʼasisasti linot lurat telanakakwa ukan apnoqat uñj-jjäna, ukhamarus janiw mantkänti.  Jupan qhepap arkasinkäna uka Simón Pedrow purinirakïna. Sepulturar mantasajja, linot lurat telanakakwa ukan apnoqat uñjäna.  Jesusan pʼeqepar uskutäkäna uka telajja, janiw mayni chʼoqañ telanakampi chik uchatäkänti, jan ukasti yaqhawjan llawthaptʼat uchatäskänwa.  Sepulturar nayraqat purkäna uka discipulos mantarakïnwa. Uñjasajj creyirakïnwa.  Jiwatanak taypitwa jupajj jaktanini* siski uka qellqatjja, janïraw jupanakajj amuyapkänti. 10  Ukhamasti uka discipulonakajj utanakaparuw kuttʼjjapjjäna. 11  Mariajj sepultura anqäjjanwa saytʼatäskäna, jachaskarakïnwa. Ukhamaruw jupajj altʼasisin sepultura manqha uñantäna. 12  Janqʼot isthapit pä angelanakaruw uñjäna, kawkintï Jesusan cuerpopajj uchatäkäna ukjan qontʼatäsipkänwa, maynejj pʼeqe toqena, maynirak kayu toqena. 13  Uka angelanakajj akham sasaw jupar sapjjäna: “Warmi, ¿kunatsa jachaskta?” sasa. Jupajj sarakïnwa: “Tatitujaruw apasjjapjjatayna, janirakiw kawkir uchapjjatapsa yatkti” sasa. 14  Uk sasasti jupajj qhepa toqeruw uñtäna, Jesusaruw ukan sayaskir uñjäna, janirakiw Jesusätapjja amuykänti. 15  Ukatsti Jesusajj akham sasaw jupar säna: “Warmi, ¿kunatsa jachaskta? ¿Khitirus thaqaskta?” sasa. Jupajj huerta uñjir jaqëkaspas ukhamwa amuyäna, ukatwa jupar akham säna: “Tata, jumatï akat apasjjstajja, sitaya, kawkirus uchanta, ukhamat nayajj apasjjañajataki” sasa. 16  Jesusasti “¡María!” sasaw jupar sarakïna. Mariajj kutikipstasaw hebreo arut jupar säna: “¡Rabboni!” sasa. (Ukajj “¡Yatichiri!” sañ muni.) 17  Jesusajj akham sasaw jupar säna: “Jan nayar katjjäsistati. Janïraw nayajj alajjpachankir Awkin ukar makatkti. Antisas jilatanakajan* ukar saram, akham sasaw jupanakar säta: ‘Nayajj Awkijan ukaruw makataskta, jumanakan Awkimäkis ukaru, nayan Diosajäkis ukaru, jumanakan Diosamäkis ukaruraki’ sasa”. 18  María Magdalenajj discipulonakan ukaruw saräna, akham sasaw jupanakar yatiyäna: “¡Tatituruw nayajj uñjta!” sasa. Kuntï Jesusajj jupar siskäna ukanaksa jupanakar yatiyarakïnwa. 19  Semanan nayrïr urupajj wali jaypʼöjjäna ukhajja, discipulonakajj mä utan tantachatäsipkänwa, judionakar ajjsarañatjja* punkus suma llawintataw ukankasipkäna. Ukhamaruw Jesusajj uñstäna, jupanak taypir saytʼasisajj akham sasaw jupanakar säna: “Sumankañajj jumanakan utjpan” sasa. 20  Uk sasasti amparanakapwa jupanakar uñachtʼayäna, chʼillapsa uñachtʼayarakïnwa. Tatitur uñjasasti discipulonakajj wal kusisipjjäna. 21  Jesusajj mayampiw jupanakar akham säna: “Sumankañajj jumanakan utjpan. Kunjamtï alajjpachankir Awkejj nayar khitankitu ukhamarakiw nayajj jumanakar khitapjjsma” sasa. 22  Uk sasasti jupanakjjaruw phustʼäna, sarakïnwa: “Espíritu santo* katoqapjjam. 23  Jumanakatï mayninakan juchanakap perdonapjjätajja, jupanakajj perdonatäpjjaniwa. Jumanakatï mayninakan juchanakap jan perdonapkätajja, janirakiw jupanakajj perdonatäpkaniti” sasa. 24  Jesusajj discipulonakapar uñstkäna ukhajja, tunka payani apostolonak taypinkki ukhamarak Ispa* sat Tomasejj janiw jupanakamp chikäkänti. 25  Ukatwa mayni discipulonakajj jupar akham sapjjäna: “¡Tatituruw uñjapjjta!” sasa. Jupajj sarakïnwa: “Janitï nayajj clavonakan pʼiyjat amparanakap uñjkä, janirak clavonakan pʼiyjatäki ukar lukʼanaj loqantkä, janirak chʼillaparus amparajamp loqantkä ukhajja, janipuniw creykäti” sasa. 26  Kimsaqallqo urunak pasjjäna ukhajja, discipulonakapajj mayampwa utankasipkäna, Tomasis jupanakamp chikäskarakïnwa. Punkojj suma llawintatäkchïnsa, ukhamaruw Jesusajj uñstäna. Jupanak taypir saytʼasisajj akham sasaw jupanakar säna: “Sumankañajj jumanakan utjpan” sasa. 27  Ukatsti jupajj akham sasaw Tomasir säna: “Lukʼanamampi amparanakaj llamktʼita, amparanakajsa uñjarakita, amparamampi chʼillajar loqantam. Jan jukʼamp pächasimti, jan ukasti creyiñamawa” sasa. 28  Uk satasti Tomasejj sarakïnwa: “¡Nayan Tatituja, nayan Diosaja!” sasa. 29  Jesusajj jupar sarakïnwa: “¿Uñjatam laykukit jumajj creyta? Khitinakatï jan uñjkasin creyipki ukanakajj kusisipjjpan” sasa. 30  Cheqpachansa Jesusajj walja yaqha señalanakwa discipulonak nayraqatan lurarakïna, janirakiw ukanakajj aka rollon qellqatäkiti. 31  Ukanakajja Jesusajj Cristötapa, Diosan Yoqapätapa creyipjjañamatakiw qellqasïna. Ukhamat creyipjjatam laykojj wiñay jakaña sutipjjar katoqapjjañamataki.

Qhanañchäwinaka

Variante: “tankämiw”.
Variante: “tanipjjäna”.
Griego arunjja, “sartanini”.
Jilatanaka sasinjja, awisajj kullakanakamppachatwa Biblian parli.
Variante: “judionakat jiwtayasisajja”.
Ukasti Diosan chʼamapa sañ muni.
Variante: “Gemelo”.