Juan 18:1-40

  • Judasajj Jesusaruw aljanti (1-9)

  • Pedrojj mä espada apsusi (10, 11)

  • Anasan ukaruw Jesusar apapjje (12-14)

  • Pedron nayrïr kuti Jesusar jan uñtʼir tukutapa (15-18)

  • Jesusajj Anasan nayraqatapankiwa (19-24)

  • Pedron payïri ukhamarak kimsïri kuti Jesusar jan uñtʼir tukutapa (25-27)

  • Jesusajj Pilaton nayraqatapankiwa (28-40)

    • “Reinojajj janiw akapachankirïkiti” (36)

18  Ukanak sasinsti Jesusajj discipulonakapamp chikaw mistuwayäna, Cedrón Valle* khurkataruw saräna, ukansti mä huertaw utjäna. Jupajj discipulonakapamp chikaw ukar mantäna.  Jupar aljantir Judasas uka lugar uñtʼarakïnwa, Jesusajj sapa kutiw ukan discipulonakapamp tantachasirïna.  Ukatsti uka Judasaw soldadonakaru ukhamarak jilïr sacerdotenakana fariseonakan guardianakaparu irpäna. Antorchanakasa, farolanakasa, nuwasiñ armanakas aptʼasitaw ukar puripjjäna.  Jesusajj taqe kunanakatï jupar pasañapäkäna ukanak yatisajja, nayraqatar chellqtasaw jupanakar akham säna: “¿Khitirus thaqasipkta?” sasa.  Jupanakasti “Nazareno Jesusaruw thaqasipkta” sasaw jupar sapjjäna. Jupajj sarakïnwa: “Nayätwa” sasa. Jupar aljantir Judasas jupanak chikarakiw saytʼatäskäna.  Jesusajj “nayätwa” sasin säna ukhajja, qhepa toqer jittʼasaw jupanakajj oraqer liwisipjjäna.  Ukatwa jupajj mayamp jupanakar jisktʼäna:* “¿Khitirus thaqapjjta?” sasa. Jupanakajj sapjjarakïnwa: “Nazareno Jesusaruw thaqasipkta” sasa.  Jesusajj sarakïnwa: “Nayätwa sapjjaraksmasä. Nayarutï thaqapjjchistajja, jupanakar khitjjapjjam” sasa.  Cheqas kuntï jupajj siskäna ukan phoqasiñapatakiw ukajj pasäna, jupajj akham sänwa: “Jumajj churkista ukanakatjja, janiw maynirus chhaqaykti” sasa. 10  Simón Pedronjja mä espadapaw utjäna, uka espada apsusisajj jachʼa jilïr sacerdoten esclavopar jawqʼatatasaw kupi jiñchup thoqoqayäna. Uka esclavojj Malco satänwa. 11  Jesusajj akham sasaw Pedror säna: “Imañapar uka espada imam. Alajjpachankir Awkejj nayar churkitu uka copatjja, ¿janit umtʼañajäki?” sasa. 12  Soldadonakasa, ejerciton comandantepasa, judionakan guardianakapas Jesusaruw katuntapjjäna, amparatwa ñachʼantapjjarakïna.* 13  Ukatjja Anasan ukaruw nayraqatajj apapjjäna, jupajj Caifasan suegropänwa. Uka marajja Caifasaw jachʼa jilïr sacerdotëskäna. 14  Cheqas juparakiw judionakarojj akham sasin satayna: “Jumanakatakejj walïspawa mä sapa jaqen marka layku jiwañapajja” sasa. 15  Ukatsti Simón Pedrojj Jesusaruw arkaskäna, mayni discipulos ukhamaraki. Uka discipulojj jachʼa jilïr sacerdoten uñtʼatänwa, Jesusamp chikarakiw jachʼa jilïr sacerdoten patiopar mantäna. 16  Pedrosti punku anqäjjan saytʼatäskänwa. Ukhamasti jachʼa jilïr sacerdoten uñtʼat mayni discipulow mistuwayäna, punku uñjirir parljjayasasti, Pedroruw irpantanïna. 17  Ukatjja punku uñjir sirvienta tawaqojj akham sasaw Pedror säna: “¿Janit jumajj aka jaqen mayni discipulopäkta?” sasa. Pedrojj sarakïnwa: “Janiw ukäkti” sasa. 18  Niyakejjay thayächïnjja, esclavonakas guardianakas kʼillimampiw* nina nakhayasipkäna, uka jakʼan saytʼataw jupanakajj juntʼurasisipkäna. Pedros jupanakamp chik saytʼatarakiw juntʼurasiskäna. 19  Mä jilïr sacerdotew Jesusarojj discipulonakapata ukhamarak yatichäwipat jisktʼäna.* 20  Jesusajj jupar sarakïnwa: “Taqe jaqenak nayraqatanwa nayajj parlayäta, kawkirutï taqe judionakajj sarapki uka sinagogansa templonsa yatichapuniyätwa, janirakiw kunsa jamasat parlkti. 21  ¿Kunatsa nayar jisktʼista?* Khitinakatï parlir istʼapkitu ukanakar jisktʼanim. Kuntï nayajj siskta ukjja, jupanakajj yatipjjewa” sasa. 22  Ukanak satapatsti uka jakʼan sayaskir mä guardiaw Jesusar ajanut tʼajjllintäna, sarakïnwa: “Jilïr sacerdoten jisktʼatajj* ¿ukhamti jumajj jaysäta?” sasa. 23  Jesusajj jupar sarakïnwa: “Nayatï jan wal parlstjja, uka jan walit qhanañcham. Nayatï cheqapar parlstjja, ¿kunatsa jumajj nuwista?” sasa. 24  Ukatsti Anasajj amparat ñachʼantatpachwa* Jesusar apjjaruyäna, ukhamat Caifás jachʼa jilïr sacerdoten ukar apapjjañapataki. 25  Simón Pedrojj saytʼataw ukan juntʼurasiskäna. Ukhamaruw jupar akham sapjjäna: “¿Janit jumajj jupan mayni discipulopäkta?” sasa. Jupajj jan uñtʼiriw tuküna, sarakïnwa: “Janiw ukäkti” sasa. 26  Ukatjja jachʼa jilïr sacerdoten mä esclavopaw akham sasin Pedror säna: “Jumarojj jupamp chikwa huertan uñjsmajja” sasa. Uka jaqejja Pedrojj jiñchu thoqoqaykäna uka jaqen mä familiarapänwa. 27  Ukampis Pedrojj mayampiw Jesusar jan uñtʼir tuküna, ukatjja ukaratpachaw mä wallpajj artʼasïna. 28  Caifasan utapat irpsusajja gobernadoran utaparuw Jesusar irpapjjäna. Ukhasti wali alwäskänwa. Jupanakajj janiw gobernadoran utapar mantapkänti, Pascuan manqʼañ laykojj janiw qʼañuchasiñ munapkänti. 29  Anqar mistusajj akham sasaw Pilatojj jupanakar säna: “¿Kuna jan walsa aka jaqejj luri?” sasa. 30  Jupanakasti sapjjarakïnwa: “Janitï jupajj jan wali jaqëkaspajja, janiw jumar apjjaruyañajj wakiskaspänti” sasa. 31  Ukatwa Pilatojj jupanakar akham säna: “Akat apasipjjam, jumanakan utjki uka leyirjam juzgapjjam” sasa. Judionakasti jupar sapjjarakïnwa: “Leyirjamajja, janiw nanakajj khitirus jiwayapkiristti” sasa. 32  Cheqansa kuntï Jesusajj siskäna ukanakan phoqasiñapatakiw ukanakajj pasaskäna, jupasti kunjamsa jiwani uka toqetwa parläna. 33  Ukatsti mayampiw Pilatojj gobernadoran utapar mantäna, Jesusar jawsasajj akham sasaw jupar säna: “¿Jumätat judionakan reyipajja?” sasa. 34  Uk satasti Jesusajj jupar sarakïnwa: “¿Amuyumarjamat uk jisktʼista,* jan ukajj yaqhanakach nayat parlapjjtamjja?” sasa. 35  Pilatojj sarakïnwa: “Jumajj yatisktawa, janiw nayajj judiökti, pachpa markamampi jilïr sacerdotenakampirakis nayan ukar apanipjjtamjjä. ¿Kunrak lurtasti?” sasa. 36  Uk satasti Jesusajj sarakïnwa: “Reinojajj* janiw akapachankirïkiti. Reinojatï akapachankirïspajja, arkirinakajajj nuwasipjjasapänwa, ukhamat jan nayajj judionakar apjjaruyatäñajataki. Cheqpachansa Reinojajj janiw akapachankirïkiti” sasa. 37  Ukatwa Pilatojj jupar akham säna: “Ukhamajj ¿jumajj reyïtati?” sasa. Jesusajj sarakïnwa: “Juma pachpaw nayan reyïtaj arsusktajja. Nayajj ukatakiw nasta, ukatakiw akapachar jutarakta, kunatï cheqäki uka toqet qhanañchañataki. Kunatï cheqäki uka toqet saytʼasirinakajja, nayan arunakaj istʼapjjewa” sasa. 38  Pilatojj jupar sarakïnwa: “¿Kunarak cheqasti?” sasa. Ukanak sasasti Pilatojj mayampiw judionakan ukar mistüna, jupanakar sarakïnwa: “Janiw nayajj kuna juchsa jupan jikjjatkti.* 39  Ukhamarus jumanakajj sapa Pascuanwa mä jaqer antutañajatak mayipjjerïtajja. Ukhamajj ¿judionakan reyipar antutañajti munapjjta?” sasa. 40  Jupanakajj mayampiw akham sasin wali jachʼat arnaqasipjjäna: “¡Janiw uka jaqerojja, antisas Barrabasar antutam!” sasa. Uka Barrabasajj lunthatänwa.

Qhanañchäwinaka

Jan ukajja, “Cedrón juyphipach jawira”.
Variante: “chhiktʼäna”.
Variante: “chʼoqantapjjarakïna”.
Variante: “carbonampiw”.
Variante: “chhiktʼäna”.
Variante: “chhiktʼista”.
Variante: “chhiktʼatajj”.
Variante: “chʼoqantatpachwa”.
Variante: “chhiktʼista”.
Jan ukajja, “Gobiernojajj”.
Variante: “katjkti”.