Juan 11:1-57

  • Lazaron jiwatapa (1-16)

  • Jesusajj Martampir Mariampiruw chuymachtʼi (17-37)

  • Jesusajj Lazaroruw jaktayi (38-44)

  • Jesusar jiwayañatakiw parlakipapjje (45-57)

11  Ukatjja Lázaro sutini mä jaqew usuntatäna. Jupajj Betania markatänwa, Mariampi Martampi kullakanakapas uka jiskʼa markanwa jakapjjarakïna.  Uka Mariaw mä suma qʼapkiri* aceitempejj Tatitur warjjattʼäna, ñikʼutapampiw kayunakapsa wañsuyarakïna. Jupan Lázaro jilapaw usuntatäna.  Ukhamasti kullakanakapajj Jesusan ukaruw maynir khitapjjäna, akham sasin yatiyaniñapataki: “¡Tata, uñjam! Khitirutï jumajj munaskta ukaw usuntata” sasa.  Jesusajj uk istʼäna ukhajja, akham sasaw säna: “Uka usojj janiw jiwañar apkaniti, jan ukasti Diosar jachʼañchañatakiwa, ukhamat Diosan Yoqapajj uka usu taypi jachʼañchatäñapataki” sasa.  Martasa, Mariasa, Lazarosa Jesusan wali munatäpjjänwa.  Ukhamarus Lazaron usutätap yatïna ukhajja, cheqpachansa pä urumpiw jupajj kawkinkkäntï uka lugarankaskäna.  Uka qhepatjja akham sasaw discipulonakar säna: “Mayamp Judear sarañäni” sasa.  Discipulonakapajj jupar sapjjarakïnwa: “Rabí,* jichhakirakis Judeankir jaqenakajj qalampi kʼupjañatak thaqasipkayätamjjä, ¿mayampit jumajj ukar saräta?” sasa.  Jesusasti sarakïnwa: “Uru qhanajja tunka payan horanakaniwa, ¿janich ukhamäki? Uru qhanan sarnaqki ukajja, janiw kunampis lanktʼaskiti, akapachan qhanap uñjatap layku. 10  Arum sarnaqki ukajja lanktʼasiwa, qhanajj jupan jan utjatap layku” sasa. 11  Ukanak parlañ tukuyasasti, akham sasaw sarakïna: “Lázaro amigosajj ikiskiwa, jupar sartayiriw nayajj ukar saraskta” sasa. 12  Ukatwa discipulonakajj jupar sapjjäna: “Tata, ikiskchejja waliptaskaniwa” sasa. 13  Jesusajj Lazaron jiwatapatwa parlaskäna, arkirinakapasti ikin samartʼañatsa parlkaspa ukhamwa amuyapjjäna. 14  Ukatwa Jesusajj jupanakar qhan säna: “Lazarojj jiwatawa, 15  ukampirus jumanak laykojj wal kusista, walik nayajj jan ukankkayätti, ukhamat jumanakan creyipjjañamataki. Jupan ukar sarapjjañäni” sasa. 16  Ukatsti Ispa* sat Tomasejj akham sasaw discípulo masinakapar säna: “Jiwasajj sararakiñäni, jupamp chik jiwañasataki” sasa. 17  Jesusajj purïna ukhajja, Lazarojj pusi urunakaw sepulturankjjäna. 18  Betania markajj Jerusalén jakʼankänwa, niya kimsa kilometronak* sarañankänwa. 19  Walja judionakaw Martampin Mariampin ukarojj jutapjjäna, Lazaron jiwatapat chuymachtʼañataki. 20  Jesusan jutaskatap istʼasinjja, Martajj jupar jikjjatiriw* mistüna. Mariasti utan qontʼatäskänwa. 21  Ukatjja Martajj akham sasaw Jesusar säna: “Tata, jumatï akankasamänjja, janiw jilajajj jiwkaspänti. 22  Jichhajj yatiraktwa kuntï jumajj Diosar maykäta ukanakjja Diosajj churätamwa” sasa. 23  Jesusajj jupar sarakïnwa: “Jilamajj sartjjaniwa” sasa. 24  Ukjjarusti Martajj sänwa: “Nayajj yattwa, qhepa urun jiwatanakajj jaktanipkani* ukhaw jupajj sartanjjani” sasa. 25  Jesusajj jupar sarakïnwa: “Jiwatat jaktañasa jakañasa nayätwa. Khititejj nayar confiyki* ukajja, jiwkani ukhas jaktaniniwa. 26  Taqe khititï jakaski, nayarus confiykitu* ukajja, janipuniw kunapachas jiwkaniti. ¿Jumajj uk creytati?” sasa. 27  Jupajj sarakïnwa: “Jïsa, ukhamaw Tata, nayajj creytwa, jumajj Diosan Yoqap Cristötawa, khititï akapachar jutki ukätawa” sasa. 28  Ukanak sasajj María kullakapar jawsiriw jupajj saräna, jamasatwa akham säna: “Yatichirejj akankjjewa, jawstamwa” sasa. 29  Uk istʼasasti Mariajj mäkiw sartasin jupan ukar saräna. 30  Jesusajj janïraw uka jiskʼa markar mantkänti, jan ukasti kawkintï Martajj jupamp jikiskäna* ukankaskänwa. 31  Mariar jankʼaki sarthapisin misturi uñjasajja, jupamp chika utankasipkäna, chuymachasipkarakïna uka judionakajj sepulturar jachiriw saraskpacha sasaw amuyapjjäna, ukatwa jupar arkapjjäna. 32  Mariajj Jesusan ukar purisin jupar uñjäna ukhajja, nayraqatapar killptʼasisaw* akham säna: “Tata, jumatï akankasamänjja, janiw jilajajj jiwkasapänti” sasa. 33  Jupar jachir uñjasasa jupamp chika jutir judionakar jachir uñjasas Jesusajj walpun llaktʼasïna,* chuymapsa chʼalljjtayasirakïnwa. 34  Jupasti sänwa: “¿Kawkirus uchapjjta?” sasa. Jupanakasti “Tata, jutamaya, uñjarakim” sasaw sapjjarakïna. 35  Ukatjja Jesusajj jachaqtʼasïnwa. 36  Ukatwa judionakajj akham sasin sapjjäna: “Uñjapjjam, ¡walpun jupar munasitayna!” sasa. 37  Yaqhepajj sapjjarakïnwa: “Aka jaqejj mä juykhurus nayrat qollarakïnsä,* ukhamajj aka jaqen jan jiwañapatakejj ¿janit kuns lurkaspänjja?” sasa. 38  Ukjjarusti mayampwa Jesusajj chuym chʼalljjtayasïna, ukatjja sepulturaruw saräna. Cheqas uka sepulturajj mä jachʼa putünwa, mä qalampi atkatatarakïnwa. 39  Ukatjja akham sasaw Jesusajj säna: “Uka qal ateqapjjam” sasa. Ukampis jiwirin Marta kullakapajj akham sasaw jupar säna: “Tata, niya thujstatäjjpachawa, pusi uröjjchejjaya” sasa. 40  Jesusajj jupar sarakïnwa: “Jumatï creyïtajja Diosan kʼajkir chʼamapwa uñjäta sasajj ¿janit sisksma?” sasa. 41  Ukatwa jupanakajj uka qal ateqapjjäna. Jesusasti alajjpacharuw uñtäna, sarakïnwa: “Awkiy, nayar istʼatamat yuspärsmawa. 42  Cheqansa nayajj yattwa, jumajj istʼapunistawa. Nayamp chik saytʼatäsipki uka jaqenak laykuw nayajj ukham sista, ukhamat nayar khitanitam creyipjjañapataki” sasa. 43  Ukanak sasasti akham sasaw jupajj jachʼat artʼäna: “¡Lázaro, mistunim!” sasa. 44  Ukatsti jiwatäkäna uka jaqejj mistunïnwa, kayunakas amparanakas telanakamp chʼoqantata, ajanupas mä pañompi chʼoqantata ukhamaw mistunïna. Jesusasti sarakïnwa: “Chʼoqarapjjam, sarnaqarakpan” sasa. 45  Marian ukar jutir judionakatjja, kuntï Jesusajj lurkäna uk uñjasajj waljaniw jupar confiyapjjäna.* 46  Yaqhep judionakajj fariseonakan ukaruw sarapjjäna, kunanaktï Jesusajj lurkäna ukanakwa yatiyapjjäna. 47  Ukatwa jilïr sacerdotenakasa fariseonakas Sanedrinankir* jaqenakar tantachthapipjjäna, sapjjarakïnwa: “¿Kamachañänisa? Aka jaqejj walja milagronakwa luri. 48  Ukhamak jaytañäni ukhajja taqeniw jupar confiyapjjani,* ukatjja romanonakaw jutasin lugarassa* markassa aparapjjestani” sasa. 49  Caifás sutini mä jaqew jupanak taypinkaskäna. Jupaw uka maran jachʼa jilïr sacerdotënjja, jupanakarojj sänwa: “Jumanakajj janiw kunsa yatipktati, 50  janirakiw amuyasipktasa, jumanakatakejj walïspawa mä sapa jaqen marka layku jiwañapajja, markpach tukjatäñat sipansa” sasa. 51  Jupajj janiw pachpa amuyupat uk parlkänti. Niyakejjay uka maranjja jachʼa jilïr sacerdotëchïnjja, Jesusan judionak layku jiwañapatwa jupajj mä profecía arsuskäna. 52  Ukampirus janiw judionak laykukejj jiwañapäkänti, jan ukasti Diosan wawanakapar mayaru tantachthapiñatakiw jupajj jiwañaparakïna, uka wawanakapajj anatatataw uñjasipjjäna. 53  Jupanakajj ukürutpachwa jupar jiwayañatak parlakipapjjäna. 54  Ukhamasti Jesusajj janiw judionak taypin qhan sarnaqjjänti, jan ukasti wasar jakʼan utjki uksanakaruw sarjjäna, Efraín sat markaru. Ukanwa discipulonakamp chik quedasïna. 55  Judionakan Pascua fiestapaw jakʼankjjäna. Ukhamajja markpachankir walja jaqenakaw janïr Pascua qalltkipanjja Jerusalenar makatapjjäna, Leyirjam qʼomachasiñataki. 56  Ukatsti jupanakajj Jesusaruw thaqapjjäna. Templon saytʼatäkasajj akham sasaw jupanakkam parlapjjäna: “¿Kamsapjjtas jumanakajja? ¿Janit jupajj fiestarus jutkani?” sasa. 57  Jilïr sacerdotenakasa fariseonakasa akham sasaw jaqenakar sapjjatayna: “Maynitï Jesusajj kawkinkisa uk yatini ukhajja yatiyapjjetätawa” sasa. Ukjja jupar katuntañatakiw sapjjäna.

Qhanañchäwinaka

Variante: “suma olorani”.
Ukajj “Yatichiri” sañ muni.
Variante: “Gemelo”.
Griego arunjja, “niya tunka phesqani estadionaka”. Mä estadiojj 185 metronakanïnwa.
Variante: “jupamp jakisiriw”.
Griego arunjja, “sartanipkani”.
Jan ukajja, “iyawski”.
Jan ukajja, “iyawskitu”.
Variante: “jakiskäna”.
Variante: “killtʼasisaw; qonqortʼasisaw”.
Griego arunjja, “espiritun walpun llaktʼasïna”.
Griego arunjja, “nayranak jistʼararakïnsä”.
Jan ukajja, “iyawsapjjäna”.
“Sanedrín” siski uka cheq aka Biblian diccionariopan liytʼäta.
Jan ukajja, “iyawsapjjani”.
Ukasti templot parlaski.