Juan 10:1-42

  • Awatirimpi ovej uyunakampi (1-21)

    • Jesusaw suma awatirejja (11-15)

    • “Yaqha ovejanakaw nayan utjarakitu” (16)

  • Templojj Diosar katuyaskäna uka fiestanwa judionakajj Jesusampi jiskhintasipjje (22-39)

    • Walja judionakaw Jesusar jan creyipkiti (24-26)

    • “Ovejanakajasti aruj istʼapjjewa” (27)

    • Yoqajj Awkimpejj mayakiwa (30, 38)

  • Jordán Jawir khurkatanjja waljaniw Jesusar creyipjje (40-42)

10  Ukatjja Jesusajj akham sasaw säna: “Cheqpachapuniw sapjjsma, khititejj ovej uyuru punknam jan mantki, jan ukasti yaqha cheqnam mantki ukajja, lunthatawa, yaqhankir qʼepsuriwa.  Khititejj punknam mantki ukajja, ovejanakan awatiripawa.  Juparuw punku uñjir jaqejj llawiri, ovejanakajj awatirin arupwa istʼapjjaraki. Jupajj sutitkamwa ovejanakapar jawsi, ukatjja anqaruw ansuraki.  Taqpach ovejanakap ansjje ukhajja, jupajj ovejanakan nayraqatap sari, ovejanakas jupar arkapjjarakiwa, awatirin arup uñtʼapjjatap layku.  Mä jan uñtʼatarojj janiw ovejanakajj kunjamatsa arkapkaniti, jan ukasti antisakiw jupat chhuktapjjani, mä jan uñtʼatan arup jan uñtʼapjjatap layku” sasa.  Uka uñachtʼäwimpiw Jesusajj jupanakar parläna, jupanakajj kuntï siskäna uk janiw amuyapkänti.  Ukatwa Jesusajj mayamp akham säna: “Cheqpachapuniw sapjjsma, kawknamtejj ovejanakajj mantapki uka punkojj nayätwa.  Taqe khitinakatï naya lanti jutapki ukanakajja, lunthatäpjjewa, yaqhankir qʼepsurïpjjewa, ukampis ovejanakajj janiw jupanakar istʼapkiti.  Punkojj nayätwa, khititejj naya cheq mantki ukajja salvatäniwa. Jupajj mantaniwa, misturakiniwa, pastonaksa jikjjatarakiniwa.* 10  Ukhamarus lunthatajj janiw inamay jutkiti, jan ukasti lunthatsuñatakiw juti, ukhamarak jiwayañataki, tukjañataki. Nayajj ovejanakan jakapjjañapatakiw jutta, ukhamat walja tiempo jakapjjañapataki. 11  Suma awatirejj nayätwa. Suma awatirejj ovejanak laykuw jakañap* churaraki. 12  Ukampis qollqe layku ovej uñjirejj janiw ovej awatirïkiti, ovejanakas janirakiw jupankkiti. Mä qamaqer* jutaskir uñji ukhajja, ovejanak jaytasaw escapjje. Ukatjja qamaqejj ovejanakwa katuri, qʼalwa chhukutatayaraki. 13  Cheqansa jupajj qollqe laykukiw ovej uñji, janiw ovejanakat llakiskiti. 14  Suma awatirejj nayätwa, ovejanakajar uñtʼastwa, ovejanakajas nayar uñtʼasipjjarakituwa, 15  kunjamtï alajjpachankir Awkejj nayar uñtʼkitu, nayajj Awkir uñtʼkaraktjja ukhama. Nayajj ovejanak laykuw jakañaj* churarakta. 16  ”Yaqha ovejanakaw nayan utjarakitu, janiw aka uyunkirïpkiti, ukhamarus uka ovejanakarojj anakiniñajarakiwa. Uka ovejanakasti arunakaj istʼapjjaniwa, mä sapa tamakïpjjaniwa, mä sapa awatirikiw utjarakini. 17  Ukatwa alajjpachankir Awkejj nayar munasitu, nayajj jakañaj* churta, ukhamat mayamp uk katoqañajataki. 18  Janiw khiti jaqes nayarojj jakañaj apaqkituti, jan ukasti pachpa amtajatwa uk churta. Uk churañatakisa mayamp katoqañatakisa nayajj munañanïtwa. Uka mandamientjja Awkijatwa katoqta”. 19  Uka arunak istʼasajj mä kutimpiw judionak taypin tʼaqjtañajj utjäna. 20  Jupanakatjja waljaniw akham sapjjäna: “Jupajj demonioniwa, loqheratawa. ¿Kunatsa jupar istʼapjjta?” sasa. 21  Yaqhanakasti sapjjarakïnwa: “Demonion mantat jaqejj janiw ukanak parlkaspati. Mä demoniojj janiw juykhunakar nayrat qollkaspati,* ¿janicha?” sasa. 22  Ukapachasti templojj Diosar katuyaskäna uka fiestaw Jerusalén markan utjäna, juyphipacharakïnwa. 23  Jesusajj templonwa Salomonan Machonanakapa sat cheqan sarnaqaskäna. 24  Judionakaw jupar muyuntasin akham sapjjäna: “¿Kunapachkamarak nanakar* pächasiyapjjetätasti? Jumatejj Cristöstajja, qhanay sapjjeta” sasa. 25  Jesusasti jupanakar sarakïnwa: “Nayajj sisjjapjjsmawa, jumanakajj janiw creyipktati. Kunanaktï nayajj Awkijan sutipjjar luraskta ukanakaw nayjjat qhanañchi. 26  Ukampis jumanakajj janiw ovejanakajäpktati, ukatwa jan creyipktati. 27  Ovejanakajasti aruj istʼapjjewa. Nayajj jupanakar uñtʼtwa, jupanakajj arkapjjarakituwa. 28  Nayaw jupanakarojj wiñay jakañ churta, jupanakajj janipuniw kunapachas tukjatäpkaniti, janirakiw khitis uka ovejanakjja amparajat aparkitaniti. 29  Kuntï Awkijajj nayar churkitu ukajja, taqe kunat sipansa wali valoraniwa, janirakiw khitis uka ovejanakjja alajjpachankir Awkin amparapat aparkaspati. 30  Nayampi Awkimpejj mayakïpjjtwa”* sasa. 31  Judionakajja mä kutimpiw jupar kʼupjañatakejj qalanak irtasipjjäna. 32  Ukatwa Jesusajj jupanakar akham säna: “Alajjpachankir Awkit jutir walja suma luräwinakwa nayajj uñachtʼayapjjsma. ¿Kawkïr luräwitsa jumanakajj kʼupjañ munapjjesta?” sasa. 33  Judionakajj jupar sapjjarakïnwa: “Janiw nanakajj suma luräwinakat kʼupjañ munapksmati, jan ukasti Dios contraw jan wal parltajja, jaqëkasas Diosätwa sasaw parltajja” sasa. 34  Jesusasti jupanakar sarakïnwa: “¿Janit jumanakan Leyiman qellqatäki? Diosajj akham sänwa: ‘Nayajj sapjjsmawa: “Jumanakajj diosanakäpjjtawa”’ sasa. 35  Diosajja arunakapan juchañchat jaqenakarojj ‘diosanakäpjjtawa’ sasaw säna. Qellqatanakajj janiw mayjtʼayatäkaspati. 36  Awkiw nayarojj santor tukuyitu, juparakiw akapachar khitanitu. ¿Nayajj Diosan Yoqapätwa sataj laykuti jumanakajj ‘Dios contraw jan wal parltajja’ sasin sapjjesta? 37  Janitï nayajj Awkijan luräwinakap lurkstjja, jan creyipjjestati. 38  Nayatï ukanak lurstjja, janisay nayar creyipkita, uka luratanakar creyipjjam. Ukhamatwa jumanakajj yatipjjäta, qhan amuyapjjarakïta, alajjpachankir Awkejj nayamp mayakiwa, nayas jupampejj mayakirakïtwa” sasa. 39  Ukatwa jupanakajj mayamp katuntañ yantʼapjjäna, ukampis jupajj jaltjjänwa. 40  Ukhamasti mayampiw jupajj Jordán Jawir khurkatar sarjjäna, kawkintï Juanajj qalltan bautiskäna ukaru. Ukanwa jupajj quedasïna. 41  Ukatjja walja jaqenakaw jupan ukar jutapjjäna, sapjjarakïnwa: “Juanajj janiw mä señalsa lurkänti, ukampis taqe kunanaktï jupajj aka jaqet siskäna ukanakajj cheqäskapunitaynawa” sasa. 42  Ukanjja waljaniw Jesusar confiyañ* qalltapjjäna.

Qhanañchäwinaka

Variante: “jakirakiniwa”.
Jan ukajja, “almap”.
Griego arunjja, “lobor”. Uka animalajj qamaqer jan ukajj zorror uñtatawa, ukampis qamaqet sipansa wali jachʼawa.
Jan ukajja, “almaj”.
Jan ukajja, “almaj”.
Griego arunjja, “nayranak jistʼarkaspati”.
Jan ukajja, “almanakajar”.
Jan ukajja, “mä amtanikïpjjtwa”.
Jan ukajja, “iyawsañ”.