Hechos 19:1-41

  • Pablojj Éfeso markankiwa; yaqhepanakajj mayampiw bautisasipjje (1-7)

  • Pablon yatichatapa (8-10)

  • Janiw demonionakas jarktʼapkänti (11-20)

  • Mä jachʼa jan waltʼäwiw Éfeso markan sarti (21-41)

19  Kunapachatï ukanakajj pasaskäna ukhamarak Apolosajj Corinto markankaskäna ukhajja, Pablojj qollu toqenak pasasaw Éfeso markar saraqäna, ukansti mä qhawqha discipulonakampiw jikisïna.*  Ukatjja akham sasaw jupanakar säna: “¿Creyentëjjapjjayäta ukhajj janit espíritu santo* katoqapkta?” sasa. Jupanakajj sapjjarakïnwa: “Janipuniw nanakajj espíritu santon utjatap istʼapjjerïkti” sasa.  Ukatwa jupajj akham säna: “Ukhamajj ¿kunjam bautismonsa jumanakajj bautisasipjjta?” sasa. Jupanakajj sapjjarakïnwa: “Juanajj yatichkäna ukarjamaw bautisasipjjta” sasa.  Ukatwa Pablojj akham säna: “Juanan bautisatapajj jaqenakan arrepentisipjjatapwa uñachtʼayäna, khititï jupjjar jutki ukaru, mä arunjja Jesusar creyipjjam sasaw jaqenakar säna” sasa.  Uk istʼasasti jupanakajj Tatit Jesusan sutipjjaruw bautisasipjjäna.  Pablojj jupanakar amparamp loqjjatäna ukhajja, espíritu santow jupanakjjar jutäna, yaqha arunakwa parlañ qalltapjjäna, profecianaksa parlapjjarakïnwa.  Taqpachanejj mä tunka payani chachanakäpjjänwa.  Sinagogar mantasasti kimsa phajjsinakaw Pablojj jan ajjsartʼasa* ukan parläna, discursonak arstʼasa Diosan Reinopat* amuytʼayasa.  Yaqhepanakasti chuym qalarayasisajj janiw creyiñ munapkänti, jaqenak nayraqatansa jan walinakwa Diosan Thakipat parlapjjäna, ukatwa Pablojj jupanakan ukat sarjjäna, discipulonakarus jupamp chikaw irpjjäna. Sapürurakiw Tirano sat jaqen escuelapan utjki uka jachʼa utanjja discursonak arstʼirïna. 10  Jupasti pä maraw uka escuelan yatichäna, ukhamatwa Asia provincian jakir taqe judionakasa griegonakas Tatitun arunakap istʼapjjäna. 11  Diosajj Pablon amparapampejj milagronak luraskakïnwa, 12  Pablon pañonakapsa isinakapsa usutanakan ukaruw apapjjäna, ukhamatwa usutanakajj waliptapjjäna, demonionakas mistupjjarakïna. 13  Yaqhep judionakajja demonionak alissusaw sarnaqapjjäna, jupanakajj Tatit Jesusan sutip aytasisaw demonionakar alissuñ munapjjarakïna, akham sasa: “Cheqpachapuniw sapjjsma, Pablojj yatiyki uka Jesusan sutipjjar mistupjjam” sasa. 14  Ukatjja judío mä jilïr sacerdotew utjäna, Esceva sutini. Jupan paqallqo yoqanakapajj uk lurirïpjjarakïnwa. 15  Ukampis demoniojj akham sasaw jupanakar säna: “Nayajj Jesusar uñtʼtwa, khitis Pablojj uksa yatiraktwa, jumanakajj ¿khitïpjjaraktasti?” sasa. 16  Mayakwa demonion mantat jaqejj jupanakar thoqkatäna, jupanakarojj sapa mayniruw atipjäna. Ukatwa uka jaqenakajj qʼala usuchjata jan isiniki uka utat escapjjapjjäna. 17  Éfeso markan jakir judionakasa griegonakasa taqeniw uk yatipjjäna, taqenirakiw wal ajjsarapjjäna.* Tatit Jesusan sutipas jukʼampirakiw jachʼañchasïna. 18  Khitinakatï creyentëjjapjjäna ukanakatjja, waljaniw jutasin juchanakap arsusipjjäna, jan wali luratanakapsa qhan arsusipjjarakïna. 19  Cheqpachansa khitinakatï magianak lurirïpkäna ukanakatjja, waljaniw libronakap mayar apthapisajj taqe jaqenak nayraqatan phichantapjjäna. Uka libronakan preciop jaksupjjäna ukhajja, phesqa tunka waranqa qollqeruw jaksupjjäna. 20  Ukhamaw Jehová* Diosan arunakapajj jiltaskakïna, wali chʼamaniw tukuskarakïna. 21  Ukanakajj pasjjäna ukhajja, Pablojj Macedonia, Acaya toqenakar sarasajj Jerusalenar sarañwa amtäna, sarakïnwa: “Uka markar purisajja Roma marka uñjir sarañajarakiwa” sasa. 22  Ukhamajj yanapirinakapat paniniruw Macedoniar khitäna, Timoteompiru Erastompiru. Jupajj Asia provincianwa mä qhawqha tiempo quedasïna. 23  Uka urunakanjja Diosan Thakipjjatwa mä jachʼa jan waltʼäwejj sartäna. 24  Qollqe metalampi trabajir Demetrio sat mä jaqew utjäna. Jupajj qollqe metalatwa Ártemis* diosan temploparu uñtasit jiskʼa templonak lurirïna, ukhamatwa jupjam trabajirinakarojj wal qollqechäna. 25  Trabajir masinakaparu qollqe metalamp trabajir yaqha jaqenakar tantachtʼasajja, akham sasaw jupajj säna: “Tatanaka, jumanakajj sum yatipjjtajja, jiwasajj aka negociompiw nayrar sartasktanjja. 26  Jumanakajj uñjapjjtawa, istʼapjjaraktawa, aka Pablojj amparampi lurat diosanakajj janiw cheqa diosanakäkiti sasaw walja jaqenakar amtayi, jupanakajj arunakapar creyipjjarakiwa. Ukjja janiw Éfeso markanak lurkiti, jan ukasti taqe Asia provinciansa ukhamarakiw luri. 27  Ukajj janiw walïkiti, jaqenakajj jan walinakwa negociosat parlapjjaspa. Ártemis jachʼa diosan temploparus janis kunäkaspa ukham uñjapjjani. Asia provinciansa oraqpachansa Ártemis diosajj taqenin adoratawa, jichhajj uka Pablon parlatap laykojj janiw jukʼamp jachʼañchatäjjaniti” sasa. 28  Uk istʼasajja jaqenakajj wal colertʼasipjjäna, akham sasaw jachʼat arnaqasipjjäna: “¡Éfeso jaqenakan Ártemis diosapajj wali chʼamaniwa!” sasa. 29  Ukhamajj markankirinakajja wal chʼajjwapjjäna, taqenirakiw teatro manqhar chhukuntapjjäna. Macedonia markankir Gayompiru Aristarcompirojj munkir jan munkir wayuntapjjäna, uka paninejj Pablomp chikaw viajipjjerïna. 30  Pablojj jaqenakan ukaruw mantañ munarakïna, discipulonakajj janirakiw ukar mantayapkänti. 31  Fiestanakampi atipasiñanakamp wakichirinakatjja, yaqhepajj Pablon amigonakapäpjjänwa. Jupanakajj mä ewjja apayasaw Pablorojj uka teatror janipun mantañapatak wal ruwtʼapjjäna, ukhamat jakañap jan aptʼasiñapataki. 32  Cheqansa jaqenakajj may may arnaqasipjjäna, ukan tantachasirinakajj wal chʼajjwapjjatap layku. Ukhamarus jilaparte jaqenakajj janiw kunat tantachasipjjatapsa yatipkänti. 33  Ukhamajj jaqenak taypitwa Alejandror irpsunipjjäna, judionakajj nayraqataruw nuktʼanipjjarakïna. Alejandrojj jaqenakan amuktʼapjjañapatakiw amparamp señal luräna, jupajj jaqenak nayraqatanwa arstʼañ munäna. 34  Jaqenakajj judiötap amuyapjjäna ukhajja, mä arukiw taqenis arnaqasiñ qalltapjjäna, niya pä horaw akham sasin arnaqasipjjäna: “¡Éfeso jaqenakan Ártemis diosapajj wali chʼamaniwa!” sasa. 35  Marka apnaqerejj jaqenakar amuktʼayjjäna ukhajja, akham sänwa: “Éfeso markankir tatanaka, Éfeso markajj jachʼa Ártemis diosan templopan jarkʼaqeripawa, kawkïr estatuatï alajjpachat jalaqtankäna ukan jarkʼaqeripawa, ¿janit taqe jaqenakajj uk yatipki? 36  Taqeniw ukanakan cheqätap yatipjje, ukhamajj paciencianïpjjañamawa, janiw jan amuytʼasisajj kunsa lurapjjañamäkiti. 37  Kunatsa jumanakajj aka chachanak akar apanipjjta, janiw jupanakajj templonakat lunthatasirïpkiti, ni Ártemis diosasatsa jan walinak parlapkiti. 38  Ukhamajj Demetriosa qollqe metalamp trabajir jaqenakas khiti contra quejasiñ munapjjchi ukhajja, yaqha urunakajj tribunalanakajj llawiratäskiwa, proconsulanakas utjarakiwa, ukanakaruw jupanakajj yaqhanak contrajj quejasipjjañapa. 39  Jumanakatï ukat jukʼampi thaqasipkstajja, mä jachʼa tantachäwinwa ukajj leyinakarjam amtasiñapa. 40  Cheqpachansa kunatï jichhürun paski ukanakatjja, marka contra saytʼirinakjam juchañchataw uñjassna, janirakiw kunatsa aka jaqenakajj akan tantachasisin chʼajjwapjje uksa qhanañchirjamäksnati” sasa. 41  Ukanak parlañ tukuyasasti, jupajj tantachasir jaqenakarojj khitanukjjänwa.

Qhanañchäwinaka

Variante: “jakisïna”.
Ukasti Diosan chʼamapa sañ muni.
Variante: “jan jiwtayasisa”.
Jan ukajja, “Gobiernopat”.
Variante: “jiwtayasipjjäna”.
“Jehová” siski uka cheq aka Biblian diccionariopan liytʼäta.
Jan ukajja, “Diana”.