Hechos 13:1-52

  • Misionerotwa Bernabeampir Saulompir khitasi (1-3)

  • Chipre islanwa yatiyasi (4-12)

  • Pisidiankir Antioquía markanwa Pablojj arstʼi (13-41)

  • Yaqha markankir jaqenakaruw yatiyasjjañapäna (42-52)

13  Profetanakampi yatichirinakampiw Antioquía markankir congregacionan utjäna, jupanakajj akïrinakäpjjänwa: Bernabé, Niger sat Symeón, Cirene markankir Lucio, Herodes reyin yatichatäki uka Manaén ukhamarak Saulo.  Jupanakajj Jehová* Diosar adorasipkäna, ayunasipkarakïna ukhajja, akham sasaw espíritu santojj* säna: “Bernabeampir Saulompir nayatak yaqhacharapipjjeta, ukhamat kuna lurañarutï jupanakar jawskta uk lurapjjañapataki” sasa.  Jupanakajj ayunapjjänwa, oracionsa lurapjjarakïnwa, amparampi jupanakar loqjjatasajja khitjjapjjarakïnwa.  Ukhamajj espíritu santon khitataw jupanakajj Seleucia markar saraqapjjäna, uka cheqatwa Chipre islarojj botet sarapjjarakïna.  Salamina sat markar puripjjäna ukhajja, judionakan sinagoganakapanwa Diosan arunakapat yatiyañ qalltapjjäna. Juanaw* jupanakar yanaptʼarakïna.  Uka isla pasasajja, Pafos markaruw puripjjäna, ukansti Bar-Jesús sutini mä judío jaqempiw jikisipjjäna,* jupajj layqasiri jaqënwa, falso profetarakïnwa.  Sergio Paulo sat proconsulamp chikaw jupajj ukankaskäna. Uka proconsulajj suma amuytʼasir jaqënwa, Diosan arunakapsa wal istʼañ munäna, ukatwa jupajj Bernabeampir Saulompir jawsayäna.  Ukampis layqa Elimasajj jupanak contraw saytʼañ qalltäna, ukhamat proconsularojj Tatitur confiyañat* jitheqtayañataki. (Cheqas Elimas sutejj “layqa” sañ muni.)  Pablo satäki uka Saulojja, espíritu santompi phoqtʼataw jupar wal uñkatäna, 10  akham sasa: “Taqe kasta engañonakampi, taqe kasta jan walinakamp phoqantat jaqe, Diablon* wawapa, taqe kunatejj cheqapäki ukan enemigopa, ¿janit Jehová* Diosan cheqa thakinakap qʼewikipañ jaytkäta? 11  Jichhajj Jehová* Diosan amparapaw jumjjanki, juykhuptätawa, janirakiw intin qhanapsa mä qhawqha tiempojj uñjkätati” sasa. Ukaratpachaw urpumpi chʼamakampejj jupar apjjattäna. Jupajj amparat irpayasiñatakiw maynir thaqaskäna. 12  Proconsulasti kunatï paskäna uk uñjasajj creyiñwa qalltäna, Jehová* Diosan yatichäwipat wal musparatap layku. 13  Pablojj jupamp chik saririnakampiw boter sarjjatasin Pafos markat sarjjapjjäna, Panfiliankir Perga markaruw puripjjäna. Juanajj jupanakar jaytasaw Jerusalenar kuttʼjjäna. 14  Ukampirus jupanakajj Pergat sarasipkakïnwa, Pisidiankir Antioquía markaruw puripjjäna. Ukatjja sábado urunwa sinagogar mantasin qontʼasipjjäna. 15  Leyimpi Profetanakan Qellqatanakapampi* liyiñ tukuyasajja, sinagogan pʼeqtʼir jaqenakajj Pablompir Bernabeampiruw akham sasin awisayanipjjäna: “Tatanaka, jilatanaka, jumanakantï jaqenakar chuymachtʼir arunakajj utjchejja, arstʼapjjasmawa” sasa. 16  Pablosti saytʼasisaw amparampi señanak luräna, sarakïnwa: “Tatanaka, israelitanaka ukhamaraki Diosar ajjsartʼir* mayni jaqenaka, istʼapjjam. 17  Aka Israel markan Diosapaw nayra awkinakasar ajllïna, Egipto oraqen forasterjam jakapkäna ukhajja, juparakiw markarojj jachʼañchäna, ampar aytasaw jupanakar uka oraqet apsunïna. 18  Niya pusi tunka maranakaw jupanakarojj wasaran aguantäna. 19  Canaán oraqen paqallqo markanakar tʼunjäna uka qhepatjja, israelitanakaruw uka oraqenakap jupajj churjjäna. 20  Taqe ukanakajj niya pusi patak phesqa tunkani* maranakanwa pasäna. ”Uka qhepatjja juezanakwa jupanakar churäna, Samuel profetkama. 21  Qheparusti mä rey jupanakajj wal mayipjjäna. Ukatwa Diosajj Quis sat chachan Saúl yoqap jupanakar churäna, jupasti Benjamín sat tribunkirïnwa, pusi tunka maranakaw jupanakjjar apnaqarakïna. 22  Jupar reyïñat apaqäna uka qhepatjja, Davidaruw jupanakatakejj reyïñapatak ajllïna. Jupjjat qhanañchasasti, akham sarakïnwa: ‘Jesé chachan David yoqapajj chuymajar purtʼkiriwa, juparakiw taqe kuntï nayajj munkta ukanak lurani’ sasa. 23  Diosajj promesaparjamaw Israel markatakejj mä salvir utjayi, jupajj Davidan wawanakapat jutiri Jesusawa. 24  Jupajj janïr purinkäna ukhajja, Juanajj taqe Israel markpacharuw bautisasipjjañapataki qhan yatiyäna, ukhamat arrepentisipjjatap uñachtʼayapjjañapataki. 25  Juanajj lurañanakapampi tukuyaskäna ukhajja, akham sasaw säna: ‘¿Jumanakajj khitiw sapjjestasa? Janiw nayajj ukäkti. Ukampis mayniw nayan qhepaj jutaski, jupan wiskhup* jararañas janiw nayar waktʼkituti’ sasa. 26  ”Tatanaka, jilatanaka, Abrahanan familiapat jutirinaka, Diosar ajjsartʼirinaka,* aka salvasiñ arunakjja Diosaw jiwasar apayanistu. 27  Ukampis Jerusalenan jakir jaqenakasa marka apnaqerinakapasa janiw jupätapjja amuyapkänti. Juezanakjam juzgasaw kuntï Profetanakan Qellqatanakapajj siski uk phoqapjjäna, ukanakasti sapa sábado urunwa jachʼat liytʼasiraki. 28  Jupar jiwayañatakejj janis kuna juchsa jikjjatapkchïnjja,* jiwayatäpan sasaw Pilator wal mayipjjäna. 29  Ukatjja taqe kunanakatejj jupjjat qellqaskäna ukanak phoqasajja, lawat apaqasaw mä sepulturar uchapjjäna. 30  Ukampis Diosaw juparojj jiwatanak taypit jaktayäna.* 31  Khitinakatï jupamp chikajj Galileat Jerusalenar makatapkäna ukanakaruw jupajj walja urunak uñstarakïna. Jupanakaw jichhajj jaqenakar jupjjat qhanañchasipki. 32  ”Ukhamajj Diosajj nayra awkinakasar mä promesa lurkäna uka toqetwa nanakajj suma yatiyäwinak jumanakar yatiyapjjsma. 33  Khitinakatejj jupanakan wawapäktan ukanakatakiw Diosajj uka arsutaparjam sumpach phoqawayi, ukjja Jesusar jaktayasaw phoqe. Kunjamtï payïr salmon qellqatäki ukhama, ukanjja akham siwa: ‘Jumajj nayan wawajätawa, aka urunwa nayajj juman awkimar tukta’ sasa. 34  Diosarakiw juparojj jiwatat jaktayäna, jupajj janipuniw mayampis jiwiri ñusantiri cuerpon jaqerojj tukjjaniti. Uksti akham sasaw Diosajj säna: ‘Kunjamtï Davidar satäkänjja, ukarjamaw nayajj jumanakar cheqpach munasitaj uñachtʼayapjjäma, uka arunakajj confiykañawa’ sasa. 35  Ukatwa jupajj yaqha salmon akham saraki: ‘Khititï jumat jan jitheqtki ukan cuerpopan ñusantañapjja janiw munkätati’ sasa. 36  Mä toqetjja Davidajj tiempopan jakir jaqenak taypinwa Diosar servïna,* jiwañan iktʼjjäna ukhajja, nayra awkinakapamp chik imantatäjjänwa, cuerpopas ñusantjjarakïnwa. 37  Maysa toqetjja, khitirutï Diosajj jaktaykäna* ukan cuerpopajj janiw ñusantkänti. 38  ”Jilatanaka, ukhamajj ak yatipjjam, juchanakat perdón katoqañajj jupa taypikiw utji, ukaw jichhajj jumanakar yatiyasiski. 39  Moisesan Leyiparjamajja, janiw jumanakajj jan juchani uñjatäpkasmänti, ukampis taqe khitinakatï creyipki ukanakajja Jesús taypiw jan juchani uñjatäpjje. 40  Ukhamajj wal amuyasipjjam, ukhamat kuntï Profetanakan Qellqatanakapajj siski ukanakajj jan jumanakjjar jutañapataki, ukanakan akham siwa: 41  ‘Jiskʼachasir jaqenaka, jumanakajj uñjapjjätawa, musparapjjarakïtawa. Ukatsti ina chʼusaruw tukusipjjäta. Jumanakajj kunanaktï nayajj urunakaman luraskta ukanakjja, janiw creyipktati, maynin phoqatpach yatiyatas janipuniw ukanak creyipktati’ sasa”. 42  Jupanakajj sinagogat mistusipkäna ukhajja, jutir sábado urun ukanakat parlapjjakitaya sasaw jaqenakajj ruwtʼasipjjäna. 43  Ukhamajj sinagogan tantachäwejj tukusjjäna uka qhepatjja, Diosar adorir judionakatsa judionakan religionapar mantir jaqenakatsa waljaniw Pablompir Bernabeampir arkapjjäna. Jupanakajj uka jaqenakampi parlkasajj Diosan wali khuyapayasiñapan* sarnaqasipkakim sasaw chʼamañchapjjäna. 44  Jutir sabadonjja, niya markpachaw Jehová* Diosan arunakap istʼañatakejj tantachasipjjäna. 45  Walja jaqenak uñjasajja, walpun judionakajj colertʼasipjjäna, kunanaktï Pablojj siskäna ukanak contraw jan walinak parlañ qalltapjjäna. 46  Ukatwa Pablompi Bernabeampejj jan ajjsartʼas* jupanakar akham sapjjäna: “Nayraqatajj jumanakaruw Diosan arunakapat parlañajj wakisïna. Jumanakajj janiw uk istʼañ munapktati, wiñay jakañ katoqañataki jan walïpjjatamsa jumanak pachpaw juchañchasipjjtajja, ukatwa nanakajj yaqha markanakar yatiyir sarasipkta. 47  Jehová* Diosajj aka arunakampiw nanakar khitapjjetu: ‘Nayaw jumarojj markanakan mä qhanapjam uttʼaysma, ukhamat oraq tukuykam salvación apañamataki’ sasa”. 48  Uk istʼasajja yaqha markankirinakajj wal kusisipjjäna, Jehová* Diosan arunakaparus jachʼañchapjjarakïnwa. Taqe khitinakatï wiñay jakañatak suma chuymanïpkäna ukanakajj creyentëjjapjjänwa. 49  Jehová* Diosan arunakapas taqe markpachanwa yatiyasiskarakïna. 50  Judionakajja Pablo contra Bernabé contra saytʼapjjañapatakiw Diosar adorir wali yäqat warminakampiru markankir jilïr jaqenakampirojj amtayapjjäna, ukatwa jupanakajj Pablompir Bernabeampirojj jan waltʼayañatak arknaqapjjäna, marka anqäjjkamaw jupanakarojj alissupjjarakïna. 51  Jupanakajj uka jaqenak contraw laqʼa polvonak kayunakapat thalarasipjjäna, Iconio markaruw sarjjapjjarakïna. 52  Discipulonakajj kusisiñampi espíritu santompi phoqtʼatäsipkakïnwa.

Qhanañchäwinaka

“Jehová” siski uka cheq aka Biblian diccionariopan liytʼäta.
Ukasti Diosan chʼamapa sañ muni.
Jupajja Juan Marcosänwa. Hechos 13:13 qellqatanjja, jupatwa parlaskaraki.
Variante: “jakisipjjäna”.
Jan ukajja, “iyawsañat”.
Ukasti kʼarintiri sañ muni.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Leyimpi Profetanakan Qellqatanakapampi” sasinjja, taqpach Hebreo Arut Qellqatanakatwa parlaski.
Variante: “jiwtayasir”.
“450”.
Variante: “jiskhup”.
Variante: “Diosat jiwtayasirinaka”.
Variante: “katjapkchïnjja”.
Griego arunjja, “sartayäna”.
Jan ukajja, “Diosan munañap luräna”.
Griego arunjja, “sartaykäna”.
Variante: “khariptʼayasiñapan”.
“Jehová” siski uka cheq aka Biblian diccionariopan liytʼäta.
Variante: “jan jiwtayasis”.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.