Hechos 11:1-30

  • Pedrojj apostolonakaruw qhanañchi (1-18)

  • Bernabeampi Saulompejj Siriankir Antioquía markankapjjewa (19-26)

    • Discipulonakajj cristianonaka sasin uñtʼatäjjapjjewa (26)

  • Ágabo chachajj manqʼat pistʼañaw utjani sasaw yatiyi (27-30)

11  Yaqha markankir jaqenakasa Diosan arunakap katoqapjjarakiwa sasaw Judeankapkäna uka jilatanakarusa apostolonakarus yatiyapjjäna.  Pedrojj Jerusalenar makatäna ukhajja, circuncisión* toqet saytʼasirinakaw jupa contra parlañ qalltapjjäna,*  akham sasa: “Jan circuncidat jaqenakan utaparuw jumajj manttajja, jupanakamp chikarakiw manqʼtajja” sasa.  Ukatwa Pedrojj jupanakar taqe kunatï paskäna ukanak qhanañchañ qalltäna, akham sasa:  “Nayajj Jope markanwa oración luraskayäta, ukhamaruw mä visión uñjta, ukansti linot lurat mä jachʼa mantelar uñtataw alajjpachat pusi esquinapat nayan ukar warkoqtanïna.  Nayajj uk sumpach uñjjatta ukhajja, oraqenkir pusi kayuni animalanaka, salvaje animalanaka, asirunaka, jararankhunaka,* alajjpachankir jamachʼinaka uñjta.  Ukatjja mä aru istʼarakta, akham siri: ‘¡Pedro, sartam, kharinukusin manqʼantam!’ sasa.  Nayajj akham saraktwa: ‘Janipuniw manqʼantkiristti Tata, kunatï qʼañüki, jan qʼomachatäkaraki ukanakajj janipuniw kunapachas lakajar mantirïkiti’ sasa.  Mayampiw arojj alajjpachat istʼasirakïna, ukampejj pä kutiw istʼasjjäna, akham siri: ‘Kunanaktï Diosajj qʼomachki ukanakarojj jan qʼañuw sasajj sisjjamti sasa. 10  Kunapachatï uka arojj kimsa kuti istʼasjjäna ukhajja, taqe ukanakajj mayampiw alajjpachar aptatäjjäna. 11  Ukhamaruw kimsa chachanakajj purinipjjäna, kawkintï nanakajj alojasipkayäta uka utaru, jupanakajj Cesarea markat khitanitaw nayan ukar jutapjjatayna. 12  Jan akchʼas pächasimti, jupanakamp chik saraskakim sasaw espíritu santojj* nayar situ. Mayni sojjta jilatanakas nayamp chikaw sarapjjäna, uka jaqen utaparuw mantapjjarakta. 13  ”Kunjamsa jupajj utapan saytʼat mä angelar uñjatayna ukwa yatiyapjjetu, uka angelajj akham sasaw jupar satayna: ‘Jope markar mä qhawqha chachanak khitam, Pedro sutimp uñtʼatäki uka Simonar jawsayanim, 14  salvasiñatakejj jumasa familiamasa kunanak lurapjjañamas wakisi ukanak jupaw yatiyätam’ sasa. 15  Kunapachatï nayajj parlañ qalltkta ukhajja, espíritu santow jupanakjjar purïna, kunjamtï qalltan jiwasjjar purinkäna ukhama. 16  Ukatwa kuntï Tatitojj siskäna uk amtta, jupajj akham sirïnwa: ‘Juanajj umampiw bautisäna, ukampis jumanakajj espíritu santomp bautisatäpjjätawa’ sasa. 17  Ukhamasti kuntï Diosajj inak* churki ukwa jupanakajj katoqapjje, kunjamtï Tatit Jesucristor creyirinakajj katoqktan ukhama. Ukhamajj ¿khitïtsa nayajj Diosar jarkʼañatakejja?”. 18  Ukanak istʼasajj janiw jupanakajj kamsjjapjjänsa, Diosarus jachʼañchapjjarakïnwa, akham sasa: “Ukhamajj Diosaw yaqha markankir jaqenakan arrepentisipjjañap muni, ukhamat jakañ katoqapjjañapataki” sasa. 19  Ukhamajj Estebanar jiwayapkäna uka qhepatjja, khitinakatï tʼaqesiyatäsin ananukut uñjasipkäna ukanakajj Fenicia, Chipre, Antioquía uksanakaruw sarjjapjjäna, jupanakajj judío jaqenakarukiw Diosan arunakapat parljjapjjäna. 20  Jupanak taypitjja mä qhawqha chachanakaw Chipre ukhamarak Cirene markanakat Antioquía markar jutapjjäna, griego aru parlir jaqenakaruw parlapjjarakïna, Tatit Jesusan suma yatiyäwinakap qhanañchasa. 21  Ukhamarus Jehová* Diosan amparapaw jupanakampïskäna, ukatjja walja jaqenakaw creyipjjäna, Tatiturus kuttanjjapjjarakïnwa. 22  Jupanakjjat yatiyäwejj Jerusalén markankir congregacionaruw purirakïna, jupanakasti Antioquía markakamaw Bernabear khitapjjäna. 23  Jupajj purïna ukhajja, Diosan wali khuyapayasirïtap* uñjasajj wal kusisïna. Tatitur taqe chuym arkasipkakim sasaw taqe jupanakar chʼamañchtʼäna. 24  Bernabeajj Diosar taqe chuyma confiyiri,* espíritu santomp phoqtʼata ukhamarak suma jaqënwa. Waljaniw Tatitun arkirinakapar yapjjattarakïna. 25  Saulor jikjjatañkam* thaqeriw jupajj Tarso markar saräna. 26  Jupar jikjjatasajja* Antioquía markaruw irpanïna. Ukhamajj marpachaw jupanakamp chikajj congregacionan tantachasipjjäna, walja jaqenakaruw yatichapjjarakïna. Tatitun discipulonakapajj Antioquía markanwa nayraqatajj cristianonaka sasin uñtʼatäjjapjjäna, Diosatwa uka suti katoqapjjäna. 27  Uka urunakanjja mä qhawqha profetanakaw Jerusalenat Antioquía markar saraqapjjäna. 28  Kawkïritejj jupanakat Ágabo satäki ukajja, niyaw oraqpachan wali manqʼat pistʼañajj utjani sasaw espíritu santon yanaptʼatajj yatiyäna. Cheqas Claudion* tiempopanwa ukajj pasäna. 29  Ukatwa discipulonakajj Judean jakir jilatanakar yanaptʼanak apayañ amtapjjäna, qhawqhatï sapa maynin utjkäna ukarjama. 30  Cheqas ukarjamaw lurapjjäna, ukatwa Bernabeampir Saulompir khitasajj uka yanapanak jilïr irpirinakar* apayapjjäna.

Qhanañchäwinaka

“Circuncisión” siski uka cheq aka Biblian diccionariopan liytʼäta.
Jan ukajja, “jupamp jiskhisiñ qalltapjjäna”.
Jan ukajja, “qatatnaqtir animalanaka”.
Ukasti Diosan chʼamapa sañ muni.
Jan ukajja, “gratisak”.
“Jehová” siski uka cheq aka Biblian diccionariopan liytʼäta.
Variante: “khariptʼayasirïtap”.
Jan ukajja, “iyawsiri”.
Variante: “katjañkam”.
Variante: “katjasajja”.
Jupajj Roma markan apnaqeripänwa.
Jan ukajja, “ancianonakar”.