Hebreos 5:1-14

  • Jachʼa jilïr sacerdotenakat sipansa Jesusaw jilïrejja (1-10)

    • Melquisedecjam jachʼa jilïr sacerdote (6, 10)

    • Kunaymanin tʼaqesisaw Diosan Yoqapajj istʼasirïñ yateqäna (8)

    • Jupïpanwa wiñayatak salvasiñajj utji (9)

  • Wawjam jan amuytʼasirïñajj janiw walïkiti (11-14)

5  Kawkïritejj jaqenak taypit jachʼa jilïr sacerdotjam serviñatak uttʼayatäki ukajja, jaqenakar Diosar adorañan yanaptʼañataki uttʼayatawa, ukhamat ofrendanaksa sacrificionaksa juchanak layku loqtañapataki.  Niyakejjay jupa pachpas pantjasirïchejja, jan yatipki pantjatäpkaraki* ukanakarojj sinttʼasiñampiw* uñjaspa.  Jupan pantjasirïtap laykojja, kunjamtï marka laykojj ofrendanak loqtkejja ukhamarakiw juchanakap laykojj ofrendanak loqtañapa.  Janiw mä jaqejj pachpa amtapat jachʼa jilïr sacerdotëkaspati, jan ukasti Diosakiw juparojj jachʼa jilïr sacerdotjam uttʼayaspa, kunjamtï Aaronarojj uttʼaykäna ukhama.  Cristompejj ukhamarakiwa, janiw jupa pachpajj jachʼa jilïr sacerdotjam uttʼayasisajj jachʼañchaskiti, jan ukasti Diosaw juparojj jachʼañchi, akham sasa: “Jumajj nayan wawajätawa, aka urunwa nayajj juman awkimar tukta” sasa.  Yaqha cheqanjja jupajj akham sarakiwa: “Jumaw Melquisedecjam wiñay sacerdotëtajja” sasa.  Cristojj aka oraqen jakkäna ukhajja,* khititejj jiwañat salvkaspäna uka Diosarojj walpun jupajj jachʼat artʼasisa jachtʼasis ruwtʼasïna, mayisirakïna. Diosar ajjsaratap* laykojja oracionapajj istʼatänwa.  Diosan Yoqapäkchïnsa, kunaymanin tʼaqesisaw jupajj istʼasirïñ yateqäna,  ukhamat perfectöjjasinjja, taqe khitinakatï jupar istʼapki ukanakajj jupïpana wiñayatak salvatäpjjañapataki. 10  Diosaw juparojj Melquisedecjam jachʼa jilïr sacerdotëñapatakejj uttʼayi. 11  Cristjjat parlañajj waljaw utjaski, ukampis jumanakar qhanañchañajj chʼamawa, jumanakajj jan istʼasir jaqenakäpjjtawa. 12  Jichhakamajja jumanakajj yatichirëjjapjjañamänwa, ukampis mayampiw Diosan arunakapan qallta yatichäwinakapat jumanakar qalltatpach yatichañajj wakisi. Janiw jumanakatakejj waña manqʼajj wakiskiti, jan ukasti mayampiw lechejj wakisi. 13  Taqe khitinakatejj leche umapki ukanakajja, janiw Diosan cheqa arunakap uñtʼapkiti, jupanakajj wawäsipkatap layku. 14  Ukhamarus waña manqʼajja, jilïr jaqenakatakiwa, jupanakajj sapa kuti amuytʼjjasajja, kunatï walïki jan walïki ukanak amuytʼañjja yateqjjapjjewa.

Qhanañchäwinaka

Jan ukajja, “saranukutäpkaraki”.
Jan ukajja, “munasiñampiw; jan colerasisaw”.
Griego arunjja, “jañchïkäna uka urunakanjja”.
Variante: “jiwtayasitap”.