Hebreos 2:1-18

  • Istʼktan ukanakat jukʼamp sum amuykipañaw wakisi (1-4)

  • Taqe kunaw Jesusar katuyata (5-9)

  • Jesusampi jilanakapampi (10-18)

    • Salvacionar Jachʼa Irpiri (10)

    • Khuyaptʼayasir jachʼa jilïr sacerdote (17)

2  Ukatpï kunanaktï jiwasajj istʼktan ukanakat jukʼamp sum amuykiptʼañajj wakisejja, ukhamat janipun saranukuñasataki.  Niyakejjay angelanak taypi arsut arunakajj wali confiykañächejja, juchachasirinakasa jan istʼasirinakasa cheqaparjam castigo katoqapjjchïnjja,  ¿kunjamarak uka jachʼa salvacionar jan yäqatas laykojj salvasiñänisti? Tatitusaw* uka jachʼa salvacionat parlañ qalltäna, ukatjja khitinakatï jupar istʼapkäna ukanakarakiw uka toqenakat parlapjjestäna.  Ukañkamasti Diosajj señalanakampi, musparkañanakampi, kunayman milagronakampiw qhanañchäna, servirinakaparojj espíritu santo* churasaw munañaparjam qhanañcharakïna.  Nanakajj parlapkta uka oraqjja, mä arunjja jutkani uka oraqjja, janiw Diosajj angelanakar katuykiti.  Mä cheqanjja mä testigojj akham sänwa: “¿Kunarak jaqesti jupat amtasiñamatakisti, jan ukajj kunarak jaqen yoqapasti jupar sum uñjañamatakisti?  Angelanakat sipansa juparojj mä jukʼa minusaruw tukuytajja, ukjjarusti juparojj kʼajkiriruw tukuytajja, jachʼañcharaktajja, juparojj taqe luratanakamjjaruw uttʼaytajja,  taqe kunwa jupar katuyaraktajja” sasa. Ukhamajj Yoqapan kayunakapar taqe kun katuykäna ukhajja, Diosajj janiw kunsa jupar jan katuyasajj jaytkänti. Taqe kunanaktï jupar katuykäna ukanakjja janïraw jichhajj uñjktanti.  Ukampis Jesusarojj uñjtanwa, jupajj angelanakat sipansa mä jukʼa minusar tukuyatänwa. Jichhajj jiwañan tʼaqesitapatjja, jupajj kʼajkirir tukuyatäjjewa, jachʼañchatäjjarakiwa. Jupajj Diosan wali khuyapayasiñapatwa* taqe jaqenak laykojj jiwayat uñjasïna. 10  Taqe kunas Diosar jachʼañchañatakiw utji, jupa taypirakiw taqe kunas utji. Walja wawanakapar jachʼañchañatakejja, salvacionar Jachʼa Irpirïki ukan tʼaqesiñapaw Diosatakejj wakisïna, ukhamat jupanakar salvañatakejj wakichtʼatäñapataki. 11  Jesusasa khitinakarutï jupajj santor tukuyki ukanakasa mä pachpa awkinikïpjjewa, ukatwa jupajj jupanakar “jilanaka” sañjja jan phenqʼaskiti. 12  Jupajj siwa: “Jilanakajaruw nayajj sutimat yatiyäjja, cantonakampiw congregación taypin jachʼañchäma” sasa. 13  Ukatjja sarakiwa: “Juparuw nayajj confiyasëjja” sasa. Mayamp saskakiwa: “Jehová* Diosajj katuykitu uka wawanakamp chikaw nayajj akankaskta” sasa. 14  Ukhamajj niyakejjay “wawanakajj” jañchi cuerponïpjjchejja,* jupajj jañchi cuerponirakïnwa, ukhamat jiwäwipampejja khititï maynirojj jiwañar purtʼasiykaspa ukar tʼunjañataki, mä arunjja Diablor* tʼunjañataki, 15  ukhamarak taqe khitinakatejj jiwañaru ajjsarapjjatap* laykojj taqpach jakäwipan esclavor uñtat jakasipki ukanakar salvañataki. 16  Jupajj janiw angelanakar yanapkiti, jan ukasti Abrahanan wawanakaparuw yanaptʼaski. 17  Ukhamasti jupajj taqe kunanwa “jilanakapjamäna”, ukhamat Diosar serviñatakejj khuyaptʼayasiri,* suma phoqeri, mä jachʼa jilïr sacerdotëñataki, ukhamat jaqenakan juchanakap layku mä wakiskir sacrificio loqtasajja, jaqenakar Diosamp sumankthapiyañataki. 18  Niyakejjay jupajj yantʼat uñjasisajj tʼaqeschïnjja, yantʼan uñjasirinakarojj yanaptʼarakispawa.

Qhanañchäwinaka

“Tatitu” siski uka cheq aka Biblian diccionariopan liytʼäta.
Ukasti Diosan chʼamapa sañ muni.
Variante: “khariptʼayasitapatwa”.
“Jehová” siski uka cheq aka Biblian diccionariopan liytʼäta.
Griego arunjja, “wilani jañchini ukhamäpjjchejja”.
Ukasti kʼarintiri sañ muni.
Variante: “jiwtayasipjjatap”.
Variante: “khariptʼayasiri”.