Hebreos 11:1-40

  • Kunas Diosar confiyañajja (1, 2)

  • Jupanakjamaraki Diosar confiyapjjañäni (3-40)

    • “Maynitejj Diosar jan confiykaspajja, janiw kunäkipansa Diosarojj kusisiykaspati” (6)

11  Diosar confiyañajja,* kuntï suytʼasktan ukajj phoqasipuniniwa sasin jan pächasis suyaña sañ muni, kunanakatï jan uñjatäki ukanakajj cheqapun utjaskatapa* taqe chuyma creyiña sañ munaraki.  Diosar confiyapjjatap* laykuw Diosajj nayra awkinakasat wali sum qhanañchäna.  Diosar confiyapjjatas* laykuw jupan aruparjamajj kunanakatï alajjpachansa aka oraqensa* uttʼayaskäna ukanak amuytanjja, kunanakatï uñjatäki ukanakajja, kunanakatï jan uñjatäki ukanakamp luratawa.  Diosar confiyatap* laykuw Abel chachajj Cainat sipansa jukʼamp valorani sacrificio Diosar loqtäna. Ukham confiyatap* laykurakiw Diosajj ofrendanakap katoqasajj jupan cheqap sarnaqerïtap qhanañchäna. Jupajj jiwatäjjchisa, Diosar confiyatap* laykojj jichhakamas parlaskakiwa.  Diosar confiyatap* laykuw Enoc chachajj jiwaña jan uñtʼañapatakejj aptatäjjäna. Diosan aptatätap laykojja, jupajj janiw kawkinsa jikjjatatäjjänti.* Janïr aptatäkäna ukhajja, Diosajj wali sum jupat qhanañchäna.  Maynitejj Diosar jan confiykaspajja,* janiw kunäkipansa Diosarojj kusisiykaspati. Khititejj Diosar jakʼachaski ukajja, jupan utjatapsa jupar taqe chuyma thaqerinakar pago churirïtapsa creyiñapawa.  Diosar confiyatap* laykuw Noé chachajj jan uñjatäkäna uka toqenakat ewjja arunak Diosat katoqasajj jupar ajjsaräna* ukhamarak familiapar salvañatak mä arca luräna. Diosar confiyatap* laykuw akapachar juchañchäna, ukham confiyatap* laykurakiw cheqap sarnaqerit uñjatäna.  Diosar confiyatap* laykuw Abrahanajj Diosan jawsatajj istʼäna, ukatwa markapat mistusajj herenciat katoqañapäkäna uka lugarar saräna; janis kawkir sarañapsa yatkchïnjja jupajj saränwa.  Diosar confiyatap* laykuw jupajj katoqañapäkäna uka oraqen yaqha markankir jaqjam jakäna. Isaacampi Jacobumpi chikarakiw carpanakan jakäna, jupanakajj Abrahanamp chikarakiw Diosajj arskäna uka herencia katoqapjjañapäna. 10  Abrahanajja kawkïr markatejj cheqpach cimientonïki uka markwa suyäna, uka markajj kunjamänis uk sum amuytʼirisa* uka markan luriripasa Diosawa. 11  Diosar confiyatap* laykurakiw Sara warmejj wali chuymanëjjchïnsa usuriptäna,* jupasti Diosarojj arsutanakapar suma phoqeritwa uñjäna. 12  Ukhamajj mä sapa jaqetakwa wawanakajj jutäna, mä arunjja jan wawanïrjamäjjäna* uka Abrahanatwa wawanakajj jutäna, uka wawanakajj alajjpachankir warawaranakjam waljanïpjjänwa, qota thiyan* utjiri chʼallar uñtata jan jaktʼkañarakïnwa. 13  Taqe jupanakajj jiwañkamaw Diosar confiyapjjäna,* janis Diosan arsutanakap phoqasir uñjapkchïnjja, jayatakwa uñtawayapjjäna, ukanak yatisajj wal kusisipjjarakïna, yaqha markat jutir jaqëpjjatapsa, uka oraqen mä qhawqha tiempo jakirïpjjatapsa taqeniruw yatiyapjjäna. 14  Ukham parlirinakajja, mä lugaranïñ taqe chuyma thaqapjjatapwa uñachtʼayapjje. 15  Jupanakatejj mistunipkäna uka markapat amtasisipkakispäna ukhajja, kuttʼjjapjjaspänwa. 16  Jichhasti jukʼamp suma lugaranïñataki, mä arunjja alajjpach mä suma lugaranïñatakiw chʼamachasisipki. Ukhamajj kunapachatï jupanakajj Diosar artʼasipjje ukhajja, Diosajj janiw jupanakat phenqʼaskiti, Diosasti jupanakatakejj mä markwa wakicharapi. 17  Diosar confiyatap* laykuw Abrahanajj yantʼatäkäna ukhajja, sacrificiotsa loqtkaspa ukhamwa Isaac mä sapa yoqapar loqtäna. 18  Diosajj jupar akham sänwa: “Wawanakama satäpkani ukanakajja Isaacatwa jutani” sasa. Ukham satpachasa Diosan promesap wali kusisit katoqasajj mä sapa yoqapar loqtañwa Abrahanajj yantʼäna. 19  Diosasti yoqaparojj jiwatanak taypit jaktayaspänwa,* uk jupajj sum yatïna, cheqansa wawaparojj jaktankaspas ukhamwa katoqäna, ukasti kunatï jutïrin paskani ukwa uñachtʼayäna. 20  Diosar confiyatap* laykurakiw Isaacajj Jacobumpiru Esaumpirojj kunatï jutïrin paskani ukanak parlas bendisïna. 21  Diosar confiyatap* laykuw Jacobojj jiwañampëjjäna ukhajja, Josean wawanakaparojj sapa maynir bendisïna. Thujrupar thujrtʼasisaw Diosarojj adorarakïna. 22  Diosar confiyatap* laykuw Joseajj jiwañap jakʼäjjäna ukhajja, kunjamsa Israelan wawanakapajj Egiptot mistjjapjjañapäna ukanakat parläna, chʼakhanakapatsa ewjjasirakïnwa.* 23  Moisesan awk taykapajj Diosaruw confiyapjjäna,* ukatwa Moisesarojj naskäna ukhajja, wali suma uñnaqtʼanïtap laykojj kimsa phajjsi imantapjjäna, janirakiw jupanakajj reyin leyiparus ajjsarapkänti.* 24  Diosar confiyatap* laykojja, Moisesajj jachʼäjjäna ukhajj janiw Faraonan phuchapan wawapa sayasiñ munjjänti. 25  Juchanakan mä qhawqha tiempo kusisiñat sipansa, Diosan markapamp chik tʼaqesiñwa ajllïna. 26  Taqe kunatï Egipton utjkäna ukanakat sipansa Ajllitjam* tʼaqesiñaruw jukʼamp valoranit uñjäna, jupajj bendición katoqañjja taqe chuymapuniw suyäna. 27  Diosar confiyatap* laykuw Moisesajj Egipto markat sarjjäna, janiw reyin colerasiñapsa ajjsarkänti,* jan uñjkañ Diosarojj uñjkaspas ukhamaw jupajj jan walinak wali pacienciampi aguantaskakïna. 28  Diosar confiyatap* laykurakiw jupajj Pascua lurayäna, punku marconaksa wilampiw chʼallsuyarakïna, ukhamat Diosan angelapajj jilïr wawanakapar jan jiwarayañapataki. 29  Diosar confiyapjjatap* laykuw israelitanakajj Mar Rojo sat qotjja waña oraqnam pasapjjäna, ukampis egipcionakajj pasañ munapjjäna ukhajja, uka qotanwa jiwarapjjäna. 30  Israelitanakajj Jericó marka paqallqo urunak muytapjjäna ukhajja, Diosar confiyapjjatap* laykuw Jericó markan perqanakapajj allthaptäna. 31  Diosar confiyatap* laykuw prostituta* Rahab warmejj uñaqerinakar suma chuymamp katoqäna, ukatwa jupajj jan istʼasirinakamp chikajj jan jiwkänti. 32  ¿Kunampsa parliristjja? Nayatejj Gedeón, Barac, Sansón, Jefté, David, Samuel, ukhamarak yaqha profetanakampit parlaskakirista ukhajja, tiempow faltitaspa. 33  Diosar confiyapjjatap* laykuw jupanakajj reyinakar atipjapjjäna, cheqapar sarnaqañsa utjayapjjäna, Diosan promesanakapsa katoqapjjäna, leonanakan lakanakapsa jistʼantapjjäna, 34  janiw ninas jupanakar kamachkänti, espadampi jiwayatäñatsa escapapjjänwa, jan chʼamanïpkäna ukhasa wali chʼamanir tukuyatäpjjänwa, nuwasiñajj utjkäna ukhasa janiw ajjsarapkänti,* jupanakar nuwantir jutapkäna uka ejercitonakarus escapayapjjänwa. 35  Yaqhep warminakan familiaranakapajj jaktayatäpjjänwa. Yaqhep chachanakajj tʼaqesiyatpachasa janiw antutatäñ laykojj Diosat jitheqtapkänti, jupanakajj jukʼamp suma jakañar jaktayatäñatakiw ukham lurapjjäna. 36  Yaqhepanakajj jiskʼachata, jawqʼjata ukham yantʼataw uñjasipjjäna, yamas yaqhepanakajj cadenanakampi chinuntata, carcelan llawintata ukhamaw uñjasipjjarakïna. 37  Yaqhepanakajj qalamp kʼupjata, yantʼata, payar kharjata,* espadampi jiwarayata ukhamaw uñjasipjjäna. Yaqhepajj ovej lipʼichita cabra lipʼichit lurat isini, jan kunani, wali llaktʼata, tʼaqesiyata ukhamaw sarnaqapjjarakïna, 38  akapachajj janiw jupanakatakjamäkänti. Jupanakajj wasaranakana, qollunakana, qollu pʼiyanakana, oraq pʼiyanakan imantasisa ukhamaw jakapjjäna. 39  Diosar confiyapjjatap* laykojja, Diosajj taqe jupanakat sum qhanañchäna, jupanakasti janiw Diosan promesanakap phoqasir uñjapkänti. 40  Kunatï jukʼamp sumäki ukwa Diosajj jiwasar churañ amtäna, ukhamat jupanakajj jiwasanakat sipansa jan nayraqatajj perfector tukupjjañapataki.

Qhanañchäwinaka

Jan ukajja, “iyawsañajja”.
Jan ukajja, “kunanakatï jan uñjatäki ukanakajj wali qhan utjaskatap yatisina”.
Jan ukajja, “iyawsapjjatap”.
Jan ukajja, “iyawsapjjatas”.
Jan ukajja, “jupan aruparjam tiemponakajj”.
Jan ukajja, “iyawsatap”.
Jan ukajja, “iyawsatap”.
Jan ukajja, “iyawsatap”.
Jan ukajja, “iyawsatap”.
Variante: “uñjatäjjänti”.
Jan ukajja, “jan iyawskaspajja”.
Jan ukajja, “iyawsatap”.
Variante: “jiwtayasïna”.
Jan ukajja, “iyawsatap”.
Jan ukajja, “iyawsatap”.
Jan ukajja, “iyawsatap”.
Jan ukajja, “iyawsatap”.
Jan ukajja, “uka markan arquitectopasa”.
Jan ukajja, “iyawsatap”.
Jan ukajja, “wawanïñatak chʼam katoqäna”.
Griego arunjja, “niya jiwirjamäjjäna”.
Variante: “qota lakan”.
Jan ukajja, “iyawsapjjäna”.
Jan ukajja, “iyawsatap”.
Griego arunjja, “sartayaspänwa”.
Jan ukajja, “iyawsatap”.
Jan ukajja, “iyawsatap”.
Jan ukajja, “iyawsatap”.
Jan ukajja, “kunjamsa cuerpop imapjjañapäna uksa ewjjasirakïnwa”.
Jan ukajja, “iyawsapjjäna”.
Variante: “leyipatsa jiwtayasipkänti”.
Jan ukajja, “iyawsatap”.
Griego arunjja, “Cristjam”.
Jan ukajja, “iyawsatap”.
Variante: “janiw reyin colerasiñapatsa jiwtayaskänti”.
Jan ukajja, “iyawsatap”.
Jan ukajja, “iyawsapjjatap”.
Jan ukajja, “iyawsapjjatap”.
Jan ukajja, “iyawsatap”.
Ukasti chachanakampi qollqe layku ikintasir warmi sañ muni.
Jan ukajja, “iyawsapjjatap”.
Variante: “janiw jiwtayasipkänti”.
Jan ukajja, “jiskʼa jiskʼa kharinoqata”.
Jan ukajja, “iyawsapjjatap”.