Efesios 3:1-21

  • Diosan imantat amtapajj yaqha markankir jaqenakamppachatakiwa (1-13)

    • Yaqha markankir jaqenakajj Cristomp chikaw herencia katoqapjjani (6)

    • Diosan wiñay amtapa (11)

  • Pablojj Éfeso markankirinakan wali amuytʼasirïpjjañapatakiw oración luri (14-21)

3  Naya Pablojj Cristo Jesús layku ukhamaraki kawkïrinakatejj yaqha markankirïpkta ukanak laykuw carcelan llawintat uñjasta.  Jumanakajj istʼapjjtawa, nayajj jumanakar yanaptʼañatak uttʼayatätwa, ukhamat Diosan wali khuyapayasiñap* katoqapjjañamataki.  Jïsa, Diosaw nayarojj imantat amtap qhanañchitu, kunjamtï mä qhawqha arunakamp qellqanipkayäsmajj ukhama.  Aka qellqat liytʼasaw qhawqsa nayajj Cristjjat Diosan imantat amtap yatta uk sum amuyapjjäta.  Nayra tiemponakanjja, jaqenakarojj janiw uka imantat amtat yatiyaskänti, kunjamtï jichhajj santo apostolonakarusa profetanakarusa espíritu santo* taypejj yatiyaski ukhamjja.  Diosan uka imantat amtapajj akawa: yaqha markankir jaqenakajja, Cristo Jesusamp mayakïpjjatap layku ukhamaraki suma yatiyäwinak laykuw Cristomp chikajj herencia katoqapjjani, cuerpon partenakapäpjjarakiniwa. Diosan promesapan phoqasitapsa nanak chikarakiw katoqapjjani.  Nayajj Diosan wali khuyapayasirïtapatwa* imantat amtanakapan serviripätjja. Chʼamaparjamarakiw nayajj uka jachʼa khuyapayasiñapjja mä bendicionar uñtat katoqta.  Kawkïritejj taqpach santo jilatanakat jiskʼäki ukat sipansa nayajj jukʼamp jiskʼätwa. Ukhamäkipansa Diosajj wal nayat khuyapayasitu,* ukhamat Criston jan jaktʼkañ bendicionanakapat parlir suma yatiyäwinakjja yaqha markanakar yatiyañajataki,  ukhamarak kunjamsa taqe kun luriri Diosajj nayra tiempotpach imantat amtap phoqasiyaski uk taqenir uñjayañajataki. 10  Ukajj lurasiwa, ukhamat Diosan yatiñapajj kunayman toqet uñachtʼayaski ukanakajj alajjpachankir gobiernonakarusa jilïrinakarus jichhajj congregación taypi yatiyasiñapataki, 11  kunjamtï Diosajj wiñay amtaparjam Cristo Jesús Tatitus taypejj phoqañ amtkäna ukarjama. 12  Jupar confiyatasatwa* qhana arunakamp jan ajjsartʼas* parltanjja, Diosarus taqe confianzampi jakʼachastanjja. 13  Ukatwa nayajj mayipjjsma: jumanak layku tʼaqesiñanakan uñjasitajatjja, jan aynachtʼapjjamti. Nayan tʼaqesitanakajajj jumanakar jachʼañchañatakiwa. 14  Ukatwa nayajj alajjpachankir Awki nayraqatan killptʼasta.* 15  Jupïpanwa taqe familianakajj alajjpachansa aka oraqensa utji. 16  Nayajj Diosaruw oración lurta, ukhamat jupajj jachʼa Diosätap laykojja, espiritup taypi jumanakan chuymanakamar chʼamañchañapataki, 17  ukhamataraki Cristor confiyapjjatamatjja,* jumanak taypin munasiñajj utjki ukamp chika Cristojj chuymanakaman jakañapataki. Nayajj oración luraraktwa, jumanakajj mä jachʼa arbolar uñtat suma saphintatäpjjañamataki ukhamarak suma saytʼatäpjjañamataki. 18  Ukhamat jumanakajj taqe santo jilatanakamp chika, qhawqchʼäkitejj cheqa yatichäwinakajj anchorusa, largorusa, altorusa, manqharusa uk sum amuytʼapjjañamataki, 19  Criston munasiñapsa uñtʼapjjañamataki. Jupan munasiñap uñtʼañaw kun uñtʼañat sipansa jukʼamp wali wakisirejja, ukhamatwa kunanaktï Diosajj churki ukanakamp phoqtʼatäpjjäta. 20  Diosan chʼamapajj jiwasampïskatap laykojja, taqe kunanaktï mayktan jan ukajj amuyktan ukanakat sipansa jukʼampinakwa luraspa. 21  Diosasti congregación taypisa Cristo Jesús taypisa wiñayansa wiñayapataki jachʼañchatäpan. Amén.*

Qhanañchäwinaka

Variante: “khariptʼayasiñap”.
Ukasti Diosan chʼamapa sañ muni.
Variante: “khariptʼayasirïtapatwa”.
Variante: “khariptʼayasitu”.
Jan ukajja, “iyawsatasatwa”.
Variante: “jan jiwtayasis”.
Variante: “killtʼasta; qonqortʼasta”.
Jan ukajja, “iyawsapjjatamatjja”.
Jan ukajja, “Ukhamäpan”.