Apocalipsis 5:1-14

  • Paqallqo selloni mä rollo (1-5)

  • Corderojj rollo katoqe (6-8)

  • Corderow rollo jistʼarañatak derechonejja (9-14)

5  Khititejj tronon qontʼatäskäna uka Diosan kupi amparapanjja, purapäjjar qellqata, paqallqo sellompi wali suma segurat mä rollo uñjta.  Ukatjja mä chʼamani angelaruw uñjarakta, jupajj akham sasaw wali jachʼat yatiyaskäna: “¿Khitis uka rollo jistʼaraspa, sellonakapsa apaqaspa?” sasa.  Uka rolljja janiw khitis alajjpachansa, ni oraqensa, ni oraq manqhansa jistʼarirjamäkänti, ni uñjjatirjamäkänsa.  Niyakejjay uka rollo jistʼarañatakisa uñjjatañatakisa jan khitis utjkchïnjja, nayajj walpun jachayäta.  Ukampis jilïr irpirinakat* maynïriw akham situ: “Jan jachamti. Judá tribunkir Leonajja, mä arunjja Davidat jutirïki ukajja atipjiwa, ukhamat rollompi paqallqo sellonakapampi jistʼarañataki” sasa.  Trono taypinsa, pusi querubín angelanak taypinsa, jilïri irpirinak* taypinsa, kharinukutjam mä corderoruw uñjta. Uka corderojj paqallqo wajjranakani paqallqo nayranakanïnwa. Uka nayranakapajj Diosan paqallqo espiritunakapawa, taqe aka oraqpachar khitatäpjjarakiwa.  Uka corderojja, tronon qontʼatäskäna uka Diosar jankʼak jakʼachasisaw kupi amparapat rollo katoqäna.  Corderojj uka rollo katoqäna ukhajja, pusi querubín angelanakasa, pä tunka pusini jilïr irpirinakasa* Corderon nayraqataparuw killptʼasipjjäna.* Uka jilïr irpirinakajja,* sapa mayniw mä arpanïna, sapa maynirakiw incienson phoqantat qori platonakanïpjjäna. (Uka inciensojj santo jilatanakan oracionanakapawa.)  Jupanakajj akham sasaw mä machaq canto cantapjje: “Jumaw rollo katoqañatakisa jistʼarañatakisa derechonïtajja. Sacrificiot loqtasisajj jumaw wilamampejj taqe tribunkir jaqenaka, kunayman aru parlirinaka, taqe kasta jaqenaka, markanaksa Diosatak altajja. 10  Jumarakiw jupanakarojj jiwasan Diosasatakejj reyinakaru sacerdotenakaru tukuytajja, ukhamat aka oraqjjarojj reyinakjam apnaqapjjañapataki” sasa. 11  Ukatsti nayajj tronor muyuntat walja angelanakaru, querubín angelanakaru, jilïr irpirinakampiruw* uñjta, arunakapsa istʼaraktwa. Jupanakajj walja tunka waranqäpjjänwa,* waranq waranqapunïpjjänwa, 12  akham sasaw jachʼat sapjjarakïna: “Kharinukut Corderojja, munañanïñatakisa, qamirïñatakisa,* yatiñanïñatakisa, chʼamanïñatakisa, respetatäñatakisa, jachʼañchatäñatakisa, bendisitäñatakisa derechoniwa” sasa. 13  Ukatsti alajjpachana, aka oraqena, oraq manqhana, lamar qotana taqe jakirinakaruw istʼta, taqe kunatejj qotan utjki ukanakarus ukhamaraki. Taqe jupanakajj akham sapjjänwa: “Khititejj tronon qontʼatäki uka Diosasa Corderosa wiñayans wiñayapatak bendisitäpjjpan, respetatäpjjpan, jachʼañchatäpjjarakpan, chʼamanïñas jupanakampïpan” sasa. 14  Pusi querubín angelanakajja, “¡amén!”* sasaw sapjjäna. Jilïr irpirinakajj* killptʼasisaw* Diosar adorapjjarakïna.

Qhanañchäwinaka

Jan ukajja, “ancianonakat”.
Jan ukajja, “ancianonak”.
Jan ukajja, “ancianonakasa”.
Variante: “killtʼasipjjäna; qonqortʼasipjjäna”.
Jan ukajja, “ancianonakajja”.
Jan ukajja, “ancianonakampiruw”.
Jan ukajja, “tunka waranqanakatsa tunka waranqanaka”.
Variante: “wali utjirinïñatakisa”.
Jan ukajja, “¡ukhamäpan!”.
Jan ukajja, “Ancianonakajj”.
Variante: “killtʼasisaw; qonqortʼasisaw”.