Apocalipsis 16:1-21

  • Diosan colerasiñapamp phoqantat paqallq platonaka (1-21)

    • Oraqjjaruw warjjati (2), lamar qotjjaruw warjjati (3), jawiranakjjaru ukhamarak uma jalsunakjjaruw warjjati (4-7), intiruw warjjati (8, 9), salvaje animalan tronoparuw warjjati (10, 11), Éufrates sat jachʼa jawirjjaruw warjjati (12-16), aireruw warjjati (17-21)

    • Armagedón lugaran Diosan guerrapa (14, 16)

16  Ukatjja santuariot mä jachʼa aru istʼta, paqallq angelanakarojj akham sasaw jachʼat artʼanïna: “Sarapjjam, Diosan colerasiñapamp phoqantat paqallq platonakjja oraqer warjjatanipjjam” sasa.  Nayrïr angelajj sarasaw platop oraqjjar warjjatäna. Ukatjja khitinakatejj salvaje animalan marcapamp marcatäpkäna, estatuaparus adorapkarakïna uka jaqenakarojj tʼaqesiyiri jan wali llagaw* tʼaqesiyäna.  Payïri angelajj lamar qotjjaruw platop warjjatarakïna. Uka lamar qotajj mä jiwat jaqen wilaparjamaw tuküna, lamar qotan taqe jakirinakas* qʼalaw jiwarapjjarakïna.  Kimsïri angelajja jawiranakjjaru ukhamaraki uma jalsunakjjaruw platop warjjatäna. Ukanakajj wilaruw tukurakïna.  Umanakjjar munañanïkäna uka angelarojj akham sir istʼarakta: “Jumajj jakasktawa, nayratpachwa jakasktajja, jan jaytjasiri Diosarakïtawa, jumaw cheqaparjam lurirïtajja, ukatwa ukanak lurañ amttajja.  Jupanakajj santo jilatanakana ukhamarak profetanakan wilapwa wartapjjäna, ukatwa jumajj jupanakar wil umaraytajja. Jupanakajj ukatakïpjjapunïnwa” sasa.  Altaratjja akham arunak istʼarakta: “Jïsa, Taqe Chʼamani Jehová* Dios, kunanaktï juezjamajj amtkta ukanakajj cheqapawa, confiykañarakiwa” sasa.  Pusïr angelajj intiruw platop warjjatäna, intirojj jaqenakar ninamp nakharayañapatakiw chʼamajj churasirakïna.  Jaqenakajj wali calorampi nakharayataw uñjasipjjäna, ukampis jupanakajj uka plaganakjjar munañanïki uka Diosan sutip contraw jan wal parlapjjäna, janiw arrepentisipkänti, ni Diosarus jachʼañchapkänti. 10  Phesqër platojj salvaje animalan tronopar warjjatatänwa. Reinopajj qʼala chʼamaktʼayatänwa, jaqenakasti tʼaqesipjjatap laykojj lajjranakapsa tʼururasipjjänwa, 11  ukampis tʼaqesipjjatap laykusa, llaganakanïpjjatap* laykusa alajjpachankir Dios contraw jan wal parlapjjäna, janiw luratanakapatsa arrepentisipkänti. 12  Sojjtïr angelajj Éufrates sat jachʼa jawirjjaruw platop warjjatäna, uka jawirajj qʼal wañsurakïna, ukhamatwa inti jalsu toqet jutir reyinakataki thakejj wakichasïna. 13  Ukatjja dragonampiru, salvaje animalampiru, falso profetampiruw uñjta, lakanakapatjja kimsa qʼañu yatiyäwinakaw* mistunïna, ukanakajj kʼayranakar* uñtasitänwa. 14  Uka yatiyäwinakajj demonionakan amuytʼayatawa, oraqpachankir reyinakaw ukanak istʼapjjaraki. Uka yatiyäwinakajj señalanakwa lurapjje, ukhamat reyinakarojj Taqe Chʼamani Diosan jachʼa urupan guerrajj apaskani ukar tantachthapiñataki. 15  “Nayajj lunthatar uñtataw jutaskta. Maynitejj uñnaqaskchi, isipsa sum uñjaskarakchejja, kusisitäpan. Jupatejj ukham luranejja, janiw jan isinejj uñjaskaniti, janirakiw jaqe nayraqatansa mä phenqʼa uñjaskaniti”. 16  Uka qʼañu yatiyäwinakajja, Hebreo arun Armagedón* sat lugararuw reyinakar tantachthapïna. 17  Paqallqöri angelajj aireruw platop warjjatäna. Ukatjja mä aruw santuariota, mä arunjja tronot akham sasin jachʼat artʼanïna: “¡Phoqasjjewa!” sasa. 18  Ukatjja lliju llijunakampi, arunakampi, qʼejjo qʼejjonakampiw utjäna, ukjjarojj mä jachʼa terremotow sartarakïna, uka terremotojj wali chʼamanïnwa, wali jachʼarakïnwa, jaqejj aka oraqen luratäkäna ukhatpachajj janiw ukhamajj utjkänti. 19  Jachʼa markajj kimsaruw jaljtäna, nacionanakan markanakapajj allthapitarakïnwa, Jachʼa Babilonias Dios nayraqatan amtatarakïnwa, ukhamat vino copa jupar churasiñapataki, uka copajj Diosan jachʼa colerasiñapamp sasiwa. 20  Taqe islanakajj escapjjapjjänwa, qollunakas chhaqarjjapjjarakïnwa. 21  Jaqenakjjarojj jachʼa chhijchhinakaw* alajjpachat purintarakïna, sapa mä chhijchhejj mä talento* qollqjam jathïnwa. Uka plagajj wali jachʼapunïnwa, ukatwa uka plagan utjatapatjja jaqenakajj Dios contra jan wal parlapjjäna.

Qhanañchäwinaka

Variante: “ulceraw”. Ukajja llejjtir uñtasitawa.
Jan ukajja, “jakir almanakas”.
“Jehová” siski uka cheq aka Biblian diccionariopan liytʼäta.
Variante: “ulceranakanïpjjatap”. Ukajja llejjtir uñtasitawa.
Griego arunjja, “qʼañu espiritunakaw”.
Variante: “jampʼatunakar”.
Griego arunjja, Har-Magedón. Ukasti hebreo arutwa juti, “Meguidó Qollu” sañ munaraki.
Variante: “granizonakaw”.
Griegonakan mä talento qollqepajj 20.4 kilogramonïnwa. “Talento” siski uka cheq aka Biblian diccionariopan liytʼäta.