Apocalipsis 14:1-20

  • Corderompi 144.000 ajllitanakampi (1-5)

  • Kimsa angelanakan yatiyäwinakapa (6-12)

    • Alajjpachan jalnaqaskir angelasti suma yatiyäwinakaniwa (6, 7)

  • Khitinakatejj Tatitumpi mayakïsin jiwapki ukanakajj kusisipjjpan (13)

  • Pä cosechaw oraqet apthapisi (14-20)

14  Ukatjja Corderoruw Sión Qollu patjjan saytʼat uñjta, jupamp chikajj pataka pusi tunka pusini waranqaniruw* uñjarakta, jupanakan paranakapanjja jupan sutipampi Awkipan sutipampi qellqatänwa.  Alajjpachat wal suynanir istʼarakta, ukajj walja umanakjama ukhamarak qʼejjo qʼejjonakjamaw wal suynäna. Nayajj istʼkayäta ukajja, cantirinakas arpanakapamp tuktʼasis cantapkaspa ukhamänwa.  Mä machaq cantökaspas ukhamwa jupanakajj trono nayraqatana, pusi querubín angelanak nayraqatana ukhamaraki jilïr irpirinak* nayraqatan cantapjjäna. Janiw khitis uka machaq canto cantirjamäkänti, jan ukasti khitinakatejj oraqet alatäpkäna uka pataka pusi tunka pusini waranqanikiw* cantapjjäna.  Jupanakajj janiw warminakamp qʼañuchasipkänti, cheqansa virgen tawaqonakjamäpjjänwa. Kawkirutejj Corderojj sarki ukaruw jupanakajj arkapjjarakïna. Diosatakisa Corderotakisa nayrïr achunakjam jaqenak taypit alatäpjjänwa,  janirakiw lakanakapanjja kuna engaños utjkänti, ni kuna manchas jupanakan utjkänti.  Alajjpachan jalnaqaskir mä angelaruw uñjarakta. Jupajj wiñay suma yatiyäwinakanïnwa, ukhamat oraqenkirinakaru, taqe markankirinakaru, tribunkirinakaru, kunayman parlani jaqenakaru, kunayman kasta jaqenakaru yatiyañataki.  Uka angelajj akham sasaw jachʼat arnaqasïna: “Diosar ajjsarapjjam,* jachʼañchapjjarakim, jaqenakar juzgañ horasajj purinjjewa. Ukhamajj khititejj alajjpachsa, oraqsa, lamar qotsa, uma jalsunaksa lurki uka Diosar adorapjjam” sasa.  Yaqha payïri angelaw akham sasin arktanïna: “¡Atipjatäjjewa! ¡Jachʼa Babiloniajj atipjatäjjewa! Jupaw qʼañu jucha* wal lurañ munatapampejj vinökaspas ukham taqe markanakar umantayäna” sasa.  Yaqha kimsïri angelaw akham arnaqasis jupanakar arktanïna: “Maynitejj salvaje animalarusa estatuaparusa adorani, paraparusa amparaparusa marcayasini ukhajja, 10  Diosan colerasiñ vinopjja umantarakiniwa, mä arunjja colerasiñ copapar jan kunamp kitantasin wartʼatäki uka vinopwa umantani. Santo angelanak nayraqatansa Cordero nayraqatansa ninampi azufrempi tʼaqesiyatäniwa. 11  Jupanakan tʼaqesipjjatapatjja, jewqʼejj* wiñayans wiñayapatakiw mistuni. Khitinakatejj salvaje animalarusa estatuaparus adorapki, sutipampi marcatas uñjasipki ukanakajja, janiw urus ni arumas samartʼapkaniti. 12  Ukhawa santo jilatanakana, mä arunjja khitinakatejj Diosan mandamientonakap phoqapki Jesusar confiyas* jakapkaraki ukanakan aguantapjjañapajj wakisini”. 13  Alajjpachat akham siri mä aru istʼarakta: “Akanak qellqam: khitinakatejj aka tiempot uksarojj Tatitumpi mayakïsin jiwapki uka jiwatanakajj kusisipjjpan. Jïsa, siw espiritojja, jupanakajj luratanakapat samarapjjpan, luratanakapajj jupanakamp chikäskiwa” sasa. 14  Ukatjja mä janqʼo qenay uñjta. Uka qenay* patjjanjja, jaqen yoqaparjamaw qontʼat uñjta, pʼeqepanjja mä qori corona asjjatatänwa, amparaparojj mä ari yawiñas* aptʼasitarakïnwa. 15  Yaqha angelaw templon santuariopat mistunirakïna, jupajj qenayjjan* qontʼatäkäna ukarojj akham sasaw wali jachʼat artʼäna: “Yawiñamampi* yawthapiñ qalltam, cosecha apthapiñ horasajj purinjjewa, oraqenkir yapojj suma poqoratäjjewa” sasa. 16  Ukatjja qenay* patjjan qontʼatäkäna ukaw oraq yawthapïna,* ukhamatwa oraqejj yawthapitäna. 17  Yaqha angelarakiw alajjpachankir templon santuariopat mistunïna, jupajj mä ari yawiñas* aptʼatarakïnwa. 18  Yaqha angelaw altarat mistunirakïna, jupajj ninjjaru munañanïnwa. Khititejj ari yawiñanïkäna* ukarojja, akham sasaw wali jachʼat artʼarakïna: “Ari yawiñamampi yawthapiñ qalltam, oraqenkir uvas cosecha yawthapim, uvasanakajj suma poqoratäjjewa” sasa. 19  Ukatjja uka angelajj oraqe yawthapïna. Oraqenkir uvas yapu yawthapisajja, uvas chʼirwañ jachʼa lugararuw jaqontäna, ukajj Diosan colerasiñapamp sasiwa. 20  Uvasanakajj marka anqäjjan takitänwa. Uka uvas chʼirwañ lugaratjja, caballonakan jakimapkamaw wilajj mistüna, niya kimsa pataka kilometronak* ukchʼaruw wilajj saratatarakïna.

Qhanañchäwinaka

“144.000”.
Jan ukajja, “ancianonak”.
“144.000”.
Variante: “Diosat jiwtayasipjjma”.
“Qʼañu jucha” siski uka cheq aka Biblian diccionariopan liytʼäta.
Variante: “jeqʼejj”.
Jan ukajja, “kunjamtï Jesusajj Diosar confiykäna ukham confiyas”.
Variante: “chʼiwi”.
Variante: “ari segaderas”.
Variante: “chʼiwjjan”.
Variante: “Segaderamampi”.
Variante: “chʼiwi”.
Variante: “llawthapïna”.
Variante: “ari segaderas”.
Variante: “ari segaderanïkäna”.
Griego arunjja, “1.600 estadionaka”. Mä estadiojj 185 metronakaniwa.