Apocalipsis 11:1-19

  • Pä testigonaka (1-13)

    • Llakisiñ isimpi isthapitanakajj 1.260 urunakanwa profecía arunak qhanañchapjje (3)

    • Testigonakajj jiwayatäpjjewa, jiwat cuerponakapajj janiw sepulturar imatäkiti (7-10)

    • Kimsa uru chikatani pasatatsti jaktayatäpjjewa (11, 12)

  • Payïri tʼaqesïwejj pasjjewa, kimsïri tʼaqesïwiw jutaski (14)

  • Paqallqöri trompeta (15-19)

    • Diosasana ukhamarak Cristopan Reinopa (15)

    • Oraqe tukjasipki ukanakajj tʼunjatäpjjaniwa (18)

11  Ukatjja mä varar uñtasita* mä soqosa lawa churapjjetäna, akham sasa: “Sartam, ukatjja Diosan templopankir santuariopampi altarampi, ukan adoririnakampir midtʼam.  Templon santuariop anqäjjankki uka patiopsti, ukhamak jaytam, janirak midtʼamti. Uka patiojj markanakar churatawa, jupanakaw pusi tunka payani phajjsinakajj santo markarojj takichasipjjani.  Nayaw pä testigojarojj llakisiñ isimpi isthapit khitanëjja, ukhamat waranqa pä pataka sojjta tunkani* urunak profecía arunak qhanañchapjjañapataki”.  Uka pä testigojj pä olivo arbolampi pä candelabrompi sasipjjewa, oraqen Tatitupäki uka nayraqatankapjjarakiwa.  Maynitejj jupanakar usuchjañ munani ukhajja, jupanakan lakanakapat ninaw mistuni, ukampirakiw enemigonakapar tukjani. Maynitejj jupanakar usuchjañ munani ukhajja, ukham jiwayataw uñjasini.  Jupanakajj alajjpach jistʼantañatakejj munañanïpjjewa, ukhamat profecía arunak parlapki uka urunakanjja jallojj jan puriñapataki. Um wilar tukuyañatakisa oraqer kunayman plaganakampi walja kuti usuchjañatakis munañanïpjjewa.  Qhanañchañ tukuyapjjani ukhajja, mikʼayat* mistunir salvaje animalaw jupanak contrajj nuwasini, jupanakar atipjasaw jiwayarakini.  Jiwat cuerponakapajj jachʼa markan jachʼa thakipankapjjaniwa, uka jachʼa markajj Sodoma markampi Egipto markampi sasiwa, ukanwa jupanakan Tatituparojj lawar chʼakkatasajj* jiwayapjjarakïna.  Ukatjja kunayman kasta jaqenakasa, tribunkirinakasa, kunayman aru parlirinakasa, markankir jaqenakasa jupanakan jiwat cuerponakapjja, kimsa uru chikataniw uñchʼukipjjani. Janirakiw jiwat cuerponakapjja sepulturar imapjjañapsa munapkaniti. 10  Uka pä profetanakan jupanakar wal tʼaqesiyapjjatapatjja, oraqen jakirinakajj wal jupanakat kusisipjjani, wal fiestachapjjarakini, maynit maynikamaw regalonaksa apayasipjjani. 11  Kimsa uru chikatani pasatatjja, Diosaw uka paninirojj jaktayäna.* Jupanakajj kayut saytʼasipjjäna ukhajja, jupanakar uñjirinakajj wal ajjsarapjjäna.* 12  Ukatjja alajjpachat mä aru akham sas artʼasinirwa istʼapjjarakïna: “Akar makatanipjjam” sasa. Jupanakajj mä qenayatwa* alajjpachar makatapjjäna, enemigonakapas jupanakar uñjapjjarakïnwa.* 13  Uka horasanjja mä jachʼa terremotow utjäna, taqpach markatjja tunkïri partew* allthaptäna. Uka terremotonjja paqallq waranqa jaqenakaw jiwarapjjäna, jiltʼirinakajj wal ajjsarapjjäna,* alajjpachankir Diosarus jachʼañchapjjarakïnwa. 14  Payïri tʼaqesïwejj pasjjewa. Kimsïri tʼaqesïwejj jankʼakiw jutaski. 15  Paqallqöri angelajj trompetap tuktʼasïna ukhajja, alajjpachanjja wali jachʼat artʼasir akham arunakaw istʼasïna: “Diosasana ukhamarak Cristopan Reinopajja* jaqenakjjaruw apnaqaski, jupajj wiñayan wiñayapatakiw reyjam apnaqarakini” sasa. 16  Khitinakatejj Dios nayraqatanjja trononakapan qontʼatäpkäna uka pä tunka pusini jilïr irpirinakajja,* killptʼasisaw* Diosar adorapjjäna, 17  akham sasa: “Taqe Chʼamani Jehová* Dios, yuspäranipjjsmawa. Jumajj jakasktawa, nayratpachaw jakasktajja, jumaw jachʼa chʼamam uñachtʼaytajja, reyjam apnaqañsa qalltaraktajja. 18  Markanakajj wal colerasipjjäna. Jumasti jupanakatakejj wal colerasirakiyätajja. Jiwatanakar juzgañataki señalat tiempojj purinjjewa; esclavo profetanakamaru, santo jilatanakaru, sutim ajjsaririnakaru,* jiskʼanakaru, jachʼanakaru premio churañatakisa, oraqe tukjasipki ukanakar tʼunjañatakisa, señalat tiempojj purinjjewa” sasa. 19  Alajjpachanjja Diosan templopankir santuariopaw jistʼarasïna, ukanjja pacton* arcapas uñjasirakïnwa. Ukatjja lliju llijunakampi, arunakampi, qʼejjo qʼejjonakampi, mä terremotompiw utjäna, jachʼa chhijchhinakaw* wal purintarakïna.

Qhanañchäwinaka

Jan ukajja, “mediñatak mä varar uñtasita”.
“1.260”.
Jan ukajja, “wali manqha pʼiyat”.
Variante: “kʼutkatasajj”.
Jan ukajja, “Diosaw jupanakarojj samana mayamp churäna”.
Variante: “jiwtayasipjjäna”.
Variante: “chʼiwitwa”.
Jan ukajja, “uñchʼukisipkarakïnwa”.
Ukasti markpachat tunka partenakar jaljatatjja, mä partepaw allthaptäna sañ muni.
Variante: “jiwtayasipjjäna”.
Jan ukajja, “Gobiernopajja”.
Jan ukajja, “ancianonakajja”.
Variante: “killtʼasisaw; qonqortʼasisaw”.
“Jehová” siski uka cheq aka Biblian diccionariopan liytʼäta.
Variante: “sutimat jiwtayasirinakaru”.
Ukajj mä acuerdor mantaña sañ muni.
Variante: “granizow”.