2 Timoteo 1:1-18

  • Aruntanaka (1, 2)

  • Timoteon Diosar confiyatapatwa Pablojj Diosar yuspäri (3-5)

  • Diosat katoqkta ukjja ninäkaspas ukham jukʼamp aqtayam (6-11)

  • Cheqa yatichäwinakjja arkaskakim (12-14)

  • Pablon enemigonakapampi amigonakapampi (15-18)

1  Naya Pablojja, Diosan munañapatwa Cristo Jesusan apostolopätjja, Diosajj Cristo Jesús taypiw jakäwi churañ arsüna, ukanak yatiyañatak uttʼayatätwa.  Nayasti juma Timoteo munat wawajaruw qellqansma: Dios Awkina ukhamaraki Cristo Jesús Tatitusan jachʼa munasiñapasa, khuyapayasiñapasa,* sumankañapasa jumampïpan.  Diosarojj walpun nayajj yuspärta, kunjamtï nayra awkinakajajj servipkänjja ukhamarakiw nayajj qʼoma concienciampi* Diosar serviskta. Nayajj uruy aruma oracionan ruwtʼaskta ukhajja, jumat amtasipunsmawa.  Jachaqtʼasitanakamat amtaskta ukhajja, nayajj wal jumar uñjañ munsma, ukhamat kusisiñajataki.  Kunjamsa jumajj Diosar confiyasajj* cheqa chuymampi sarnaqerïta uk nayajj amtapuntwa, nayraqatajj Loida awichamampi Eunice mamamampiw ukham chuymanïpjjänjja, jichhas jumajj ukham chuymanïskakpachätawa, uka toqet janiw pächaskti.  Ukatwa nayajj jumar amtayansma, kuntï Diosat katoqkta ukjja ninäkaspas ukham jukʼamp aqtayañamataki, ukjja kunapachatï nayajj amparamp loqjjatksma ukhaw katoqtajja.  Diosajj churkistu uka espíritu santojja,* janiw ajjsarir* jaqer tukuykistuti,* jan ukasti chʼamani, munasiñani, suma amuytʼasiri jaqëñasatakiw yanaptʼistu.  Ukhamajj jan jumajj Tatitusat* yatiyañjja phenqʼasimti, janirak nayatsa phenqʼasimti, nayajj Tatit laykuw carcelan llawintatäskta. Antisas jumajj suma yatiyäwinak laykojja, Diosan chʼamapar confiyasajj tʼaqesiskakim.  Jupaw jiwasarojj salvistu, juparakiw santo jaqëñasatakejj jawsistu, ukampis janiw luratanakas laykojj jawskistuti, jan ukasti amtanakap layku ukhamarak wali khuyapayasiñap* laykuw jawsistu. Jupajj nayra tiempotpachwa Cristo Jesús taypejj jachʼa khuyapayasiñampi uñjistänjja. 10  Jichhajj jiwasar Salviri Cristo Jesusan uñstanitapatwa Diosan wali khuyapayasirïtapajj* wali qhan amuyasjje. Cristow jiwañ chhaqtayjje, juparakiw suma yatiyäwinak taypejj kunjamatsa jan tukuskir jakañ katoqsna uk qhanañchistu. 11  Nayajj mä yatiyirjama, mä apostoljama, mä yatichirjam uttʼayatätwa, ukhamat uka suma yatiyäwinak yatiyañajataki. 12  Ukatwa nayajj tʼaqesiskta, ukampis janiw phenqʼaskti. Khitirutejj nayajj creykta uka Diosarojj uñtʼtwa, kuntï nayajj jupar katuykta ukjja juicio urkamaw imaskani, janiw ukat pächaskti. 13  Kuna cheqa* yatichäwinaktï nayat katoqkta uka yatichäwinakjja arkaskakim. Cristo Jesusamp mayakïtam laykojja, uka cheqa yatichäwinakarojj Diosar confiyasa* munasiñamp sarnaqasa arkaskakim. 14  Kunatï jumar katuyatäki ukjja, espíritu santon yanaptʼapampi sum cuidam, uka espíritu santojj taqe jiwasampïskiwa. 15  Asia provinciankir taqe jaqenakajj kunjamsa nayat jitheqtapjjäna ukjja sum jumajj yatisktajja. Figelo, Hermógenes uka jilatanakamppachaw nayat jitheqtapjjäna. 16  Tatitusti Onesíforo jilatan utapat khuyaptʼayaspan.* Jupajj walja kutiw nayarojj chʼamañchtʼitäna, janirakiw cadenanakampi chinuntatätaj laykojj phenqʼaskänti. 17  Antisas jupajj Roma markankaskäna ukhajja, katuñkamaw nayarojj wal thaqetäna. 18  Juicio urunjja Jehová* Tatitojj Onesíforo jilatat khuyaptʼayaspan.* Kunjamsa jupajj Éfeso markan servïna uksa jumajj sum yatiraktajja.

Qhanañchäwinaka

Variante: “khariptʼayasiñapasa”.
“Conciencia” siski uka cheq aka Biblian diccionariopan liytʼäta.
Jan ukajja, “iyawsasajj”.
Ukasti Diosan chʼamapa sañ muni.
Variante: “janiw jiwtayasir”.
Jan ukajja, “Diosajj janiw ajjsarir chuyma churkistuti”.
“Tatitu” siski uka cheq aka Biblian diccionariopan liytʼäta.
Variante: “khariptʼayasiñap”.
Variante: “khariptʼayasirïtapjja”.
Jan ukajja, “suma; yanaptʼkiri”.
Jan ukajja, “iyawsasa”.
Variante: “khariptʼayaspan”.
“Jehová” siski uka cheq aka Biblian diccionariopan liytʼäta.
Variante: “khariptʼayaspan”.