2 Tesalonicenses 1:1-12

  • Aruntanaka (1, 2)

  • Tesalonicankirinakan Diosar confiyapjjatapajj jukʼampiw jiltaski (3-5)

  • Jan istʼasirinakajj castigatäpjjaniwa (6-10)

  • Congregacionatakiw oracionajj lurasi (11, 12)

1  Naya Pablojja, Silvanompi* Timoteompi chikaw Tesalónica congregacionar qellqanipjjsma, khitinakatï Dios Awkisampi Tatit Jesucristompejj mayakïpjjta ukanakaru:  Dios Awkina ukhamaraki Tatit Jesucriston wali khuyapayasiñapasa* sumankañapasa jumanakampïpan.  Jilatanaka,* jumanakatjja Diosar yuspärapjjapuntwa, uk lurañatakejj obligatäpjjtwa. Jumanakan Diosar confiyapjjatamajj* jukʼampiw jiltaski, maynit maynikam munasiñanakamas ukhamarakiw jukʼamp jiljjattaski, ukatwa ukham lurapjjañajajj wali sumajja.  Ukatwa nanakajj Diosan congregacionanakap taypin jumanakat wal jachʼañchasipjjta. Jumanakajja jan waltʼayañatak arknaqatasa jan waltʼäwinakan* tʼaqeskasasa wal aguantasipktajja, Diosarus wal confiyasipkaraktajja,* ukanakwa jupanakar yatiyapjjta.  Taqe ukanakajja, Diosajj cheqapar uñjirïtapwa uñachtʼayi, taqe ukanak laykurakiw jumanakajj Diosan Reinop* katoqañatakejj suma jaqet uñjatäpjjtajja, cheqansa uka Reino laykuw jumanakajj tʼaqesisipktajja.  Diosajj cheqapar uñjirïtap laykojja, khitinakatï jumanakar tʼaqesiyapktam ukanakarojj castiganiwa.  Tatit Jesusajj wali chʼaman angelanakapampi aqkir ninampi alajjpachat uñstankani ukapachajja, khitinakatï tʼaqesipkta ukanakajja, nanakamp chik salvatäpjjätawa.  Ukapachaw jupajj Diosar jan uñtʼirinakarusa, Jesús Tatitusat parlki uka suma yatiyäwinakar jan istʼirinakarus castigani.  Jupanakajj juchañchataw uñjasipjjani, Tatit* nayraqatansa jan mayampitak tʼunjatäpjjaniwa, janirakiw jupan kʼajkir chʼamapsa uñj-jjapjjaniti. 10  Tatitojj santo servirinakapamp chik jachʼañchatäñataki jutkani ukhaw ukajj pasani. Uka urunsti taqe khitinakatï jupar confiyapki* ukanakajja, jupar uñjasajj wal musparapjjani, ukhamarakiw jumanakas kuntï yatiyapksma ukar creyipjjatam laykojja, jupar uñjasajj wal musparapjjarakïta. 11  Ukatwa nanakajj jumanakatak oración lurarapipjjapunsma, ukhamat kunatakitejj jawsatäpkta ukarjam jakapjjatamatjja Diosasajj jumanakar sum uñjañapataki, taqe kunanaktï jupajj chʼamapampi lurañ munki ukanak lurañapataki ukhamaraki kunanaktï jupar confiyapjjatamat* lurasipkta uk phoqachañapataki. 12  Ukhamatwa Jesús Tatitusan sutipajj jumanak taypi jachʼañchatäni. Jumanakajj jupamp mayakïpjjatamatjja jachʼañchatäpjjarakïtawa, ukhamatwa Diosasana ukhamaraki Tatit Jesucriston wali khuyapayasiñapajj* qhan uñjasini.

Qhanañchäwinaka

Jupajj Silas satarakïnwa.
Variante: “khariptʼayasiñapasa”.
Jilatanaka sasinjja, awisajj kullakanakamppachatwa Biblian parli.
Jan ukajja, “iyawsapjjatamajj”.
Jan ukajja, “tʼaqesiñanakan”.
Jan ukajja, “iyawsasipkaraktajja”.
Jan ukajja, “Gobiernop”.
“Tatitu” siski uka cheq aka Biblian diccionariopan liytʼäta.
Jan ukajja, “iyawsapki”.
Jan ukajja, “iyawsapjjatamat”.
Variante: “khariptʼayasiñapajj”.