2 Pedro 3:1-18

  • Kunatï walïki ukanakat sawkasir jaqenakajj janiw juicio urut yatipkiti (1-7)

  • Jehová Diosajj amtap phoqañatakejj janiw qheptʼkiti (8-10)

  • Kunjam jaqëpjjañamasa uk amuytʼasipjjam (11-16)

    • “Machaq alajjpachanakampi machaq oraqempi” (13)

  • Jan wali jaqenakan juchanakapampi jan apayasiñatakejj amuyasipjjam (17, 18)

3  Munat jilatanaka, akampejj pä cartwa qellqanipjjsma, kunjamtï nayrïr cartan qellqanipksmajja ukhamarakiw jichhajj amtayäwinakampejj sum amuytʼapjjañamataki chʼamañchtʼanipjjsma.  Ukhamat santo profetanakan nayra parlatanakapsa Salviri Tatitusan* mandamiento arunakapsa amtasipjjañamataki, uka mandamientonakjja apostolonakatwa* istʼapjjtajja.  Nayraqatjja may yatipjjañamwa nayajj munta, qhepa urunakanjja kunatï walïki ukanakat sawkasir jaqenakaw utjani, munañanakaparjamaw jan walinak lurapjjani,  jupanakajj sapjjaniwa: “Criston kuttʼaniñap tiempojj* ¿kawkinkarakisti? Nayra awkinakasajj jiwañan iktʼjjapjjäna ukhat jichhakamajja, taqe kunas pachpakïskiwa, jaqenakajj luratäkäna ukhatpachaw ukhamäski” sasa.  Uka jaqenakajj yatkasinwa akanak jan amtañ munapkiti: alajjpachanakajj nayratpachaw utjäna, oraqejj Diosan aruparjamaw umat jaljtayatäna, uma taypin uchatarakïnwa.  Kunapachatï umajj aka oraqpachar phoqantkäna ukhajja, nayra tiempo jaqenakajj ukanakampi tʼunjatarakïnwa.  Diosan uka pachpa aruparjamarakiw alajjpachasa aka oraqesa ninatak imatäski, ukanakajja kunapachatï jan wali jaqenakajj tʼunjatäkani, juicio urus purinkani ukürkam imatäsipkiwa.  Munat jilatanaka, Jehová* Diosatakejj mä urojj waranqa maranakamp sasiwa, waranqa maranakajj mä urumpi sasirakiwa, janipun uk armasipjjamti.  Jehová* Diosajj promesap phoqañatakejj janiw qheptʼkiti, kunjamtï yaqhep jaqenakajj amuyapki ukhamjja, jan ukasti wali pacienciampiw jumanakar suyasipktamjja; janiw khitin jiwañapsa jupajj munkiti, jan ukasti taqenin arrepentisipjjañapwa muni. 10  Jehová* Diosan urupajj mä lunthatar uñtataw jutani, uka urunjja jankʼakiw alajjpachanakajj suynasis pasjjani, kunanakatï alajjpachansa oraqensa utjki ukanakajja juntʼutatayatäsajj umatatayatäniwa, oraqesa kunanakatï ukan utjki ukanakasa nakhantayatäniwa. 11  Niyakejjay taqe ukanakajj umatatayatächinejja, jumanakajj kunjam jaqëpjjañamasa uk amuytʼasipjjam, jumanakajj qʼomaw sarnaqapjjañama, luratanakamampis Dios chuymäpjjatamwa uñachtʼayapjjañamaraki. 12  Jehová* Diosan urup puriniñapjja wali amuyump* suytʼasipkakim, janipun armasipjjamti, uka urunwa alajjpachanakajj ninampi tukjatäni, kunanakatï alajjpachanakansa oraqensa utjki ukanakajj umatatayatarakïniwa. 13  Diosan promesaparjamajj machaq alajjpachanakampi machaq oraqempi suyasktanjja, ukanjja cheqapar sarnaqañaw utjani. 14  Ukhamajj munat jilatanaka, niyakejjay ukanak suyaskstanjja, Dios nayraqatan wali qʼomäñataki, jan kuna manchanïñataki, jupampi sumankañatak chʼamachasipjjam. 15  Tatitusajj pacienciamp uñjkistu ukajj salvasiñasatakiwa uk amuyapjjam. Uka toqetarakwa Pablo munat jilatasajj Diosat yatiñ katoqasajj qellqanipjjayätamjja. 16  Cheqansa jupajj taqe cartanakapanwa uka toqenakat qellqanipjjayätamjja. Ukampis uka qellqatanakapan yaqhep cheqanakajj janiw amuyañjamäkiti. Jan amuytʼasirïpki* uka jaqenakasa pächasirinakasa jupanak pachpa tukjatäñatakiw uka arunakjja yaqha toqer uñtayapjje, Qellqatanakankir yaqha arunakampis ukhamarakiw lurapjje. 17  Ukhamajj munat jilatanaka, jumanakajj taqe ukanak yatjjasajja, jan wali jaqenakan juchanakapampi jan apayasipjjañamatakejj amuyasipjjam, ukhamat suma saytʼatäkasin jan tinkupjjañamataki. 18  Antisas jumanakajj Salviri Jesucristo Tatitusan wali khuyapayasiñapsa* yatiñapsa jukʼamp katoqasipkakim. Jupajj jichhasa wiñayatakisa jachʼañchatäpan. Amén.*

Qhanañchäwinaka

“Tatitu” siski uka cheq aka Biblian diccionariopan liytʼäta.
Griego arunjja, “apostolonakamatwa”.
“Kuttʼaniñ tiempo” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
Jan ukajja, “jankʼakïñap munasa”.
Jan ukajja, “Jan yatichatäpki”.
Variante: “khariptʼayasiñapsa”.
Jan ukajja, “Ukhamäpan”.