2 Corintios 6:1-18

  • Diosan wali khuyapayasiñap jan ina chʼusar tukuyaña (1, 2)

  • Pablon Diosar servitapaw qhanañchasi (3-13)

  • “Jan mä yukurojj chʼulla chʼulla yapintat uñjasipjjamti” (14-18)

6  Diosamp chika trabajisajja, nanakajj ukhamarakiw chʼamañchtʼanipjjsma: Diosan wali khuyapayasiñap* katoqasajja jan ina chʼusar uk tukuyapjjamti.  Diosajj akham siwa: “Mä suma tiemponwa istʼsma, salvasiñ urunwa yanaptʼsma” sasa. Jichhapï uka suma wakiskir tiempojja. Jichhapï uka salvasiñ urojja.  Janipuniw nanakajj khitirus lanktʼasiyañ munapkti, ukhamat Diosaru servipjjatajanjja jan kuna jan walis utjañapataki.  Antisas kunaymanitwa nanakajj Diosan servirinakapjam uñtʼayasipjjta, walja yantʼanak aguantasa, tʼaqesiñanakana, awisajj pistʼayasiñanakana, jan waltʼañanakana,  nuwjat uñjasisa, carcelanakana, chʼajjwañanakana, chʼama tukuñ trabajonakana, arumanakas jan ikita, awisajj jan manqʼata,  qʼom jakasa, kunatï cheqäki uk uñtʼasa, paciencianïsa, suma chuymanïsa, jakäwinakasansa espíritu santompi* irpayasisa, mayninakarusa taqe chuyma munasisa,  cheq parlasa, Diosan chʼamapamp yanaptʼayasisa, kupi ampararusa* chʼeqa ampararusa* kunatï cheqapäki uka armanakas aptʼata,  awisajj jachʼañchata, awisajj jiskʼachata. Awisajj jaqenakas sumaraki, jan waliraki nanakjjat parlapjje; engañjirinakarjamaw uñjapjjetu, ukampis nanakajj cheq parlapjjta;  jan uñtʼatanakarjamaw uñjapjjetu, ukampis suma uñtʼatäpjjtwa; jiwaskir jaqenakarjamaw uñjapjjetu,* ukampis nanakajj jakasipktwa; castigata* jaqenakarjamaw uñjapjjetu, ukampis janiw jiwañar katuyatäpkti; 10  llakitanakarjamaw uñjapjjetu, ukampis wali kusisitäpjjtwa; pobre jaqenakarjamaw uñjapjjetu, ukampis waljaniruw qamiriptayapjjta;* janis kunanïpkiristsa ukham uñjapjjetu, ukampis nanakajj taqe kunanïpjjtwa. 11  Nanakasti jumanakarojj qhan parlapjjsma, Corintonkirinaka, chuymanakajas wali jachʼaw jumanakatakejj jistʼarasi. 12  Janiw jumanakatakejj chuymanakaj jistʼantasipkti, jan ukasti jumanakaw nanakatakejj chuymanakam jistʼantasipjjtajja. 13  Wawanakajarjamaw nayajj jumanakar parlapjjsma, kunjamtï jumanakar uñjapksmajja ukhamarakiy nanakar uñjapjjeta, chuymanakamjja wali jachʼa jistʼarapjjam. 14  Jan creyentëpki ukanakampejj jan mä yukurojj chʼulla chʼulla yapintat uñjasipjjamti.* ¿Kunjamaraki cheqapampi jan walimpejj mayachasispasti? Jan ukajj ¿kunjamaraki qhanampi chʼamakampejj mayakïpjjaspasti? 15  Ukhamarus ¿kunjamaraki Cristompi Belialampejj* mä amuyunikïpjjaspasti? Jan ukajj ¿kunjamaraki mä creyentempi mä jan creyentempejj mä amtanikïpjjaspasti? 16  ¿Kunjamaraki idolonakajj Diosan templopankapjjaspasti? Jiwasajj jakkir Diosan templopätanwa, kunjamtï Diosajj siskänjja ukhama, jupasti sänwa: “Nayajj jupanak taypinwa jakäjja, jupanak taypinwa sarnaqarakëjja, jupanakan Diosapäjjäwa, jupanakajj nayan markajarakïniwa” sasa. 17  “‘Ukhamajj jupanak taypit mistjjapjjam, jitheqtjjapjjam’ siw Jehová* Diosajja, ‘jan jukʼampi uka qʼañunak llamktʼapjjamti’”, “‘nayajj katoqasipjjämawa’”. 18  “‘Nayaw jumanakan awkimäjjäjja, jumanakasti nayan wawanakajäpjjätawa’* siw Taqe Chʼamani Jehová* Diosajja”.

Qhanañchäwinaka

Variante: “khariptʼayasiñap”.
Ukasti Diosan chʼamapa sañ muni.
Inas nuwasiñataki.
Inas jarkʼaqasiñataki.
Jan ukajja, “jiwañar apjjaruyat jaqenakarjamaw uñjapjjetu”.
Jan ukajja, “cheqañchata”.
Variante: “utjiriniptayapjjta”.
Jan ukajja, “Jan creyentëpki ukanakampejj jan chʼulla chʼulla mayachat uñjasipjjamti”.
Uka arojj hebreo arutwa juti, “jan kunatak serviri” sañ muni. Belial sasinjja, Supayat parlaski.
“Jehová” siski uka cheq aka Biblian diccionariopan liytʼäta.
Griego arunjja, “nayan yoqall wawanakaja, imill wawanakajäpjjätawa”.
“Jehová” siski uka cheq aka Biblian diccionariopan liytʼäta.