2 Corintios 3:1-18

  • Nanakjjat sum parliri cartanaka (1-3)

  • Machaq pacton servirinakapa (4-6)

  • Machaq pacton qhanapajj jukʼampi kʼajkiriwa (7-18)

3  ¿Nanakajj mayampti jumanakamp uñtʼayasipjjäjja? ¿Nanakjjat sum parliri cartanakti jumanakar churapjjäma, kunjamtï yaqhep jaqenakajj lurapki ukhama? Jan ukajj ¿jumanakarucha uka cartanak mayipjjäma?  Jumanak pachpaw nanakjjat parliri cartäpjjtajja, ukasti chuymanakajan qellqantatawa, taqe jaqenakaw uk uñtʼapjje, liytʼapjjaraki.  Jumanakaw Criston cartapäpjjtajja, ukajj qhanaw amuyasi. Ukasti nanakamp qellqatarakiwa, jïsa, Diosan servirinakap taypi qellqatawa. Janirakiw tintampi qellqatäkiti, jan ukasti jakkir Diosan espiritupampi qellqatawa, janiw qalat lurat tablanakar qellqatäkiti, jan ukasti jañchit lurat tablanakaru, mä arunjja chuymanakaru qellqantatawa.  Nanakajj Cristo taypiw Diosar confiyapjjta.  Janiw nanakajj nanak pachpasa kun lurañatak suma wakichtʼatäpkirista ukham amuyasipkti, jan ukasti Diosaw nanakarojj suma wakichtʼatäñatak yanaptʼapjjetu.  Jupaw nanakarojj machaq pacton* servipjjañajatakejj sum wakichtʼapjjetu, janiw qellqat Leyir serviñatakejja, jan ukasti espíritu santor* serviñataki. Qellqat Leyejj jiwañar apiriwa, Diosan espiritupasti jakañ chuririwa.  Jiwañar apiri qalar qellqata Leyejja, mä suma kʼajkir qhanampi churatänwa, Israelan wawanakapas janiw Moisesan ajanup uñkatirjamäpkänti, ajanupajj wal kʼajatap layku. Ukampis uka kʼajkir qhanajj chhaqtayatäñapänwa.  Ukhamajj ¿janit espíritu santon luräwipajj jukʼampi kʼajkirïki?  Jiwañar apiri Leyitejj kʼajkirïchïnjja, ¡jaqenakaru cheqapar sarnaqeriru tukuyki uka luräwejj jukʼampi kʼajkiriwa! 10  Jukʼamp kʼajkiri utjatap laykojja, kunatï mä tiempon kʼajkirïkäna ukan kʼajatapajj apaqatäjjewa. 11  Kunatï chhaqtañapäkäna ukatejj kʼajkir qhanampi churatächïnjja, ¡machaq pacton qhanapajj jukʼampi kʼajkiriwa! 12  Niyakejjay ukar wal confiystanjja, jiwasajj qhana arunakampiw parltanjja, 13  janirakiw Moisesjam lurktanti, jupajj mä telampiw ajanup imjjatasïna, ukhamat Israelan wawanakapajj kunatï chhaqtañapäkäna uka kʼajkir qhana jan uñjapjjañapataki. 14  Jupanakajj janiw amuytʼañ munapkänti. Jichhakamas amuyunakapajj mä telampjam imjjatatakïskiwa, janirakiw nayra pactotsa amuyapkiti, uka telajj Cristo taypikiw apaqatäspa. 15  Jichhürkamas chuymanakapajj mä telampjam imjjatatakïskiwa, ukatwa Moisesan qellqatanakap jan amuyirjamäpkiti. 16  Maynejj Jehová* Diosan ukar kuttʼanjje ukhajja, telajj apaqatäjjewa. 17  Jehová* Diosajj Espirituwa, ukhamajj kawkjantï Jehová* Diosan espiritupajj utjki ukanjja, libre jakasiñaw utji. 18  Taqe jiwasanakajj ajanus jan kuna telampi imjjatasisaw Jehová* Diosan kʼajkir qhanap mä espejor uñtat qhantʼaytanjja. Ukham qhantʼkasajja, kunjamäkitejj jupajj ukarjam tukusaw jiwasajj jukʼamp jukʼampi qhantʼasktanjja, kunjamarutï Jehová* Diosajja, mä arunjja Espiritojja* tukuykistu ukhamarjama.

Qhanañchäwinaka

Ukajj mä acuerdor mantaña sañ muni.
Ukasti Diosan chʼamapa sañ muni.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.
Ukajja, “Jehová Diosan espiritupajja” sasaw jaqokipasirakispa.