2 Corintios 13:1-14

  • Pablojj tukuyañatakejj amuytʼayiwa, ewjjtʼarakiwa (1-14)

    • “Cristianjamat jakasipkta janicha ukjja amuykiptʼasisipkakim” (5)

    • Amuyunakamjja cheqañchasisipkakim; mä amtaki jakasipjjam (11)

13  Kimsa kutiw akampejj jumanakan ukar jutañatakejj wakichasjjta. Qellqatanjj akham siwa: “Paya jan ukajj kimsa testigonakan qhanañchatap istʼasinwa taqe kunas qhanstañapa”.  Janis jichhajj jumanakamp chikäkstjja, payïr kutis jumanakamp chikäkirista ukham amuyasta. Nayasti juchachasipkäna ukanakarusa ukhamaraki taqenirusa janïräkipanwa ewjjtʼanipjjsma: nayatï jutäjja, janiw khitis cheqañchäwi katoqañat salvaskaniti,  ukhamatwa Cristojj naya taypi parlaskatapjja qhan uñachtʼayapjjäma. Jupajj janiw jumanak taypinjja jan chʼamanïkiti, jan ukasti wali chʼamaniwa.  Cheqansa jan chʼamanïkäna ukhaw juparojj lawar chʼakkatas* jiwayapjjäna, ukampis Diosan chʼamap utjatapatwa jupajj jakaski. Nanakajj jupjamarakiw jan chʼamani uñjasipjjta, ukampis Diosan chʼamap utjatapatwa jupamp chikajj jakapjjarakëjja, uka chʼamarakiw jumanakampïski.  Jumanakajj cristianjamat jakasipkta janicha ukjja amuykiptʼasisipkakim, kunjam jaqëpjjtasa uksa uñakiptʼasisipkakim. Jan ukajj ¿janich Jesucristojj jumanakamp mayakïtap amuyapkta? Diosamp jan suma jaqet uñjatäpkasma ukhakiw Cristojj jumanakamp jan mayakïkaspati.  Nanakajj Diosamp suma jaqet uñjatäpjjtwa, uk yatipjjañamwa nayajj munta.  Nanakajj Diosatwa mayirapipjjsma, ukhamat jumanakajj kuna jan walsa jan lurapjjañamataki. Ukampis janiw yaqhanakampi suma jaqet uñjayasiñ laykojj uk lurapkti, jan ukasti kunatï walïki uk lurapjjañamatakiw oración lurarapipjjsma, janis jaqenakajj sum uñjapkitpan ukhasa.  Kunatï cheqäki uka contrajj janiw kunsa lurapkiristti, jan ukasti kunatï cheqäki uka laykukiw kuns lurapjjeristjja.  Kunapachatï nanakajj aynachtʼatäpkta, jumanakas chʼamanïpkarakta ukhajja, nanakajj wal kusisipjjta. Diosatwa mayirapipjjaraksma, ukhamat jumanakan amuyunakamajj cheqañchatäñapataki. 10  Ukatwa nayajj jan jumanakamp chikäkasajj akanak qellqanta, ukhamat jutasajj jan jumanakar jan sinttʼasis cheqañchañajataki. Tatitojj janiw jumanakar aynachtʼayañatakejj jilïrjam uttʼaykituti, jan ukasti jumanakar chʼamañchtʼañatakiw uttʼayitu. 11  Ukhamajj jilatanaka, kusisitäsipkakim, amuyunakamsa cheqañchasisipkakim, chuymachäwi arunaksa katoqtʼasisipkakim, mä amtanikïñatakisa sumaki jakasiñatakisa chʼamachasisipkakim. Ukhamatwa wali munasiri, sumankañ churiri Diosajj jumanakampïni. 12  Maynit maynikam jampʼattʼasis* aruntasipjjam. 13  Taqpach santo jilatanakaw aruntanakap apayanipjjtam. 14  Tatit Jesucriston wali khuyapayasiñapasa,* Diosan munasiñapasa, Diosajj churapktam uka espíritu santosa* taqe jumanakampïpan.

Qhanañchäwinaka

Variante: “kʼutkatas”.
Jikisisaw (jakisisaw) cristianonakajj jampʼattʼasisa aruntasipjjerïna.
Variante: “khariptʼayasiñapasa”.
Ukasti Diosan chʼamapa sañ muni.