1 Corintios 7:1-40

  • Casadonakataki, solteronakataki ewjjtʼanaka (1-16)

  • “Sapa maynisa kunjamtï Diosajj jawski, ukhamakïskpan” (17-24)

  • Solteronaka, viudanaka (25-40)

    • Kunatsa sapakïskañajj walejja (32-35)

    • “Tatitun arkiripampikiw casarasiñapa” (39)

7  Jichhajj qellqanipkista uka jisktʼanakaruw* nayajj qhanañchtʼasinkta, mä chachatakejj jukʼampi walïspawa warmi jan llamktʼañapajja.*  Ukampis qʼañu jucha* lurañanak wal utjatap laykojja, chachajj warminïpan, warmis chachanirakïpan.  Kuntï chachajj warmipamp phoqañapäki uk phoqpan, warmejj uka pachparaki chachapampejj lurpan.  Chachan warmejj janiw pachpa cuerpopjjarojj munañanëjjeti, jan ukasti chachapaw cuerpopjjarojj munañanëjje. Warmin chachasti janirakiw pachpa cuerpopjjarojj munañanëjjeti, jan ukasti warmipaw cuerpopjjarojj munañanëjje.  Chacha warmjam ikthapiñatjja jan jumanakajj janiw sasipjjamti. Ukampis jumanakatejj oración lurañataki mä qhawqha tiempo jan ikthapiñataki amtapjjstajja, ukajj waliwa. Ukatjja chacha warmjamajj mayamp ikthapipjjasmawa, ukhamat Supayajj* jan jumanakar yantʼañapataki, munañanakamar jan apnaqañ puedipjjatam layku.  Kuntï nayajj sapksma ukjja jumanakajj lurapjjasmawa, janirakiw ukajj mä mandamientökiti.  Taqenis nayjamäpjjaspa ukwa nayajj munta. Ukampis sapa mayniw Diosatjja mä regalo katoqe, maynejj akhamata, maynejj ukhamataraki.  Jan casaratanakarusa viudanakarusa nayajj saraktwa, jupanakatakejj jukʼamp walïspaw nayjam sapakïsipkañapajja.  Ukampis jupanakatejj munañanakapar jan apnaqerjamäpkchi ukhajja, casarasipjjpan, jukʼampi waliw casarasiñajja, warmi munañampi chacha munañampi apayasiñat sipansa. 10  Casaratäpki ukanakarojj nayajj saraktwa, janiw nayajja, jan ukasti Tatituwa: mä warmejja janiw chachapat jaljtañapäkiti. 11  Jupatï chachapat jaljtanejja, jan yaqhamp casaraspanti, jan ukasti chachapampi sumankthapjjpan; chachajj janirakiw warmipar jaytanukuñapäkiti. 12  Mayninakarojj nayajj saraktwa, jïsa, nayaw sista, janiw Tatitojja: mä jilatatejj jan creyente warminïchi, warmipajj jupampi jakañ munchi ukhajja, janiw jaytanukuñapäkiti. 13  Mä warmitejj jan creyente chachanïchi, chachapajj jupampi jakañ munarakchi ukhajja, janiw chachapar jaytanukuñapäkiti. 14  Jan creyentëki uka chachajja, warmipampi juntöskatap laykojj santowa, jan creyentëki uka warmejja, creyente chachapampi juntöskatap laykojj santarakiwa. Janitejj ukhamäkaspajja, wawanakapajj janiw santöpkaspati, ukampis jichhajj santöpjjewa. 15  Jan creyentëki ukatejj sarjjañ amtchejja,* sarjjpan. Jilatasa jan ukajj kullakasa janiw uka casonjja chinkatatäjjeti, ukampis Diosaw jumanakarojja sumankañar jawsapjjtamjja. 16  Jumatejj casarat warmïstajja, ¿kunjamaraki chachamar jan salvañam yattasti? Jumatejj casarat chachästajja, ¿kunjamaraki warmimar jan salvañam yattasti? 17  Kuntï Jehová* Diosajj sapa maynir churki, kunjamtï Diosajj jawskaraki ukarjam sapa maynis sarnaqpan. Taqe congregacionansa uka ewjjanakwa nayajj churarakta. 18  Mä chachatejj circuncidatäkasina* Diosan jawsatächejja, ukhamakïskpan. Mä chachatejj jan circuncidatäkasin Diosan jawsatächejja, jan circuncidaspanti. 19  Circuncidasiñajj janiw kunäkisa, jan circuncidasiñas janirakiw kunäkisa, Diosan mandamientonakap phoqañaw jukʼamp wakiskirejja. 20  Sapa maynisa kunjamtï Diosajj jawski, ukhamakïskpan. 21  ¿Esclavökasati jumajj jawsatäyäta? Jan ukat llakisimti, jumatï jichhajj libre jakasirjamästajja, jan ukhamak pasayamti. 22  Tatitun mä arkiripatejj esclavökasina jawsatächejja, librëjjewa,* Tatitunkjjarakiwa. Khititejj libre jaqëkasina jawsatächi ukajja, Criston esclavoparakiwa. 23  Jumanakajj wali jila alampi alatäpjjtawa, ukhamajj janiy jaqenakan esclavopäjjapjjamtejja. 24  Jilatanaka, kunjamtï sapa maynis jawsatäpktajja, Dios nayraqatanjj ukhamäsipkakim. 25  Khitinakatejj sapäsipki* ukanakatakejja, janiw Tatitun mandamientopajj utjkituti. Niyakejjay Tatitojj nayat khuyaptʼayaschejja,* kuntï nayajj sapksma ukarojj confiyapjjasmawa. 26  Niyakejjay jan wali tiemponakan jakstanjja, nayajj akham amuyta: mä chachatejj casadöchi jan ukajj solteröchi ukhajja, jukʼamp walïspawa ukhamäskakiñapajja. 27  Jumatejj mä warmir chinkatatästa ukhajja, jan jaljtañ thaqamti. Jumatejj jan warminïkstajja, jan warm thaqamti. 28  Ukampis jumatejj casarasismajja, janiw kuna juchäkaspasa. Sapäski* ukatejj casarasispajja, janirakiw kuna juchäkaspasa. Ukhamarus khitinakatejj casarasipkani ukanakatakejja, tʼaqesiñaw jañchipan utjani. Ukampis uka tʼaqesiñatwa nayajj salvañ munapjjsmajja. 29  Jilatanaka, nayajj akham saraktwa, utjkis uka tiempojj jukʼaptatäjjewa. Jichhat uksarusti khitinakatejj warminïpki ukanakajja, janis warminïpkaspa ukhamäpjjpan. 30  Khitinakatejj jachapki ukanakajja, jan jachapki ukanakjamäpjjpan. Khitinakatejj kusisipki ukanakajja, jan kusisipki ukanakjamäpjjpan. Khitinakatejj alapki ukanakajja, jan utjirinïpki ukanakjamäpjjpan. 31  Khitinakatejj akapachat beneficiasipki ukanakajja, akapachat jan phoqatpach beneficiasipki ukanakjamäpjjpan, kunanakatejj akapachan pasaski ukanakajj mayjtʼaskatap layku. 32  Jumanakajj jan kuna llakinïpjjasma ukwa nayajj munta. Jan casarat chachajja, kunanakatï Tatitunkki ukanakatwa llakisi, mä arunjja kunjamsa Tatitur kusisiyaspa uka toqetwa llakisi. 33  Ukampis casarat chachajja, kunanakatï akapachankki ukanakatwa llakisi, mä arunjja kunjamsa warmipar kusisiyaspa uka toqetwa llakisi, 34  amuyupansa tʼaqjtatäjjarakiwa. Ukhamarus jan casarat warmisa mä virgen tawaqosa kunanakatï Tatitunkki ukanakatwa llakisi, ukhamat jupan cuerpopasa amuyupasa santöñapataki. Ukampis casarat warmejja, kunanakatï akapachankki ukanakatwa llakisi, mä arunjja kunjamsa chachapar kusisiyaspa uka toqetwa llakisi. 35  Ukanakjja jumanakar yanaptʼañatakiw nayajj sapjjsma, janiw jumanakar jarkʼañ laykojja, jan ukasti chʼamañchtʼapjjsmawa, kunatï walïki ukanak lurapjjañamataki, sapürus Tatitur jan kunampi jarkʼata taqe chuyma servipjjañamataki. 36  Ukampis maynitejj solterökasin cuerpon munañanakapar jan atipirjamäkchi, qʼajjo wayna tiempsa qʼajjo tawaq tiempsa* pasjjarakchi ukhajja, akham lurañapawa: kuntï jupajj lurañ amtki uk lurpan, janiw kuna juchsa lurkiti. Casarasipjjpan. 37  Ukampis maynitejj chuymapan amtjjchi, amuyuparjamajj janiraki casarasiñajj wakiskchiti, jan ukajj cuerpon munañanakapar apnaqerjamächi, chuymapansa sapakïskaña amtarakchi ukhajja, walïniw ukham luratapajja. 38  Ukhamarakipï maynitejj casaraschi ukhajja, walïniw ukham luratapajja, ukampis maynitejj jan casaraschi ukhajja, jukʼamp walïniw ukham luratapajja. 39  Mä warmejja chachap jakkipanjja chachapar chinkatatawa. Ukampis chachapatejj jiwañan iktʼjjchi ukhajja, khitimpiy casarasiñ munchi ukampi casarasiñatakejj librëjjewa, ukampis Tatitun arkiripampikiw casarasiñapa. 40  Nayajj saraktwa, jupatejj mayamp jan casaraskanejja, jukʼamp kusisitäniwa. Cheqpachansa nayajj Diosan espiritupanirakïtwa.

Qhanañchäwinaka

Variante: “chhiktʼanakaruw”.
Ukajja jukʼampi walïspawa warmimpi jan ikthapiñajja sañ muni.
“Qʼañu jucha” siski uka cheq aka Biblian diccionariopan liytʼäta.
Griego arunjja, “Satanás”. Ukajj contra saytʼiri, kutkatasiri sañ muni.
Jan ukajja, “jaljtañ amtchejja”.
“Jehová” siski uka cheq aka Biblian diccionariopan liytʼäta.
“Circuncisión” siski uka cheq aka Biblian diccionariopan liytʼäta.
Griego arunjja, “libertöjjewa”.
Ukajja warmimpi jan ikthapiri mä waynata, jan ukajj chachampi jan ikthapiri mä virgen tawaqotwa parlaski.
Variante: “khariptʼayaschejja”.
Ukajja warmimpi jan ikthapiri mä waynata, jan ukajj chachampi jan ikthapiri mä virgen tawaqotwa parlaski.
Ukasti warminïña jan ukajj chachanïña wal munaña tiempojj pasjje uka toqet parlaski.