1 Corintios 6:1-20

  • Cristianonakkamaw tribunalanakan quejasipjje (1-8)

  • Janiw Diosan Reinop katoqapkaniti (9-11)

  • Diosaruy cuerponakaman jachʼañchapjjam (12-20)

    • “Qʼañu juchat jitheqtapjjam” (18)

6  ¿Kunatsa jumanakajj maynimpi chʼajjwasajj tribunalaru sarasin Diosan leyinakap jan phoqer jaqenakar quejasipjjta? Antisas ¿janit santo jilatanakan ukar sarapjjañamajj wakiski?  ¿Janit jumanakajj yatipkta? Khitinakatejj santöpki ukanakaw akapachar juzgapjjani. Niyakejjay akapachajj jumanakan juzgatächinejja, ¿janit uka jiskʼa jan waltʼäwinak juzguirjamäpkta?  ¿Janit jumanakajj yatipkta? Jiwasajj angelanakaruw juzgañäni. Ukhamajj jakäwin utjki uka jan waltʼäwinakjja askicharaksnawa.  Jakäwin utjki uka jan waltʼäwinakatejj askichañächejja, ¿kunataraki congregacionajj jan walit uñjki uka jaqenakar juezanakjam ajllisipjjtasti?  Nayajj jumanakan phenqʼasipjjañamatakiw ukanak parlaskta. ¿Janit jumanak taypin mä yatiñan jaqes utjki, ukhamat jilatanakap taypin jan waltʼayasiñajj utjki ukanak juzgañapataki?  Ukat sipansa, mä jilatajj tribunalar sarasaw yaqha jilat contrajj quejasiski, janiw ukakïkiti, khitinakatï jan creyentëpki uka jaqenakan ukaruw quejasir sari.  Jumanakkam quejar mantasajja jumanak pachpaw phenqʼachat uñjasipjjtajja. ¿Kunatsa jan wal luratajj jan aguantasipkta? ¿Kunatsa kʼarimp kʼarimpi* aparatajj jan aguantasipkta?  Antisaw jumanakajj jan walinak lurapjjtajja, kʼarimp kʼarimpiw* mayninakar aparapjjtajja, yamas pachpa jilatanakamaruw ukham lurapjjtajja.  ¿Janit jumanakajj yatipkta? Jan cheqapar sarnaqer jaqenakajj janiw Diosan Reinopjja* katoqapkaniti. Jan jumanak pachpajj engañjasipjjamti.* Qʼañu juchan* sarnaqerinakasa, idolonakar adoririnakasa, adulterio juchan* sarnaqerinakasa, warmir tukurinakasa,* chachapura ikintasirinakasa, 10  lunthatanakasa, taqe kun munirinakasa, machirinakasa, jaqe masipar jiskʼachirinakasa, mayninakat kʼarimp kʼarimpi* apaqerinakasa, janiw Diosan Reinop* katoqapkaniti. 11  Jumanakat yaqhepajj ukhamäpjjayätawa. Jichhasti jumanakajj qʼomachatäjjapjjtawa, santo jaqenakar tukuyatäjjapjjtawa, Tatit Jesucriston sutipjjarusa Diosasan espiritupampisa cheqap sarnaqerit uñjatäjjapjjtawa. 12  Taqe kunas nayatakejj walikïskiwa, ukampis janiw taqe kunas yanaptʼkistaspati. Taqe kunas nayatakejj walikïskiwa, ukampis janiw kunampis apnaqayaskäti. 13  Manqʼajj purakatakiwa, purakajj manqʼatakirakiwa, ukampis Diosajj manqʼarus purakarus ina chʼusaruw tukuyani. Cuerpojj janiw qʼañu jucha* lurañatakïkiti, jan ukasti Tatitutakiwa. Tatitusti cuerpotakirakiwa. 14  Kunjamtï Diosajj chʼamapampejj Tatitur jaktaykänjja,* ukhamarakiw jiwasarojj jiwatat jaktayistani.* 15  ¿Janit jumanakajj yatipkta? Cuerponakamajj Criston cuerpopamp mayachatawa. Ukhamajj ¿Criston cuerpopatti nayajj mä parte apaqasin prostituta* warmimpi mayachäjja? ¡Janiw ukhamäkaspati! 16  ¿Janit jumanakajj yatipkta? Kunapachatï maynejj mä prostituta* warmimpi mayachaski ukhajja, uka warmimpejj mä cuerpokëjjapjjewa. Diosajj akham siwa: “Panipajj mä jañchikëjjapjjaniwa” sasa. 17  Khititejj Tatitur mayachaski ukajja, jupampejj mä pachpa amuyunikëjjewa. 18  Ukhamasti qʼañu juchat* jitheqtapjjam.* Khititejj yaqha juchanak lurki ukajja, janiw pachpa cuerpoparojj jan waltʼaykiti, khititejj qʼañu jucha* lurki ukajja, pachpa cuerpop contraw jucha luraski. 19  ¿Janit yatipkta? Jumanakajj mä cuerpokïpjjtawa, uka cuerpojj espíritu santon* templopawa, uka espíritu santojj jumanak manqhankiwa, Diosatwa uk katoqapjjaraktajja. Ukhamarus jumanakajj Diosankapjjtawa, 20  Diosaw wali jila alampi alasipjjtamjja. Ukhamajj Diosaruy jumanakajj cuerponakaman jachʼañchapjjam.*

Qhanañchäwinaka

Variante: “llullamp llullampi”.
Variante: “llullamp llullampiw”.
Jan ukajja, “Gobiernopjja”.
Jan ukajja, “Jan jumanakajj engañjayasipjjamti”.
“Qʼañu jucha” siski uka cheq aka Biblian diccionariopan liytʼäta.
Ukasti casaratäkasin yaqhamp ikintasiña sañ muni.
Ukasti chacha masipampi ikintasiñatak warmit tukuri chachanakatwa parlaski.
Variante: “llullamp llullampi”.
Jan ukajja, “Gobiernop”.
“Qʼañu jucha” siski uka cheq aka Biblian diccionariopan liytʼäta.
Griego arunjja, “sartaykänjja”.
Griego arunjja, “sartayistani”.
Ukasti chachanakampi qollqe layku ikintasir warmi sañ muni.
Ukasti chachanakampi qollqe layku ikintasir warmi sañ muni.
“Qʼañu jucha” siski uka cheq aka Biblian diccionariopan liytʼäta.
Jan ukajja, “jaltjjapjjam”.
“Qʼañu jucha” siski uka cheq aka Biblian diccionariopan liytʼäta.
Ukasti Diosan chʼamapa sañ muni.
Griego arunjja, “jumanakajj cuerpon jachʼañchapjjam”.