1 Corintios 16:1-24

  • Jerusalenankir cristianonakatakiw qollqe apthapisi (1-4)

  • Pablon viajiñ amtatapa (5-9)

  • Timoteo, Apolos jilatanakajj visitir sarañ amtapjje (10-12)

  • Ewjjtʼanakampi aruntanakampi (13-24)

16  Santo jilatanakataki qollqe apthapiñ toqetjja, kuntï Galaciankir congregacionanakar siskayätjja ukarjamaw jumanakajj lurapjjarakisma.  Sapa semanan nayrïr urupanwa jumanakajj sapa mayni mä qhawqha iraqtʼapjjasma, qhawqhatï utjapktam ukarjama, ukhamat kunapachatï nayajj purinkä ukhajj jan apthapisiñapataki.  Jumanakan ukar purinkä ukhajja, cartanakaman ajllipkta uka chachanakaruw Jerusalenar khitäjja, ukhamat munasiñat churapkta ukanak apapjjañapataki.  Nayan sarañajatï wakisinejja, jupanakajj nayamp chikaw sarapjjarakini.  Macedonia markar sarkä ukhaw jumanakan ukar jutäjja, nayasti Macedoniaruw saräjja,  inas jumanakamp mä qhawqha tiempo quedaschï, jan ukajj inas juyphipachajj jumanakamp paschï, ukhamat kawkirutï sarkä ukarojj jumanakamp chik mä qhawqha sarañataki.  Janiw nayajj paskasakejj jumanakamp jikisiñ* munkti, antisas Jehová* Diosatejj munanejja, mä qhawqha tiempow jumanakamp quedasiñ munirista.  Ukampis Pentecostés Fiestakamaw nayajj Éfeso markankaskäjja,  nayatakejj walja lurañanakar apiri mä jachʼa punkuw llawirasi, ukampis waljaniw naya contra saytʼasirinakajj utji. 10  Timoteojj purinkani ukhajj yanaptʼapjjam, ukhamat jumanak taypin jan kunatsa ajjsarañapataki,* jupajj nayjamarakiw Jehová* Diosan lurañanakap phoqaski. 11  Ukhamajj jan khitis jupar jiskʼachpanti. Nayan ukar sumaki jutjjañapatak khitanjjapjjam, nayasti jilatanakampiw akan suyaskta. 12  Apolos jilatasarojj jilatanakamp jutañapatakiw nayajj wal chʼamañchta, janïraw jichhajj jumanakan ukar jutañ amtkiti, jan ukasti kunapachay jutirjamächini ukhaw jutani. 13  Amuyasipjjapunim, Diosar confiyañanjja* suma saytʼatäpjjam, jan ajjsarirïpjjamti,* wali chʼaman saytʼasipjjam. 14  Taqe kunsa munasiñampi lurapjjam. 15  Jumanakajj yatipjjtawa, Acaya markanjja Estéfanas jilatan utapankirinakaw nayrïr achunakajja, jupanakarakiw santo jilatanakar yanaptʼañataki* chʼamachasipjjäna. Ukhamajj jilatanaka, nayajj chʼamañchtʼanipjjsmawa: 16  ukham jaqenakarojj istʼasipkakim, taqe khitinakatï yanaptʼasipki wal trabajtʼasipki ukanakarus ukhamaraki. 17  Nayajj wal kusista, Estéfanas, Fortunato, Acaico jilatanakan akankapjjatapatjja, jupanakaw jumanak lantejj nayar wal yanaptʼapjjetu. 18  Jupanakarakiw chuymajsa* qhanartayapjjetu, jumanakan chuymanakamsa ukhamaraki. Ukham jaqenakarojj wali munasiñampi uñjapjjam. 19  Asiankir congregacionanakajj aruntanakapwa apayanipjjtamjja. Aquilasa, Priscasa,* utapankir congregacionasa Tatitun discipulonakapjamaw wali munasiñampi aruntanipjjtamjja. 20  Taqe jilatanakaw aruntanipjjtamjja. Jumanakajj maynit maynikam jampʼattʼasisa* aruntasipjjam. 21  Naya Pablojj ukhamarakiw aruntaj pachpa amparajampi qellqtʼas apayanipjjsma. 22  Khititejj Tatitur jan munaskchi ukajja, maldisitäpan. ¡Nanakan Tatituja, jutamaya! 23  Tatit Jesusan wali khuyapayasiñapajj* jumanakampïpan. 24  Cristo Jesusan discipulonakapa, munasiñajajj taqe jumanakampïpan.

Qhanañchäwinaka

Variante: “jakisiñ”.
“Jehová” siski uka cheq aka Biblian diccionariopan liytʼäta.
Variante: “jiwtayasiñapataki”.
“Jehová” siski uka cheq aka Biblian diccionariopan liytʼäta.
Jan ukajja, “iyawsañanjja”.
Variante: “jan jiwtayasirïpjjamti”.
Griego arunjja, “serviñataki”.
Griego arunjja, “espiritujsa”.
Jupajj Priscila satarakïnwa.
Jikisisaw (jakisisaw) cristianonakajj jampʼattʼasisa aruntasipjjerïna.
Variante: “khariptʼayasiñapjja”.