1 Corintios 1:1-31

  • Aruntanaka (1-3)

  • Corintonkirinakatwa Pablojj Diosar yuspäri (4-9)

  • Mä wawak sarnaqañatak ewjjtʼa (10-17)

  • Cristojj Diosan chʼamapawa, Diosan yatiñanïñaparakiwa (18-25)

  • “Jehová Diosat jachʼañchaspan” (26-31)

1  Naya Pablojj Diosan munañapat jawsatätwa, ukhamat Cristo Jesusan mä apostolopjam serviñataki. Sóstenes jilatasajj nayamp chikäskarakiwa.  Corinto markankir Diosan congregacionaparu ukhamarak taqe cheqan Jesucristo Tatitusan sutipjjar artʼasipki taqe ukanakaruw qellqanipjjsma. Jupasti jupanakansa jiwasansa Tatitusawa. Cristo Jesusamp mayakïpjjatam laykuw Diosajj jumanakar santor tukuyapjjtamjja, juparakiw santo serviripäpjjañamatakejj jawsapjjtamjja:  Dios Awkisana ukhamarak Tatit Jesucriston wali khuyapayasiñapasa* sumankañapas jumanakampïpan.  Nayajj jumanakat Diosar yuspärapuntwa, jupajj Cristo Jesús taypiw wal khuyaptʼayasipjjtamjja.*  Cristompi mayakïpjjatam laykuw jumanakajj taqe kuns katoqapjjtajja, ukhamarak Diosan arunakap sum yatiyañsa, sum uñtʼañsa.  Kunanakatejj Cristjjat yatiyaski uka yatiyäwinakajja, jumanak taypin suma saphintatarakiwa.  Taqe kunatï jumanakatak munaski ukanakajja, jumanakan utjapjjtamwa, ukañkamajja Jesucristo Tatitusan jutatapajj qhanpach amuyaskani uka tiempo puriniñapjja taqe chuymaw suyasipktajja.  Diosaw jumanakarojj tukuykam saytʼatäpjjañamatak yanaptʼapjjätam, ukhamat Jesucristo Tatitusan urupanjja jan khitis jumanakar juchañchañapataki.  Diosajj arunakap phoqapuniwa, jupaw jumanakarojj Yoqapampi mayakïpjjañamatak jawsapjjtamjja, Yoqapajj Jesucristo Tatitusawa. 10  Jilatanaka,* Jesucristo Tatitusan sutipjjaruw nayajj chʼamañchtʼanipjjsma, taqenis mä amtak parltʼasipjjam, jan jumanak taypin tʼaqa tʼaq sarnaqañajj utjpanti, antisas mä wawak sarnaqasipjjam, amuyunsa ukhamarak lupʼiñansa. 11  Jilatanaka, Cloe kullakan utapankirinakat mä qhawqhaniw nayarojj yatiyapjjetu, jumanak taypin chʼajjwañanak utjatapa. 12  Nayajj ak sañ munapjjsma, jumanakajj akham sapjjtawa: “Nayajj Pablon arkiripätwa”, yaqhepasti: “Nayajj Apolosan arkiripätwa”, yaqhanakasti: “Nayajj Pedron* arkiripätwa”, mayninakasti: “Nayajj Criston arkiripätwa” sasa. 13  ¿Criston congregacionapajj tʼaqjtatati? Janiw Pablojj jumanak layku lawar chʼakkatat* jiwayatäkänti, ¿janich ukhamäki? Jan ukajj ¿Pablon sutipjjaruch bautisayasipjjtajja? 14  Janiw nayajj jumanakat khitirus bautiskti, ukatwa Diosarojj yuspärtjja, antisas Crispo, Gayo ukanakarukiw nayajj bautista. 15  Ukhamat jan khitis akham sañapataki: “Nayajj Pablon sutipjjar bautisatätwa” sasa. 16  Nayarakiw Estéfanas jilatan utapankirinakarus bautisayäta, ukat jukʼampejj janiw yaqhampir bautisatajat amtaskti. 17  Janiw Cristojj bautisañajatak khitankituti, jan ukasti suma yatiyäwinak yatiyañatakiw khitanitu. Janiw wali yatjjatat jaqenakan arsut arunakampi yatiyañatak khitankituti, ukham lurirista ukhajja, tʼaqesiñ lawan* Cristojj jiwkäna ukajj inamayäspawa. 18  Tukjatäpkani ukanakatakejja, tʼaqesiñ lawat* yatiyasiski ukajj inamayakiwa. Ukampis salvatäkañäni ukanakatakejja, uka yatiyäwejj Diosan chʼamap uñachtʼayi. 19  Qellqatanjja akham siwa: “Wali yatiñan jaqenakan yatiñanakapjja qʼal chhaqtayäjja. Suma amuytʼani jaqenakan amuyunakapsa, maysaruw apanuköjja” sasa. 20  ¿Kawkinkarak yatiñan jaqesti? ¿Kawkinkis escriba* jaqejja? ¿Kawkinkis akapachan* chʼajjwayir jaqejja? ¿Janit Diosajj akapachankir jaqenakan yatiñanakap jan kunatak servir tukuyki? 21  Akapachankir jaqenakajj pachpa yatiñanakapar confiyapjjatap laykojj janiw Diosar uñtʼapkiti. Kuntï jiwasajj yatiyktan ukajja, yaqhanakatakejj janis kunatak servirïkaspa ukhamawa, ukampis uka yatiyäwi taypiw Diosajj creyentenakar salvañ amti, ukhamatwa Diosan yatiñanïtapajj uñachtʼayasi. 22  Judionakajj señalanak mayipjje, griegonakajj yatiñanïña thaqapjjaraki. 23  Jiwasajja Cristojj lawar chʼakkatatäkäna* uka toqetwa yatiytanjja. Ukajja judionakatakejj mä lanktʼayir qalar uñtatawa, yaqha markankirinakatakejj jan kunatak servirirakiwa. 24  Khitinakatejj jawsatäpki ukanakatakejja, judiöpas griegöpasa Cristo taypiw Diosan chʼamapajj uñachtʼayasi, yatiñanïtapas ukhamaraki. 25  Kunatï Diosankki ukjja, jaqenakajj jan kunatak serviri, jan chʼamani ukhamwa uñjapjje, ukampis ukanakajj jupanakat sipansa jukʼamp yatiñaniwa, jukʼamp chʼamanirakiwa. 26  Jilatanaka, jumanak pachpaw amuyapjjtajja, jawsatäpki ukanak taypinjja, jaqen amuyuparjam wali yatiñan jaqet uñjatäpki ukanakatjja janiw waljanejj utjkiti, janirakiw chʼamani jaqenakatsa ni reyin familiapat jutir jaqenakatsa waljanejj utjkiti. 27  Jan ukasti jan amuytʼanit uñjatäpki ukanakaruw Diosajj akapachat ajlli, ukhamat yatiñani jaqenakar phenqʼachañataki. Jan chʼamanit uñjatäpki ukanakaruw Diosajj akapachat ajlli, ukhamat chʼamaninakar phenqʼachañataki. 28  Kunatï jaqenakatakejj jan yäqatäki, jiskʼachatäki, jan kunäkaraki ukanakwa Diosajj akapachat ajlli, wali yäqatäkis ukanak jan kunar tukuyañataki. 29  Ukhamat Dios nayraqatan jan khitis jachʼa jachʼa tukuñapataki. 30  Diosaw jumanakarojj Cristo Jesusan discipulonakapar tukuyapjjtamjja. Jesusaw Diosan yatiñapsa cheqapar uñjirïtapsa uñachtʼayistu. Jesús taypiw jiwasajj santo jaqer tuksna, juparakiw juchat kutsuyasajj* salvistaspa, 31  ukhamat kunjamtï qellqatan siskejj ukhamäñapataki, ukansti siwa: “Khititejj jachʼañchaski ukajj Jehová* Diosat jachʼañchaspan” sasa.

Qhanañchäwinaka

Variante: “khariptʼayasiñapasa”.
Variante: “khariptʼayasipjjtamjja”.
Jilatanaka sasinjja, awisajj kullakanakamppachatwa Biblian parli.
Griego arunjja, “Cefas”. Ukajj Pedron yaqha sutipawa. Juan 1:42 liytʼäta.
Variante: “kʼutkatat”.
“Tʼaqesiñ lawa” siski uka cheq aka Biblian diccionariopan liytʼäta.
“Tʼaqesiñ lawa” siski uka cheq aka Biblian diccionariopan liytʼäta.
Jan ukajja, “Leyit suma yatjjatata”.
“Akapacha” siski uka cheq aka Biblian diccionariopan liytʼäta.
Variante: “kʼutkatatäkäna”.
“Juchat kutsuyaña” siski uka cheq aka Biblian diccionariopan liytʼäta.
“Jehová” siski uka cheq aka Biblian diccionariopan liytʼäta.