1. ¿Kuna mandamientsa Jesusajj discipulonakapar churäna? (Nayrïr paginankir dibujo uñjjattʼäta).

 JANÏR jiwayapkäna uka arumajja, Jesusajj akham sasaw discipulonakapar säna: “Nayajj mä machaq mandamiento churapjjsma [...]. Kunjamtï nayajj munasipksmajja, ukhamarak jumanakajj maynit maynikam munasipjjam. Cheqpachansa jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” sasa (Juan 13:34, 35).

2. ¿Kunatsa maynit maynikam munasiñajj wali wakiskirejja?

² Jesusajj discipulonakapar wal munasïna, ukatwa jumanakatï maynit maynikam munasipjjäta ukhajja, taqeniw nayan cheqpach discipulojäpjjatam amuyapjjani sasin säna. Jesusan uka arunakapajj nayrïr patak maranakanwa phoqasïna, jichha tiemponsa phoqasirakiwa. Ukatwa chʼamäkipansa, maynit maynikam munasiñajj wali wakiskirejja.

3. ¿Kunsa aka yatichäwin yatjjataskañäni?

³ Pantjasirïtas laykuw awisajj taqe chuyma munasirïñajj chʼamakejja. Ukhamäkchisa Jesusat yateqasiñatak chʼamachasiskakiñasawa. Aka yatichäwinjja, kunjamsa munasiñajj taqenimp sumankañataki, jan khitir yaqhachañataki, katoqtʼasirïñataki yanaptʼistu ukwa yateqañäni. Yateqkasajj akham jisktʼasiñäni: “¿Chʼamäkipansa mayninakar munasisipkakïna uka jilat kullakanakat kunsa yateqeristjja?” sasa.

4. Mateo 5:23, 24 textorjamajja, ¿kunatsa jiwas conträki ukampi sumankthapiñatak chʼamachasiñasa?

⁴ Congregacionan maynejj jiwas conträtap amuystan ukhajja, kunatsa jupamp sumankthapiñatak chʼamachasiñasa ukwa Jesusajj yatichawayistu (Mateo 5:23, 24 liytʼañataki). Diosar kusisiyañatakejja, taqenimpiw sum apasiñasa. Jilat kullakanakampi sumankañatak wal chʼamachastan ukhajja, Jehová Diosajj wal kusisi. Maynitak chuyma ustʼat sarnaqañäni,  yamas jan sumankthapiñ munkañäni ukhajja, Diosajj janiw kuntï jupar serviñatak lurktan uk katoqkaniti (1 Juan 4:20).

5. ¿Kunatsa Mark jilatatakejj sumankthapiñajj chʼamakïna?

⁵ Maynimpi sumankthapiñajj chʼamakïspawa. ¿Kunatsa ukham sistanjja? Kunas Mark * jilatar pasäna uk amuytʼañäni. Mä jilataw yaqhep jilat kullakanakar jupat jan walinak parläna, ukaw wal chuym ustʼayäna. ¿Kunsa Mark jilatajj luräna? Jupajj akham siwa: “Wal colertʼasisajj jupar toqenoqayätwa” sasa. Ukampis Mark jilatajj ukham luratapat arrepentisïnwa, ukatwa sumankthapiñatak jupamp parläna. Ukampis uka jilatajj janiw perdonañ munkänti. Ukatwa Mark jilatajj qalltan akham amuyäna: “Jupajj janiw sumankthapiñ munkiti, ¿kunataraki nayak chʼamachasiskästi?” sasa. Congregacionanak tumptʼir jilataw ‘sumankthapiñatak chʼamachasiskakim’ sasin säna. ¿Kunsa Mark jilatajj lurpachäna?

6. 1) ¿Kunsa Mark jilatajj sumankthapiñatak luräna? 2) ¿Kunjamsa Mark jilatajj Colosenses 3:13, 14 textorjam lurañatak chʼamachasïna?

⁶ Mark jilatajja, awisajj jan humilde chuymanïtapa, mayninakat sipansa jilankkaspas ukham amuyiri jaqëtapwa amuyasïna. Ukatwa cambiañajawa sasin säna (Col. 3:8, 9, 12). Jan waltʼayasipkäna uka jilatamp mayamp parlasajj humilde chuymampiw perdón mayisïna. Ukatsti mä qhawqha cartanakwa qellqäna, ukanjja disculptʼita, mayampiw amigomäñ munta sasaw säna. Yamas kunanakatï gustkaspa ukanakwa regaltʼäna. Ukhampachasa, mayni jilatajj chuyma ustʼatakïskänwa. Ukampis Mark jilatajja Jesusajj ‘munasipjjam, perdonasipjjarakim’ siskäna ukarjam lurañatakiw chʼamachasiskakïna (Colosenses 3:13, 14 liytʼañataki). Ukhamasti sumankthapiñatak chʼamachasiñäni ukhas maynejj jan munkani ukhajja, Jesusjam munasirïñaw perdonaskakiñatakisa, sumankthapiñatak Diosar orasiskakiñatakis yanaptʼistani (Mat. 18:21, 22; Gál. 6:9).

7. 1) ¿Kun lurañassa Jesusajj mayistu? 2) ¿Kuna jan walinsa mä kullakajj uñjasïna?

 ⁷ ‘Kunjamtï jumanakajj uñjatäñ munapktajja, ukhamaraki jupanakar uñjapjjam’. Janiw ‘munasipktam ukanakaruk munasipjjañamäkiti’ sasaw Jesusajj säna (Luc. 6:31-33). Congregacionan maynejj jan aruntañ munkistaspa ukhajj ¿kunsa lursna? Awisakis ukham paschejja, ukaw Lara sat kullakar pasäna. Jupajj akham siwa: “Mä kullakajj janiw aruntañ munkitänti, kunatsa ukhamäna uk janiw yatkayätti. Ajjsarayätwa, tantachäwinakar sarañas chʼamakëjjänwa” sasa. Qalltanjja Lara kullakajj akham amuyäna: “Ukham pasatapajj janiw juchajäkiti. Yaqhep jilat kullakanakajj uka kullakan mayjätap amuyapjjarakiwa” sasa.

8. 1) ¿Kunsa Lara kullakajj sumankthapiñatak luräna? 2) ¿Kunatï Lara kullakar paskäna ukajj kunsa yatichistu?

⁸ Lara kullakajja, uka kullakampi sumankthapiñatakejj wal chʼamachasïna. Jehová Diosaruw ukjjat orasïna, ukatsti jupampi parliriw saräna. Kunatsa kullakajj jupatak mayjäna ukjjatwa parlapjjäna, qhomanttʼasisajj sumankthapipjjänwa. Taqe kunas walikjamakëjjänwa. Ukampis Lara kullakajj akham siwa: “Tiempompejja mayampiw uka kullakajj mayjtʼjjäna. Ukajj wal llakisiyitäna” sasa. Qalltanjja Larajj akham amuyäna: “Uka kullakajj cambiani ukhakiw kusisit jakasëjja” sasa. Ukampis tiempompejj akham sasaw amuyjjäna: ‘Munasiñampi jupar uñjaskakiña, taqe chuyma perdonaskakiñaw jukʼamp walïspa’ sasa (Efes. 4:32-5:2). Jesusjam munasirejja, “janiw kuna jan wal luratas amjjäskiti”, “taqe kunansa amukiw tʼaqesi, taqe kun creyiraki, taqe kun suytʼi, taqe kun aguanti”, uka arunakwa Lara kullakajj amtäna (1 Cor. 13:5, 7). Ukaw jan sinti llakisiñatak yanaptʼäna. Tiempompejja uka kullakajj munasiñampiw Lara kullakar uñj-jjäna. Jiwasatï jilat kullakanakamp sumankañataki, jupanakar munasiskakiñataki chʼamachasiñäni ukhajja, “wali munasiri, sumankañ churiri Diosajj” jiwasampïniwa (2 Cor. 13:11).

9. Hechos 10:34, 35 textorjamajja, ¿kunatsa jan khitirus yaqhachañasäki?

⁹ Jehová Diosajj janiw khitirus yaqhachkiti (Hechos 10:34, 35 liytʼañataki). Jiwasajj jupat yateqasis jan khitirus yaqhachktan ukhajja, Diosan wawanakapätaswa uñachtʼaytanjja. Ukatsti “jaqe masimarojj juma kikparjam munasiñamawa” siski uka mayitaruw istʼtanjja, jilat kullakanakampis sumankaraktanwa (Rom. 12:9, 10; Sant. 2:8, 9).

10, 11. ¿Kunas mä kullakarojj jan yaqhachirïñatak yanaptʼäna?

¹⁰ Yaqhepatakejja jan yaqhachirïñajj chʼamakïspawa. Kunas Ruth kullakar pasäna uk amuytʼañäni, tawaqetäkäna ukhajja, yaqha markankir mä warmiw familiapar jan wal luräna. ¿Kunjamsa ukajj Ruth kullakar mayjtʼayäna? Jupajj akham siwa: “Janiw uka markat kunsa yatiñ munkayätti. Uka markankir taqpach jaqenakasa, jilat kullakanakamppachasa jan wali jaqëpkaspa ukham amuyjjayäta” sasa. ¿Kunas ukham jan amuyjjañatak yanaptʼäna?

¹¹ Ruth kullakajja uka amuyu apanukuñ wakisitapwa amuyäna. Ukatwa uka markankir jilat kullakanakan experiencianakapa, uka markat yatiyäwinaka Anuario libron liytʼäna. Jupajj akham siwa: “Uka markankirinakat sum amuyjjañatakiw chʼamachasiyäta. Ukankir jilat kullakanakas taqe chuyma Diosar servipjjatapwa amuyjjayäta. Jupanakajj Diosan markapankapjjarakiwa sasaw qhan amuyjjarakiyäta” sasa. Kullakajj jukʼat jukʼatwa uka markankirinakar munasiñampi uñj-jjäna. Jupajj akham saskakiwa: “Uka markankir jilat kullakanakar uñtʼasajja, munasiñamp uñjañataki, jupanakamp parltʼasiñatakiw chʼamachasirïta. Ukhamatwa jupanakar sum uñtʼjjayäta” sasa. ¿Kunjamsa ukajj yanaptʼäna? Ruth kullakajj akham siwa: “Tiempompejja janiw uka markankirinakar yaqhachjjayätti” sasa.

12. ¿Sara kullakajj kunjam jaqënsa?

¹² Inas yaqhepajj jan amuyasisak mayninakar yaqhachasipkchi. Sara kullakajja, janiw maynejj qhawqha qollqenisa, congregacionan kuna lurañanakampis yanaptʼi ukarjam uñjirïkänti, ukatwa janis yaqhachirïkaspa ukham amuyasïna. Ukampis jupajj akham siwa: “Yaqhepanakar yaqhachatajwa amuyasiyäta” sasa. ¿Kunjamsa jupajj yaqhachäna? Familiapanjja taqeniw universidadan estudiapjjäna, ukatwa wali yatjjatat jaqenakampik Sarajj chikachasiñ munirïna. Mä kutejja mä amigopar akham sänwa: “Universidadan estudiatanakampikiw jilpach chikachasta, mayninakampejj janiw sint parlkti” sasa. Sarajj cambiañapänwa. ¿Kunas ukatak yanaptʼäna?

13. ¿Kuntï Sarajj jan yaqhachirïñatak lurkäna ukat kunsa yateqassna?

¹³ Congregacionanak tumptʼir mä jilataw Sararojj kunansa cambiañapa uk amuyasiñapatak yanaptʼäna. Sarajj akham siwa: “Diosar taqe chuyma servitajatsa, tantachäwinakan arstʼatajatsa, Bibliat sum yatitajatsa, walik ukham lurasktajja sasaw jilatajj sitäna. Ukatsti, ‘Bibliat jukʼamp yatjjasajja, jukʼampirakiw humilde chuymanïñataki, jan jachʼa jachʼa tukuñataki, khuyapayasirïñataki chʼamachasiñasa’ sarakitänwa”. Sarajj chuymaruw uka arunak katoqasïna. Jupajj akham siwa: “Mayninakar sum uñjaña, munasirïñaw jukʼamp wakiskirejja sasaw amuyjjayäta” sasa. Ukatwa taqenir sum uñj-jjäna. Sarajj akham saskakiwa: “Jilat kullakanakajj suma chuymanïpjjatapatwa Jehová Diosatak wali valoranïpjje, nayajj ukham uñjañatakiw chʼamachasirakiyäta” sasa. ¿Kunsa yateqassna? Wali yatjjatatäkasasa, janipuniw mayninakat sipan jilanksnas ukham amuyasiñasäkiti. Jiwasatï ‘taqpach creyente masinakasar taqe chuyma munasiñänejja’ janiw khitirus yaqhachkañäniti (1 Ped. 2:17).

14. Hebreos 13:16 textorjamajja, ¿katoqtʼasirïktan ukhajj kunjamas Jehová Diosajj jikjjatasi?

¹⁴ Katoqtʼasirïktan ukhajj Jehová Diosajj wal kusisi (Hebreos 13:16 liytʼañataki). Pisinkirinakar yanaptʼtan ukhas ukhamarakiw wal kusisi. Ukham lurañajj Diosar adorañampi sasiwa (Sant. 1:27; 2:14-17). Ukatwa Biblian akham sistu: “Jaqe masimarus katoqtʼasipkakim” sasa (Rom. 12:13). Katoqtʼasirïktan ukhajja, taqe chuyma munasirïtasa, suma amigötaswa uñachtʼaytanjja. Manqtʼasiñataki kun umtʼasiñatak yaqhanakar invittʼasasa, jupanakar yanaptʼañatak tiempo apstʼasisasa Jehová Diosaruw kusisiytanjja (1 Ped. 4:8-10). ¿Ukampis kunanakas katoqtʼasirïñatak jarkʼistaspa?

15, 16. 1) ¿Kunatsa yaqhepatakejj katoqtʼasirïñajj chʼamakïspa? 2) ¿Kunas Edit kullakarojj katoqtʼasirïñapatak yanaptʼäna?

¹⁵ Awisajja pisinkirïtasata, jan wajjtʼasir familian jilsutasata, jan ukajj yaqha ukhamanakatwa katoqtʼasirïñajj chʼamakïspa. Ukaw Edit sat mä viuda kullakar pasäna. Janïr Testigökasajja, janiw mayninakampi chikachasiñajj gustkänti. Yaqhanakaw nayat sipansa jukʼamp sum katoqtʼapjjaspa sasaw amuyirïna.

¹⁶ Testigöjjasajja Edit kullakajj janiw ukham amuyjjänti, katoqtʼasirïñatakiw chʼamachasjjäna. Jupajj akham siwa: “Tantachasiñ Uta luraskäna ukhajja, mä jilïr irpirejj akham sitänwa ‘mä chacha warmiw construccionan yanaptʼañatak jutapjjani, utamar pä semana alojtʼasmati’ sasa. Ukapachajj Sarepta markankir viuda warmita, ukhamarak kunjamsa Jehová Diosajj jupar bendisïna ukanakatwa amtayäta” sasa (1 Rey. 17:12-16). Ukatwa Edit kullakajj utapar katoqtʼäna. ¿Ukham luratapat kuna bendicionanaksa katoqäna? Jupajj akham siwa: “Uka chacha warmejj janiw pä semanak utajan quedasipkänti, jan ukasti pä phajjsiw quedasipjjäna. Uka tiemponjja wali suma amigoruw tukupjjayäta” sasa. Jichhajja Edit kullakajj congregacionan walja amigonakaniwa, precursoräjjarakiwa, predikir sarapki uka jilat kullakanakar utapar invittʼañasa,  kun wajjtʼañasa wal gusti. Jupajj akham sarakiwa: “Wajjtʼasirïsajj kusisitätwa. Ukham luratajat walja bendicionanakwa katoqarakta” sasa (Heb. 13:1, 2).

17. ¿Kunsa Luke jilatampi esposapampejj amuyasipjjäna?

¹⁷ Inas jiwasajj katoqtʼasirïstan, ukampis ¿jukʼamp katoqtʼasirïñatak chʼamachassnati? Uk amuytʼañäni, Luke sat jilatampi esposapampejj wali katoqtʼasirïpjjewa. Awk taykaparusa, yaqha familiaranakaparusa, suma amigonakaparusa, congregacionanak tumptʼir jilatampiru esposapampirusa utapar invittʼapjjapuniwa. Ukampis Luke jilatajj akham siwa: “Suma amigojäpkäna ukanakaruk invittʼapjjatajwa amuyasipjjayäta” sasa. ¿Kunsa jukʼamp katoqtʼasirïñatakejj lurapjjäna?

18. ¿Kunsa Luke jilatampi esposapampejj jukʼamp katoqtʼasirïñatak lurapjjäna?

¹⁸ Jesusajj akham sänwa: “Munasipktam ukanakaruk munasipjjsta ukhajja, ¿kuna bendicionsa katoqapjjäta?” sasa. Luke jilatampi esposapampejj uka arunakat amuytʼasaw taqenir katoqtʼañ wakisitap amuyapjjäna (Mat. 5:45-47). Jehová Diosajj taqeniruw sum katoqe, jiwasajj jupat yateqasiñasawa sasaw amuyapjjäna. Ukatwa jan invittʼapjjerïkäna ukanakar invittʼapjjäna. Luke jilatajj akham siwa: “Jichhajj taqeniw wali kusisitäpjjta, suma amigöpjjarakta, Jehová Diosarus jukʼampiw jakʼachasipjjta” sasa.

19. ¿Kunjamsa Jesusan discipulopätas uñachtʼaytanjja, kun lurañsa jumajj amtarakta?

¹⁹ Aka yatichäwinjja, taqe chuyma munasiñajj kunjamsa taqenimp sumankañatakisa, jan khitir yaqhachañatakisa, katoqtʼasirïñatakisa yanaptʼistu ukwa yateqawaytanjja. Jilat kullakanakjjat kuna jan wali amuyunaksa apanukuñasawa, jupanakarojj taqe chuymaw munasiñasaraki. Ukham lurañäni ukhajja, kusisitäñäniwa, Jesusan cheqpach discipulopätaswa uñachtʼayarakiñäni (Juan 13:17, 35).