LISA a sat mä kullakarojja, Bibliat yateqañ munañapatakejj kunas yanaptʼäna uk akham siwa: “Jilat kullakanakajj suma chuymampiw uñjapjjetäna, ukaw chuymar purtʼitäna” sasa. Anne sat kullakampejj niya ukhamaw pasarakïna. Jupajj akham siwa: “Testigonakar uñtʼkayäta ukhajja, yatichapkitäna ukat sipansa kunja suma chuymanïpjjänsa ukaw chuymar purtʼitäna” sasa. Uka kullakanakarojj Biblia liyiñasa uka toqet lupʼiñas wal jichhajj gustjje, ukampis jilat kullakanakan suma chuymanïpjjatapaw jupanakar wal yanaptʼäna.

Mayninakan chuymapar purtʼañatakejj ¿kunjamsa suma chuymanïtas uñachtʼaysna? Kunjamsa uk lursna uk pä toqet uñjañäni. Maya, arunakasampi. Paya, luratanakasampi. Khitinakarus suma chuymampi uñjañasa ukwa uñjaskarakiñäni.

Proverbios 31 capitulon mä suma warmitwa parli, “jupajj parlki ukhajja suma chuymampiw parli” sarakiwa (Prov. 31:26). Uka warmirojj suma chuymanïtapaw kamsanisa, kunjamsa parlani uk amuyasiñapatakejj yanaptʼi. Awk taykanakajj ukhamwa lurapjjarakispa. Jilaparte awk taykanakajja, qhoru arumpi wawanakapar parlapjjaspa ukhajj qhawqsa wawanakar jan waltʼayaspa uk sum yatipjje. Awk taykanakatï wawanakar runkatatapjjani, jan munasiñap parlapjjani ukhajja, wawanakajj janiw jupanakar istʼañ munjjapjjaspati. Ukampis munasiñamp parlapjjani ukhajja, wawanakajj istʼasipjjaniwa, kun luram satas lurapjjarakiniwa.

Wawanakanïstansa janisa, ¿kunjamsa suma chuymamp parlsna? Proverbios 31:26 texton nayrïr partepaw yanaptʼistaspa, ukan akham siwa: “Lakap jistʼarki ukhajja yatiñampiw parli” sasa. Ukajj ¿kamsañsa muni? Suma arunakwa ajlliñasa, kunjamsa parlañäni uksa ajlliñasarakiwa. Mä jan waltʼäwin uñjasisajj akhamwa jisktʼasiñasa: “Kuntï arskä ukajj ¿jukʼampit colertʼayani, jan ukajj sumankañcha utjayani?” sasa (Prov. 15:1). Ukhamajj yatiñan jaqëstan ukhajja, janïr arskasajj sumwa amuytʼasiñäni.

Yaqha proverbiojj akham sarakiwa: “Jan amuytʼasis arsut arunakajja espadampi usuchjañamp sasiwa” sasa (Prov. 12:18). Arunakasasa, kunjamsa parltan ukas kunjamsa mayninakar jan waltʼayaspa uk amuytʼañäni ukhajja, wali amuyumpiw kuns arsuñäni. ‘Suma chuymamp parlirïñäni’ ukhajja, janiw usuchjir arunakampis ni qhoru arumpis parlkañäniti (Efes. 4:31, 32). Jan walinak amuyaskañat sipansa, jan walinak parlaskañat sipansa suma amuyunakwa pʼeqesar uchañasa, munasiñampiw parlañasaraki. Jehová Diosajj uka toqet wali yateqaskayawa. Elías serviripajj wali sustjatäkäna ukhajja, Diosar representkäna uka angelajj ‘jiskʼat parlasaw suma qoña arumpi’ chʼamañchtʼäna (1 Rey. 19:12). Ukampis janiw suma chuymampikejj parlañasäkiti, jan ukasti suma chuymanïtasajj luratanakasanwa amuyasiñaparaki. Uk jichhajj uñjañäni.

Jehová Diosat yateqasisajj munasiñampiw parlañasa, suma chuymampiw kuns lurañasaraki (Efes. 4:32; 5:1, 2). Nayrïr parrafon parlaniwayktan uka Lisa sat warmejja, Testigonakan suma chuymanïpjjatap luräwinakapanwa uñjäna. Jupajj akham siwa: “Mä akatjamat familiajamp yaqha cheqar jakir sarjjañajäna ukhajja, Testigonakat pä chacha warmiw yanaptʼapjjetäna, nanakar yanaptʼañatakejj trabajopat permiso mayisipjjatayna. Ukhatakejj janïraw  Bibliat yateqañ qalltkayätti” sasa. Uka jilat kullakanakan suma chuymampi uñjapjjatapatjja, Bibliat yateqañajj kunjamakïpachasa sasin amuyañapatakiw Lisa sat warmir yanaptʼäna.

Nayrïr parrafon parlaniwayktan uka Anne sat warmejja, Testigonakajj kunja munasirïpjjesa ukwa uñjarakïna. Jupajj akham siwa: “Niyakejjay jan wali pachan jakstanjja, janiw nayajj khitirus confiyjjayätti; jaqer confiyañajj nayatakejj wali chʼamänwa. Testigonakar uñtʼkayäta ukhajja, jupanakat payachasiyätwa. Kuna amtampis wali munasiñamp uñjapjjpachïtu sasaw jisktʼasirïta. Ukampis Biblia yatichkitäna uka kullakajj suma chuymampiw uñjitäna, ukatwa jupar confiyjjayäta” sasa. Ukampis ¿kunjamsa ukajj Anne warmirojj yanaptʼäna? Jupajj akham siwa: “Tiempompejj taqe chuymaw Bibliat yateqjjayäta” sasa.

Testigonakan suma chuymampi ukat munasiñampi uñjapjjatapaw uka pä kullakanakar yanaptʼäna. Ukarakiw Bibliat jukʼampi yateqañ munapjjañapatakejj yanaptʼäna. Congregacionankirinakan suma chuymanïpjjatap uñjañaw uka kullakanakarojj Jehová Diosar confiyjjañatakisa markapar confiyjjañatakis yanaptʼawayi.

Yaqhepatakejja, suma chuymamp parltʼañas lartʼasiñas facilakiwa, kuna laykutejj jilsuwayapki uka markan uk lurañajj janiw chʼamäkiti, jan ukajj ukham chuymanïpjjapuniwa. Ukampis janiw uka laykukejj ukhamäñasäkiti, ukhamäspa ukhajja janiw Diosjam suma chuymanïtas uñachtʼayjjsnati (Hechos 28:2 liytʼarakïta).

Cheqpach suma chuymanïñajj espíritu santon achup taypinkiwa (Gál. 5:22, 23). Ukham chuymanïñatakisa, Diosjama ukat Jesusjamäñatakis espíritu santompiw amuyunakasansa luratanakasans yanaptʼayasiñasa. Cristianonakjamajj cheqpachapuniw mayninakat llakistanjja, Diosampir jaqe masisampir munasitasatwa uk lurtanjja. Ukhamajj mayninakar suma chuymamp uñjañajj wali importantewa, chuymatwa misturaki, ukajj Diosarojj wal kusisiyi.

Suma chuymampi uñjapkistu jan ukajj sum uñtʼktan ukanakar munasiñamp uñjañajj facilakiwa (2 Sam. 2:6). Jiwasar ukham uñjapjjatapat yuspäraraktanwa (Col. 3:15). Ukampis maynir suma chuymamp uñjañajj jan wakisitap amuystan ukhajj ¿kunas pasaspa?

Ak amuytʼañäni, munasiñajj jan wakiski ukanakarus Jehová Diosajj munasiñampiw uñji, janiw khitis jupjam suma chuymamp munasirejj utjkaspati. Uka toqet Bibliajj wali sum yatichistu. Griego Arut Qellqatanakanjja, walja kutiw jachʼa khuyapayasiña arojj uñsti. ¿Kunjamsa Diosajj uk uñachtʼayi?

Jehová Diosajj walja millón millón jaqenakaruw suma chuymamp uñji, kunanakatï jakañatak munaski ukanak churasaw suma chuymanïtap uñachtʼayi (Mat. 5:45). Janïr jupar uñtʼkayätan ukhatpachaw Diosajj suma chuymamp uñj-jjestäna (Efes. 2:4, 5, 8). Sañäni, taqe jaqenak laykuw mä sapa Yoqap churäna. Apóstol Pablojja Diosajj ‘wali khuyapayasiñapatwa’ Jesusan jiwatapjjar juchat kutsuyistu sasaw qellqäna (Efes. 1:7). Juchachaskstansa chuymapsa pʼakintkstanjja, Jehová Diosajj irpaskakistuwa, yatichaskakistuwa. Yatichäwinakapasa arunakapas ‘sullar uñtasitawa’ (Deut. 32:2). Kunja suma chuymampis uñjistu uk janipuniw kuttʼayañ puedksnati. Cheqas Jehová Diosatï jan munasiñamp uñjkistaspajja, janiw jutïritak suytʼäwinïksnati (1 Pedro 1:13 liytʼarakïta).

Jehová Diosan suma chuymanïtapajja, jupar jakʼachasiñataki ukat jupjam chuymanïñatakiw yanaptʼistu. Ukhamajj janiw mä qhawqhanirukejj suma chuymamp uñjañasäkiti, jan ukasti kunjamtï Diosajj mayninakar uñjki ukham uñjañatakiw sapüru chʼamachasiñasa (1 Tes. 5:15). Mayninakarutï taqe horasan suma chuymamp uñjañäni ukhajja, kunjamtï mä thaya urun ninajj maynir juntʼthapiykejja ukhamäñäniwa. Familiaranakasasa, congregacionankir jilat kullakanakasasa, trabaj compañeronakasasa, escuel masinakasasa, vecinonakasas jiwasamp chikäsajj kusisitäpjjaniwa.

Familiasata jan ukajj congregacionasat maynirutï munasiñamp uñjañajj wakischi, jan ukajj suma chuymamp parltʼañajj wakischi ukhajja, ¿yanaptʼsnati? Inas congregacionasankir mä jilatasa jan ukajj mä kullakas utap uñjir munchi, jan ukajj jardinap askichañatak yanap munchi, qhatur sarañataki jan ukajj yaqha lugarar sarañatak mä yanaptʼir munchi. ¿Kunjamsa predicacionan suma chuymanïtas uñachtʼaysna? Yanap munki ukar yanaptʼasaw suma chuymanïtas uñachtʼaysna.

Jehová Diosat yateqasisipkakiñäni, arunakasampisa luratanakasampisa ‘suma chuymanïtas’ uñachtʼayaskakiñäni.