NAYRA tiemponjja, mä chachampi mä warmimpejj casarasiñ amtapjjäna ukhajj chachaw warmin familiaparojj qhawqtï phuchapat mayipki uka pago churañapäna. Ukajj qollqempi, uywanakampi, jan ukajj yaqha valoran cosasanakampiw pagasïna. Awisajja trabajisaw maynejj uk paguirïna, ukaw Jacob chachar pasäna. Raquel warmimpi casarasiñ amtäna ukhajj paqallqo maranakaw suegropatak trabajïna (Gén. 29:17, 18, 20). ¿Kunatsa mä warmimp casarasiñatakejj pago churaña costumbrejj utjäna?

Biblia toqet yatjjatata Carol Meyers sat warmejj akham siwa: “Warmit churaskäna uka pagojja, kuna trabajonaktï familiapan tawaqojj lurirïkäna uk pagañatakïnwa. Tawaqon trabajopajj yapump jakasiri familiatakejj wali importantënwa” sasa. Warmit qollqe jan ukajj regalonakajj churaskäna ukajj paypach familianakan jukʼamp sum apasipjjañapatakiw yanaptʼarakïna. Jan waltʼäwinak utjipanjja, paypach familiaw jupanakpura yanaptʼasipjjarakispäna. Janiw ukakïkiti, warmimp casarasiñatak pagojj churasïna ukajja, mä warmejj casarasiñatak parlatäjjatapwa uñachtʼayäna. Awkipat sipansa, esposopaw jichhajj cuidjjañapäna, ukwa uka pagojj uñachtʼayarakïna.

Warmit pagojj churaskäna ukajja, janiw jupajj alañäkaspasa jan ukajj aljañäkaspasa ukham sañ munkänti. Mä librojj akham siwa: “Warmin familiapar qollqe jan ukajj yaqha ukham valorani regalonakajj churaskäna ukajja, israelitanakajj casarasiñatak warmip alapkaspänsa ukhamwa uñtayi. Ukampis janiw ukhamäkänti. [Qollqe jan ukajj regalonaka churaskäna ukajja], warmi irpasjjatapat familiapar pago churañatakïnwa, janiw warmip alkaspasa ukhamäkänti” sasa (Ancient Israel—Its Life and Institutions).

Jichha tiemponjja, casaraskani uka warmit pago churañ costumbrejj yaqhep markanakan utjaskakiwa. Cristiano awk taykanakatï phuchapat qollqe jan ukajj regalonak katoqkasin wali jila jan mayipkani ukhajja, ‘amuytʼasirïpjjatapwa’ jaqenakajj yatipjjani (Filip. 4:5; 1 Cor. 10:32, 33). Jan ‘qollqe sinti munirïpjjatapwa’ uñachtʼayapjjarakini (2 Tim. 3:2). Awk taykanakatï phuchapat jan walja qollqe mayipkani ukhajja, casarasir waynajj janiw taqpach qollqe jikjjatañkamajj casarasiñ urup qheptʼaykaniti. Precursorat serviskchi ukhas janirakiw sapüru trabajisin qollqe jikjjatañatakejj uk jaytkaniti.

Yaqhep markanakanjja, casarasir warmit qhawqhas pagojj churasiñapa uka toqet leyinakaw utji. Uka markanakan cristiano awk taykanakajj uka leyinak respetapjjewa. ¿Kunatsa respetapjje? Diosaw cristianonakarojj ‘jilïr autoridadanakar istʼapjjañap’ mayi, kuna leyinakatï jupan leyinakap jan pʼakintki uk phoqapjjañapsa mayiraki (Rom. 13:1; Hech. 5:29).