WICHITA (Kansas, Estados Unidos) markanwa nasta, diciembre 10, 1936 marana. Kimsa sullkanïtwa. William tatajasa Jean mamajas taqe chuymaw Jehová Diosar servipjjäna. Tatajajj tama pʼeqtʼirjamaw servïna. Mamajan mamitapajj Emma Wagner satawa, jupatwa mamajajj cheqa yatichäwinak yateqäna. Emma awichajajj waljaniruw Bibliat yatichatayna, Gertrude Steele kullakarus jupaw yatichatayna, jupajj walja maraw misionerat Puerto Rico markan serviwayi. * Taqe jupanakajj nayatak wali yateqaskayänwa.

Mä sábado jaypʼojja, tatajampiw Yatiyañataki ukat Consolación (jichhajj ¡Despertad!) revistanakampi callenakan yatiyasipkayäta, ukhajj phesqa maranïyätwa. Uka tiemponjja, jaqenakajj Payïr Jachʼa Chʼajjwäwinkasipkänwa. Tatajajj janiw akapachar mitiskänti, ukatwa mä doctorajj wali umantatäsin jupar ‘llaythätawa’ sasin jiskʼachäna. Tatajar jakʼat uñkatasajj akham sänwa: “¿Kunatsa jan nuwjkista? Llaytha jaqe” sasa. Ajjsarayaskchïyätsa, tatajan jan ajjsartʼayasitapat wal muspharayäta. Waljaniw uñjir jutapjjäna, ukhamäkchïnsa, tatajajj jupanakar revistanak lakiraskakïnwa. Ukatsti mä soldadow jutarakïna, doctorajj jupar akham sänwa: “Aka llaythampejj ¡kunsay lurapjjam!” sasa. Umatätap amuyasinjja, soldadojj akham sänwa: “Samartʼir sarjjam” sasa. Ukjjarojj panpachaniw sarjjapjjäna. Kunjamsa Diosajj jan ajjsartʼirïñatak tatajar yanaptʼawayi uk amtasajj wal kusista. Wichita markanjja, tatajajj ñikʼut khuchhuñatak pä tiendanïnwa. ¡Doctoras ukar khuchhuyasir jutarakirïnwa!

Kimsaqallqo maranïkayäta ukhajja awk taykajajj utsa, ñikʼut khuchhuñ tiendanaksa aljapjjänwa. Uka lantejj llantanakan mä ut lurapjjäna, ukampiw Colorado markar sarjjapjjayäta, yanaptʼajj ukan wal munasïna. Grand Junction marka jakʼanwa jakañ qalltapjjayäta, awk taykajajj  precursorat ukan servipjjäna. Uywa uñjasina, yapu yapuchasinwa trabajipjjäna, ukampis janiw jurnäläkänti. Wal chʼamachasisajja, Diosan yanaptʼapampejj mä tamaw uttʼayasïna. Ukanwa awkijajj nayarusa, Billie jilatarusa, esposaparusa, mayninakarus mä jawiran bautisapjjetäna, junio 20, 1948 marana. Qhepat Billie jilatampi esposapampejj tamanak tumptʼirjamaw servipjjäna, yoqapampi esposapampis ukhamaraki.

Diosar sapüru servirinakampi sum apasiñasa, chʼamañchtʼasiñas wali sumänwa. Steele familiajj wal yanaptʼitäna, jupanakajj Don, Earlene, Dave, Julia, Si, Martha satäpjjänwa. Diosar nayraru uchasakiw kusisiñajj utjaspa uk jupanakat yateqawayta.

Bud Hasty amigojajja, 19 maranëjjayäta ukhaw Estados Unidos markat aynacha toqer sarañatak invittʼitäna. Tamanak tumptʼirejj Ruston (Luisiana) markaruw khitapjjetäna, ukanjja walja Testigonakaw Diosat jitheqtatäpjjäna. Jilatajj akham sapjjetänwa: ‘Jukʼanikïpchïtasa, sapa semanaw tantachäwi apapjjañama’ sasa. Ukatakejj mä uta jikjjatasin uk sum askichapjjta. Sapa semanaw tantachasipjjayäta, qalltan paninikïpjjayätwa. Paninikiw tantachäw sarayapjjerïta, maynikiw taqe jisktʼanakar jaysaniri. Awisajj mä demostracionaw utjañapäna, ukatakejj paniniw plataformar makatapjjerïta, janiw khitis utjirïkiti. Qhepatsti, mä jilïr kullakaw tantachäwinakar jutjjäna. Ukjjarojj Bibliat yateqerinakasa, Diosat jitheqtat jilat kullakanakas jutjjapjjarakïnwa. Ukhamatwa tamajj jiltäna.

Mä kutejja, Bud jilatampejj iglesia de Cristo religionankir mä chachampiw jikisipjjta, jupajj jan uñtʼkayäta uka textonakwa aytäna. Ukaw kunarus creyta ukanakat wal lupʼiyitäna. Mä semanapuniw uka chachan jisktʼanakapat yatjjatayäta. Iyawskta uk chuymar katjjasiñatakejj ukaw yanaptʼitäna. ‘Yaqha religionankir jaqenakampejj jichhajj parljjeristwa’ sasaw sayäta.

Qhepatjja, tamanak tumptʼirejj El Dorado (Arkansas) markankir mä tamaruw yanaptʼañatak khititäna. Ukankasajj sapakutiw Colorado markar sarayäta, ukanwa cuartelar jan sarañatak tramitenak lurayäta. Mä kutejj precursor masinakajampiw autojat ukar sarasipkayäta. Ukhamaruw Texas markan jan walir purtʼasipjjta, autojajj qʼalapunïnwa. Ukatwa mä jilatar jawsapjjta, jupaw jutasin utaparusa, tantachäwirus irpapjjetäna. Jan walin uñjasipjjataj yatisajja, qollqempiw jilat kullakanakajj yanaptʼapjjetäna. Yanaptʼapkitäna  uka jilatasa, 25 dolararuw autoj aljarakïna.

Mayniruw Wichita markar apañapatak yanaptʼa mayipjjta, ukanwa precursorat serviri Everidge Frank McCartney amigojajj jakasïna. Frank, Francis ispa yoqanakapampejj jichhakamaw amigösipkta. Jupanakaw 25 dolarar mä merqʼe auto aljapjjetäna. Ukjja, qʼala tukjat autojj lantiw alasjjayäta. Diosan Reinop nayrar uchatajat ukjapuniw Jehová Diosan yanaptʼap uñjta. Cheqas mä autpun munaskayäta. Ukanwa McCartneys familiajj Bethel Crame sat mä kullakaru uñtʼayapjjetu. Mamapajj Ruth satänwa, jupajj Wellington (Kansas) markan 90 marankamaw precursorat serviwayi. Niya mä mara qhepatjja, Bethel kullakampiw 1958 maran casarasipjjta. Jupampiw El Dorado markan precursorjam sirvjjapjjayäta.

Kunjamsa mayninakajj yanaptʼawayapjjetu uk lupʼisajja, ‘Diosan markapan kunan yanaptʼañay wakischini ukanwa yanaptʼañäni’ sasaw esposajamp amtapjjayäta. Qhepatjja, Walnut Ridge (Arkansas) markaruw precursor especialjam serviñatak khitapjjetäna. 1962 maransti, Galaad Escuelar (clase 37) sarañatakiw invitapjjarakitäna. Don Steele jilatas ukankarakïnwa. Escuela tukuyjjepansti, Nairobi (Kenya) markaruw khitapjjetäna. Nueva York markat sarjjasajja, wali llakitaw jikjjatasipjjayäta. Ukampis Nairobi markar purisajja, janiw llakitäjjapjjayätti. Walja jilat kullakanakaw aeropuerton katoqapjjetäna.

Ratukiw uka markan yatinoqtapta, Diosar servisas kusisitäpjjayätwa. Ukanjja, Chris Kanaiya chachampiru Mary esposapampiruw Bibliat yatichawayapjjta. Jupanakajj jichhakamaw Kenya markan sapüru Diosar servisipki. Mara qhepatjja, Kampala (Uganda) markaruw nayrïr misionerot khitapjjarakitäna. Ukan wali sumapunïnwa, waljaniw Bibliat yateqañ munapjjäna. Qhepatsti nanakamp chikaw Diosar servipjjäna. Kimsa mara chikatani qhepatjja, Estados Unidos markaruw kuttʼjjapjjayäta, ukhamat wawanakajar uywañataki. Nueva York markat sarjjapjjayäta ukat sipansa, Africat sarjjasaw jukʼamp llakita jikjjatasipjjayäta. Ukan jakasiri jaqenakarojj wal munasipjjayäta, ukatwa ‘kuttʼaniñasawa’ sasin amtapjjayäta.

Awk taykajajj jakasipkäna, ukanwa jakañ qalltapjjta, Colorado marka aynach toqena. Ukanwa Kimberly nayrïr wawajajj nasïna. 17 phajjsinak qhepatsti, Stephany wawajaraki. Cheqa yatichäwinakwa jupanakar yatichapjjayäta. Kunjamtï awk taykanakajajj nanakatak wali yateqaskayänjja, ukhamarakïñwa munapjjayäta. Suma yateqaskay awk taykanïskstansa, janiw taqenipunejj Diosar serviñ amtapkaspati, ukaw familiajan pasäna, sullka jilajampi kullakajampejja janiw Diosar sirvjjapjjeti. Wasitampi Diosan markapar kuttʼanipjjaspa uk wal suyta.

Kusisitaw wawanakajar uywawayapjjta. Taqe kunsa mayachtʼataw lurapjjerïta. Aspen (Colorado) marka jakʼanwa jakasipjjayäta, ukatwa khunun sarnaqañ yateqapjjayäta, ukhamat tiemponïsin familjam ukar sarañataki. Khunu qollurojj telefericot sarapjjerïta, sarkasaw wawanakajampi taqe kunat parlapjjerïta. Awisajj yaqha cheqaruw sarapjjarakirïta, ukanwa nina aqtayasisin uka jakʼan wal parlapjjerïta. Wawanakajajj  jiskʼäsipkchïnsa, akham jisktʼapjjerïtu: “¿Kunsa jachʼäjjasin luräjja? ¿Khitimpis casarasëjja?” sasa. Diosar serviñajj chuymanakapana, amuyunakapana utjañapatakejja, Diosatwa parlapjjerïta. Diosar sapüru serviñasa, khititï Diosar serviñatak jiwasjam amtanïki ukamp casarasiñas kunja wakiskirisa uk parlapjjapunirïtwa. Ukampis wawpach jan casarasipjjañapatakejja, akham sapjjerïtwa: “23 mara phoqañkamajj janiw khitimpis casarasiñamäkiti” sasa.

Awk taykanakajat yateqasisajja, yatiyirisa, tantachäwirus familjam sarapjjapunirïtwa. Diosar sapüru servirinakarus utar invitapjjarakirïtwa. Ukhamarusa, misionerot serviñajj kunja sumänsa uksa parlapjjerïtwa. Africar wasitampi sarañajj wali askïspawa sasaw wawanakajar sapjjerïta. Uk istʼasajj wal sarañ munapjjäna.

Familjamajj Bibliat yatjjatapjjapunirïtwa, escuelan kuna jan walinakansa wawanakajajj uñjasipjjaspa ukarjamaw kuns lurapjjerïta. Testigjamajj kunjamsa jisktʼanakar jaysapjjaspa ukwa mä demostración wawanakajar lurayapjjerïta. Ukham yateqasajj wal kusisipjjäna, jan ajjsartʼas parlañs yateqapjjänwa. Jilsjjasinjja, awisajj janiw familjamajj Bibliat yatjjatañ munjjapjjänti. Ukhamïpanjja, mä kutejj wal colertʼasisajj akhamwa jupanakar sayäta: “Cuartonakamar sarapjjam, janiw familjamajj yatjjatkañäniti” sasa. Uk istʼasajja, jachtʼasisajj ‘yatjjatakiñäni’ sasinwa sapjjetäna. Uk istʼasajja, wawanakajan Bibliat yatjjatañ munapjjatapwa esposajampejj amuyapjjayäta. Jachʼäjjasajj Bibliat wal yatjjatañ munapjjäna. Jan ajjsartʼasaw kuns sapjjarakitäna. Ukampis awisajja, ‘aka yatichäwejj janiw walïkiti’ sasaw sapjjerïna. Ukajj walsa llakisiyapjjerïkchitojja, ukaw kunsa amuyapjje uk yatiñatak yanaptʼapjjetäna. Uk sum qhanañchtʼatajja, Jehová Diosajj uka toqet kamsisa uk sum amuyapjjäna.

Janjamakiw wali jayäkiti, wawanakajj ratukiw jilarawayapjje. Diosan markapamp yanaptʼatajja, wawanakajan Jehová Diosar munasipjjañapatakiw chʼamachasiwayapjjta. Colegiot mistusajja, phuchanakajajj precursorat serviñwa qalltapjjäna. Qollqe toqet yanaptʼasiñatakis kunaymaninak lurañwa yateqapjjarakïna. ¡Ukajj wali kusiskañänwa! Ukatsti Cleveland (Tennessee) markaruw pä kullakanakampi sarjjapjjäna, ukan yanaptʼajj waliw munasïna. Jan nanakamp chikäjjapjjatapat walsa llakisipjjchiyätjja, Diosar servir uñjasin wal kusisipjjayäta. Bethelampejj wasitampiw precursorat serviñ qalltapjjayäta, ukhamïpanjja, jukʼamp bendicionanakwa katoqapjjayäta. Tamanak tumptʼirin yanapiripjamasa, jachʼa tantachäwinakansa yanaptʼapjjapunirïtwa.

Tennessee markar janïr sarkasajja, Londres (Inglaterra) markaruw phuchanakajajj sarapjjäna, ukankkasajj sucursalaruw sarapjjäna. Ukanwa 19 marani Stephany phuchajajj Paul Norton sat mä betelitar uñtʼatäna. Mayan uka markar kuttʼasajja, Kimberly phuchajarakiw Brian Llewellyn jilatar uñtʼarakïna, jupajj Paul Norton jilatampiw trabajïna. Stephany phuchajajj 23 mara phoqasinwa Paul jilatampi casarasjjäna. Kimberly phuchajasti 25 mara phoqasarakiw Brian jilatampi casarasïna. Ukhamajj 23 mara phoqasaw casarasisipkäna. Suma chuymani jilatanakampi casarasiñ amtapjjatapajj walikïnwa.

Phuchanakajajj akham sapjjetänwa: “Jumanakasa, abuelitonakasa, wali yateqaskayäpjjtawa. Qollqet aynachtʼañas utjawaykchejja, ukaw ‘Diosan Reinopa nayrar uchañatakejj’ yanaptʼawayapjjetu” sasa (Mat. 6:33). Abril 1998 maranjja, Paulompi Stephanympirojj Galaad Escuelar (clase 105) sarañatakiw invitapjjäna, ukatsti Malaui (África) markaruw khitapjjäna. Niya ukhanakarakiw Brian ukhamarak Kimberly jupanakarojj Londres Betelar invitapjjäna, qhepat Malaui Betelaruw khitapjjarakïna. Uk yatisajj wal kusisipjjayäta, wayn tawaqökasin ukham serviñat sipansa yaqha ukhamajj janiw utjkaspati.

Kunjamtï qalltan sapksmajja, Marais jilataw enero 2001 maran jawsanitäna. Jupajj Servicio de Traducción ukanwa pʼeqtʼaskäna. Jilatajj sitänwa: “Oraqpachankir traductoranakarojja, inglés  aru sum amuyapjjañapatakiw yanaptʼasini” sasa. Ukan yanaptʼañatakiw wakichtʼañ munapjjetäna, ukhatakejj 64 maranïyätwa. Walpun esposajampejj uka toqet Diosar mayisipjjerïta, suma ewjjtʼa katoqañatakis chuymankipstat mamanakajampis parlapjjarakirïtwa. Walsa yanaptʼa munapkchïnjja, ‘sarapjjasmawa’ sasaw sapjjetäna. Wasitat jilatar jawsasajja, ‘uka luräwin yanaptʼañ munapjjeristwa’ sasaw sayäta.

Uka tiemponjja mamajan cáncer usunïtapaw yatisïna. Ukhamïpanjja, jupar uñjañatakiw qheparañ amtapjjayäta, ukhamat Linda kullakajar yanaptʼañataki. Uk yatisajj mamajajj akham sitänwa: “Saraskakim, janitï sarkätajja, janiw sum jikjjataskäti” sasa. Linda kullakajas ukhamarak amuyäna. Ukham amtapjjatapasa, jilat kullakanakan yanaptʼapasa wal yanaptʼapjjetäna. Patterson markankir Betelar sarjjasin mä uru qhepatjja, Linda kullakajajj ‘mamitaw jiwjje’ sasinwa jawsanitäna. Niyakejjay kullakajas mamajas Diosan markapana jukʼampi yanaptʼañatak chʼamañchtʼapjjchitänjja, ukaruw chuym uchapjjayäta.

Malaui sucursalaruw nayraqat khitapjjetäna, ukajj wali kusiskañänwa, ukanwa phuchanakajajj esposonakapampi servisipkäna. ¡Familpachaw ukan jikisipjjayäta! Ukjjarusti Zimbabue, Zambia markanakaruw sarapjjarakiyäta. Kimsa mara chikatanitjja, Malaui markaruw kuttʼapjjayäta. África cheqankir Testigonakajja, akapachar jan mitisipjjatapat tʼaqhesiyataw nayrajj uñjasipjjäna. Uka jilat kullakanakan experiencianakapwa Malaui markan qellqapjjañajäna. *

Wasitampiw 2005 maran Basalt (Colorado) markar kuttʼanjjapjjayäta, ukanwa precursorjam servisipkta. 2006 maranjja, Brian tollqajampi Kimberly phuchajampiw Mackenzie, Elizabeth sat pä wawanakapar uywañataki jutjjapjjarakïna. Paulompi Stephany phuchajampejj Malaui sucursalanwa jichhakam yanaptʼasipki. Paul tollqajajj sucursal sarayirjamaw serviski. Jichhajj 80 maranëjjtwa, nayamp chika trabajir walja wayna jilatanakajja, kuntï lurirïkayäta uka lurañanakanwa yanaptʼasipki, ukajj wali kusiskañawa. Wawanakajana, allchhinakajana Diosar serviñan nayrar sartapjjañapatakejja, Diosan servirinakapat yateqasiñaw yanaptʼapjjetäna. Ukaw kusisita sum jakasiñatakejj yanaptʼawayapjjetu.