MÄ THAYA alwajja Brookings (Dakota del Sur, Estados Unidos) markankasipkayätwa, chʼuchʼu thayaw thaytʼanirakïna. Niyaw thaya tiempojj qalltani sasaw sayäta. Uka urojja uywa uta manqhan mä qhawqhanimpi saytʼatäsipkayätwa, uka cheqajj wali thayänwa. Cheqas, uywanakar uma churañatak mä jiskʼa estanque jakʼankasipkayätwa. Kunatsa ukankasipkayäta uk amuytʼapjjañamatakejj jakäwijat mä jukʼa parltʼapjjäma.

Marzo 7, 1936 maranwa nasta, pusi wawanakäpjjtwa, nayaw sullkäta. Dakota del Sur markanwa yapuchasina, uywanak uñjasina familiajamp jakapjjayäta. Jila partejj yapumpis sarnaqapkchiyätjja, ukajj janiw nanakatakejj nayrankkänti. Tatajampi mamajampejja, 1934 maranwa Jehová Diosan Testigopjam bautisasipjjatayna. Ukatwa Diosan munañap lurañatak chʼamachasipjjäna. Clarence tatajasa, Alfred tiojasa, Conde (Dakota del Sur) markankir mä jiskʼa tamanwa jilïr irpirinakan sarayiripat servipjjäna, nayrajj siervos de compañía satäpjjänwa.

Tantachäwirusa, Diosan Reinopata utat uta yatiyiris familiajamp sarapjjapunirïtwa. Tatajampi mamajampiw jiskʼatpach yatichawayapjjetu, jupanakar uñjasas yateqawayapjjaraktwa, ukaw wal yanaptʼawayapjjetu. Dorothy kullakajampejj sojjta maraniw Diosan arunakap yatiyañ qalltapjjta. 1943 maranwa Diosan Arunakap Yatiyañatak Escuela sat tantachäwin arstʼañatak qellqayasiyäta, uka mara nayrakiw uka escuelajj tantachäwin apasiñ qalltäna.

Jachʼa tantachäwinakar sarapjjapunirïtwa. 1949 maranjja, Sioux Falls (Dakota del Sur) markanwa Grant Suiter jilatajj mä jachʼa tantachäwin arstʼäna. Uka arstʼäwin pʼeqeñchäwip amtasisktwa, “Amuyktan ukat sipansa, akapachan  tukusiñapajj jukʼamp jakʼankiwa” satänwa. Jilatajja, bautisat taqe jilat kullakanakaw Diosan Reinopat yatiyañatak chʼamachasipjjañapa, ukaw aka tiempon jukʼamp wakiskirejja sasaw säna. Uka arunakaw jutïri jachʼa tantachäwin bautisasiñ amtañatakejj yanaptʼawayitu. Kunjamtï qalltan sapkayäsmajja, uywanakar churañ mä utanwa bautisasiñatak suyaskayäta. Brookings markan noviembre 12, 1949 maranwa, uywanakar churañatak fierrot lurata mä jiskʼa estanquen pusinejj bautisasipjjta.

Bautisasisinjja, precursorat serviñwa amtayäta. 15 maraniw enero 1, 1952 maran precursorat serviñ qalltawayta. Bibliajj akham siwa: “Suma yatiñan jaqenakamp chika sarnaqerejja, suma yatiñanirakïniwa” sasa (Pro. 13:20). Ukham yatiñan jilatanakaw yanaptʼawayapjjetu. Jupanakat maynejj 60 marani Julius tiojawa, jupampiw precursorat servipjjayäta. Nayat wali jilïrïkchïnsa, wali kusisitaw Diosan arunakap yatiyir sarapjjerïta. Tiempompejj tiojan experienciapat wal yateqawayta. Mä qawqha tiempotjja, Dorothy kullakajas precursorat serviñwa qalltarakïna.

Waynitükayäta ukhajja, awk taykajajj tamanak tumptʼiri jilatampiru esposapampirojj utar jutapjjañapatakejj invittʼapjjapunirïnwa. Ukhamatwa Jesse Cantwell jilatampi Lynn esposapampejj wal yanaptʼawayapjjetu. Precursorjam serviñ qalltañatakis yanaptʼawäpjjarakituwa. Cheqas Diosan markapan kunanaksa lurirista uk amtañatakis jupanakaw wal yanaptʼawayapjjetu. Awisajja, utaj jakʼanakan yaqha tamanakar visitapkäna ukhajja, jupanakamp chika yatiyir sarañatakiw invitapjjerïtu. Jupanakampi ukham sarañajj wali sumapunïnwa.

Qhepatjja Bud Miller jilatampi Joan kullakampiw tamanak tumptʼirjamajj jutapjjarakïna. Nayajj 18 maranëjjayätwa, cuartelar sarañas waktʼjjarakitänwa. Cuartelar sarapjjañapataki ajllirinakajja, nayaruw ajllipjjetäna. Ukajj akapachar jan mitisipjjamti sasin Jesusajj yatichkäna ukarjam jan walïtapwa amuytʼirïta. Nayajj Diosan Reinopatwa yatiyañ munayäta (Juan 15:19). Ukatwa cuartelar sarañatak ajllitäñat sipansa, religionar sariri jaqjam ajllitäñ mayirïta.

 Cuartelar saririnakar ajllipki ukanakamp parlir nayamp sarañäni sasaw Miller jilatajj sitäna, ukatwa wal kusisiyäta. Jupajj jan ajjsartʼiri jilatänwa. Diosar taqe chuyma serviri jilatar nayamp chika uñjasajj jan ajjsartʼasaw parltʼirïta. Ukatsti 1954 maranwa Diosan arunakap yatiyirjam ajllipjjetäna. Ukaw Diosan markapan yaqha luräwinak katoqañatak yanaptʼawayitu.

Uka tiemponwa Betelar invittʼapjjetäna. Staten Island (Nueva York) markankir Haciendas Watchtower ukanwa kimsa marajj serviwayta. Ukan yanaptʼañajj wali sumänwa, ukanwa ‘suma yatiñan jaqenakampi’ chikajj trabajiyäta.

WBBR radiojj Staten Island sat haciendankänwa. Ukjja Jehová Diosan Testigonakapaw 1924 marat 1957 marakamajj sarayapjjäna. Uka haciendanjja 15 jan ukajj 20 betelitanakaw trabajipjjäna, jila partejj jan experienciani wayna tawaqöpjjayätwa. Ukhamäkchïnsa, alajjpachar sarañataki ajllita ukhamarak chuymankipstata Eldon Woodworth jilataw nanakampejj trabajïna, jupajj wali amuytʼasir jilatänwa. Mä awkjamaw Diosar serviñan yanaptʼapjjetäna. Mayninakan pantjasitanakap uñjasajja, Woodworth jilatajj aka arunakwa arsuri: ‘Pantjasir jaqenakas yanaptʼapkchejja, kunanaktï Jehová Diosajj lurawayki uk uñjañajj wali muspharkañawa’ sasa.

Frederick W. Franz jilatajj nanakampiw haciendan trabajirakïna. Jupajj wali yatiñanïnwa, Bibliatsa sum yatïna, ukaw wal yanaptʼawayapjjetu. Sapa maynitwa llakisïna. Harry Peterson jilataw nanakatak phayirïna, Papargyropoulos apellidopat sañat sipansa Peterson sañaw facilakïna. Uka jilatajj ajllitarakïnwa, taqe chuymaw Diosan arunakap yatiyirïna. Peterson jilatajj Betelan wal trabajtʼirïna, yatiyiris sarapunirïnwa. Phajjsin walja revistanakwa jaqenakar churirïna. Bibliat suma yatjjattʼatänwa, jisktʼanakajarus sum qhanañchtʼapjjerïtu.

Kunanaktï haciendan achuyapkayäta ukanakjja, sum wakichtʼasaw Betelar apayapjjerïta. Sapa marajja, frutanaka ukhamarak verduranakwa 45.000 frasconakar uchasin Betelar apayapjjerïta. Ukanjja, Etta Huth kullakampiw trabajiyäta, apayañatakejj kunjamsa wakichtʼasiñapa ukanak sum yatïna. Betelar apayañatak  wakichapkayäta ukhajja, hacienda jakʼanakan jakiri walja kullakanakaw yanaptʼirejj jutapjjeri, Etta kullakaw sapa maynirojj trabajonak churirïna. Uka kullakajj walsa yanaptʼkchïnjja, hacienda sarayiri jilatanakarojj wali respetompiw uñjirïna. Diosan markap sarayiri jilatanakar wali respetompi uñjañ wakisitapwa jupat yateqawayta.

Angela Romano tawaq kullakajja, Betelar apayañatak wakichapkayäta ukan yanaptʼañatakiw jutarakïna. Etta kullakaw juparojj Bibliat yatichatayna. Ukhamatwa amuytʼasir yaqha kullakarojj Betelan uñtʼawayta. Angela kullakampejj abril, 1958 maranwa casarasta, jupampiw 58 maranak jakawayta, Diosan markapansa kunayman toqet yanaptʼawayapjjta. Jupajj taqe chuymapuniw Jehová Diosar servïna, ukaw matrimoniojan yanaptʼawayapjjetu. Kuna jan walinakan uñjaskasasa esposajarojj wal confiyta.

WBBR radiojj 1957 maran aljasjjäna ukhajja, Brooklyn markankir Betelanwa mä qawqha tiempojj yanaptʼawayta. Qhepatjja, Angelampi casarasisaw Betelat mistjjta. Niya kimsa maraw Staten Island markan precursorat servipjjayäta. WBBR radio alirimpiw uka pachpan llätunka maranak trabajiwayta, ukasti WPOW satäjjänwa.

Diosan markapan yanaptʼajj munaski ukan yanaptʼañatakejja, Angelampejj jan walja cosasanakanïñwa amtapjjayäta. Ukhamatwa 1961 mara qalltajj Falls City (Nebraska) markan precursor especialat serviñatak invittʼapjjetäna. Uka markar sarañatak wakichtʼasisipkayäta ukhaw Jilïr Irpirinakataki ukat Taman Yanapirinakapatak Escuelar sarañatak invittʼapjjetäna, nayrajja uka escuelajj mä phajjsiw South Lansing (Nueva York) markan apasirïna. Uka escuelan wal yateqawayapjjta, Nebraska markan yanaptʼañatakejj ukarjamaw lurañäni sapjjerïtwa. Ukampis Camboya markaruw misionerot khitapjjetäna. Asia cheqan Inti jalsut aynach (sudeste) toqenjja, machaqat suma lugaranak uñjañasa, istʼañasa, muktʼañasa wali sumänwa. Diosan arunakap uka cheqanakan yatiyasajj wal kusisipjjayäta.

Ukampis servipkayäta ukanjja, política toqet janiw nayrjamäjjänti, ukatwa Vietnam del Sur toqer misionerot sarjjapjjayäta. Ukan pä mara servisipkayäta ukhaw wal usuntayäta, ukatwa markajar kuttʼanipjjta. Wasitampi Diosar serviñ qalltañatakejja, tiempow munasïna.

Marzo, 1965 maranwa tamanak tumptʼirjamajj wasitat serviñ qalltta. 33 maranakaw esposajampejj tamanak tumptʼirjama, tamanak tumptʼirinakan uñjiripjamajj serviwayapjjta, jachʼa tantachäwinakansa yanaptʼawayapjjaraktwa. Kimsa uru jachʼa tantachäwinak wal suyirïta, ukatwa taqe chuymajj ukan yanaptʼirïta. Walja maraw Nueva York markan servipjjayäta, kimsa uru jachʼa tantachäwinakat jila partejj Estadio de los Yankees ukanwa apasïna.

Diosar sapürunjam serviri mayni cristianonakjamarakiw esposajampejj kusiskaña luräwinak katoqawayapjjta. Amuytʼañataki, 1995 maranjja, Escuela de Entrenamiento Ministerial  ukan yatichañatakiw invittʼapjjetu. Kimsa mara qhepatjja, Betelan serviñatakiw invitapjjetu. 40 maranak nayrajj Diosar jukʼamp serviñ qalltapkayäta ukar kuttʼasajj wal kusisipjjayäta. Mä tiempojja, Departamento de Servicio ukan yanaptʼayäta, Diosan markapan apaski uka escuelanakansa yatichirjamaw yanaptʼawayarakta. 2007 maranjja, kawkïr escuelanakatï Betelan apaskäna ukjja Departamento de Escuelas Teocráticas ukan uñjañapatakiw Oraqpachan Jilïr Irpirinakajj amtapjjäna, uka departamento sarayirjamaw mä qawqha marajj yanaptʼawayta.

Diosan markapan apaski uka escuelanakanjja, aka maranakanakwa jukʼamp cambionakajj uñjasiwayi. Jilïr Irpirinakatak Escuelajj 2008 maratwa apasiñ qalltawayi. Patterson ukhamarak Brooklyn markanjja, 12.000 jilïr irpirinakat jilaniw pä maran uka escuelar sarawayapjje. Uka escuelanakajj experienciani jilatanakan yanaptʼapampiw yaqha markanakan apasiwayaraki. 2010 maranjja, Escuela de Entrenamiento Ministerial ukajja, Soltero Jilatanakan Bibliat Yatjjatapjjañapatak Escuela sasin uñtʼatäjjänwa. Ukatsti Cristiano Matrimonionakan Bibliat Yatjjatapjjañapatak Escuelaw apasiñ qalltarakïna.

Septiembre, 2014 marat qalltasaw uka pä escuelajj mayachasiwayi, uka escuelajj Diosan Reinopat Yatiyirinakataki Escuela satäjjewa. Uka marat jichhakamajja, casadonaka, soltero jilat kullakanakaw uka escuelar sarapjje. Walja sucursalanakan uka escuela apasiskatap yatisajja, jilat kullakanakajj wal kusisipjje. Bibliat yatjjatañatak yanaptʼir escuelanakajj waljaniruw yanaptʼawayi, yateqerinakar uñjasasti wal kusista.

Bautisaskta ukat jichhakamajja, amuytʼasiri jilat kullakanakat waljaniw yanaptʼawäpjjetu, ukatwa Jehová Diosar wal yuspärta. Jupanakajj nayat jilïrïpjjänwa, janiw nayjam costumbrenïpkänti, ukampis Diosarojj taqe chuymaw servipjjäna. Jehová Diosar wal munasipjjatapas qhanaw luratanakapan uñjasïna. Jehová Diosan markapanjja, amuytʼasiri jilat kullakanakajj waljaw utji, jupanakaw yanaptʼapjjestaspa. Nayarojj ukhamwa yanaptʼawäpjjetu.