“Alajjpachansti mä trono uñjarakta, ukansti mayniw qontʼatäskäna. Uka tronon qontʼatäkän ukasti kʼajkir jaspe jan ukajj cornalina qalar uñtatarakïnwa. Tronoparusti mä kürmirakiw muyuntäna, ukasti esmeralda qalar uñtatarakiw kʼajäna” (Apocalipsis 4:2, 3).

“Uka muytatansti mä qhanaw qhanarakïnjja, uka qhanasti kürmir uñtatarakïnwa, kunapachatejj kürmejj jalluna qenay taypin uñstkis ukhama. Ukhamwa nayajj uñjta [Jehová] Tatitun kʼajkir kankañapjja” (Ezequiel 1:27, 28).

Uka visionanakjja apóstol Juanampi Ezequiel profetampiw uñjapjjäna, Jehová Diosajj kunja muspharkañ Diosasa uk amuytʼañasatakejja, kʼajkir suma qalanakata, kurmita ukhamarak mä tronotwa uka visionanakajj parlistu. Ukanakaw Diosajj kunja muspharkañasa, kunja sumasa, kunja askisa ukanak amuytʼayistu.

Salmo qellqerejj akham sasaw qellqarakïna: “[Jehová] Tatitojj taqe chʼamaniwa, jachʼar aptatäñapajj wakisipuniwa, kʼari diosanakat sipan wali ajjsarkayawa. Yaqha markanakan diosanakapajj janiw kunäpkisa, Diosasti alajjpach luririwa; aytat kankañampi, lliphipkir qhanampiw nayraqatapanki, chʼamampi, muspharkay kankañampiw qollan utapanki” sasa (Salmo 96:4-6).

Jehová Diosajj Taqe Kunjjar Munañanïkchisa, oración toqe Jupar jakʼachassna ukwa muni (Salmo 65:2). Diosajj munasistuwa ukhamarak jiwasat llakisirakiwa, ukatwa apóstol Juanajj jan pächasis “Diosajj munasiñawa” sasin qellqäna (1 Juan 4:8).

“Estebanajj qollan ajayumpi phoqtʼatäsinwa alajjpachar uñtasina, Diosan jachʼa kankañap uñjäna. Jesusarusti Diosan kupëjjapan saytʼatäskiri uñjarakïna. Ukatsti sarakïnwa: ‘¡Uñtapjjam! Nayajj alajjpachanak jistʼarat uñjta. Jaqen Yoqaparusti Diosan kupëjjapankaskiri uñjarakta’ sasa” (Hechos 7:55, 56).

Judionakan pʼeqtʼirinakapajja, uka nayrakiw Jesusar jiwayapjjäna. Estebanajja uka pachpa jaqenakampiw jichhajj parlaskäna. Uka visionanjja, Estebanajj Jesusaruw Diosan kupëjjapankaskir uñjäna. Uka toqetjja Pablojj akham sasaw qellqäna: ‘Jehová Diosajj jiwatanak taypitwa Jesusar jaktayi, ukatsti alajjpachanjja jupan kupëjjaparuw qontʼayasi,  taqe munañaninakjjaru uttʼayasa, marka apnaqerinakjjaru, autoridadanakjjaru, chʼamaninakjjaru, kunatejj utji jichhürunakansa, qhepa urunakansa utjkani ukanakjjarusa’ sasa (Efesios 1:20, 21).

Jesusajj ukham jachʼañchatäkchisa, Awkipjamarakiw jaqenakat wal llakisi sasaw Bibliajj qhanañchi. Aka Oraqen Diosan Arunakap yatiykäna ukhajja, usutanakaruw qolläna, pisi chʼamaninakaruw yanaptʼäna ukat jiwatanakarus jaktayarakïnwa. Jesusajj jakäwip churasaw qawqsa Diosarusa, jaqenakarus munasïna uk uñachtʼayäna (Efesios 2:4, 5). Jupajj niyaw aka oraqjjar apnaqjjani, Diosan arunakaparjam sarnaqapki ukanakarus walja bendicionanakwa churarakini.

“[Naya Daniel profetajja] uñchʼukiskakïyätwa, ukjjarusti mä trononakaw uchatarakïna, mä Jilïri chuymani jaqew qontʼasirakïna [...]. Waranqa waranqanakarakiw juparojj servipjjäna, millón millonanakarakiw jupa nayräjjan saytʼatäpjjäna” (Daniel 7:9, 10).

Uka visionanjja, waranq waranqa angelanakwa Daniel profetajj uñjäna. ¡Ukajj wali muspharkañäpachänwa! Angelanakarojj janiw uñjksnati, ukampis jupanakajj amuytʼasiri wali chʼamanïpjjewa. Jupanakajj wali suma uttʼayatäpjjewa, serafinanakas querubinanakas uka taypinkarakiwa. Biblianjja 250 jila kutiw angelanakat parli.

Diosajj janïr aka Oraqsa ukat jaqenaksa lurkäna ukhaw angelanakar luräna. Diosajj aka Oraq lurkäna ukhajja, angelanakajj alajjpachatwa uñchʼukisinipkäna ukat wali kusisitaw amparanakap tʼajjllirapjjarakïna (Job 38:4-7).

Diosat jan jitheqtas servir angelanakajja, Diosan Reinopat suma yatiyäwinakajj taqe cheqan yatiyasiñapatakiw yanaptʼasipki (Mateo 24:14). Ukham yanaptʼasipkatapjja mä visionanwa apóstol Juanajj uñjäna, ukatsti akham sänwa: “Yaqha angelarakwa alajjpachan jalanaqaskir uñjta. Jupasti wiñay qhespiyasiñ arunakanïnwa taqe jaqenakaru yatiyañataki, taqe markanakaru, taqe casta jaqenakaru, kunayman parlani jaqenakarusa” sasa (Apocalipsis 14:6). Nayra tiemponjja angelanakajj jaqenakampiw awisajj parlapjjerïna, jichha tiemponjja janiw ukhamäjjeti. Ukampis angelanakajja, Diosan arunakap yatiyapki ukanakaruw suma chuymani jaqenakar jikipjjañapatak yanaptʼapjje.

“Ukatsti mä jachʼa nuwasiñaw alajjpachanjja utjäna. Arcángel Miguelasti [Jesucristusti] angelanakapampi saytʼasisinjja uka dragonampiw nuwasïna, Dragonampi angelanakapampisti saytʼasipjjarakïnwa, [...] Ukhamajj uka dragonajj jaqonukutäjjänwa alajjpachatjja. Uka dragonapï nayrapacha uka jachʼa katarïnjja, ukasti Supaya, Satanás satarakiwa, juparakiw aka oraqen jaqenakarojj wali sallqjañanak luri. Jupampi angelanakapampisti aka oraqeru jaqtanitäjjapjjänwa” (Apocalipsis 12:7-9).

Alajjpachanjja jan walinakajj utjarakïnwa. Aka Oraqen jaqejj jakañ qalltkäna ukhajja, mä angelaw Dios contra saytʼäna, Diosar yupaychañat sipansa jaqenakajj jupar yupaychapjjaspa ukwa munäna. Ukhamatwa Satanás sutimpi uñtʼayasïna uka sutejj Diosan “Uñisiripa” sañwa muni. Tiempompejja yaqha angelanakaw Dios contra saytʼapjjarakïna, ukhamatwa jupanakajj demonionakar tukupjjäna. Jan walinakampi apayasisajja, uka angelanakajj Dios contraw saytʼapjje ukat jila parte jaqenakaruw Diosat jitheqtayapjjaraki.

Supayasa, demonionakapasa wali phiru jan sinttʼasirinakawa. Jupanakajj janiw jaqenakar munasipkiti, jan walinak utjañapatakisa jila partejj jupanakaw juchanïpjje. Amuytʼañataki, mä kutejja Diosat jan jitheqtiri Job chachan uywanakapampi, servirinakapampwa Supayajj jiwarayäna. Ukatjja yoqanakaparu ukat phuchanakaparuw kawkhantï manqʼasipkäna uka utamp alljjattayas jiwarayarakïna. Taqe ukanak qhepatsti, Supayajj “Job chacharojja jan qollkaña llejjti usumpiw usuntayäna. Ukatsti uka llejjti usojja kayuta, pʼeqekamaw katuntäna” (Job 1:7-19; 2:7).

Supayajj aka oraqen ‘tiempopan jukʼakïtap yatisiwa’ (Apocalipsis 12:12). Ukhamajj janiw jutïrin utjjaniti, ¡ukajj suma yatiyäwipuniwa!

“[Juma Jesusajj] wilamampiw Diosataki alapjjestajja, taqe casta jaqenakaru, kunayman parlani jaqenakaru jiskʼa markaru, jachʼa markaru. Reyinaka, sacerdotenakrakwa tukuyapjjestajja Diosatakejja. Taqe aka oraqpacharu apnaqapjjañajjataki” (Apocalipsis 5:9, 10).

Jiwjjasajja alajjpacharuw Jesusajj sarjjäna, yaqhep jaqenakajja alajjpachar sarapjjarakiniwa. Ukatwa Jesusajj jan jitheqtir apostolonakapar akham säna: “Mä utjäwi jumanakatak wakichiriw sarä. Sarasinsti, [...] wasitampiw jutä jumanakaru irpasjjañataki, kawkhankkätï nayajj jumanakajj ukkhankapjjañamatakiraki” sasa (Juan 14:2, 3).

 Khitinakatï alajjpachar sarapki ukanakajja, Jesusamp chikaw aka oraqer apnaqanipjjani ukat walja bendicionanakwa utjayapjjarakini. Jesusajj wali uñtʼat oracionapanjja Diosan Reinop mayipjjäta sasaw arkirinakapar yatichäna, jupasti akham sänwa: “Alajjpachankir nanakan Awkejja, sutimajj jachʼañchatäpan. [Reinomampisti] apnaqapjjeta. Munañamasti luratäpan akapachanjja, kunjämatï alajjpachana luratäki ukhama” sasa (Mateo 6:9, 10).

“[Naya apóstol Juanajj] mä jachʼa aru istʼarakta alajjpachat artʼasiniri: ‘¡Akajjay, Diosajj jichhajj jaqenak taypinwa jaki! [...] Diosajj taqe jachanakapwa nayranakapatjja picharani, janirakiw jiwañas, jachañas utjkjjaniti, warariñasa ni usuyasiñasa. Taqe kunanakatï nayrajj utjkän ukanakajj tukusjjewa’ sasa” (Apocalipsis 21:3, 4).

Uka visionanjja, Jesusampi ukat alajjpachar sarapki ukanakampejj Diosan Reinopan apnaqapkani ukwa Juanajj uñjäna. Jupanakajja Supayan akapachankir apnaqäwip tʼunjasinjja, mä suma paraisoruw aka Oraq tukuyapjjani. Jichhürunakan kunanakatï jaqenakar llakisiyki, tʼaqhesiykaraki ukanakas chhaqtayatäniwa. Janiw jiwañas utj-jjaniti.

Ukampis khitinakatï jiwapki ukhamarak alajjpachar jan sarapkani uka waranq waranqa jaqenakampejj ¿kunas pasani? Jupanakajja wasitat jaktanisinwa aka Oraqen mä suma Paraison jakasipjjani (Lucas 23:43).