Kunapachatï Jehová Diosajj jaqenakar lurkäna ukhajja, jan usuntasa jan jiwasa wiñay aka Oraqen jakasipjjañapwa munäna. Ukampis Adán sat nayrïr chachaw Diosar jan istʼkänti, ukhamatwa uka suma jakasiñ aptʼawayäna. Ukatwa wawanakapjamajj taqenis jiwaraktanjja (Romanos 5:8, 12; 6:23). Ukatwa Jehová Diosajj Yoqapar aka Oraqen jiwañapatak khitanïna, ukhamat kuntï Adanajj aptʼawayki uk kutsuyañapataki. (Juan 3:16 liytʼäta.)

Jesusan jiwatap laykuwa juchanakasajj perdonatäspa, ukhamarak aka Oraqen wiñay jakañas utjarakispa. Jan chuymankipstasa, jan jiwasa ukat jan usuntasa jakañajj kunja sumänisa ukjja Bibliaw amuytʼayistu. (Isaías 25:8; 33:24 ukat Apocalipsis 21:4, 5 liytʼäta.)

Jiwayañatak katuntapkäna uka arumajja, tantachtʼasisin jiwäwip amtapjjañapatakiw Jesusajj arkirinakapar ewjjtʼäna. Jesusan jiwäwipa sapa mara amtañajja, Jehová Diosasa Jesusasa qawqsa munasipjjestu uk lupʼiñatakiw yanaptʼistu. (Lucas 22:19, 20 ukat 1 Juan 4:9, 10 liytʼäta.)

Aka maranjja, abril 14, lunes arumaw Jesusan jiwäwipajj Inti jalantjjaru amtasiskani. Ukar sarañamatakiw invittʼapjjsma. Kawkhankanisa ukjja Jehová Diosan Qhanañchirinakapaw yatiyapjjätam. (Romanos 1:11, 12 liytʼäta.)