Uka arunakajj wali uñtʼatawa ukat wali aytatarakiwa. Biblian utjki uka arunakatjja, uka jiskʼa tʼaqapuniw “Diosajj qawqhsa jaqenakar munasi ukat qhespiyasiñ toqetsa sum qhanañchi” sasaw amuyasi. Ukatwa yaqhep markanakan uka arunakjja, kawkhantï pelot anatapki ukanakan jachʼa letreronakar qellqkatapjje ukat autonakaparusa, callenakarus ukhamarakiw qellqkatapjje.

Letreronakar qellqkatapki ukanakajja, ‘Diosajj wal munasitap laykuw wiñay jakañ churitani’ sasaw amuyasipjje. ¿Jumajj kunjams amuyarakta? ¿Diosajj munasiñap laykojj kun lurawayi sasmasa?

Alajjpachasa, Oraqesa, jaqenakasa ukat taqe kunatï utjki ukanakasa, Diosan luratawa sasaw waljanejj amuyapjje. Taqe kunatï aka Oraqen jakki ukanakajja, wali muspharkañapuniwa ukat yäparu lurtʼatarakiwa. Taqe ukanakajja, janiw ina chʼusatak uñstkaspati, jan ukasti wali chʼikhi ukat wali chʼamani maynin luratawa. Jila parte jaqenakajja, Diosaruw jakäwi churatapat wal yuspärapjje. Ukat jakaskakiñatakisa, kusisita jakasiñatakisa Diosakiw yanaptʼistaspa, kunattejj Jupakiw samansa, manqʼañanaksa, umsa kunatï jakañatak wakiski uksa churistaspa sasaw amuyapjje.

Cheqas Diosaruw taqe ukanakat yuspärtanjja, Jupaw jakäw churistu, Juparakiw jakayaskistu (Salmo 104:10-28; 145:15, 16; Hechos 4:24). Ukhamatwa Diosajj munasiñap  uñachtʼayistu. Apóstol Pablojj akham sänwa: “[Diosaw] taqe jiwasanakarojj jakañsa, samañsa, taqe kunanaksa churchistojja. Jiwasanakajj Diosanwa jakapjjtanjja, sarnaqapjjaraktanjja, utjapjjaraktansa” sasa (Hechos 17:25, 28).

Diosajj janiw jañchi toqet yanaptʼasaki munasiñap uñachtʼaykistuti. Jan ukasti, ajay toqetsa yanaptʼarakistuwa. Ukat Jupar yupaychañ munir lurtʼawayistu, ukat ukarjamaw yanaptʼarakistu (Mateo 5:3). Ukhamatwa familiap taypinkañasatakis yanaptʼistu. Jiwasatï Jupar istʼañäni ukhajja, ‘wawaparakïsnawa’ (Romanos 8:19-21).

Kunjamtï Juan 3:16 qellqatan siskejja, wawaparu mä arunjja, Jesusar aka Oraqer khitanisaw Diosajj munasiñap uñachtʼayistu. Jesusajj Awkipata ukat Diosapat yatichañataki ukat jiwasanak layku jiwañatakiw jutawayi. Ukampis kunatsa Jesusan jiwañapajj wakisïna ukat kunjamsa jiwatapajj Diosan munasiñap uñachtʼayistu uk waljanejj janiw amuyapkiti. Bibliajj uka toqet kamsisa uk jichhajj uñjañäni.

Taqeniw usunttansa, chuymankipsttansa ukat jiwaraktansa. Diosajj janiw ukhamäñap munkänti. Jupajj nayrïr chacha warmirojj aka Oraqen mä suma paraison wiñay jakasipjjañapatakiw luratayna. Ukampis jan jiwapjjañapatakejja, Diosaruw istʼapjjañapäna (Génesis 2:17). Ukampis Adán sat nayrïr chachajja, Dios contraw saytʼjjäna, ukhamatwa jupasa uka wawanakaparus jiwañar aptʼasiwayäna. Apóstol Pablojj akham sänwa: “Kunjämatejj mä sapa jaqe toqe juchajj aka oraqer mantankejja, ukat jiwajj uka jucha laykurak utjejja, ukhamarakiw jiwajj taqe jaqerojj katuntawayi juchachasitap layku” sasa (Romanos 5:12).

Diosajj “aski kankañar muniriwa” mä arunjja, kunatï cheqapäki uk muniriwa (Salmo 37:28). Adanajj yatkasinsa Juchar purtʼasiwaykchejja, Diosajj janiw ukhamak pantjasitap uñchʼukkänti, ukat janirakiw pantjasitap laykus jaqenakar wiñay tʼaqhesipjjañapataki ukat jiwapjjañapatak juchañchkänti. Antisas “jakañatjja jakañaraki[w]” churasiñapa siski ukarjam lurasajja, cheqaparu uñjirïtapwa uñachtʼayäna. Ukatjja istʼasir jaqenakajj wasitat wiñay jakañ katoqapjjañapatakiw mä suma suytʼäwi churarakïna (Éxodo 21:23). Ukhamajja, ¿kunjamatsa wiñay jakañ katoqsna? Cheqas mayniw jan juchani jakäwip loqtasiñapäna.

Adanan wawanakapatjja, juchanïpjjatap laykojj janiw khitis uk lurkaspänti, Jesusakiw uk luraspäna (Salmo 49:6-9). Kunattejj Adán chachjamarakiw Jesusajj jan juchani nasiwayäna. Niyakejjay jaqenakajj jucharu katuyatäpjjchïnjja, Jesusajj jakäwip jaqenak layku loqtasisajja, kunjamtï Adanamp Evampejj qalltan jakasipkäna ukham jakasipjjañapatakiw yanaptʼawayi (Romanos 3:23, 24; 6:23). Ukhamajj askinak jikjjatañatakejj ¿kun lurañas wakisispa?

Juan 3:16 qellqatajj akham saskakiwa: “Taqe khitinakatejj [Jesusar] iyawsapki ukanakajj jan chhaqañapataki, jan ukasti wiñay jakañanïñapataki” sasa. Ukhamajja, jiwasatï ‘wiñayataki jakasiñ’ munstanjja, Jesusaruw iyawsañasa ukat istʼañasa.

Inas maynejj akham amuychispa: “Uka qellqatajj janiw Jesusar istʼañat parlkiti, jan ukasti ‘Jesusar iyawsirinakajj’ wiñay jakañ katoqapjjani sasakiw qhanañchi” sasa. Cheqas Jesusar iyawsañasa, creyiñasa wali wakiskiriwa. Ukampis Bibliajj Jesusar iyawsañat parlki ukhajja, janiw aleq creyiñatak parlkiti. Janirakiw ‘Jesusaw qhespiyirijajj’ sañakïkisa, jan ukasti Jesusan yatichäwiparjam sarnaqañasataki chʼamachasiñasawa. Ukhamatakwa Diosampejj askit uñjatäsna. Jiwasatï ukarjam jan lurkañäni ukhajja, iyawsäwisajj inamayakïspawa. Bibliajj akham siwa: “Iyawsañajj jiwata[wa], kunapachatejj jan suma luräwinakampi uñachtʼayaski ukkhajja” sasa (Santiago 2:26). Ukhamasti, Jesusarutï iyawstanjja, kuntï jupajj yatichkäna ukarjam jakañatakiw chʼamachasiñasa.

Apóstol Pablojj akham sasaw qhanañcharakïna: “Criston munasiñaparakiw jariyapjjetu [...]. Cristojj taqenitakiw jiwi, khitinakatejj jakasipki ukanakajj jan jupanakpachataki jakjjapjjañapataki, jan ukasti Cristotaki jakjjapjjañapataki, jupanak layku jiwasina jaktki ukataki” sasa (2 Corintios 5:14, 15). Jesusan loqtasïwiparutï cheqapun yuspärstanjja, janiw munañasak thaqkañäniti, jan ukasti Jesusatakjam sarnaqañatakiw chʼamachasiñäni. Mä arunjja, kuntï Jesusajj lurañas munki ukwa taqe kunat sipansa nayrar uchañäni. Ukjja, sarnaqäwisana, amtäwisana ukat luräwinakasanwa qhan uñachtʼayañasa. Jesusar iyawsatasatjja, ¿kuna bendicionanaksa katoqañäni?

‘Khitinakatï Jesusan loqtasïwipar iyawsapki ukat yatichäwiparjam sarnaqapki ukanakajja, wiñayaw jakasipjjani janiw jiwapkaniti’ sasaw Juan 3:16 qellqatajj qhep qhepan qhanañcharaki. Ukampis khitinakarutï Diosajj munaski ukanakajj janiw taqpachanejj mä cheqanak jakapkaniti.

Mä jukʼa jaqenakajja, alajjpachanwa wiñayataki jakasipjjani. ¿Kunjamatsa uk yattanjja? Jesusajj nayamp chika apnaqapjjañamatakiw ‘mä utjäwi wakichir sarä’ sasaw Jesusajj arkirinakapar säna (Juan 14:2, 3; Filipenses 3:20, 21). Khitinakatï, alajjpachan jakañatak jaktapkani ukanakajja, “Diosampina Cristompina sacerdotepäpjjaniwa. Waranqa mararakiw jupampejj reinapjjani” (Apocalipsis 20:6).

Ukhamajj Jesusan arkirinakapatjja, mä jukʼanikiw uka bendición katoqapjjani. Jesusajj jupanakar akham sänwa: “Jan ajjsarapjjamti, jiskʼa tama ovejanakajja, ukampis alajjpach Awkimajj khuyapayasiñapana reinop churaña munapjjtam” sasa (Lucas 12:32). Uka ‘jiskʼa tamajj’ ¿qawqhanïpjjesa? Apocalipsis 14:1, 4 qellqatajj akham siwa: “Corderoruw uñjta Sión qollu patana sayaskiri. Jupamp chikasti pataka pusi tunka pusini waranqa jaqenakaw ukankaskarakïna, jupanakasti paranakaparojj Corderon sutipampi, ukhamarak Awkipan sutipampi qellqtʼatäpjjänwa [...]. Jaqenak taypita jupanakajj qhespiyatäpjjataynawa, Diosatakisa Corderotakisa nayrïri ofrendanakapäkaspas ukhama” sasa. Aka Oraqen millón millón jaqenak jakawayapki ukanakat 144.000 jaqenakajj mä ‘jiskʼa tamakiwa’. Jupanakasti reyinakäpjjaniwa sasaw Bibliajj saraki, ukhamasti ¿khitinakjjarus apnaqapjjani?

Jesusajj yaqha tamat parlkasajj akham sarakïnwa: “Utjarakituwa yaqha ovejanakajja, ukanakasti janiw aka uyunkkiti; ukanakarojj apaniñajjarakiwa, jupanakasti istʼapjjetaniwa, ukatsti mä sapa tamakirakïniwa, mä sapa awatirinikiraki” sasa (Juan 10:16). Jupanakajj Diosan Reinopat askinak katoqapjjarakiniwa. Uka “yaqha ovejanakajja” aka Oraqen wiñay jakasiñatak suytʼäwinïpjjewa, kunjamtï Adanampi Evampejj wiñay jakasipjjañapäkäna ukhama. ¿Kunjamatsa uk yattanjja?

 Aka Oraqejj mä suma Paraisoruw tukuyatäni sasajj walja kutiw Bibliajj qhanañchi. Ukajj cheqapuniti janicha uk yatiñatakejja, Bibliamat aka qellqatanak liytʼam: Salmo 37:9-11; 46:8, 9; 72:7, 8, 16; Isaías 35:5, 6; 65:21-23; Mateo 5:5; Juan 5:28, 29 ukat Apocalipsis 21:4. Uka qellqatanakanjja, guerrasa, manqʼat pistʼañasa, usunakasa ukat jiwañas tukusjjaniwa sasaw qhanañchi. Ukat suma jaqenakajja, utanak utachasipjjani, yapunakap yapuchasipjjani ukat wawanakapas suma jaqenak taypinwa jakasipjjarakini sasaw qhanañcharaki. * ¿Ukhaman jumajj jakasiñ munasmati? ¡Cheqas uka arunakajj phoqasipuniniwa!

Taqe ukanak yatjjatasajja, Jehová Diosajj taqe kun jiwas layku luratapwa amuytanjja. Jupaw jakäwsa, chʼikhi amuysa, kʼumar jakasiñsa ukat kunatï jakasiñatak munaski taqe ukanaksa churistu. Ukampis taqe ukanakat sipansa, munat Yoqapwa jiwasanak layku jiwañapataki aka Oraqer khitani. Ukhamat walja bendicionanak katoqañasataki, kunjamtï Juan 3:16 qellqatan yateqaniwayktan ukhama.

Kawkhantï guerrasa, manqʼat pistʼañasa, jiwañasa, jan utj-jjani ukan wiñaya jakasiñajj wali kusiskañapunïniwa. Uka bendicionanak katoqañäniti janicha ukajj sapa maynitäjjewa. Ukhamajj ak jisktʼasiñasawa: ¿Kunsa nayajj Diosatak lurasktjja? sasa.