Cheqas taqe cheqanakankir jaqenakan oracionanakap Diosajj istʼi (Salmo 145:18, 19). Ukat kunanakatï llakisiykistu uka toqenakat Jupar yatiyañasawa sasaw Bibliajj chʼamañchistu (Filipenses 4:6, 7). Ukampis janiw taqe oracionanakpun istʼkiti, sañäni: pʼeqer yatsusin kutin kutin pachpa arunakamp mayisiña. (Mateo 6:7 liytʼäta.)

Ukat Diosan leyinakaparjam jan sarnaqapki ukanakan mayisitanakapsa, janirakiw istʼkiti (Proverbios 28:9). Amuytʼañataki, Biblia qellqaskäna uka tiemponakan israelitanakajj jaqenakaruw jiwayapjjerïna, ukatwa Diosajj mayisitanakap jan istʼkänti. Ukhamasti, Diosamp istʼayasiñasatakejj kunanaktï Jupajj mayki ukanak phoqhañasawa. (Isaías 1:15 liytʼäta.)

Diosamp istʼayasiñatakejj iyawsäwinïñasawa (Santiago 1:5, 6). Jehová Diosan utjatapata ukat jiwasanakat llakisitapat janiw pächasiñasäkiti. Ukatakejj Bibliat yatjjatañasapuniwa, ukhamatwa iyäwsawisajj Biblian yatichäwinakaparjam chʼamañchtʼatäni. (Hebreos 11:1, 6 liytʼäta.)

Ukampis taqe chuyma ukat altʼat chuymampiw Diosar mayiñasaraki, kunjamtï Jesusajj lurkäna ukhama (Lucas 22:41, 42). Ukampis ‘ak lurarapita, uk lurarapita’ sasin Diosar saskañat sipansa, kuna mayitanakatï Jupamp istʼayasiñatak utjki ukanak sum amuyañatakiw chʼamachasiñasa. ¿Kunjamsa uk lursna? Biblia liyisa. Ukhamatwa mayisitanakasajj Diosan munañaparjamäni. (1 Juan 5:14 liytʼäta.)