1, 2. 1) ¿Kunjamsa Jehová Diosar munasiñasa? 2) ¿Kunjamsa Jesusajj Jehová Diosar taqe amuyupamp munasitap uñachtʼayäna?

 MOISESAN Leyiparjamajj ¿kawkïris jukʼamp importante mandamientojja? Jesusajj akham sasaw qhanañchäna: “Jehová Diosamarojj taqe chuymamampi, taqe almamampi, taqe amuyumampi, taqe chʼamamampi munasiñamawa” sasa (Mar. 12:30). Ukhamajj Jehová Diosar munasitasajj chuymasatwa mistuñapa, kuntï munktan, kunjamsa chuymasan jikjjatastan, qhawqha chʼamanïtansa ukanakampis jupar munasitaswa uñachtʼayañasa. Janiw ukakïkiti, amuyusampis jupar munasitaswa uñachtʼayañasaraki. Jehová Diosar munasitasaw jupjam amuyunïñatak chʼamañchistu. Cheqas janiw kunjamsa Diosajj amuyi uk phoqatpach amuyañ puedkañäniti, ukampis “kunjamtï Cristojj amuyki” uk yatjjatañaw yanaptʼistaspa, kuna laykutejj kunjamsa Awkipajj amuyi uk sum jupajj yatïna (Biblia de estudion 1 Cor. 2:16 liytʼasajja, “nosotros sí tenemos la mente de Cristo” siski ukwa notapan liytʼäta).

² Jesusajj taqe amuyupampiw Jehová Diosar munasïna, kun lurañapsa Awkipajj munäna uk sum Jesusajj yatïna. Uk lurañatakejj tʼaqesiñapäkchïnsa, phoqañwa amtäna. Niyakejjay jupajj Awkipar kusisiyañ munkchïnjja, kuntï jupar maykäna uk phoqañaw jupatak jukʼamp importantëna.

3. ¿Kunsa apóstol Pedrojj Jesusat yateqäna, ukat kun lurapjjañapatakis cristianonakar chʼamañchtʼäna? (1 Pedro 4:1).

 ³ Apóstol Pedrosa mayni apostolonakas Jesusamp chikaw sarnaqapjjerïna, ukhamatwa kunjamsa Jesusajj amuyi uk yateqapjjäna, ukajj jupanakatak mä privilegiönwa. Apóstol Pedrojj nayrïr cartap qellqkäna ukhajja, ukham amuyunïñatak wakichasipjjañapatakiw cristianonakar chʼamañchtʼäna (1 Pedro 4:1 liytʼäta). Pedrojj “wakichasipjjarakim” sasin qellqkäna ukhajja, kunjamtï militaranakajj parlapki ukarjamaw ukham säna. Ukhamajj cristianonakatï Jesusjam amuyañ yateqañäni ukhajja, jan wali amuyunakamp jan apnaqayasiñatakisa Supayan apnaqat akapachamp jan apnaqayasiñatakis wakichtʼatäñäniwa (2 Cor. 10:3-5; Efes. 6:12).

4. ¿Kunjamsa aka yatichäwejj Pedron ewjjtʼaparjam lurañatak yanaptʼistaspa?

⁴ Aka yatichäwinjja, Jesusan amuyupata ukat kunjamsa jupjam amuyunïsna ukwa yateqaskañäni. Ukat akanak yatjjatarakiñäni: 1) Jehová Diosjam amuyunïñ yateqaña, 2) humilde chuymanïña, 3) sum amuytʼasirïña.

JEHOVÁ DIOSJAM AMUYAÑ YATEQAPJJAÑÄNI

5. ¿Kunapachas Pedrojj Jehová Diosjam jan amuyatap uñachtʼayäna?

⁵ Aka toqet amuytʼañäni. Mä kutejja, Pedrojj janiw kunjamtï Jehová Diosajj amuyki ukham amuykänti. Jesusajj Jerusalén markar sarañapätapwa apostolonakapar yatiyäna. Ukanwa religión pʼeqtʼirinakajj katuntapjjañapäna, tʼaqesiyapjjañapäna, jiwayapjjañaparakïna (Mat. 16:21). Jesusajj Diosan markapar salvañatak jutañapäkäna uka Mesiasänwa, Pedrojj uk sum yatïna, ukhamajj janiw Jehová Diosajj Jesusan jiwañap munkaniti sasin inas amuyarakchïna (Mat. 16:16). Ukatwa Pedrojj Jesusar yaqha cheqar irpasin akham säna: “Tata, juma pachpat sinttʼasim, janipuniw jumajj ukhamar purtʼaskätati” sasa (Mat. 16:22). Ukham sasinjja, Pedrojj jan Jehová Diosjam amuyatapwa uñachtʼayäna, janirakiw kunjamtï Jesusajj amuyki ukham amuykänti.

6. ¿Kunjamsa Jesusajj Jehová Diosjam amuyatap uñachtʼayäna?

⁶ Jesusajj alajjpachankir Awkipjamaw amuyäna, ukatwa Pedror akham säna: “¡Saraqet Supaya! Nayajj Diosan munañap lurañajawa, jan jarkʼistati. Janiw jumajj kunjamtï Diosajj amuyki ukham amuyktati, jaqenakjamaw amuytajja” sasa (Mat. 16:23). Jesusajj ak sum yatïna: Jehová Diosan munañap lurañajj janiw jupatak faciläñapäkänti, jan ukasti tʼaqesiñapänwa, ukat jiwañaparakïnwa. Pedrojj Jesusat llakisisas ukham siskchïnjja, Jesusajj janiw ewjjtʼapar istʼkänti, ukhamatwa Pedrojj Jehová Diosjam amuyañ wakisitap yateqäna. ¡Jiwasajj ukat yateqaraksnawa!

7. ¿Kunjamsa Pedrojj Jehová Diosjam amuyañatak chʼamachasiskatap uñachtʼayäna? (Dibujo uñjjattʼäta).

⁷ Mä qhawqha tiempotjja, Pedrojj Jehová Diosjam amuyañatak chʼamachasiskatapwa uñachtʼayäna. Diosatakejj yaqha markanakankir jaqenakan markapankapjjañapajj horasäjjänwa, ukatwa Cornelior predicañapatak Pedror khitäna. Ukhamatwa Corneliojj jan judiöpkäna ukanakat nayrïr cristianöjjäna. Uka tiempon judionakajj janiw yaqha markankirinakamp chikachasipjjerïkänti, ukatwa Pedrotakejj Diosan mayitaparjam phoqañajj chʼamakïpachäna. Ukampis kunsa Jehová Diosajj jan judiöpkäna ukanakat amuyäna uk sum amuyjjäna ukhajja, Pedrojj janiw nayrjam amuyjjänti. Ukatwa Corneliojj visitayasiñatak Pedror mayïna ukhajj “iyaw sasin” saräna (Hech. 10:28, 29). Pedrojj Corneliompiru utapankirinakampir predicäna ukhajja,  jupanakajj bautisasipjjänwa (Hech. 10:21-23, 34, 35, 44-48).

8. ¿Kunjamsa Jehová Diosjam amuyatas uñachtʼaysna? (1 Pedro 3:8; notapampi).

⁸ Mä qhawqha maranakat akham sasaw Pedrojj cristianonakar ewjjtʼäna: “Taqe jumanakajj mä amuyunikïpjjam” sasa (1 Pedro 3:8 liytʼäta, notapampi). Taqpach Testigonakatï mä pachpa amuyunikïñ munstanjja, kunjamtï Jehová Diosajj amuyki ukham amuyañasawa, jupan amuyupajj Bibliankiwa. Ak amuytʼañäni, Jesusajj Diosan Reinop nayrar uchapjjañapatakiw arkirinakapar chʼamañchtʼäna (Mat. 6:33). Jesusan ewjjtʼaparjamajja, mä jilatatï precursorat serviña jan ukajj Diosar sapürunjam serviñ amtaspa ukhajj ¿kunjamtï Pedrojj Jesusar siskäna ukhamarakti jupar sañäni? Janiwa. Antisas uka suma amtar puritapat felicittʼañäniwa, yanaptʼañatakis jankʼakirakïñäniwa.

HUMILDE CHUYMANÏPJJAÑÄNI

9, 10. ¿Kunjamsa Jesusajj wali humilde chuymanïtap uñachtʼayäna?

⁹ Janïr jiwayatäkäna uka arumajja, Jesusajj Pedrorusa mayni apostolonakarus humilde chuymanïñwa yatichäna. Jesusajj janïr jiwkasajj discipulonakapampiw qhep qhepa kutin manqtʼasiñ munäna, ukatwa Pedrompiru Juanampirojj ukatak wakichapjjañapatak mayïna. Inas jupanakajj taqenin kayunakap jareqtʼasipjjañapatakejj mä fuentempi mä toallamp wakichapjjarakchïna. Ukampis ¿khitis humilde chuymanïsajj kayunakap jareqaspäna?

¹⁰ Mä esclavokiw kayunakap jareqaspäna. Ukampis uka arumajja, Jesusajj jan payachasisaw discipulonakapan kayunakap jareqäna. Kunjamsa Jesusajj patjja isinakap mä lador uchäna, mä toallamp cinturapar chinkatasïna, mä fuenter um warjjatäna, jupanakan kayunakaps jareqäna uk uñjasajj wal apostolonakajj musparapjjpachäna (Juan 13:4, 5). ¿Qhawqha tiempons kayunakap jareqpachäna uk amuyasmati? Jesusajj 12 apostolonakan kayunakapwa jareqäna, qhepat traicionkäna uka Judasan kayunakaps jareqarakïnwa. ¡Jesusajj wali humilde chuymanïnwa! Wali pacienciampiw jupanakar akham sasin qhanañchtʼarakïna: “¿Kuntï jumanakar lurapksma uk amuyapjjtati? Jumanakajj ‘Yatichiri’, ‘Tatitu’ sasaw nayar sapjjestajja. Uk sasinjja cheq parlasipktajja, nayajj ukätwa. Nayatï Tatitükasina, Yatichirïkasin jumanakar kayu jareqapjjsmajja, jumanakajj ukhamarakiw maynit maynikam kayunak jareqasipjjañama” sasa (Juan 13:12-14).

11. ¿Kunjamsa Pedrojj humilde chuymanïñ yateqatap uñachtʼayäna? (1 Pedro 5:5; dibujo uñjjattʼarakïta).

¹¹ Jesusan humilde chuymanïtapat Pedrojj yateqänwa. Jesusajj alajjpachar kuttʼjjäna uka qhepatjja, Pedrojj mä milagro toqew nasïwitpach mä cojo jaqer qolläna (Hech. 1:8, 9; 3:2, 6-8). Uk uñjasasti walja jaqenakaw Pedror jakʼachasipjjarakïna (Hech. 3:11). ¿Kunsa Pedrojj luräna? Niyakejjay judionak taypin yäqatäñajj wali importantëchïnjja, ¿Pedrojj jachʼañchayasiñti munarakpachäna? Janiw ukhamäkänti. Pedrojj wali humilde chuymanïnwa, ukatwa Jehová Diosampir Jesusampir jachʼañchañatakejj akham säna: “Jumanakajj uñjapkta, uñtʼapkarakta uka jaqejja, Jesusan sutip taypi ukhamarak sutipar confiyapjjataj laykuw chʼaman tuku” sasa (Hech. 3:12-16). Tiempompejja, humilde chuymanïñajj kunja wakiskirisa ukwa Pedrojj cristianonakar qellqarakïna. Kuntï siskäna ukajja,  inas kunapachatï Jesusajj mä toallamp cinturapar chinkataskäna apostolonakapan kayunakap jareqkarakïna uk amtaychistu (1 Pedro 5:5 liytʼäta).

12. ¿Kunsa Pedrot yateqasisajj humilde chuymanïñatak lurañäni?

¹² Jiwasajj Pedrjamarakiw humilde chuymanïñ yateqsna. Ukatakejj ak amtañaw yanaptʼistaspa: janiw arunakasampikejj cheqpach humilde chuymanïtas uñachtʼayksnati, jan ukasti kuntï chuyma manqhasan amuyktan ukarjamaw uñachtʼaysna. Ukwa griego arut ‘humilde chuymani’ sasin traducitäki uka arojj 1 Pedro 5:5 texton qhanstayi. Mayninak layku mä kuns lurtan ukhajja, Jehová Diosampiru jaqe masisampir munasitasatwa uk lurtanjja, janiw mayninakamp jachʼañchayasiñ laykukejj uk lurktanti. Jiwasatï Jehová Diosarus jilat kullakanakarus kusisit chuymamp serviñäni, janirak khitis uk luratas uñjkani ukhajja, humilde chuymanïtaswa uñachtʼayañäni.

‘SUM AMUYTʼASIRÏÑASAWA’

13. ¿‘Sum amuytʼasirïñajj’ kamsañs muni?

¹³ ¿Kunjamsa ‘sum amuytʼasirïtas’ uñachtʼaysna? (1 Ped. 4:7). Amtanakasajj kunjamtï Jehová Diosajj amuyki ukarjamäñapawa.  Janirakiw ak armañasäkiti: taqe kunat sipans Jehová Diosamp sum apasitasaw jukʼamp importantejja, kuntï jiwasat amuyañasäki ukakwa amuyarakiñäni, janiw taqe kuns yatksna ukham amuykañäniti. Jehová Diosar confiyataswa uñachtʼayañäni, ukatakejj sapa kutiw humilde chuymamp orasiñasaraki. a

14. ¿Kunapachas Pedrojj Jehová Diosar jan confiyatap uñachtʼayäna?

¹⁴ Jiwañapäkäna uka arumajja, Jesusajj akham sasaw discipulonakapar säna: “Aka arumajja, taqpachaniw jumanakajj nayar jaytjapjjetäta” sasa. Ukampis Pedrojj jupar confiyasisajj akham sänwa: “Taqenis jumar jaytjapkchïtamjja, ¡janipuniw kunäkipansa nayajj jaytjkämati!” sasa (Mat. 26:31, 33, 41). Uka arumasti Jesusajj yaqhep discipulonakaparojj akham sasaw ewjjtʼarakïna: “Amuyasipjjapunim, oracionsa jan jaytas lurasipkakim” sasa. Pedrotï uka ewjjtʼaparjam luraspäna ukhajja, jan ajjsarasaw Jesusan discipulopätap qhanañchaspäna, ukampis Pedrojj Jesusar jan uñtʼiriw tuküna, ¡uk luratapat walpun chuym usuyasïna! (Mat. 26:69-75).

15. Janïr jiwayatäkäna uka arumajj ¿kunas Jesusarojj suma amuytʼasirïñatak yanaptʼäna?

¹⁵ Jesusajj taqe chuymaw Jehová Diosar  confiyatap uñachtʼayäna, jupajj perfecto jaqëkchïnsa, janïr jiwayatäkäna uka arumajj kutin kutiniw orasïna, ukaw jan ajjsaras Awkipan munañap lurañatak yanaptʼäna (Mat. 26:39, 42, 44; Juan 18:4, 5). Kunjamsa Jesusajj kutin kutin orasïna uk uñjañajj Pedrotak jan armkañäpachänwa.

16. ¿Kunjamsa Pedrojj sum amuytʼasirëjjatap uñachtʼayäna? (1 Pedro 4:7).

¹⁶ Pedrojj orasisaw Jehová Diosar confiyatap uñachtʼayäna. Jesusajj jiwatat jaktanjjäna uka qhepatjja, Pedrorus mayni apostolonakarus predicapjjañamatakejj espíritu santo katoqapjjäta sasaw säna. Ukampis ukatakejj Jerusalén markanwa suyapjjañapäna (Luc. 24:49; Hech. 1:4, 5). ¿Kunsa Pedrojj suyañkamajj luräna? Jupanakas mayni cristianonakas “walja kuti[w] oración lurapjjäna” sasaw Bibliajj qhanañchi (Hech. 1:13, 14). Qhepat nayrïr cartap qellqkäna ukhajja, cristianonakarojj sum amuytʼasirïpjjañapataki oración luras Jehová Diosar confiyapjjañapatakiw chʼamañchtʼäna (1 Pedro 4:7 liytʼäta). Pedrojj Jehová Diosar confiyañwa yateqäna, jilat kullakanakar yanaptʼañatakisa chʼamañchtʼañatakis wakichtʼatäjjarakïnwa (Gál. 2:9).

17. Mä kuns sum lurtʼañ yatkchiñäni ukhas ¿kunsa lurañasa? (Foto uñjjattʼarakïta).

¹⁷ Sum amuytʼasirïñatakejj Jehová Diosaruw kutin kutin orasiñasa, mä kun lurañajj jiwasatak facilakjamäkchini ukhasa, Jehová Diosarojj yanaptʼap mayiñasapuniwa. Jukʼampis mä wakiskir amtar puriñasäki ukhaw yanaptʼap mayiñasa, kuna laykutejj jupaw kunas jiwasatak jukʼamp walïspa uk yati, janiw ukat payachasktanti.

18. ¿Kunsa Pedrot yateqasisajj lursna?

¹⁸ Jehová Diosat yateqasisajj jupjam chuymanirakïsnawa, jiwasar ukham lurtʼatapat walpun yuspärtanjja (Gén. 1:26). Pantjasir jaqjamajj janiw jupjamäñpun puedkañäniti (Is. 55:9). Ukampis Pedrjamarakiw jiwasajj kunjamtï Jehová Diosajj amuyki ukham amuyañsa, humilde chuymanïñsa, sum amuytʼasirïñs yateqsna.